1Disi na san MASRA taigi Yona, a manpikin fu Amitai: 2“Meki yusrefi klari fu go na a bigi foto Nineve, fu krutu den sma fu a foto. Bika Mi no man si a ogri moro di den e du.” 3Ma Yona ben meki ensrefi klari fu lowe gi MASRA go na Tarsis. So a go na Yafo, pe a feni wan sipi di ben o go na Tarsis. A pai a moni di a ben mus pai fu go na Tarsis, dan a go ini a sipi, fu lowe gi MASRA.
4Ne MASRA meki wan tranga winti bigin wai tapu a se. A watra bigin seki so hebi taki a sipi ben e suku fu broko. 5Den sipiman ben e frede, taki iniwan fu den bigin begi a gado fu en. Den bigin fringi den lai fu a sipi go ini a se, fu a sipi ben kan kon moro lekti. Ma Yona, di ben saka go na ondrosei ini a sipi go didon, ben fadon ini wan dipi sribi. 6Dan a kapten fu a sipi saka go na Yona. A taigi en taki: “Fa yu kan sribi so! Opo, dan yu e begi a Gado fu yu. Kande a Gado fu yu kan sari wi, fu wi no dede.” 7Ma a pisten dati den sipiman taigi makandra taki: “Kon meki wi fringi a lot. Dan wi sa kon sabi suma meki a nowtu disi miti wi.” Den fringi a lot, dan a lot sori taki na Yona. 8Dan den taigi Yona taki: “Taigi wi, suma fowtu na en meki a nowtu disi miti wi? San yu e du tapu a sipi disi? Fu pe yu kmoto? Fu sortu kondre yu kmoto? Fu sortu folku yu de?” 9Ne Yona piki den taki: “Mi na wan Hebrewman. Mi e lespeki MASRA, a Gado fu heimel, di meki a se nanga a drei gron.” 10Di Yona taki dati den man bigin frede srefsrefi. Den aksi en taki: “Fa yu ben kan du dati?” Bika den man ben kon sabi taki na lowe Yona ben e lowe gwe gi MASRA, fu di a ben meki den kon ferstan dati. 11Dan den aksi en taki: “San un mus du nanga yu fu a watra kan tapu fu rigeri so?” Den taki so bika a se ben e seki moro nanga moro. 12Ne Yona piki den taki: “Un opo mi trowe na se, dan a se sa tapu fu rigeri. Bika mi sabi taki na mi meki wan fowtu. Fu dat'ede a hebi seki watra disi teki unu.” 13Den man ben du ala muiti fu pari a sipi go baka na syoro, ma den no ben man doro, fu di a se ben e rigeri moro nanga moro. 14Ne den man begi MASRA taki: “Tye, MASRA, no teki wi libi te a man disi dede. No si wi leki kiriman efu a man disi no du noti, bika Yu, MASRA, du san Yu ben wani.” 15Baka dati den man teki Yona fringi go ini a se, dan a se kon tiri baka. 16Dan den man kisi wan dipi lespeki gi MASRA. Den srakti wan meti leki ofrandi gi MASRA èn den pramisi En wantu sani. 17Dan MASRA sorgu taki wan bigi fisi swari Yona. Dri dei nanga dri neti Yona tan ini a fisi bere.
Yona 2
1Dan Yona bigin begi MASRA, a Gado fu en, ini a fisi bere.
2A taki:
“Mi kari MASRA na ini mi nowtu
èn A piki mi.
Mi bari kmoto fu dedekondre
èn Yu yere mi sten.
3Yu ben trowe mi go ini a dipi,
na ini a moro dipi pisi fu a se.
Watra ben tapu mi fu ala sei,
bigi skwala ben e psa abra mi ede.
4Mi ben prakseri taki:
Yu no wani si mi moro,
noiti moro mi o si Yu santa tempel.
5Watra ben e tapu mi,
mi ben e swari watra kba.
Mi ben e sungu e gwe.
A wiwiri di e gro ini a se
ben lontu mi ede.
6Mi sungu go te na gron
pe den bergi e bigin,
na a presi di sroto den greni fu en
fu têgo na mi baka.
Ne Yu, MASRA, mi Gado,
hari mi libilibi puru baka ini a dipi.
7Di mi firi taki mi ben o dede,
mi prakseri MASRA,
mi begi èn Yu yere mi begi
ini Yu santa tempel.
8Den sma di e dini tra gado,
di no man du noti,
e drai den baka gi A Wan,
di de fu fertrow.
9Ma mi sa prijse Yu
èn tyari ofrandi gi Yu
mi sa du san mi ben pramisi Yu
bika na MASRA wawan e ferlusu.”
10Ne MASRA komanderi a fisi, dan a fisi spiti Yona baka na syoro.
Yona 3
Den sma fu Nineve e drai den libi
1Disi na san MASRA taigi Yona, di A taki fu a di fu tu leisi nanga en: 2“Meki yusrefi klari fu go na a bigi foto Nineve. Mi o taigi yu san yu mus taki fu krutu den sma fu a foto.” 3So Yona meki ensrefi klari dan a go na Nineve, leki fa MASRA ben taigi en fu du.
Nineve ben de wan bigi foto. Dri dei ben de fanowdu fu waka psa ini a foto. 4Dan Yona bigin waka ini a foto. A waka wan dei fara go ini a foto, fosi a bigin taigi den sma taki: “Ete fotenti dei dan not'noti fu Nineve o tan abra.” 5Dan den sma fu Nineve bribi a boskopu fu Gado. Den teki a besroiti fu faste èn bigiwan nanga pikinwan weri rowkrosi. 6Di a kownu fu Nineve kisi a boskopu fu yere, a opo fu en kownusturu, a puru a tapuseikrosi di a e weri leki kownu, a weri wan rowkrosi dan a go sidon ini asisi fu sori taki a e sari. 7Dan a kownu meki den bari a boskopu disi ini Nineve: “Disi na san kownu nanga den bigiman fu a kondre komanderi: no wan libisma sa nyan noso dringi wan sani. No wan meti, kaw noso skapu, sa nyan grasi noso dringi watra tu. 8Libisma nanga meti sa weri rowkrosi. Den mus begi Gado trangatranga, den mus drai den baka gi a takru fasi fa den ben e libi nanga den ogri sani di den ben e du. 9Dan kande Gado sa kenki prakseri èn no strafu un moro. Kande a atibron fu En sa kowru, dan A meki un tan na libi.” 10Di Gado si san den du, fa den drai den baka gi a takru fasi fa den ben e libi, A kisi sari-ati taki A ben wani strafu den, èn A no du en moro.
Yona 4
1Ma di Yona si dati, a no ben bun na en srefsrefi èn a kisi atibron. 2So a taigi MASRA ini wan begi taki: “Tye, MASRA, na disi mi ben wan taigi Yu di mi ben de na oso ete? Fu a san disi ede mi ben lowe go na Tarsis. Bika mi sabi taki Yu na wan Gado di e sori En bun-ati, di abi sari-ati, langa pasensi, bigi lobi èn di e gi sma pardon fu a ogri di den du. 3Meki mi dede MASRA, bika a moro bun gi mi efu mi dede, prefu mi tan na libi.” 4Ne MASRA aksi en taki: “Taigi Mi efu yu abi leti fu kisi atibron.”
5Ma Yona ben kmoto ini a foto, dan a go sidon na a oostsei dorosei fu a foto. A ben meki wan kampu, dan a go sidon ini a kowrupe ondro a kampu fu a ben kan si san ben o psa nanga a foto. 6Dan MASRA Gado sorgu taki wan bon gro kon, di ben e sorgu taki wan kowrupe ben de tapu a ede fu Yona, fu Yona ben kan firi moro betre. Yona ben breiti srefsrefi nanga a bon. 7Ma a tamara fu en, di a dei e opo, Gado sorgu taki wan woron bigin nyan a bon, dan a bon bigin drei gwe. 8Fa a son opo, na so Gado sorgu taki wan faya winti bigin wai kmoto fu a oostsei. A son ben e bron Yona na en mindri ede, taki a ben e suku fu flaw. Ne Yona bigin winsi taki a ben dede. A taki: “A moro bun efu mi dede, prefu mi tan na libi.” 9Dan Gado aksi Yona taki: “Na bron yu ati e bron fu a sani di psa nanga a bon?” Ne Yona piki taki: “Mi ati e bron srefsrefi èn mi abi leti fu dati.” 10Dan MASRA aksi en taki: “Yu no ben wani fu a bon drei gwe. Ma a no yu meki muiti fu a bon gro. A no yu ben prani en tu. Na wan bon di gro kon ini wan neti èn a dede gwe baka. 11Yu denki tak' Mi no e sari a bigi foto Nineve, di abi moro leki wan hondro nanga tutenti dusun libisma, di no sabi a difrenti srefi fu den leti anu nanga den kruktu anu nanga ala den meti fu den?”
1Baka dati mi si wan tra tranga engel saka kmopo fu heimel. A ben weri wan wolku leki dyakti, èn wan alenbo ben de na tapu en ede. En fesi ben e brenki leki a son, èn den futu fu en ben gersi postu di ben teki faya. 2Ini en anu a ben abi wan pikin lolo san ben opo. Dan a poti en leti futu tapu a se, nanga en kruktu futu tapu a syoro. 3Dan a bari nanga wan tranga sten leki di fu wan lew. Di a bari, den seibi dondru bari tu. 4Di den seibi dondru bari, mi ben wani skrifi san den taki. Ma mi yere wan sten taki kmopo fu heimel taki: “No skrifi san den seibi dondru taki. Meki a tan wan kibritori.”
5Dan a engel di mi si tnapu tapu a se nanga a syoro, opo en let'anu go na loktu. 6Dan a sweri na a Wan di e libi fu têgo èn ala ten, a Wan di meki heimel, grontapu, nanga a se, nanga ala sani san de na ini den. A sweri taki: “A ten fu wakti kba. 7Ma te a di fu seibi engel sa bro en tutu, dan a heri kibritori fu Gado sa kon na krin, soleki fa A ben taigi den profeiti di ben wroko gi En.”
8Dan a sten di mi ben yere taki kmopo fu heimel, bigin taki baka nanga mi. A taigi mi taki: “Go teki a lolo san opo ini a anu fu a engel di e tnapu tapu a se nanga a syoro.” 9So mi go na a engel, èn mi aksi en fu a gi mi a pikin lolo. A langa en gi mi, dan a taigi mi taki: “Teki en, dan yu nyan en. Ini yu bere a sa bita, ma ini yu mofo a sa switi leki oni.” 10Ne mi teki a pikin lolo di a engel langa gi mi, dan mi nyan en. Ini mi mofo a ben switi leki oni, ma di mi swari en, a ben bita ini mi bere. 11Dan mi kisi fu yere taki: “Taigi den sma fu den difrenti folku nanga kondre, den sma di e taki den difrenti tongo, nanga den kownu, ete wan leisi san Gado gi yu fu taki.”
