Dag 45 van 365- Leviticus 15-16 en Matteüs 27:1-26

₁MASRA taigi Moses nanga Aaron taki: ₂“Taigi den sma fu Israel taki: ‘Efu wan man en manpresi e puru dot'doti watra fu di a kisi wan siki, a watra dati no krin ini Gado ai. ₃Efu a siki meki taki na dropu a watra e dropu kmoto, noso taki noti no man psa moro fu en manpresi kon na doro, ala tu fasi sowan man no krin ini Gado ai. ₄Ala bedi tapu san a man didon, nanga ala sani tapu san a sidon, no krin ini Gado ai tu. ₅Efu wan sma fasi a bedi fu a man dati, a sa wasi en krosi nanga en skin, èn a no sa krin ini Gado ai te leki neti tapu. ₆Efu wan sma sidon tapu wan sani tapu san a man ben sidon di abi a siki, a sma sa wasi en krosi nanga en skin èn a no sa krin ini Gado ai te leki neti tapu. ₇Efu wan sma fasi a man di abi a siki, a sma dati sa wasi en krosi nanga en skin èn a no sa krin ini Gado ai te leki neti tapu. ₈Efu a man di abi a siki spiti tapu wan sma di krin ini Gado ai, a sma dati sa wasi en krosi nanga en skin èn a no sa krin ini Gado ai te leki neti tapu. ₉Te a man di abi a siki sidon tapu en asi, dan a sani tapu san a sidon tapu a asi en baka, no sa krin ini Gado ai tu. ₁₀Efu wan sma fasi wan sani tapu san a man ben sidon, a sma dati no sa krin ini Gado ai te leki neti tapu èn efu wan sma opo a sani tapu san a man ben sidon, a sma dati sa wasi en krosi nanga en skin èn a no sa krin ini Gado ai te leki neti tapu. ₁₁Efu a man di abi a siki fasi wan sma sondro fu a ben wasi en anu, a sma di a fasi sa wasi en krosi nanga en skin èn a no sa krin ini Gado ai te leki neti tapu. ₁₂Efu a man di abi a siki fasi wan sani di meki fu kleidoti, un sa naki a sani dati broko. Ala sani fu udu di a fasi, un sa spuru nanga watra fu a kon krin baka ini Gado ai. ₁₃Te a man di abi a siki kon betre, a sa teri seibi dei fosi a kan krin ensrefi. Baka den seibi dei a mus wasi en krosi èn a sa wasi en skin nanga watra fu wan bron, dan a sa de krin baka ini Gado ai. ₁₄Tapu a di fu aiti dei a sa go nanga tu stondoifi noso tu yongu doifi na MASRA fesi, na mofodoro fu a tenti pe yu kan miti nanga Gado. Dan a sa langa den doifi gi a priester. ₁₅A priester sa bron wan leki ofrandi fu kisi pardon fu sondu, a trawan a sa bron leki ofrandi. Dan a priester sa meki a kon bun baka nanga Gado na MASRA fesi, fu di a ben abi wan siki di ben e meki dot'doti watra kmoto fu en manpresi.

₁₆Te a manwatra fu wan man lon, a sa wasi en heri skin èn a no sa krin ini Gado ai te leki neti tapu. ₁₇Den sa wasi ala krosi nanga ala sani fu leer tapu san a manwatra fadon èn den sani no sa krin ini Gado ai te leki neti tapu. ₁₈Efu wan man go na bedi nanga wan uma èn en manwatra lon tu, den ala tu sa wasi den skin èn den no sa krin ini Gado ai te leki neti tapu.

₁₉Te wan uma abi en munsiki a no sa krin seibi dei langa ini Gado ai. Efu wan sma fasi en, a sma dati no sa krin ini Gado ai te leki neti tapu. ₂₀Ala bedi tapu san a uma didon, nanga ala sani tapu san a sidon no krin ini Gado ai tu. ₂₁Efu wan sma fasi a bedi fu a uma dati, a sa wasi en krosi nanga en skin, èn a no sa krin ini Gado ai te leki neti tapu. ₂₂Efu wan sma fasi wan sani tapu san a uma ben sidon, a sma dati sa wasi en krosi nanga en skin èn a no sa krin ini Gado ai te leki neti tapu. ₂₃Efu wan sma fasi wan sani tapu a bedi fu a uma, noso efu a fasi wan sani tapu a presi pe a uma sidon, a sma dati no sa krin ini Gado ai te leki neti tapu. ₂₄Efu wan man go na bedi nanga a uma, dan leki fa a uma no krin ini Gado ai, na so a man srefi no sa krin ini Gado ai tu. Seibi dei langa a man no sa krin ini Gado ai. Ala bedi tapu san a didon no sa krin ini Gado ai tu.

₂₅Efu wan uma e lasi brudu, ma a no de a ten fu en munsiki, noso efu a munsiki fu wan uma e tan moro langa leki san a ben mus tan, a uma dati no sa krin ini Gado ai solanga leki a e lasi brudu. A sa de leki efu na en munsiki a abi. A no krin ini Gado ai. ₂₆Te a uma e lasi brudu so, dan ala bedi tapu san a e didon nanga ala sani tapu san a e sidon no sa krin ini Gado ai neleki te a abi en munsiki. ₂₇Efu wan sma fasi den sani disi, a sma dati no sa krin ini Gado ai. A sa wasi en krosi nanga en skin, èn a no sa krin ini Gado ai te leki neti tapu. ₂₈Te a uma kon betre, a sa teri seibi dei fosi a kon krin ini Gado ai. ₂₉Tapu a di fu aiti dei a sa go nanga tu stondoifi noso tu yongu doifi na mofodoro fu a tenti pe yu kan miti nanga Gado. Dan a sa langa den doifi gi a priester. ₃₀A priester sa bron wan leki ofrandi fu kisi pardon fu sondu, a trawan a sa bron leki ofrandi. Dan so a priester sa meki a uma kon bun baka nanga Gado na MASRA fesi, fu di a no ben krin ini Gado ai èn a ben e lasi brudu.’ ”

₃₁Na disi Gado ben taigi Moses nanga Aaron fu taigi den sma fu Israel: “na so den mus hori densrefi aparti fu den sani di kan meki taki den no krin ini Gado ai. Efu den no du dati den o dede, efu den doti Mi santa tenti di tnapu na den mindri.”

₃₂Disi na den wèt na san wan man mus hori ensrefi efu a abi wan siki na en manpresi di e meki dot'doti watra kmoto fu en manpresi, noso te a manwatra fu wan man lon. Bika den sani disi e meki taki wan man no krin ini Gado ai. ₃₃Èn disi na den wèt na san wan uma mus hori ensrefi te a abi en munsiki, te wan uma e lasi brudu nanga te wan man didon nanga wan uma di no krin ini Gado ai.

₁Den tu boi fu Aaron ben dede fu di den ben kon krosbei fu MASRA. Baka dati MASRA taigi Moses taki: ₂“Taigi yu brada Aaron taki a no sa kon oten a wani baka a garden, ini a moro santa presi, fesi a tapun fu a santa kisi. Efu a du dati a o dede. Bika na drape, tapu a tapun dati, Mi e sori Misrefi na ini wan wolku.

₃Tapu a fasi disi wawan Aaron sa kon ini a moro santa presi: A sa kon nanga wan yongu bulu leki ofrandi fu kisi pardon fu en sondu, nanga wan man skapu fu bron leki ofrandi. ₄A sa weri a santa ondrokrosi nanga wan linnen ondrobruku. A sa tai wan linnen banti lontu en bere èn a sa lontu en ede nanga wan linnen duku. Disi na den santa krosi di a mus weri. A sa weri den baka te a wasi en skin. ₅Den sma fu Israel sa gi en tu bokoboko leki ofrandi fu kisi pardon fu sondu nanga wan man skapu fu bron leki ofrandi.

₆Aaron sa tyari a bulu fu en fosi leki ofrandi fu kisi pardon fu sondu, fu meki taki en nanga den sma fu en oso kon bun baka nanga Gado. ₇Baka dati a sa tyari den tu bokoboko kon na MASRA fesi, na mofodoro fu a tenti pe yu kan miti nanga Gado. ₈Dan Aaron sa fringi a lot fu luku sortu bokoboko sa de gi MASRA, èn sortu wan gi Asasel. ₉Te a lot sori sortu bokoboko na fu MASRA, Aaron sa teki a bokoboko dati leki ofrandi fu kisi pardon fu sondu. ₁₀Ma a bokoboko di a lot sori taki en na gi Asasel, den sa poti tnapu libilibi na MASRA fesi. Den sa seni a bokoboko disi go ini a sabana gi Asasel èn tapu a fasi disi den sa kon bun baka nanga Gado.

₁₁Aaron sa tyari a bulu fu en leki wan ofrandi fu kisi pardon fu en eigi sondu, fu meki taki en nanga den sma fu en oso kon bun baka nanga Gado. Ensrefi sa srakti a bulu fu kisi pardon fu en sondu. ₁₂Fu a altari di tnapu na MASRA fesi, a sa teki krofaya di e bron ete poti ini wan pan. A sa furu den anu fu en tu nanga a wierook di e smeri switi, dan a sa go nanga ala den sani disi ini a moro santa presi baka a garden. ₁₃Aaron sa poti a wierook tapu a faya, na MASRA fesi, fu a smoko fu a wierook kan tapu a tapun fu a santa kisi pe den wortu de di ben e memre den na san Gado taki. Efu a no du dati a o dede. ₁₄A sa teki pikinso fu a brudu fu a bulu nanga en finga, dan a dropudropu en na fes'sei fu a tapun, èn na gron fesi a tapun a sa dropudropu seibi leisi pikinso fu a brudu nanga en finga tu. ₁₅Baka dati a sa srakti a bokoboko, fu a folku kisi pardon fu en sondu. Te a du dati a sa tyari a brudu go na inisei baka a garden. A sa du a srefi sani nanga a brudu disi, leki fa a ben du nanga a brudu fu a bulu. A sa dropudropu en na fes'sei fu a tapun nanga na gron fesi a tapun. ₁₆Tapu a fasi disi Aaron e krin a moro santa presi fu a kan bun gi Gado, nanga fu den ogridu, den takrudu nanga den sondu fu den Israelitisma. Na so a sa du tu nanga a tenti pe yu kan miti nanga Gado, di tnapu na mindri fu a folku nanga ala den sondufasi fu den. ₁₇No wan sma mus de ini a tenti pe yu kan miti nanga Gado, te Aaron go na inisei fu go meki en bun nanga Gado. Den no sa du dati te leki a kon baka na dorosei. Baka te a meki en bun nanga Gado gi ensrefi, gi en oso nanga gi a heri folku fu Israel, ₁₈a sa go na dorosei na a altari di tnapu na MASRA fesi. A sa krin en fu a kan bun gi Gado. A sa teki pikinso fu a brudu fu a bulu nanga fu a bokoboko, dan a lobi en lontu na den tutu fu a altari. ₁₉Te a du dati, a sa dropudropu pikinso fu a brudu seibi leisi tapu a altari. Na so a e krin en fu den sondu fu den Israelitisma nanga den sani di e meki taki den no krin ini Gado ai, èn a e meki a altari kon santa baka.

₂₀Baka te a krin a moro santa presi, a tenti pe yu kan miti nanga Gado, nanga a altari, fu den kan bun gi Gado, a sa tyari a bokoboko kon di den no ben kiri. ₂₁Aaron sa poti ala tu anu fu en tapu a ede fu a bokoboko, dan a sa taki ala den takrudu, den ogridu nanga den sondu di den sma fu Israel du. Na so a e poti den tapu a bokoboko. Dan wan sma di ben tnapu klari kba sa tyari a bokoboko go na a sabana. ₂₂Drape a sa lusu a bokoboko fu a go ini a sabana. Na so a bokoboko e teki ala a sondu fu a folku na en tapu tyari go na wan presi ini a sabana pe libisma no e go. ₂₃Baka dati Aaron sa go na a tenti pe yu kan miti nanga Gado. A sa puru den linnen krosi di a ben weri, di a ben go ini a moro santa presi, dan a sa libi den drape. ₂₄A sa wasi en skin tapu wan santa presi, dan a weri en tra krosi baka. Te a du dati, a sa go na dorosei, dan a bron a ofrandi di a ben mus bron gi ensrefi nanga di fu a folku, fu meki en bun nanga Gado gi en nanga gi a folku. ₂₅A fatu fu a ofrandi fu kisi pardon fu sondu, a sa bron tapu a altari. ₂₆A sma di ben tyari a bokoboko go gi Asasel, sa wasi en krosi nanga en skin. Baka dati a sa kon baka ini a kampu. ₂₇Den sa teki a skin fu a bulu nanga a bokoboko di ben srakti fu kisi pardon fu sondu, tyari go na dorosei fu a kampu, dan den bron a buba, a meti nanga a inibere fu den. A brudu fu a meti disi den ben tyari go ini a santa presi fu kisi pardon fu sondu. ₂₈A sma di bron den sa wasi en krosi nanga en skin. Baka dati a sa kon ini a kampu baka.

₂₉Den sani disi un sa tan du fu têgo: Tapu a di fu tin dei, fu a di fu seibi mun, un mus faste èn un no mus du no wan wroko. Disi na gi den sma fu Israel, ma a de tu gi den doroseisma di e libi na un mindri. ₃₀Bika tapu a dei dati a priester sa meki un kon bun baka nanga Mi, fu un kan kon krin baka. Un sa kon krin baka fu ala sondu na MASRA fesi. ₃₁A sa de wan trutru sabatdei gi unu. Un sa faste èn a sa de wan sani di un sa tan du fu têgo. ₃₂A priester di den salfu èn di den wei fu du a wroko te en papa no de moro, sa meki un kon bun baka nanga Gado. Na en sa weri den santa linnen krosi. ₃₃A sa krin a moro santa presi, a tenti pe yu kan miti nanga Gado nanga a altari èn a sa meki den tra priester nanga a heri folku kon bun baka nanga Gado. ₃₄Disi na wan sani di un mus tan du fu têgo, fu meki den sma fu Israel kon bun baka nanga Gado fu den sondu di den du. Un sa du en wan leisi wan yari.”

Dan Moses du ala sani leki fa MASRA ben taigi en fu du.

₁Di dei opo, ala den prenspari priester nanga den fesiman fu a folku teki a besroiti fu kiri Yesus. ₂Dan den tai En tyari go gi granman Pilatus.

₃Yudas, di ben seri Yesus, si taki den ben wani kiri Yesus, dan a kisi konsensi fonfon. So a tyari den dritenti solfrumoni go baka gi den prenspari priester nanga den fesiman fu a folku. ₄A taigi den taki: “Mi sondu, bika mi seri wan man di no du noti.” Ma den piki en taki: “Dati na yu problema. Un kba nanga a tori.” ₅Ne Yudas fringi a moni go ini a santa presi, dan a gwe go anga ensrefi. ₆Den prenspari priester piki a moni, dan den taki: “Un no kan poti a moni disi ini a kisi pe sma e poti moni gi a tempel, bika na moni di pai fu kiri wan sma.” ₇Dan den teki a besroiti fu bai wan pisi gron di ben de fu a man di ben meki prapi. A gron dati den ben o teki leki berpe gi doroseisma. ₈Fu dat'ede den e kari a gron dati Brudu Gron te leki a dei fu tide. ₉Na so a sani san a profeiti Yeremia ben taki kon tru. A ben taki: “Den teki den dritenti solfrumoni di den sma fu Israel ben agri fu pai gi en, ₁₀dan den bai a gron fu wan man di e meki prapi. Na dati Masra ben taigi mi fu du.”

₁₁So den man tyari Yesus go na granman Pilatus. Dan Pilatus aksi En taki: “Na Yu na a Kownu fu den Dyusma?” Yesus piki en taki: “Na leki fa yu taki.” ₁₂Ma di den prenspari priester nanga den fesiman fu a folku ben kragi En, Yesus no piki noti. ₁₃Pilatus aksi Yesus taki: “Yu no e yere ala den sani san den e taki fu Yu?” ₁₄Ma Yesus no piki en tapu no wan sani. A sani dat' meki Pilatus ferwondru srefsrefi.

₁₅A ben de a gwenti te den ben hori a Paskafesa taki a granman ben lusu wan straf'man di den Dyusma ben wani. ₁₆A ten dati wan man ben de na straf'oso di furu sma ben sabi. A ben nen Barabas. ₁₇Dan fu di furu Dyusma ben drape, Pilatus aksi den taki: “Suma un wani taki mi mus lusu gi unu? Barabas noso Yesus, di den e kari a Mesias.” ₁₈Pilatus ben sabi heri bun taki den ben tyari Yesus kon gi en fu di den ben dyarusu na En tapu. ₁₉Di Pilatus ben sidon tapu a krutusturu, en uma seni taigi en taki: “No leisi strafu gi a man disi di no du noti. Bika a neti di psa mi nyan furu pina fu En ede ini wan dren.” ₂₀Ma den prenspari priester nanga den fesiman fu a folku sutu faya gi a bigi grupu sma meki den aksi Pilatus fu lusu Barabas, èn fu kiri Yesus. ₂₁Pilatus aksi den sma baka taki: “Sortu wan fu den tu man un wani taki mi mus lusu?” Den sma taki: “Barabas.” ₂₂Dan Pilatus aksi den taki: “Dan san mi mus du nanga Yesus, di den e kari a Mesias?” Ne ala sma bari taki: “Spikri En na wan kroisi!” ₂₃Pilatus aksi den baka taki: “Ma sortu ogri a man disi du?” Ma den sma bigin bari moro tranga taki: “Spikri En na wan kroisi!” ₂₄Dan Pilatus si taki noti no e yepi moro, ma taki moro nanga moro den sma e meki opruru. Dat' meki a teki watra, dan a wasi en anu na ala den sma fesi. A taigi den taki: “Mi no abi noti fu du nanga a dede fu a man disi. San o psa na unu problema. Mi kba nanga a tori.” ₂₅A heri folku piki en taki: “Meki a frantwortu fu En dede kon tapu wi nanga den bakapikin fu wi!” ₂₆Baka dati Pilatus lusu Barabas, dan a meki den wipi Yesus èn tyari En go spikri na wan kroisi.