Dag 44 van 365- Leviticus 14 en Matteüs 26:57-75

₁MASRA taigi Moses taki: ₂“Disi na a wèt te den tyari wan sma di ben abi wan siki fu en skin go na a priester, fu a priester meki a sma kon krin baka ini Gado ai. ₃A priester sa go na dorosei fu a kampu fu ondrosuku a sma. Te a priester si taki a sma no abi a siki fu a skin moro, taki a siki gwe libi en, ₄a priester sa meki den tyari den sani kon di de fanowdu fu a sma kon krin baka ini Gado ai. A sa meki den tyari tu libi fowru kon di bun fu nyan, sedre-udu, wan pisi dungru redi titei nanga hysop. ₅Dan a priester sa komanderi den fu den hori wan fu den fowru abra wan prapi nanga watra fu wan bron, dan den srakti en. ₆Baka dati a sa teki a libi fowru, a sedre-udu, a pisi dungru redi titei nanga a hysop, dan a dopu den ini a brudu fu a fowru di den srakti abra a prapi nanga watra fu wan bron. ₇A priester sa dropudropu en seibi leisi tapu a sma di mus kon krin fu a siki fu a skin di a ben abi, fu a kon krin ini Gado ai. Dan a sa lusu a fowru ini a opo wei fu a frei gwe. ₈A sma di ben mus kon krin sa wasi en krosi. A sa koti ala en wiwiri, a sa wasi nanga watra dan a sa krin baka ini Gado ai. Baka dati a sa kon ini a kampu, ma seibi dei langa a no sa go ini en tenti. ₉Baka seibi dei a sa piri en ede, a sa puru en barba nanga en ai wiwiri. Ala en wiwiri a sa puru. A sa wasi en krosi nanga en skin nanga watra, dan a sa krin baka ini Gado ai.

₁₀Tapu a di fu aiti dei a sa teki tu skapu. Noti no mus mankeri den skapu. Moro fara a sa teki wan uma skapu fu wan yari. Leki graan-ofrandi a sa teki sowan siksi kilo fu a moro bun blon. A blon disi mus moksi nanga oli. Moro fara a sa teki sowan afu liter oli tu. ₁₁A priester di o meki a sma kon krin baka ini Gado ai, sa tyari a sma go na mofodoro fu a tenti pe yu kan miti nanga Gado. Drape a sa poti en tnapu na MASRA fesi, makandra nanga ala den sani di a tyari kon leki ofrandi. ₁₂A priester sa teki a wan skapu leki wan paiman fu tyari leki wan ofrandi fu kisi pardon fu sondu. A sa du disi makandra nanga a afu liter oli. A priester sa opo den go na loktu leki ofrandi na MASRA fesi. ₁₃Baka dati a sa srakti a skapu tapu a srefi santa presi pe den e srakti a ofrandi fu kisi pardon fu sondu nanga a ofrandi di mus bron. Bika a meti fu en na fu a priester, neleki a ofrandi fu kisi pardon fu sondu. Na wan tumsi santa sani. ₁₄A priester sa teki pikinso fu a brudu fu a meti, dan a lobi en na a let'sei yesi, a let'sei doi fu a anu nanga a let'sei doi fu a futu fu a sma di mus kon krin ini Gado ai. ₁₅Baka dati a sa kanti pikinso fu a afu liter oli ini en eigi kruktu anu. ₁₆A sa dopu wan fu den finga fu en let'anu ini a oli di de ini en kruktu anu, dan a dropudropu en seibi leisi na MASRA fesi. ₁₇A sa teki pikinso fu a oli di de ete ini en kruktu anu, dan a lobi en na a let'sei yesi, a let'sei doi fu a anu nanga a let'sei doi fu a futu fu a sma di mus kon krin ini Gado ai. A sa lobi en tapu a brudu fu a ofrandi di ben de kba na a yesi, nanga den doi fu a sma. ₁₈Baka dati a priester sa wrifi a oli di de ete ini en anu tapu a ede fu a sma di mus kon krin ini Gado ai. Na so a priester sa meki a sma kon bun baka na MASRA fesi. ₁₉A priester sa tyari a ofrandi fu kisi pardon fu sondu, dan so a sa meki a sma di mus kon krin ini Gado ai, kon bun baka nanga Gado. Baka dati a sa srakti a meti di ben mus bron leki ofrandi. ₂₀Dan a priester sa bron a ofrandi di ben mus bron makandra nanga a graan-ofrandi tapu a altari. Tapu a fasi disi a priester sa meki a sma kon bun baka nanga Gado, dan a sma sa kon krin baka ini Gado ai.

₂₁Efu a sma no gudu so èn a no abi a moni fu en, dan a sa tyari leki paiman wan skapu kon leki ofrandi fu kisi pardon fu sondu. Den sa opo en go na loktu leki ofrandi, fu a kan kon bun baka nanga Gado. Makandra nanga a skapu a sa tyari wan graan-ofrandi kon fu sowan tu kilo fu a moro bun blon di moksi nanga oli, nanga sowan afu liter oli. ₂₂Efu a man, a kan tyari tu stondoifi noso tu yongu doifi kon tu. A wan sa de wan ofrandi fu a kisi pardon fu sondu, a trawan sa bron leki ofrandi. ₂₃Tapu a di fu aiti dei a sa tyari den go gi a priester na MASRA fesi, na mofodoro fu a tenti pe yu kan miti nanga Gado. ₂₄A priester sa teki a skapu, a paiman di mus tyari leki wan ofrandi fu kisi pardon fu sondu, nanga a afu liter oli. A sa opo den go na loktu leki wan ofrandi na MASRA fesi. ₂₅A sa srakti a skapu, a paiman di mus tyari leki ofrandi fu kisi pardon fu sondu, dan a sa teki pikinso fu a brudu fu en lobi na a let'sei yesi, a let'sei doi fu a anu nanga a let'sei doi fu a futu fu a sma di mus kon krin ini Gado ai. ₂₆A priester sa kanti pikinso fu a oli na ini en eigi kruktu anu tu. ₂₇A sa dopu wan fu den finga fu en let'anu ini a oli di de kruktu anu, dan a dropudropu en seibi leisi na MASRA fesi. ₂₈A priester sa teki pikinso fu a oli di de ete ini en kruktu anu, dan a lobi en na a let'sei yesi, a let'sei doi fu a anu nanga a let'sei doi fu a futu fu a sma di mus kon krin ini Gado ai. A sa lobi en tapu a brudu fu a ofrandi di ben de kba na a yesi, nanga den doi fu a sma. ₂₉A priester sa wrifi a oli di de ete ini en anu tapu a ede fu a sma di mus kon krin ini Gado ai. Na so a priester sa meki a sma kon bun baka na MASRA fesi. ₃₀Baka dati a priester sa tyari wan fu den stondoifi noso yongu doifi di a sma ben man tyari kon leki ofrandi. ₃₁Wan sa de wan ofrandi fu kisi pardon fu sondu, a trawan sa bron leki ofrandi makandra nanga a graan-ofrandi. Dan a priester sa meki a sma di ben mus kon krin ini Gado ai, kon bun baka na MASRA fesi.

₃₂Disi na a wèt gi wan sma di ben abi wan siki fu a skin, ma di no gudu so fu tyari den sani di a mus tyari, fu kon krin baka ini Gado ai.”

₃₃MASRA taigi Moses nanga Aaron taki: ₃₄“Te un doro ini a kondre Kanaan di Mi o gi unu fu a de fu unu èn Mi meki wan siki broko drape na a ososkin di e pori en, ₃₅a sma di abi a oso sa go na a priester. A sa taigi a priester taki: ‘Wan siki broko na mi ososkin di e pori en.’ ₃₆Fosi a priester kon luku, a sa komanderi den fu puru ala sani na ini a oso, fu a no taki tak' ala sani di de ini a oso no krin ini Gado ai. Te den du dati, a priester sa kon fu luku a oso. ₃₇Te a kon èn a si taki a siki broko na a ososkin leki grungrun noso rediredi olo, di dipi moro den tra pisi fu a ososkin, ₃₈a priester sa kmoto ini a oso dan a tapu a oso fu seibi dei. ₃₉Baka den seibi dei dati, a priester sa kon baka. Te a luku èn a si taki a siki panya moro fara na ososkin, ₄₀a sa komanderi den meki den puru den ston di abi a siki. Den mus fringi den ston dati dorosei fu a foto tapu wan dot'ipi. ₄₁Baka dati a priester sa meki den krabu a smenti puru inisei na a ososkin, dan den tyari en go trowe dorosei fu a foto tapu wan dot'ipi. ₄₂Den sa poti tra ston na a presi fu den wan di den puru èn den sa lobi tra smenti na inisei fu ososkin. ₄₃Ma efu a siki broko baka na a ososkin, baka di den puru den ston, krabu a smenti puru èn smenti a ososkin baka, ₄₄a priester sa kon luku. Te a luku èn a si taki a siki panya moro fara na a ososkin, dan na wan siki di den no man tapu moro e pori a ososkin. A oso no krin ini Gado ai. ₄₅Den sa broko a oso. Den sa teki den ston, a udu nanga a smenti fu a oso, go trowe dorosei fu a foto tapu wan dot' ipi. ₄₆Efu wan sma ben go ini a oso den dei di a priester ben sroto a oso, a sma dati no krin ini Gado ai te leki neti tapu. ₄₇A sma di ben sribi ini a oso, sa wasi en krosi. A sma di ben nyan na ini a oso, sa wasi en krosi tu.

₄₈Ma efu a priester kon luku èn a si taki a siki no panya moro fara na a ososkin baka di den lobi tra smenti gi en, a sa taki tak' a oso krin ini Gado ai fu di a siki no de moro fu si. ₄₉A priester sa teki tu fowru, sedre-udu, dungru redi titei nanga hysop fu krin a oso. ₅₀A sa hori wan fu den fowru abra wan prapi nanga watra fu wan bron, dan a srakti en. ₅₁Baka dati a sa dopu a sedre-udu, a hysop, a dungru redi titei nanga a libi fowru ini a brudu fu a fowru di a srakti. A sa dopu den ini a watra fu a bron tu, dan a dropudropu en seibi leisi go na a oso. ₅₂Na so a sa krin a oso: nanga a brudu fu a fowru, nanga a watra fu bron, nanga a libi fowru, a sedre-udu, a hysop nanga a dungru redi titei. ₅₃A libi fowru a sa lusu na ini wan opo wei dorosei fu a foto fu a frei gwe. Na so a meki a oso kon bun baka. Dan a oso sa krin baka ini Gado ai.”

₅₄Disi na a wèt gi den difrenti sortu siki di nyan noso pori wan sani: te wan siki broko tapu a sma ede na en wiwiri, ₅₅te wan siki e pori krosi noso a ososkin, ₅₆fu wan sweri, wan soro noso wan lekti flaka. ₅₇Dan so sma sa sabi efu wan sani krin noso efu a no krin ini Gado ai. Disi na a wèt te wan sani abi wan siki di e nyan en noso pori en.

₅₇Den man di ben grabu Yesus, tyari En go na a granpriester Kayafas. Drape den sabiman fu Gado wèt nanga den fesiman fu a folku ben kon makandra. ₅₈Ma Petrus ben e waka fara na baka e kon te na a dyari fu a granpriester. Dan a go inisei go sidon mindri den waktiman fu a tempel fu si san o psa moro fara. ₅₉Den prenspari priester nanga ala den man fu a grankrutu fu den Dyusma, ben suku sma di ben wani lei gi Yesus fu den kan kiri En. ₆₀Ma den no feni noti, aladi furu sma ben go taki sani di no tru. Te fu kba, tu man go na fesi. ₆₁Den taki: “A man disi ben taki tak' A kan broko a santa presi fu Gado, dan A meki en baka ini dri dei.” ₆₂Ne a granpriester opo, dan a aksi Yesus taki: “Yu no e piki tapu san den man disi e taki fu Yu?” ₆₃Ma Yesus no piki noti. Dan a granpriester taigi En taki: “Sweri gi mi ini a nen fu a libi Gado: Taigi unu efu Yu na a Mesias, a Manpikin fu Gado?” ₆₄Yesus piki en taki: “Na leki fa yu taki. Ma Mi e taigi un taki: Bigin fu now un o si a Manpikin fu Libisma sidon na a let'anu sei fu Gado di abi Makti. Dan un o si En te A e kon baka tapu den wolku.” ₆₅Di Yesus taki a sani dati, a granpriester priti en krosi, dan a taki: “A e meki leki En na Gado! Un no abi kotoigi fanowdu moro. Luku, un srefi yere now fa A afrontu Gado. ₆₆San na un besroiti?” Den tra krutubakra piki taki: “A fiti fu A dede!” ₆₇Dan den spiti ini En fesi èn den naki En nanga kofu. Trawan baka naki En ini En fesi, ₆₈dan den taki: “Mesias, sori unu taki yu na wan profeiti. Taigi unu suma naki Yu.”

₆₉A pisten dati Petrus ben e sidon na dorosei ini a dyari. Dan wan uma di ben wroko drape kon taigi en taki: “Yu ben de nanga Yesus fu Galilea tu.” ₇₀Ma Petrus lei na ala sma fesi taki: “Mi no sabi san yu e taki!” ₇₁Dan Petrus opo waka go na a poort. Ma wan tra uma si en, dan a taigi den sma drape taki: “A man disi ben de nanga Yesus fu Nasaret.” ₇₂Ma agen Petrus lei. A taki: “Mi e sweri gi unu. Mi no sabi a man!” ₇₃Baka wan syatu pisten, den tra sma di ben e tnapu drape waka go na Petrus, dan den taigi en taki: “A tru. Yu na wan fu den man tu. Wi e yere en na a fasi fa yu e taki.” ₇₄Dan Petrus sweri baka èn a bigin fluku ensrefi taki: “Mi no sabi a man!” A srefi momenti dati wan kakafowru bari. ₇₅Dan Petrus memre fa Yesus ben taigi en taki: “Fosi kakafowru bari, yu o taki dri leisi taki yu no sabi Mi.” Dan Petrus go na dorosei, dan a bari wan krei.