Dag 356 van 365- Micha 6-7 en Openbaring 13

₉Arki, MASRA e bari taigi a foto taki: na wan bun sani fu lespeki a nen fu MASRA. Arki a wipi nanga a sma di seni en kon. ₁₀Den oso fu den sma di no e dini Gado, abi gudu di den kisi tapu wan kruktu fasi nanga wan falsi wegi di Mi fluku. ₁₁Yu denki taki wan falsi wegi nanga wan saka nanga falsi wegiston bun ini Mi ai? ₁₂Den gudusma fu a foto furu nanga ogri. Den sma fu a foto e bedrigi. Soso lei e kmoto na ini den mofo. ₁₃Dat' meki Mi naki unu nanga siki. Fu un sondu ede Mi e broko unu. ₁₄Un o nyan, ma nyanyan no o sari unu. Angri o tan kiri unu. Un o tyari sani go kibri, ma a no o tan fu unu. Èn efu yu ben kibri wan sani, Mi o meki un lasi en te un e feti nanga tra folku. ₁₅Un o sai, ma un no o koti nyanyan. Un o masi oleif puru oli, ma unsrefi no o lobi a oli gi un skin. Un o masi droifi tron win, ma unsrefi no o dringi en. ₁₆Bika un e tan du den sani fu Omri nanga den sani di a famiri fu Akab ben e du. Un e tan du den srefi sani di den ben e du. Fu dat'ede Mi o meki taki sma o skreki te den si san psa nanga a foto fu unu. Den o teki unu fu a foto leki spot'popki. Tapu a fasi disi un o tyari a syen fu Mi folku.

₁Abi sari-ati nanga mi. Bika a gersi leki te sma e piki droifi, den laste droifi na den droifibon. Droifi no de moro fu nyan. No wan figa srefi de di mi angri so fu nyan. ₂Sma no de ini a kondre moro di e waka baka Gado, no wan no de di e du Gado wani. Den alamala e suku fu kiri wan trawan. Den alamala e luru densrefi. ₃Den sabi fa fu du ogri bun nanga den anu. Den fesiman no e du noti sondro fu moni, den krutubakra e meki sma pai den fu koti krutu. Den heihei wan e taki san bun gi den èn so den e seti den sani nanga makandra. ₄A moro bun wan na den mindri gersi wan bon nanga maka. A wan fu den di yu ben kan fertrow ete gersi wan heri busi nanga makamakabon. A dei doro fu Gado strafu unu, leki fa den waktiman fu unu ben taki. Dan un o de ini bigi bruya. ₅No fertrow yu eigi kondreman. No bow tapu yu mati. Luku bun san yu e taki nanga a uma di didon ini yu anu. ₆Bika a manpikin no e lespeki en p'pa, a umapikin e kaka futu gi en m'ma. Den frow no e arki san a m'ma fu den masra e taki. Yu eigi ososma o de yu feyanti.

₇Ma mi sa tan hori ai na tapu MASRA. Mi sa tan wakti tapu a Gado di o ferlusu mi. Mi Gado sa yere mi.

₁Ne mi si wan bigi ogri meti opo kmopo ini a se. A ben abi seibi ede nanga tin tutu. Tapu iniwan fu den tutu a ben weri wan kroon, èn na tapu iniwan fu den ede wan nen ben skrifi san e afrontu Gado. ₂A meti san mi si ben gersi wan redi tigri. Den futu fu en ben abi langa srapu nangra leki di fu wan loiri, èn en mofo ben gersi a mofo fu wan lew. A bigi kaiman gi a krakti nanga a bigi makti di ensrefi ben abi, na a meti fu a rigeri leki kownu. ₃Wan fu den ede fu a meti kisi bigi mankeri. A gersi leki a ede ben o dede, ma a soro kon betre. Ala sma na grontapu ferwondru fu dati, èn den bigin waka na baka a meti. ₄Den anbegi a bigi kaiman fu di a ben gi a meti san kmopo ini a se makti. Den anbegi a meti tu taki: “No wan sma de leki a meti, èn no wan sma kan hori feti nanga en!” ₅Dan a meti kisi makti fu taki bigitaki èn fu afrontu Gado. Fotenti-na-tu mun langa a kisi a makti fu du den sani disi. ₆So a meti opo en mofo èn a afrontu Gado. A kosi a nen fu En, a santa tanpresi fu En, èn a kosi den wan di e libi ini heimel. ₇A meti ben kisi makti tu fu feti nanga den sma fu Gado, èn fu wini den. A kisi makti tapu den sma fu ala lo nanga folku, èn fu ibri tongo nanga kondre. ₈Ala sma na grontapu o anbegi a meti, boiti den sma di sensi bifo grontapu ben meki, den nen ben skrifi kba ini a buku fu libi fu a Lam di ben srakti.

₉Suma abi yesi, meki a yere! ₁₀Efu a de tak' yu mus go na straf'oso, dan na straf'oso yu o go. Efu a de tak' den o kiri yu nanga deigri, dan nanga deigri den o kiri yu. Dat' meki den sma fu Gado mus tan hori doro, èn den mus tan bribi.

₁₁Dan mi si wan tra meti opo kmopo ondro gron. A ben abi tu tutu leki wan pikin skapu, ma a ben taki leki wan bigi kaiman. ₁₂A meti disi wroko nanga ala a makti fu a fosi meti let' na en fesi. A sorgu taki den sma na grontapu mus anbegi a fosi meti di ben abi a soro san kon betre. ₁₃A meki den sma si bigi marki. A meki faya srefi kmopo na loktu kon na grontapu let' na den fesi. ₁₄Dan fu di a ben kisi makti fu du den marki na fesi a fosi meti, a kori den sma di e libi na grontapu nanga den sani di a du. A taigi den tak' den mus meki wan bigi popki di gersi a meti san no dede, awinsi a ben kisi bigi mankeri nanga wan deigri. ₁₅A kisi makti fu gi a bigi popki san gersi a tra meti libibro. Dat' meki a popki ben man taki, èn a sorgu taki den e kiri ala sma di no e anbegi en. ₁₆A sorgu tu tak' ala sma mus kisi wan marki na tapu den let'anu noso na tapu den fes'ede: pikinwan nanga bigiwan, guduman nanga pôtiman, den sma di de srafu nanga den fri sma. ₁₇Dan no wan sma kan bai noso seri wan sani efu a no abi a marki fu a nen fu a meti, noso a nomru fu en nen.

₁₈Gi a sani disi ferstan de fanowdu. Suma srapu, meki a puru a rai fu a nomru fu a meti. Bika a de a nomru fu wan libisma, èn a nomru na siksi hondro nanga siksitenti-na-siksi (666).