Dag 363 van 365- Zacharia 9-12 en Openbaring 20

₁A boskopu fu Gado. Disi na san MASRA taigi mi.

“A de na ini Hadrak èn a e tan na ini Damaskus. Bika a ai fu MASRA de na tapu ala sma leki fa a de na tapu ala den lo fu Israel. ₂Iya, a de na tapu Hamat tu di didon na sei den kondre disi nanga na tapu Tyrus nanga Sidon awinsi fa den disi denki taki den koni. ₃Tyrus bow wan tranga hei skotu lontu a foto. Den abi someni solfru leki santi nanga gowtu leki a tokotoko di didon na strati. ₄Ma arki, Masra sa teki a foto abra. A sa naki a gudu fu den trowe na ini se. A foto sa bron te na gron. ₅Den sma fu Askelon sa frede te den si dati. Den di fu Gasa o beifi. Ekron e lasi ala howpu. Dan a kownu fu Gasa no sa de fu feni moro, èn no wan sma sa de fu feni na ini Askelon. ₆A folku san o de na ini Asdod o de wan moksi sani fu ala sortu folku. Mi o broko a bigifasi fu den Filistijnsma. ₇Mi o hari a meti di abi brudu ete puru na ini den mofo nanga den tra groskin sani di den e nyan. Ma wantu sma fu a folku o tan na libi gi a Gado fu unu. Den o tron wan famiri na ini Yuda èn den sma fu Ekron sa de leki den Yebusitisma gi wi. ₈Mi sa hori wakti gi Mi kondre gi den legre di e go kon. No wan sma sa kon fu pina den bika Misrefi sa hori ai na den tapu.”

₁₁Mi sa poti den wan fu unu fri di de na srafu ete ini a peti sondro watra. Mi sa du disi fu di yu nanga Mi abi wan ferbontu di stampu nanga brudu. ₁₂Un srafu di ben abi howpu ete, un drai go baka na a tranga foto. Tide srefi Mi e taigi un taki: Mi sa blesi un tu tron so furu. ₁₃Mi sa span Yuda leki wan bo, Efraim sa de leki a peiri na en tapu. Mi sa opo den sma fu Sion leki wan deigri fu wan dyadya fetiman fu feti den sma fu Grikikondre.

₁₄Dan MASRA sa de fu si na loktu, tapusei fu En folku. A peiri fu En sa frei leki a faya di e koti na loktu. Dan Masra fu MASRA sa bro tapu a tutu. A sa hari kon leki wan tranga winti fu a zuidsei. ₁₅MASRA fu ala sani sa kibri den. Den o swari den feyanti fu den, den sa trapu den ston di a feyanti e fringi kon na den tapu. Den o dringi a brudu fu den feyanti leki win te den kon drungu. Den o dringi te den e lon abra leki wan beki, leki den uku fu wan altari. ₁₆A ten dati MASRA, a Gado fu den, sa ferlusu en folku, leki fa wan skapuman e du nanga den skapu fu en. Bika den de leki den diri ston na tapu wan kroon, di sa brenki na ini a kondre. ₁₇Fu tru, luku o moi a de! A win nanga a karu e meki yonkuman nanga yongu uma e gro kon bun.

₃Mi ati e bron tapu den skapuman. Mi o strafu den bokoboko. Ma MASRA fu ala sani e sorgu gi den skapu fu En, a folku fu Yuda. Den sa de leki a moi fet'asi fu En tapu san A e hari go feti. ₄Bika ini a folku disi a ukuston o kmoto, a pen di e hori a tenti tnapu, nanga a bo. Na ini a folku disi ala den fesiman e kmoto. ₅Den dyadya fetiman. Ini a feti den e trapu den feyanti fu den na ini a tokotoko tapu strati. Den e feti bika MASRA de nanga den. Den wan di sidon hei tapu den asi fu den, o lasi a feti.

₆Na so Mi o meki a folku fu Yuda kon tranga, na so Mi o ferlusu den bakapikin fu Yosef. Mi sa tyari den kon baka, fu di Mi abi sari-ati gi den. A sa de leki noiti Mi ben taigi den taki Mi no wani den moro. Bika Mi na MASRA, a Gado fu den. Mi sa arki den. ₇Dan Efraim sa de leki wan dyadya fetiman, den sa drungu fu prisiri. Den pikin fu den sa si dati. Densrefi sa prisiri tu. Den ati sa prisiri fu san MASRA du.

₈Mi sa froiti kari den dan Mi tyari den kon na wan. Bika na Mi e ferlusu den. Den sa kon so furu baka leki fa den ben de bifo. ₉Mi e panya den na mindri den tra folku Ma den sa prakseri Mi na ini den fara kondre pe den o de. Na so den o libi nanga den pikin fu den dan den o drai kon baka. ₁₀Iya, Mi sa puru den na ini a kondre Egipte, Mi sa puru den na ini Asur èn tyari den kon makandra. Mi o tyari den go na a kontren fu Gilead nanga Libanon. Ma a presi o pikin fu hori den. ₁₁Nanga frede den o psa ini a se, ma Mi sa naki den skwala. Den peti fu a Nijl-liba sa drei gwe. Na so a heimemre fu Asur sa broko, nanga a makti fu Egipte.

₁₂Mi MASRA sa meki den kon tranga. Den sa waka na ini a nen fu MASRA, na so MASRA taki.

₄Na so MASRA, mi Gado taki: “Sorgu gi den skapu fu Mi di den o srakti. ₅Den sma di bai den e srakti den sondro wan firi. Den sma di e seri den e taki: ‘Mi e taki MASRA tangi fu di mi kon gudu.’ Den skapuman no e sari den.” ₆Na so MASRA taki: Mi no sa sari den sma fu grontapu moro. Luku, Mi e gi den sma abra na makandra nanga ini anu fu den kownu. Den o meki a kondre tron wan sabana ma Mi no o ferlusu noti puru ini den anu. ₇Fu dat'ede mi ben e sorgu gi skapu di den o srakti. Den skapu di ben de fu den man di e seri skapu fu srakti. Dan mi teki tu tiki. A wan mi kari: Switi fasi, a trawan mi kari: Tyari kon na wan. Na so mi sorgu gi den skapu. ₈Ini wan mun mi puru dri skapuman na pasi. Mi no ben abi pasensi moro nanga den èn den no ben lobi mi srefsrefi tu. ₉Fu dat'ede mi taki: “Mi no sa sorgu moro langa gi unu. San o dede, kan dede. San o puru na pasi, kan puru na pasi. Den wan san tan abra, kan nyan densrefi.” ₁₀Ne mi teki a tiki di mi ben kari: Switifasi, dan mi naki en broko. Na so mi broko a ferbontu di mi ben meki nanga ala folku. ₁₁Na so mi broko a ferbontu a ten dati. Dan so den man di ben e luku san mi e du, den man di ben e seri den skapu, kon si taki disi ben de wan boskopu fu MASRA. ₁₂Dan mi taigi den taki: “Efu san mi du ben bun ini un ai, dan un gi mi a moni di mi mus kisi. Ma efu a no bun ini un ai dan un kan libi en.” Ne den wegi dritenti solfrumoni gi mi. ₁₃Ma MASRA taigi mi taki: “Tyari go pe den e faya solfru fu a kon safu. Na disi na a moni di den feni taki fiti mi.” So mi teki den dritenti solfru moni dan mi tyari en go fringi ini a oso fu MASRA, pe den e faya a solfru fu a kon safu. ₁₄Baka dati mi teki a tra tiki fu mi di mi ben e kari: Tyari kon na wan, dan mi broko en. Tapu a fasi dati mi broko a banti mindri Yuda nanga Israel, di den ben abi leki brada.

₁₅Dan MASRA taigi mi taki: “Weri den krosi ete wan leisi leki efu yu na wan skapuman di no sabi not' noti fu a wroko. ₁₆Bika arki, mi o poti wan skapuman ini a kondre. A no o broko en ede nanga a skapu di e go lasi. A no o go suku den wan di lasi pasi. A no o dresi den skapu tu di kisi mankeri noso sorgu gi den bun wan di de ete. Kwet' kweti! A o nyan a meti fu den moro fatu skapu. A o hari den futu fu den srefi puru.

₁A boskopu fu Gado. Disi na san MASRA taigi mi fu Israel.

Na so MASRA taigi mi, A Wan di span a heimel na loktu, di poti grontapu tnapu tapu en fundamenti èn di meki a yeye fu libisma poti na ini libisma. ₂“Luku, Mi sa meki Yerusalem de leki wan kan di e drungu ala tra folku lontu den. Efu den lontu Yerusalem fu feti nanga en, den o teki Yuda abra tu. ₃A dei dati Mi o meki Yerusalem de leki wan hebi ston di ala den tra kondre mus opo. Ma ala sma di opo en o kisi hebi mankeri. Ala folku fu grontapu o kon makandra drape fu feti nanga en. ₄Ma MASRA taki tak' a dei dati A sa meki ala den asi bruya. A sa meki den man di e tyari den asi lasi den ferstan. Mi sa hori ai na tapu den sma fu Yuda, ma Mi sa meki ala den asi fu den tra folku kon breni. ₅Dan den edeman fu Yuda sa taki ini densrefi taki: ‘A krakti fu wi na den sma fu Yerusalem, tangi fu MASRA fu ala sani, a Gado fu den.’ ₆A dei dat Mi sa meki den edeman fu Yuda de leki wan frambo mindri udu, leki wan faya mindri a drei grasi. Den o bron ala den tra folku na let'sei nanga kruktusei fu den. Yerusalem sa tan leti pe a de.

₇MASRA sa gi den sma fu Yuda a wini fosi. A sa du dati fu a famiri fu David nanga den sma fu Yerusalem no kisi wan moro bigi nen moro di fu Yuda. ₈A pisten dati MASRA sa kibri den sma fu Yerusalem fu noti no miti den. A swakiwan na den mindri sa tranga a dei dati leki David. A famiri fu David sa tiri den leki Gado, neleki efu na a Engel fu MASRA srefi e go na den fesi.

₉A pisten dati Mi sa kiri ala folku puru na pasi di wan hari kon feti nanga Yerusalem. ₁₀Mi sa meki a Yeye fu sari-ati nanga a Yeye fu begi kon tapu a famiri fu David, nanga den sma fu Yerusalem. Den sa si a wan di den ben dyuku, dan den sa krei leki fa sma e krei te den lasi den wan enkri pikin. Den sa bari leki fa sma e bari di lasi den fosi pikin. ₁₁A pisten dati den sma fu Yerusalem sa bari krei, leki fa den e bari krei gi Hadadrimon na ini a Megidodal. ₁₂A heri kondre sa bari krei. Ibri lo na en eigi presi. A lo fu David na en eigi presi nanga den uma fu den na den eigi presi. A lo fu Natan na en eigi presi nanga den uma fu den na den eigi presi. ₁₃A lo fu Lefi na en eigi presi nanga den uma fu den na den eigi presi. A lo fu Simi na en eigi presi nanga den uma fu den na den eigi presi. ₁₄Ala den tra lo, ala den lo na den eigi presi nanga den uma fu den na den eigi presi.

₁Baka dati mi si wan engel e saka kmopo fu heimel. Ini en anu a ben abi wan bigi keti nanga a sroto fu a olo san no abi gron. ₂Dan a grabu a bigi kaiman, san de a sneki san ben de sensi fosten. Un sabi en leki didibri, leki Satan. Dan a engel tai en fu wan dusun yari. ₃A fringi en go ini a olo san no abi gron èn a sroto a olo. Dan a poti wan marki na en tapu taki a no mus opo. Nanga dati, didibri no ben o man kori den folku moro, solanga a dusun yari no ben psa. Baka dati den mus lusu en fu wan syatu pisten. ₄Baka dati mi si kownusturu. Den wan di ben kisi a makti fu krutu, ben sidon na tapu den kownusturu disi. Owktu mi si den sili fu den sma di trawan ben koti den ede puru, fu di den ben kotoigi fu Yesus èn fu di den ben panya a wortu fu Gado. Den sma disi no ben anbegi a meti noso a bigi popki fu en, èn den no ben teki a marki fu en na den fes'ede noso na tapu den anu. Den ben kon baka na libi èn den rigeri makandra nanga Kristus dusun yari langa. ₅Den tra sma di ben dede no ben kon baka na libi, solanga den dusun yari no ben psa. Disi na a fosi opo baka na dede.

₆Den sma di abi prati ini a fosi opo baka na dede, na blesi sma, bika den na den sma fu Gado. Den no o dede fu a di fu tu leisi. Ma den sa de priester fu Gado nanga fu Kristus. Dusun yari langa den sa rigeri makandra nanga En.

₇Baka te den dusun yari psa, Gado o meki den lusu Satan puru na strafu. ₈Dan a o kon fu kori den folku na heri grontapu, fu kon makandra fu go feti. Den folku disi den e kari Gog nanga Magog, èn den lai leki pesi. ₉Dan den kmopo na ala sei fu grontapu, èn den lontu a foto san Gado lobi, a foto pe den sma fu Gado e libi. Ma faya fadon kmopo fu heimel èn a kiri den. ₁₀Dan den fringi didibri di ben kori den sma dati, go na ini a swampu di abi soso faya èn san e bron nanga kroiti. A meti nanga a falsi profeiti de ini a swampu dati tu. Na drape den o pina dei nanga neti, fu têgo èn ala ten.

₁₁Baka dati mi si wan bigi weti kownusturu nanga a Wan di sidon na en tapu. Heimel nanga grontapu lon gwe gi En, èn den no ben de fu si noiti moro. ₁₂Dan mi si den dedesma tu, pikinwan nanga bigiwan. Den ben tnapu na fesi a kownusturu. Dan mi si taki buku opo. Den opo wan tra buku tu, a buku fu libi. Dan soleki fa den sani ben skrifi ini den buku san den dedesma disi ben du, na so den kisi strafu. ₁₃A se lusu den sma di ben dede na ini en, èn Dede nanga Dedekondre ben lusu den dede di ben de na ini den. Den alamala kisi strafu na fa den wroko fu den ben de. ₁₄Dan den fringi Dede nanga Dedekondre go ini a swampu di abi soso faya. A swampu disi di abi soso faya, na a di fu tu dede. ₁₅A sma di nen no ben skrifi ini a buku fu libi, den ben fringi go ini a swampu di abi soso faya.