Dag 43 van 365- Leviticus 13 en Matteüs 26:31-56

₁MASRA taigi Moses nanga Aaron taki: ₂“Te wan sma abi wan sweri, wan soro noso wan lekti flaka na en skin di wani gersi wan siki fu a skin, den sa tyari en go na priester Aaron noso wan fu den manpikin fu en, sobun den priester. ₃A priester sa luku a presi pe a flaka de. Efu a si taki a wiwiri tapu a presi dati kon weti èn taki a presi dati didon moro dipi leki a tra buba fu a skin, dan na wan siki fu a skin a sma abi. Te a priester si dati a sa taki tak' a sma dati no krin ini Gado ai.

₄Efu a sma abi wan weti flaka na en skin, ma a presi fu a flaka no didon moro dipi leki a tra buba fu a skin èn a wiwiri tapu a presi dati no weti tu, a priester sa tapu a sma dati poti seibi na wan presi. ₅Tapu a di fu seibi dei a priester sa luku a flaka baka. Efu a priester luku èn a si taki a flaka tan a srefi èn taki a no panya moro fara, a sa tapu a sma dati ete seibi dei. ₆Baka den seibi dei dati a priester sa luku a flaka baka. Efu a si taki a flaka e kon dungru èn taki a no panya ensrefi go moro fara, a priester sa taki tak' a sma dati krin ini Gado ai. A no ben de noti moro leki wan flaka. A sma sa wasi en krosi, dan a krin ini Gado ai baka. ₇Ma efu a flaka panya ensrefi go moro fara, baka di a sma ben go na a priester fu a priester luku gi en efu a krin ini Gado ai, a sa abi fu go baka na a priester. ₈Efu a priester luku a flaka èn a si taki a flaka panya ensrefi moro fara, a sa taigi a sma taki a no krin ini Gado ai. Na wan siki fu a skin a abi.

₉Efu wan siki broko na wan sma skin, den sa tyari a sma dati go na a priester. ₁₀Efu a priester luku èn a si taki a sma abi wan sweri na en skin di weti, taki a wiwiri srefi kon weti tu èn taki grometi e gro tapu a sweri, ₁₁dan a priester no abi fu poti sowan sma aparti moro bika a de krin fu si taki na wan siki fu a skin a abi. A sma no krin ini Gado ai. ₁₂Efu a priester si, so fara leki a kan si, taki a siki broko na a sma heri skin, fu en ede kon miti en futu, ₁₃a sa ondrosuku a sma moro fini. Efu a de so taki a siki broko trutru na a sma heri skin, a priester sa taigi a sma taki a krin ini Gado ai. So wan sma krin ini Gado ai, fu di en heri skin kon weti. ₁₄Ma efu grometi de fu si, dan sowan sma no krin ini Gado ai. ₁₅Efu a priester si taki grometi de, a sa taigi a sma taki a no krin ini Gado ai. Bika a grometi no krin. Na wan siki fu a skin a sma abi. ₁₆Ma te a grometi kon weti, a sma sa go baka na a priester. ₁₇A priester sa luku èn efu a si taki a grometi kon weti, a sa taigi a sma taki a kon krin ini Gado ai. Sowan sma krin ini Gado ai.

₁₈Efu wan sma ben abi wan butsweri na en skin di kon betre, ₁₉ma dan wan weti sweri broko tapu a presi dati, noso wan rediredi weti flaka, a sma sa go na a priester fu a priester luku en. ₂₀Efu a priester luku a sweri èn a si taki a didon moro dipi leki a tra buba fu a skin, èn taki a wiwiri tapu a sweri kon weti, a sa taigi a sma taki a no krin ini Gado ai. Na wan siki fu a skin broko ini a sweri. ₂₁Ma efu a priester luku èn a si taki a wiwiri tapu a sweri no weti, taki a no didon moro dipi leki a tra buba fu a skin èn taki a skin e kon dungru, a priester sa tapu a sma dati poti seibi na wan presi. ₂₂Efu ini den seibi dei dati a sweri panya moro fara abra a skin, dan a priester sa taigi a sma taki a no krin ini Gado ai. Na wan siki fu a skin a abi. ₂₃Ma efu ini den seibi dei a flaka tan a srefi èn a no panya moro fara, dan a ben de noti moro leki a marki fu a soro. A priester sa taigi a sma taki a krin ini Gado ai.

₂₄Efu wan sma bron, dan a presi dati bigin gi wan redi grometi noso wan weti flaka, ₂₅a priester sa abi fu luku en. Efu a de so taki a wiwiri tapu a weti flaka kon weti tu èn taki a flaka didon moro dipi leki a tra buba fu a skin, dan na wan siki fu a skin broko na ini a bronmarki. A priester sa taigi a sma taki a no krin ini Gado ai. Na wan siki fu a skin a abi. ₂₆Efu a priester luku dan a si taki a wiwiri tapu a weti flaka no kon weti, taki a flaka no didon moro dipi leki a tra buba fu a skin èn taki a flaka e kon dungru, a priester sa tapu a sma dati poti seibi na wan presi. ₂₇Baka seibi dei a priester sa luku a flaka baka. Efu a flaka panya ensrefi moro fara, a priester sa taigi a sma taki a no krin ini Gado ai. Na wan siki fu a skin a abi. ₂₈Ma efu a flaka tan a srefi, efu a no panya ensrefi go moro fara èn efu a kon dungru, dan a no de noti moro leki na sweri a bronmarki ben sweri. A priester sa taigi a sma taki a krin ini Gado ai. Na wan bronmarki a sma abi.

₂₉Efu wan man noso wan uma abi wan soro na en ede noso efu a man abi wan soro ondro a barba, ₃₀a priester sa luku a soro. Efu a soro didon moro dipi leki a tra buba fu a skin èn efu a wiwiri drape geri èn a doi moro leki a tra wiwiri, a priester sa taigi a sma taki a no krin ini Gado ai. Na wan siki a abi. Na wan siki fu a skin broko na en ede noso barba. ₃₁Efu a priester luku a soro dan a si taki a no didon moro dipi leki a tra buba fu a skin, ma taki a wiwiri drape no blaka, a priester sa tapu a sma dati poti seibi dei na wan presi. ₃₂Baka den seibi dei dati a priester sa luku a soro baka. Efu a soro no panya ensrefi go moro fara, efu a wiwiri drape no kon geri èn efu a soro no didon moro dipi leki a tra buba fu a skin, ₃₃a sma mus puru a barba lontu a soro. Te a du dati a priester sa tapu a sma dati poti ete seibi dei na wan presi. ₃₄Baka den seibi dei dati a priester sa luku a soro baka. Efu a soro no panya ensrefi go moro fara, efu a no didon moro dipi leki a tra buba fu a skin, a priester sa taigi a sma taki a krin ini Gado ai. A sa wasi en krosi, dan a sa krin baka ini Gado ai. ₃₅Ma efu a soro panya ensrefi go moro fara baka di a priester taigi en taki a krin ini Gado ai, ₃₆a priester sa luku en baka. Efu a de so taki a soro panya ensrefi go moro fara, dan a priester no abi fu luku srefi efu a wiwiri kon geri tu. Sowan sma no krin ini Gado ai. ₃₇Ma efu a priester luku, dan a si taki a soro no panya go moro fara èn efu blaka wiwiri e gro na en tapu, dan a soro kon betre. Sowan sma krin ini Gado ai. A priester sa taigi en taki a krin ini Gado ai.

₃₈Te wan man noso wan uma kisi lekti weti flaka tapu en skin, ₃₉a priester sa abi fu luku den. Efu den weti flaka no e brenki ma den dungrudungru, dan na noti moro leki wan flaka nomo di de tapu a buba. Sowan sma krin ini Gado ai.

₄₀Te a edewiwiri fu wan mansma e fadon, na piri en ede e piri. Sowan sma krin ini Gado ai. ₄₁Efu na en fes'ede a wiwiri e fadon, dan na piri en fes'ede e piri. Sowan sma krin ini Gado ai. ₄₂Ma efu wan rediredi weti flaka de fu si pe a wiwiri fadon na en mindri ede noso en fes'ede, dan na wan siki fu a skin broko na en mindri ede noso en fes'ede. ₄₃A priester sa luku en. Efu a si taki na wan rediredi weti sweri de na a sma mindri ede pe a wiwiri fadon, noso na en fes'ede di piri èn a sweri gersi wan siki fu a skin, ₄₄dan na wan siki fu a skin a sma abi. Sowan sma no krin ini Gado ai. A priester abi fu taigi en taki a no krin ini Gado ai. Na wan siki fu a skin broko na en ede.

₄₅A sma di abi a siki mus priti en krosi. A mus libi en wiwiri meki a anga, nanga en anu a mus tapu en snor nanga en barba èn a mus bari: ‘Mi no krin! Mi no krin!’ ₄₆Solanga leki a abi a siki fu en skin a e tan so taki a no krin ini Gado ai. A sa libi aparti. A no sa tan ini a kampu.

₄₇Efu wan flaka de fu si tapu wan krosi, tapu a titei fu wan linnen krosi noso wan katun krosi, ₄₈tapu leer noso tapu wan sani di meki fu leer, ₄₉èn a flaka na a titei fu a krosi noso na a leer grungrun noso a rediredi, dan na wan siki broko na a krosi noso a leer di e pori en. Den sa tyari en gi a priester fu a luku en. ₅₀A priester sa luku a sani di kisi a flaka, dan a sa tapu en poti seibi dei na wan sei. ₅₁Baka den seibi dei dati a sa luku a flaka baka. Efu a priester si taki a flaka panya ensrefi moro fara na a titei fu a krosi noso a leer, dan na wan siki di den no man tapu moro e pori a krosi noso a leer. A no abi trobi san den ben e du nanga en ma a titei noso a leer disi no krin ini Gado ai. ₅₂A priester sa bron a krosi nanga a katun noso a linnen titei fu san a meki. A sa bron a sani fu leer tu di kisi a siki. A sa bron den nanga faya bika na wan siki di den no man tapu moro e pori den. ₅₃Ma efu a priester si taki a flaka na a krosi, na a titei noso a leer no panya go moro fara, ₅₄dan a sa taigi den fu wasi a sani. Baka dati a sa tapu en poti ete seibi dei na wan sei. ₅₅Baka den seibi dei dati den sa wasi a sani, dan a priester sa luku en baka. Efu a flaka no panya moro fara ma a tan a srefi, dan a sani no krin ini Gado ai. Den sa bron en nanga faya bika a siki pori a sani kba. ₅₆Ma efu a priester si taki a flaka kon dungru, baka di den wasi a sani, dan a sa priti a flaka puru na a krosi, a leer noso a titei. ₅₇Efu a flaka kon baka na titei fu a krosi noso a sani di meki fu leer, dan na broko wan siki broko na a sani di e nyan en. Den sa bron a sani di kisi a siki nanga faya. ₅₈Efu a flaka ben kmoto na a titei fu a krosi noso a sani fu leer baka di den wasi en, den sa wasi en ete wan leisi dan a sani sa krin baka ini Gado ai.”

₅₉Disi na a wèt te wan siki e nyan a titei fu katun noso linnen krosi, noso na wan sani di meki fu leer. Dan sma kan sabi efu wan sani krin ini Gado ai noso efu a no krin ini Gado ai.

₃₁Di den ben de na pasi, Yesus taigi den man di ben e teki leri fu En taki: “Tide neti un alamala o gwe libi Mi. Bika a skrifi taki: ‘Mi o kiri a skapuman, dan ala den skapu o panya.’ ₃₂Ma te Mi kon baka na libi, Mi o go na un fesi na Galilea.” ₃₃Ma Petrus taigi Yesus taki: “Noiti mi o gwe libi Yu, awinsi ala den trawan gwe!” ₃₄Yesus piki en taki: “Fu tru Mi e taigi yu taki: Fosi kakafowru bari tide neti, yu o taki dri leisi taki yu no sabi Mi.” ₃₅Ma Petrus taki: “Awinsi mi mus dede nanga Yu, mi no o taki tak' mi no sabi Yu.” Dan ala den tra man di ben e teki leri fu En taki a srefi sani tu.

₃₆Baka dati Yesus nanga den man di ben e teki leri fu En go na wan presi di den e kari Getsemane. Drape A taigi den taki: “Un sidon dyaso. Mi o go pikinso moro fara fu go begi.” ₃₇Dan A teki Petrus, Yakobus nanga Yohanes, den tu manpikin fu Sebedeus, fu go nanga En. Ne Yesus bigin firi sari èn A ben frede. ₃₈A taigi den dri man taki: “Mi abi sowan dipi sari taki Mi no man tyari en. Un tan dya, èn un tan na ai nanga Mi.” ₃₉Dan Yesus go pikinso moro fara, A trowe Ensrefi langalanga na gron, dan A begi taki: “Mi P'pa, efu a kan, no meki Mi dringi fu a kan disi, no meki Mi nyan a pina. Ma a no san Mi wani, ma na san Yu wani musu psa!” ₄₀Dan A drai kon baka na den man di ben e teki leri fu En èn A si taki den e sribi. Ne A aksi Petrus taki: “Yu no ben man tan wan yuru na ai nanga Mi? ₄₁Un mus tan na ai, èn begi fu un no kon na ini tesi. Mi sabi taki ati wani, ma skin no abi krakti.” ₄₂Dan Yesus go begi baka. A taki: “Mi P'pa, efu Mi mus dringi fu a kan disi, efu tra fasi no de, dan meki Yu wani psa!” ₄₃Di Yesus drai kon baka den ben e sribi baka, bika sribi ben moro den. ₄₄Yesus libi den safri, dan A go begi den srefi sani fu a di fu dri leisi. ₄₅Di A kba begi, A kon na den man di ben e teki leri fu En dan A taigi den taki: “Now un kan sribi èn rostu fu unu. Luku, a yuru doro kba. Den e gi a Manpikin fu Libisma abra na ini anu fu sondusma. ₄₆Opo, kon meki un gwe. Luku, a sma di seri Mi e kon kba.”

₄₇Yesus no ben kba taki ete, di Yudas, wan fu den twarfu man fu En, doro. Den prenspari priester nanga den fesiman fu a folku ben seni en kon nanga wan heri ipi sma di ben e tyari owru nanga tiki. ₄₈Yudas ben meki mofo nanga den man taki: “Na a wan di mi o bosi, na En un mus grabu.” ₄₉Ne a waka kon na Yesus. A taigi En taki: “Meister, fa a e go nanga Yu?” Dan a bosi En. ₅₀Ma Yesus taigi en taki: “Mi mati, san yu kon fu du?” Den man waka kon na Yesus, dan den grabu En hori. ₅₁Ne wan fu den man di ben de nanga Yesus hari en owru, dan a kapu a yesi puru fu a knekti fu a granpriester. ₅₂Ma Yesus taigi en taki: “Poti a owru fu yu baka na en presi. A sma di e feti nanga owru, den o kiri nanga owru tu. ₅₃Yu no sabi taki Mi kan aksi Mi P'pa, dan wantron A sa seni moro leki twarfu legre engel kon fu yepi Mi? ₅₄Ma efu Mi du dati, dan fa den sani o kon tru di skrifi ini a Santa Buku, taki na so a musu psa?” ₅₅Dan Yesus taigi den sma taki: “Un kon nanga tiki nanga owru fu grabu Mi, neleki Mi na wan bigi ogriman. Ala dei Mi ben sidon e gi leri ini a tempel, ma un no grabu Mi. ₅₆Ma a ben musu psa so fu meki den sani di den profeiti ben skrifi kon tru.” Dan ala den man di ben e teki leri fu Yesus lon gwe libi En.