Dag 365 van 365- Maleachi 1-4 en Openbaring 22

₁Wan boskopu fu Gado. Disi na san MASRA taigi Maleaki taki a mus taigi Israel.

₂MASRA taki: Mi lobi unu. Ma unu piki taki: “Tapu sortu fasi Yu sori unu taki Yu lobi wi?” Ne MASRA taki: Esau nanga Yakob ben de brada, ma Mi ben lobi Yakob. ₃Esau Mi no ben lobi. Mi meki den bergi ini a kondre fu en tron sabana. A kondre fu en Mi gi na den krabudagu di e libi na ini den sabana. ₄Efu Edom taki: “Den foto fu wi broko, ma wi sa bow den sani baka di broko didon na gron,” dan MASRA fu ala sani e taki: Meki den bow. Mi sa naki en broko baka. Den o kari en: “A kondre gi san Gado drai En baka.” Den o kari en tu: “A folku tapu san a atibron fu Gado de fu têgo.” ₅Te un si dati nanga un eigi ai, un o taki: “A bigi nen fu MASRA de fu yere dorosei fu Israel srefi. ”

₆Wan manpikin e lespeki en p'pa èn wan knekti e lespeki en basi. Ma unu, priester, di no e lespeki Mi, Mi e aksi taki: Efu Mi na un p'pa, pe a lespeki de dan di un mus sori Mi? Efu Mi na un basi, dan pe a lespeki de dan di un mus abi gi Mi, MASRA fu ala sani taki? Dan un e aksi taki: “Tapu sortu fasi wi no lespeki Yu?” ₇Un e tyari nyanyan di no warti srefsrefi leki ofrandi tapu Mi altari. Dan un e aksi taki: “Tapu sortu fasi wi sori taki Yu no warti?” Un e du dati fu di un e si a tafra fu MASRA leki noti. ₈Bika un e du leki a no abi trobi efu un tyari wan breni meti kon leki ofrandi. Un e du leki a no abi trobi efu un tyari wan malengri meti noso wan siki meti kon. Un tyari sowan meti leki kado go gi a granman, dan un mus luku efu a o breiti nanga en, èn efu a o abi prisiri nanga unu. Na dati MASRA fu ala sani taki. ₉Un go so doro fu pruberi fu wini a ati fu Gado, fu A sori unu En bun-ati. Bika na den sani disi un e du, dan un e prakseri ete taki A abi prisiri nanga unu. Na dati MASRA fu ala sani taki. ₁₀A ben o bun efu wan fu unu ben tapu den doro. Dan un no ben abi fu kon meki faya fu soso tapu Mi altari. Mi no abi prisiri nanga unu, MASRA fu ala sani taki. Mi no wani den ofrandi di un e tyari gi Mi. ₁₁Bika ala folku, fu pe a son e opo go te na pe a e saka, e gi Mi grani. Ala presi den e bron wierook leki ofrandi gi Mi èn den e tyari ofrandi di warti. Bika ala folku e lespeki Mi. Na dati MASRA fu ala sani taki. ₁₂Ma unu e broko Mi saka, bika un e si a tafra fu MASRA leki noti èn un e tyari nyanyan kon na en tapu di no warti srefsrefi. ₁₃Dan un e taki ete taki: “A sani disi na wan hebi gi wi.” Un e langa un mofo gi a wroko di un mus du, MASRA fu ala sani taki. Un e tyari meti kon di un fufuru, malengri meti nanga siki meti, dan un wani taki tak' Mi mus teki den nanga prisiri te un tyari den kon leki ofrandi. Na dati MASRA taki. ₁₄Wan fluku sa de tapu a sma di bedrigi MASRA fu di a ben pramisi MASRA wan meti di a kweki, wan manwan di no e mankeri noti, ma dan a tyari wan meti kon di no fiti fu tyari leki ofrandi. Bika Mi na wan bigi Kownu, MASRA fu ala sani taki, èn ala folku e lespeki Mi.

₁“Dat' meki na disi Mi e taigi unu, priester: ₂Efu unu no wani arki, efu un no prakseri bun san Mi e taki, fu un lespeki Mi, dan Mi sa fluku unu èn Mi sa fluku ala sani nanga san Mi ben blesi unu, MASRA fu ala sani taki. Mi sa fluku un trutru bika un no teki den sani na ati. ₃Luku, Mi sa strafu den bakapikin fu unu. Mi sa teki a doti fu den meti di den tyari leki ofrandi, dan Mi fringi en gi unu na ini un fesi. Iya, den o teki un makandra nanga a doti go trowe tapu a dot'ipi. ₄Dan un sa ferstan taki na Mi meki disi psa, fu a ferbontu fu Mi nanga Lefi no broko. Na disi MASRA fu ala sani taki. ₅A ferbontu di Mi ben meki nanga en ben o tyari libi nanga freide gi en. Mi gi en disi fu a ben kan lespeki Mi èn nanga wan dipi lespeki a dini Mi. ₆Yu ben man fertrow den sani fu a wèt di a ben e leri den sma. No wan sani di no bun ben e kmoto ini en mofo. A ben e libi wan bun fasi nanga Mi èn nanga trawan. A meki furu sma drai den baka gi ogridu. ₇Bika furu sabi de ini a mofo fu a priester. Fu en mofo den sma wan leri a wèt, bika en na wan boskopuman fu MASRA fu ala sani. ₈Ma unu dati kmoto fu a pasi di Mi sori unu. Den sani fu a wèt di un leri den sma meki furu sma du sani di den no ben mus du. Un broko a ferbontu fu Mi nanga Lefi, MASRA fu ala sani taki. ₉Fu dat'ede Mi o meki taki a heri folku no e lespeki unu èn taki den e si unu fu noti. Bika un no e libi leki fa Mi wani èn un e si a wèt leki noti.”

₁₀Wi alamala abi a srefi P'pa. Na a srefi Gado meki wi alamala. Fu sanede meki wi e bedrigi makandra èn broko a ferbontu di Gado meki nanga den afo fu wi. ₁₁Yuda no ben dini Gado wawan. Ini Israel nanga Yerusalem den sma du wan bigi ogri. Bika Yuda pori a santa sani fu MASRA, a sani di A lobi, fu go trow nanga wan uma di e dini wan tra gado. ₁₂Mi e winsi tak' MASRA sa yagi a man di du a sani disi puru na mindri den Israelitisma, awinsi a e tyari ofrandi gi MASRA fu ala sani. ₁₃Moro fara un e nati a altari fu MASRA nanga watra-ai. Un e krei èn un e dyeme fu di A no e luku den ofrandi fu un moro. A no e teki den fu un anu tu fu di a no e prisiri nanga den. ₁₄Dan un e aksi unsrefi taki: Fu sanede dan? Disi e psa fu di MASRA ben de ketoigi fu a ferbontu di yu ben meki nanga yu uma di yu ben yongu. Ma yu broko a ferbontu dati aladi en na yu uma, a uma nanga san yu ben meki a ferbontu. ₁₅No wan sma di abi pikinso ferstan nomo e du sowan sani. Bika ala sma wani abi pikin nanga bakapikin di Gado lobi. Dat' meki yu mus luku yusrefi bun èn yu mus sorgu taki yu no broko a ferbontu di yu ben meki nanga yu uma di yu ben yongu. ₁₆Bika Mi no lobi en srefsrefi te sma e broko trow, MASRA, a Gado fu Israel, e taki. Efu yu du dati, yu e tyari ogri kon na yu tapu. Na dati MASRA fu ala sani taki. Fu dat'ede un mus luku bun taki un no broko trow.

₁₇Un e weri MASRA nanga den sani di un e taki. Dan un e aksi taki: “Nanga san wi e weri En?” Un e weri En ede fu di un e taki tak' ala sma di e du ogri e du san bun ini MASRA ai èn A lobi den sma disi. Ma efu dati de so dan pe a Gado de di e krutu nanga leti?

₆Fu tru, Mi, MASRA, no kenki. Ma unu, bakapikin fu Yakob, no kenki tu. ₇Sensi a ten di den afo fu unu ben de na libi ete den no ben hori densrefi na den sani fu Mi, di den ben mus tan du. Un drai kon baka na Mi, dan Mi sa drai kon baka na unu. Na dati MASRA fu ala sani taki. Ma dan un e aksi taki: “San wi du so taki wi mus drai kon baka?” ₈Wan sma no kan fufuru sani fu Gado. Ma un e fufuru sani fu Mi. Dan un e aksi taki: “San wi e fufuru fu Yu?” Un e du dati fu di un e hori den tin prosenti na baka nanga den spesrutu ofrandi di den sma e tyari gi Mi. ₉Wan fluku de trutru na un tapu, bika na Mi un e fufuru. Unu, a heri folku. ₁₀Un tyari ala den tin prosenti go poti ini den maksin, fu nyanyan kan de ini Mi oso. Un du dati, MASRA fu ala sani taki, dan un sa si efu Mi no sa opo den fensre fu heimel dan Mi blesi un bogobogo. ₁₁Dan Mi sa bari den sprenka fu den no nyan a nyanyan fu un gron moro, fu den droifibon kan abi froktu, MASRA fu ala sani taki. ₁₂Ala folku sa taki fa Mi blesi unu, fu di a kondre fu unu na wan bun kondre, MASRA fu ala sani taki.

₁₃Un gi Mi bigitaki, MASRA taki. Dan un aksi taki: “San na den bigi taki di wi taki?” ₁₄Un taki tak': “A no abi no wan wini fu dini MASRA. Sortu bun a e tyari gi wi efu wi hori wisrefi na den komanderi fu En? Fu sanede wi mus sari fesi MASRA fu ala sani? ₁₅Fu dat'ede wi mus fu taki tak' a e go bun nanga den sma di abi heimemre. Bika a gersi leki ala sani e go bun nanga den sma di no e dini Gado. Efu den tesi Gado srefi noti no e psa nanga den.”

₁₆Na so den sma di e lespeki MASRA e taki nanga makandra. Ma MASRA yere. A arki bun. Leti na En fesi den skrifi den nen fu den sma di e lespeki MASRA èn di no e meki spotu nanga En nen. ₁₇Den sa de fu Mi tapu a dei di Mi poti, MASRA fu ala sani taki. Mi sa abi sari-ati nanga den leki fa wan p'pa e abi sari-ati nanga en manpikin di e du san a p'pa e taki. ₁₈Dan un sa si baka suma bun ini Gado ai nanga suma na den sma di no e dini Gado, suma e anbegi Gado nanga suma no e anbegi Gado.

₁Bika arki, a dei e kon, a e kon leki wan faya onfu. A dei dati ala den sma nanga heimemre nanga den wan di no wan dini Gado sa de leki drei grasi. Dan tapu a dei di e kon, den o bron gwe. No wan taki noso rutu fu den sa de fu si moro, MASRA fu ala sani taki. ₂Ma a son sa opo gi unu di e lespeki Mi, a son di o meki sma si taki un abi leti. A faya fu en sa dresi sma dan un sa kon na dorosei èn dyompo leki pikin skapu. ₃Un sa trapu den sma di no e dini Gado. Den sa de leki doti na ondro un futu tapu a dei di Mi poti, MASRA fu ala sani taki.

₄Un memre a wèt di Mi gi Mi knekti Moses tapu a Horeb-bergi gi heri Israel, den sani di un mus tan du nanga den sani na san un mus tan hori unsrefi. ₅Luku, Mi o seni a profeiti Elia kon, fosi a bigi dei fu MASRA doro, a dei di de fu frede. ₆A sa meki p'pa nanga m'ma kon bun baka nanga den pikin fu den èn a sa meki pikin kon bun baka nanga den p'pa nanga m'ma. Dan Mi no abi fu kon fu figi a kondre puru.

₁Baka dati a engel sori mi a liba di abi watra san e gi libi. A ben lon kmopo fu a kownusturu fu Gado nanga di fu a Lam, èn a ben brenki leki fa kristal e brenki. ₂A ben lon psa mindri a bigi strati fu a foto. Na ala tu sei fu a liba, yu ben abi bon san e gi libi. Twarfu leisi wan yari den bon disi ben gi froktu, ala mun wan leisi. Den wiwiri fu den ben de fu dresi den folku. ₃Noti san Gado fluku o de moro. A kownusturu fu Gado nanga di fu a Lam sa de ini a foto, èn den knekti fu En sa anbegi En. ₄Den sa si Gado ai na ai, èn En nen o skrifi na tapu den fes'ede. ₅Neti no o de moro, èn den no o abi a faya fu lampu noso a faya fu a son fanowdu moro, bika Masra Gado o de a faya fu den. Èn den o rigeri leki kownu fu têgo èn ala ten.

₆Dan a engel taigi mi taki: “Yu kan fertrow den sani san mi taki. Mi no e lei. Masra, a Gado di e tiri a yeye fu den profeiti, seni En engel fu sori den knekti fu En den sani san musu psa her'esi.”

₇“Luku, Mi e kon her'esi.” A sma di e hori ensrefi na a boskopu san Gado gi unu ini a buku disi, na wan blesi sma.

₈Na mi, Yohanes, ben yere èn si den sani disi. Di mi yere èn si den, mi fadon tapu mi kindi na a futusei fu a engel di sori mi den sani, fu anbegi en. ₉Ma a taigi mi taki: “No du! Mi na wan knekti neleki yu nanga den tra brada fu yu, den profeiti nanga den sma di e hori densrefi na den wortu fu a buku disi. Na Gado yu mus anbegi!” ₁₀Dan a taigi mi taki: “Yu no mus kibri a boskopu san Gado gi unu ini a buku disi, bika a ten de krosbei. ₁₁A sma di e du kruktu, meki a tan du kruktu, èn a sma di doti, meki a kon moro doti. A sma di e du bun, meki a tan du bun, èn a sma di santa, meki a kon moro santa.”

₁₂“Luku, Mi e kon her'esi, èn Mi e kon fu gi ala sma den paiman na a fasi fa den wroko fu den ben de. ₁₃Mi na a Alfa nanga a Omega, a Fosiwan nanga a Kriboiwan, a Bigin nanga a Kba.

₁₄Den sma di e wasi den krosi krin, na blesi sma. Den sa abi a leti fu nyan den froktu fu a bon san e gi libi, èn fu psa den doro go ini a foto. ₁₅Ma dorosei fu a foto yu abi den dagu: sobun den tofruman, den sma di e gi densrefi abra na takru lostu, den sma di e kiri trawan, den sma di e dini kruktu gado, nanga ala den sma di lobi fu lei.”

₁₆“Na mi, Yesus, seni Mi engel fu taigi unu den sani disi, fu un taigi den gemeente. Mi na a rutu nanga a bakapikin fu David. Mi na a mamanten-stari.”

₁₇A Yeye nanga a trowmisi e taki: “Kon!”

Ala sma di yere a sani disi mus taki: “Kon!” Meki ala sma kon di watra e kiri, èn meki den sma di wani, dringi fu soso fu a watra san e gi libi.

₁₈Mi e warskow ala sma di e yere a boskopu san Gado gi unu ini a buku disi taki: Gado o strafu ini wan sma di poti wan sani moro tapu san skrifi dyaso. Gado o strafu en nanga den strafu san skrifi ini a buku disi. ₁₉Efu wan sma puru wan sani fu a boskopu san Gado gi unu ini a buku disi, Gado o puru a leti san a abi fu kan nyan fu den froktu fu a bon san e gi libi èn fu go ini a santa foto soleki fa a skrifi ini a buku disi.

₂₀A Wan di e taigi yu den sani disi e taki: “Iya, Mi e kon her'esi!”

Amen! Kon Masra Yesus, kon!

₂₁Meki a bun-ati fu Masra Yesus de nanga un ala.