Dag 52 van 365- Numeri 1-3 en Marcus 3

₁MASRA ben taki nanga Moses ini a dreisabana fu Sinai, ini a tenti pe yu ben kan miti nanga Gado. Disi ben de tapu a fosi dei fu a di fu tu mun, ini a di fu tu yari baka di den ben komopo na ini Egipte. ₂MASRA ben taigi en taki: “Teri den famiri fu den Israelitisma. Bigin na den afo fu den. Yu mus teri ala mansma wan fru wan. ₃Yu nanga Aaron mus skrifi den nen fu den alamala. Den mus abi a libimarki fu tutenti yari nanga moro owru, en den mus warti fu feti na ini a legre. ₄Fu ibri lo yu mus teki wan famiri-edeman fu yepi yu. ₅Disi na den nen fu den edeman di sa yepi yu: Elisur, a manpikin fu Sedehur, fu a lo fu Ruben. ₆Selumiyel, a manpikin fu Surisadai, fu a lo fu Simeon. ₇Nakson, a manpikin fu Aminadab, fu a lo fu Yuda. ₈Netanel, a manpikin fu Suar, fu a lo fu Isakar. ₉Eliab, a manpikin fu Helon, fu a lo fu Sebulon. ₁₀Fu den manpikin fu Yosef yu ben abi: Elisama a manpikin fu Amihud fu a lo fu Efraim, nanga Gamliyel, a manpikin fu Pedasur fu a lo fu Manase, ₁₁Abidan, a manpikin fu Gidoni, fu a lo fu Benyamin. ₁₂Akiyeser a manpikin fu Amisadai, fu a lo fu Dan. ₁₃Pagiyel, a manpikin fu Okran, fu a lo fu Aser. ₁₄Elyasaf, a manpikin fu Rehuel, fu a lo fu Gad. ₁₅Akira, a manpikin fu Enan, fu a lo fu Naftali. ₁₆Disi na den wan di un mus teki puru mindri den Israelitisma. Ibriwan fu den sa tron edeman fu wan fu den lo èn den sa tiri a legre fu a lo dati.”

₁₇So Moses nanga Aaron, makandra nanga den man di Gado ben sori den, ₁₈kari a heri folku kon na wan na tapu a fosi dei fu a di fu tu mun. Dan fu ala famiri fu den Israelitisma, bigin na den afo fu den, den skrifi den nen fu den mansma fu tutenti yari nanga moro owru. Den skrifi den nen wan fru wan na tapu papira. ₁₉Dan soleki fa MASRA ben komanderi Moses, den bigin teri den mansma na ini a sabana fu Sinai.

₂₀Fu den bakapikin fu Ruben, a fosi pikin fu Israel, den skrifi den nen fu ala mansma fu tutenti yari nanga moro owru, di ben warti fu feti ini a legre. Den bigin na den afo fu den famiri èn den skrifi den nen wan fru wan. ₂₁Na ini a lo fu Ruben den ben teri fotenti-na-siksi dusun nanga feifi hondro man.

₂₂Fu den bakapikin fu Simeon, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₂₃Na ini a lo fu Simeon den ben teri feifitenti-na-neigi dusun nanga dri hondro man.

₂₄Fu den bakapikin fu Gad, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₂₅Na ini a lo fu Gad den ben teri fotenti-na-feifi dusun siksi hondro nanga feifitenti man.

₂₆Fu den bakapikin fu Yuda, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₂₇Na ini a lo fu Yuda den ben teri seibitenti-na-fo dusun nanga siksi hondro man.

₂₈Fu den bakapikin fu Isakar, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₂₉Na ini a lo fu Isakar den ben teri feifitenti-na-fo dusun nanga fo hondro man.

₃₀Fu den bakapikin fu Sebulon, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₃₁Na ini a lo fu Sebulon den ben teri feifitenti-na-seibi dusun nanga fo hondro man.

₃₂Fu den bakapikin fu Yosef: fu Efraim, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₃₃Na ini a lo fu Efraim den ben teri fotenti dusun nanga feifi hondro man. ₃₄Fu den bakapikin fu Manase, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₃₅Na ini a lo fu Manase den ben teri dritenti-na-tu dusun nanga tu hondro man.

₃₆Fu den bakapikin fu Benyamin, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₃₇Na ini a lo fu Benyamin den ben teri dritenti-na-feifi dusun nanga fo hondro man.

₃₈Fu den bakapikin fu Dan, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₃₉Na ini a lo fu Dan den ben teri siksitenti-na-tu dusun nanga seibi hondro man.

₄₀Fu den bakapikin fu Aser, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₄₁Na ini a lo fu Aser den ben teri fotenti-na-wan dusun nanga feifi hondro man.

₄₂Fu den bakapikin fu Naftali, den skrifi den nen fu ala mansma fu tutenti yari nanga moro owru, di ben warti fu feti na ini a legre. Den bigin na den afo fu den famiri èn den skrifi den nen wan fru wan. ₄₃Na ini a lo fu Naftali den ben teri feifitenti-na-dri dusun nanga fo hondro man.

₄₄Disi ben de den mansma di Moses, Aaron, nanga den twarfu famiri-edeman fu Israel ben teri. Ibriwan ben drape gi en famiri. ₄₅Ala den mansma fu Israel, fu tutenti yari nanga moro owru, di den ben teri èn di ben warti fu feti na ini a legre fu Israel, ₄₆ben de siksi hondro na dri dusun feifi hondro nanga feifitenti man.

₄₇Ma den bakapikin fu Lefi no ben teri makandra nanga den tra lo. ₄₈Bika MASRA ben taigi Moses: ₄₉“Yu no mus teri a lo fu Lefi. Yu no mus teri a grupu disi makandra nanga den Israelitisma. ₅₀Ma yu mus gi den a frantwortu fu a tenti fu a ferbontu nanga ala sani san e tan drape. Den mus tyari a santa tenti nanga den sani fu en. Den sa du ala a wroko di de fu du ini a santa tenti èn den sa opo den kampu lontu a tenti. ₅₁Te a santa tenti mus broko puru fu un kan gwe moro fara, dan den Lefitisma sa sorgu fu dati. Te a santa tenti doro na a nyun tanpe, dan den Lefitisma sa opo en baka. Ibrisma tra sma di sa go krosbei fu en sa dede. ₅₂Ala den Israelitisma sa tan na wan ini a kampu, pe a fraga fu den eigi grupu de. ₅₃Ma den Lefitisma sa bow a kampu fu den lontu a tenti fu a ferbontu. Den sa hori wakti fu tra sma no kon krosbei na a tenti fu a ferbontu, fu a atibron fu Gado no saka kon na tapu den Israelitisma.”

₅₄Den Israelitisma ben du ala sani so leki fa MASRA ben komanderi Moses.

₁MASRA taigi Moses nanga Aaron taki: ₂“Den Israelitisma mus tan na wan. Ibrisma mus tan pe en eigi fraga de, nanga a marki fu en famiri. Den sa seti den kampu lontu a tenti pe yu kan miti nanga Gado, ma no tumsi krosbei fu en.

₃A kampu fu Yuda sa seti na a oostsei, a sei pe a son e opo. Drape a fraga fu den sa de. A kapten fu den bakapikin fu Yuda ben de Nakson, a manpikin fu Aminadab. ₄A legre fu en ben abi seibitenti-na-fo dusun nanga siksi hondro man. ₅Na a srefi sei fu Yuda a lo fu Isakar sa seti ensrefi. A kapten fu den bakapikin fu Isakar ben de Netanel, a manpikin fu Suar. ₆A legre fu en ben abi feifitenti-na-fo dusun nanga fo hondro man. ₇A lo fu Sebulon sa de na a sei dati tu. A kapten fu den bakapikin fu Sebulon ben de Eliab, a manpikin fu Helon. ₈A legre fu en ben abi feifitenti-na-seibi dusun nanga fo hondro man. ₉Ala den mansma san den ben teri ini a kampu fu Yuda, ben de wan hondro aititenti-na-siksi dusun nanga fo hondro man. Den ben mus de den fosiwan di ben mus broko a kampu fu den te den ben o hari go moro fara.

₁₀A kampu fu Ruben sa seti na zuidsei. Drape a fraga fu den sa de. A kapten fu den bakapikin fu Ruben ben de Elisur, a manpikin fu Sedeur. ₁₁A legre fu en ben abi fotenti-na-siksi dusun nanga feifi hondro man. ₁₂Na a srefi sei fu Ruben a lo fu Simeon sa seti ensrefi. A kapten fu den bakapikin fu Simeon ben de Selumiyel, a manpikin fu Surisadai. ₁₃A legre fu en ben abi feifitenti-na-neigi dusun nanga dri hondro man. ₁₄A lo fu Gad sa de na a sei dati tu. A kapten fu den bakapikin fu Gad ben de Elyasaf, a manpikin fu Reuel. ₁₅A legre fu en ben abi fotenti-na-feifi dusun nanga siksi hondro nanga feifitenti man. ₁₆Ala den mansma san den ben teri ini a kampu fu Ruben, ben de wan hondro feifitenti-na-wan dusun nanga fo hondro feifitenti man. Den sa de nomru tu di mus broko a kampu fu den te den ben o hari go moro fara.

₁₇Baka dati a tenti pe yu kan miti nanga Gado nanga a kampu fu den Lefitisma sa broko. Den de leti na mindri fu den tra kampu. Leki fa den kampu seti na so den mus broko den tu. Ibriwan tapu en eigi presi, pe a fraga fu en de.

₁₈A kampu fu Efraim sa de na a westsei. Drape a fraga fu den sa de. A kapten fu den bakapikin fu Efraim ben de Elisama, a manpikin fu Amihud. ₁₉A legre fu en ben abi fotenti dusun nanga feifi hondro man. ₂₀Na a srefi sei fu Efraim a lo fu Manase sa seti ensrefi. A kapten fu den bakapikin fu Manase ben de Gamliyel, a manpikin fu Pedasur. ₂₁A legre fu en ben abi dritenti-na-tu dusun nanga tu hondro man. ₂₂A lo fu Benyamin sa de na a sei dati tu. A kapten fu den bakapikin fu Benyamin ben de Abidan, a manpikin fu Gidoni. ₂₃A legre fu en ben abi dritenti-na-feifi dusun nanga fo hondro man. ₂₄Ala den mansma san den ben teri ini a kampu fu Efraim, ben de wan hondro aiti dusun nanga wan hondro man. Den sa de nomru dri di ben mus broko a kampu fu den te den ben o hari go moro fara.

₂₅A kampu fu Dan sa de na a noordsei. Drape a fraga fu den sa de. A kapten fu den bakapikin fu Dan ben de Akiyeser, a manpikin fu Amisadai. ₂₆A legre fu en ben abi siksitenti-na-tu dusun nanga seibi hondro man. ₂₇Na a srefi sei fu en a lo fu Aser sa seti ensrefi. A kapten fu den bakapikin fu Aser ben de Pagiyel, a manpikin fu Okran. ₂₈A legre fu en ben abi fotenti-na-wan dusun nanga feifi hondro man. ₂₉A lo fu Naftali sa de na a sei dati tu. A kapten fu den bakapikin fu Naftali ben de Akira, a manpikin fu Enan. ₃₀A legre fu en ben abi feifitenti-na-dri dusun nanga fo hondro man. ₃₁Ala den mansma san den ben teri ini a kampu fu Dan, ben de wan hondro feifitenti-na-seibi dusun nanga siksi hondro man. Den sa de den laste grupu di ben mus broko a kampu fu den ten den ben o hari go moro fara.”

₃₂Disi ben de den famiri fu den Israelitisma di den ben teri. A heri legre ben abi siksi hondro dri dusun nanga feifi hondro nanga feifitenti man. ₃₃Ma den no ben teri den Lefitisma makandra nanga den tra Israelitisma, leki fa MASRA ben komanderi Moses.

₃₄Den Israelitisma ben du ala sani so leki fa MASRA ben komanderi Moses. Ibri sma ben de pe en fraga ben de. A srefi fasi den ben broko a kampu fu den tu. Den ben bigin na den afo fu seti ibrisma na en eigi famiri.

₁Disi ben de den bakapikin fu Aaron nanga Moses, na ini den dei di MASRA ben taki nanga Moses na tapu a bergi fu Sinai. ₂Disi ben de den nen fu den manpikin fu Aaron: a fosiwan ben de Nadab, dan yu ben e kisi Abihu, Eleasar nanga Itamar. ₃Disi ben de den nen fu den manpikin fu Aaron, den wan di a ben salfu leki priester nanga di a ben poti fu du priester wroko. ₄Na ini a dreisabana fu Sinai, Nadab nanga Abihu ben fadon dede na fesi MASRA, fu di den ben leti wan ofrandi nanga faya di no fiti. Fu di den no ben abi manpikin, meki Eleasar nanga Itamar ben du a priester wroko na ini den dei di den p'pa Aaron ben de na libi.

₅Dan MASRA ben taigi Moses taki: ₆“Meki a lo fu Lefi kon na fesi, fu wroko gi Aaron. Den sa de yepiman gi priester Aaron. ₇Den sa du wroko gi a priester nanga gi a heri folku. A wroko disi den sa du fesi a tenti pe yu kan miti nanga Gado. Dati na a wroko di den mus na a santa tenti. ₈Den sa sorgu gi ala sani di de na a tenti pe yu kan miti nanga Gado èn du wroko gi den Israelitisma na a santa tenti. ₉Yu sa libi den Lefitisma gi Aaron nanga den manpikin fu en wawan. Den sa yepi Aaron fu du wroko gi ala den Israelitisma. ₁₀Komanderi Aaron nanga den manpikin fu en fu du a priesterwroko. Ala tra sma di sa go krosbei fu a santa presi sa dede.”

₁₁MASRA ben taigi Moses moro fara taki: ₁₂“Luku, Mi e teki den Lefitisma fu Mi srefi. Den sa de fu Mi ini a presi fu ala den fosi pikin fu den Israelitisma, den di kmoto leki fosiwan na ini den m'mabere. ₁₃Bika ala fosi pikin na fu Mi. A dei di Mi ben e kiri ala fosi pikin fu den sma fu Egipte, Mi ben poti ala den fosi pikin fu den Israelitisma, di fu libisma nanga di fu den meti, aparti gi Misrefi. Den na fu Mi. Mi na MASRA.”

₁₄MASRA taigi Moses na ini a Sinaisabana tu taki: ₁₅“Teri den famiri fu den Lefitisma, bigin na den afo fu den. Skrifi ala manpikin fu wan mun nanga moro owru.” ₁₆Ne Moses teri den so leki fa MASRA ben komanderi en.

₁₇Den nen fu den manpikin fu Lefi ben de: Gerson, Kehat nanga Merari. ₁₈Den bakapikin fu Gerson ben de Libni nanga Simi. ₁₉Den bakapikin fu Kehat ben de Amram, Yishar, Hebron nanga Usiyel. ₂₀Den bakapikin fu Merari ben de Makli nanga Musi. Disi na den famiri fu den bakapikin fu den Lefitisma.

₂₁Den bakapikin fu Libni nanga Simi e meki a famiri fu Gerson. Na den ben de den bakapikin fu Gerson. ₂₂Ala den mansma ini a libimarki fu wan mun nanga moro owru, di den ben teri, ben de seibi dusun nanga feifi hondro man. ₂₃Den bakapikin fu den ben meki den kampu na a westsei, baka a santa tenti. ₂₄A edeman fu a famiri fu den ben de Elyasaf, a manpikin fu Lael. ₂₅A wroko fu den Gersonitisma na a tenti pe wi kan miti nanga Gado, ben de fu sorgu gi den duku di ben e tapu a tenti nanga a santa tenti, nanga den duku di ben e anga na a mofodoro fu a tenti pe wi kan miti nanga Gado. ₂₆Moro fara gi den duku di ben e skotu a pren, a santa tenti nanga a altari, nanga gi ala den titei di ben de fanowdu fu du a wroko.

₂₇Den bakapikin fu Amram, Yishar, Hebron nanga Usiyel ben e meki a famiri fu Kehat. Na den na den bakapikin fu Kehat. ₂₈Ala mansma ini a libimarki fu wan mun nanga moro owru di den ben teri, ben de aiti dusun nanga siksi hondro man: Den ben abi a sorgu fu a santa presi. ₂₉Den bakapikin fu Kehat ben meki den kampu na a zuidsei, sei a santa tenti. ₃₀A edeman fu a famiri fu den ben de Elisafan, a manpikin fu Usiyel. ₃₁Den ben mus sorgu gi a santa kisi, a tafra, a kandelaar, den altari, den santa wrokosani di ben de fanowdu fu du a wroko, a garden di ben tapu a santa presi nanga ala sani di ben de fanowdu fu du a wroko. ₃₂A fesiman fu ala den edeman fu den famiri fu Lefi ben de Eleasar, wan fu den manpikin fu priester Aaron. A ben abi a frantwortu abra ala sma di ben e wroko na ini a santa presi.

₃₃Den bakapikin fu Makli nanga Musi ben e meki a famiri fu Merari. Na den na den bakapikin Merari. ₃₄Ala mansma ini a libimarki fu wan mun nanga moro owru di den ben teri ben de siksi dusun nanga tu hondro man. ₃₅A edeman fu den famiri fu den bakapikin fu Merari ben de Suriyel, a manpikin fu Abikail. Den ben meki den kampu na a noordsei, sei a santa tenti. ₃₆Den bakapikin fu Merari ben kisi a wroko fu sorgu gi den planga fu a santa tenti, den barki, den postu, den futupisi nanga ala tra sani di ben de fanowdu fu du a wroko. ₃₇Moro fara gi den postu fu a pren, den futupisi, den pen nanga den titei fu en.

₃₈Na fes'sei fu a santa tenti, fes'sei fu a tenti pe yu ben kan miti nanga Gado, na a oostsei, pe son e opo, na drape Moses, Aaron nanga den manpikin fu Aaron ben meki den kampu fu den. Den ben mus du ala sani gi den Israelitisma na ini a santa presi. Ibrisma di no ben fiti fu go drape, èn di ben go krosbei, ben mus dede.

₃₉Ala den mansma fu den famiri fu den Lefitisma, na ini a libimarki fu wan mun nanga moro owru, di MASRA ben komanderi Moses nanga Aaron fu teri, ben de tutenti-na-tu dusun man.

₄₀Dan MASRA taigi Moses: “Teri ala den fosi manpikin fu den Israelitisma fu wan mun nanga moro owru èn skrifi den nen na tapu papira. ₄₁Teki den Lefitisma gi Mi na a presi fu ala den fosi manpikin fu den Israelitisma. Yu mus teki den fosi pikin fu den meti fu Lefitisma tu, na a presi fu ala den fosi pikin fu den meti fu den Israelitisma. Mi na MASRA.” ₄₂Ne Moses teri den fosi manpikin fu den Israelitisma, so leki fa MASRA ben komanderi en. ₄₃Ala den fosi manpikin fu den Israelitisma, fu wan mun nanga moro owru, di den ben teri, ben de tutenti-na-tu dusun nanga tu hondro seibitenti-na-dri.

₄₄Dan MASRA taigi Moses: ₄₅“Teki den Lefitisma gi Mi na a presi fu ala den fosi manpikin fu den Israelitisma. Teki den meti fu den Lefitisma tu na a presi fu ala den fosi pikin fu den meti fu den Israelitisma. Bika den Lefitisma na fu Mi. Mi de MASRA. ₄₆Den fosi manpikin fu den Israelitisma ben abi tu hondro seibitenti-na-dri sma moro furu moro den fosi manpikin fu den Lefitisma. ₄₇Gi den sma dati yu mus pai gi ibriwan feifi solfru moni. Den solfru moni disi mus wegi tutenti gera, leki a solfrumoni fu a santa presi. ₄₈A moni disi yu sa gi Aaron nanga den manpikin fu en leki pai gi den Israelitisma di ben furu moro den Lefitisma.” ₄₉So Moses teki a moni, di ben mus pai gi den Israelitisma di ben furu moro den Lefitisma, ₅₀na den fosi manpikin fu den Israelitisma. A piki wan dusun dri hondro siksitenti-na-feifi pisi solfru moni, di ben e wegi a srefi leki a solfrumoni fu a santa presi. ₅₁Dan Moses gi a moni di a piki, na Aaron nanga den manpikin fu en, soleki fa MASRA ben komanderi en.

₁Yesus go wan tra leisi baka ini wan kerki. Drape wan man ben de di ben abi wan malengri anu. ₂Den man ben luru Yesus fu si efu A ben o dresi a man tapu a sabatdei. Nanga dati den ben kan tyari En go na krutu. ₃Dan Yesus taigi a man nanga a malengri anu taki: “Kon tnapu dya pe ala sma kan si yu.” ₄Ne A aksi den man taki: “San a wèt e taki un kan du tapu a sabatdei? Bun noso ogri? Fu hori wan sma na libi, noso fu kiri en?” Ma den hori den mofo. ₅Nanga atibron Yesus luku ala den sma di ben lontu En. Ma A ben firi sari fu a fasi fa den ben tranga den ati. Dan A taigi a man taki: “Langa yu anu!” A man langa en anu, dan a kon betre. ₆Dan den Fariseiman gwe. Wantron den go taki nanga den bakaman fu Herodes fu suku wan fasi fu kiri Yesus.

₇Yesus go nanga den man di ben e teki leri fu En na a Meer fu Galilea. Wan bigi grupu sma fu Galilea ben go tu. Sosrefi bigi grupu sma di ben kmopo fu Yudea, ₈Yerusalem nanga Idumea, nanga sma fu a tra sei fu a Yordanliba, nanga sma di ben e libi ini a birti fu Tirus nanga Sidon. Bika den ben yere fu den sani san Yesus du. ₉Yesus taigi den man di ben e teki leri fu En fu den poti wan boto klari, fu te a bigi grupu sma ben o pusu tumsi kon na En tapu. ₁₀Bika A ben dresi furu sma. Dat' meki ala sma di ben abi wan siki ben pusu kon na En tapu, fu kan fasi En. ₁₁Te den takruyeye ben si Yesus, den ben trowe densrefi na En fesi, dan den ben bari taki: “Yu na a Manpikin fu Gado.” ₁₂Ma Yesus ben warskow den trangatranga taki den no mus taigi no wan sma suma na En.

₁₃Yesus kren go tapu wan bergi, èn suma A ben wani, A kari kon na En. Den go na En, ₁₄dan Yesus teki twarfu man fu tan waka nanga En. A ben o seni den fu go preiki, ₁₅èn A ben o gi den makti fu puru takruyeye tapu sma. ₁₆Disi na den twarfu man di A teki: Simon, di A ben kari Petrus, ₁₇Yakobus nanga Yohanes, den manpikin fu Sebedeus. Yesus ben kari den tu man dati Boanerges, san wani taki: pikin fu dondru. ₁₈Moro fara A teki: Andreas, Filipus, Bartolomeus, Mateus, Tomas nanga Yakobus, a manpikin fu Alfeus. Dan A teki Tadeus, Simon fu a grupu fu den Seloten, ₁₉nanga Yudas Iskariot, a man di seri En.

₂₀Dan Yesus go na oso. Agen wan lo sma kon na En, taki En nanga den man di ben e teki leri fu En no ben man feni wan okasi fu nyan. ₂₁Di den famiri fu Yesus yere dati, den go fu teki En. Bika sma ben e taki: “Yesus edesei no e wroko bun.”

₂₂Den sabiman fu Gado wèt, di ben kmopo kon fu Yerusalem, ben taki: “Na Beelsebul, a edeman fu den takruyeye, de na En tapu. Dat' meki A man puru takruyeye tapu sma.” ₂₃Yesus kari den kon na En, dan A gi den wantu agersitori. A taki: “Fa Satan kan puru Satan? ₂₄Efu den sma ini wan kondre e feti nanga densrefi, a kondre dati o broko. ₂₅Èn efu den sma ini wan oso no man feni en nanga densrefi, den o panya. ₂₆We, efu Satan e feti nanga ensrefi èn efu prati de ini en kondre, dan a no o man tan rigeri èn a makti fu en e kon na wan kba. ₂₇No wan sma kan broko go ini a oso fu wan tranga man fu fufuru en sani, efu a no tai en fosi. Baka te a tai en, dan fosi a o man teki en sani tyari gwe. ₂₈Fu tru Mi e taigi un taki: Libisma kan kisi pardon fu ala sondu, srefi efu den ben afrontu Gado. ₂₉Ma a sma di e afrontu a Santa Yeye, noiti no o kisi pardon fu a sani dati. Fu têgo a sondu dati o de na en tapu.” ₃₀Yesus taki so fu di den ben taki: “Wan takruyeye de na En tapu.”

₃₁Den brada fu Yesus nanga En m'ma kon na En. Den ben tnapu na dorosei, dan den seni kari En. ₃₂Wan bigi grupu sma ben sidon lontu Yesus. Dan den taigi En taki: “Yere, Yu m'ma nanga den brada fu Yu de na dorosei. Den e seni kari Yu.”

₃₃Yesus piki den taki: “Suma na Mi m'ma nanga den brada fu Mi dan?” ₃₄Dan Yesus luku den sma di ben lontu En, A taki: “Unu na Mi m'ma nanga den brada fu Mi. ₃₅Bika ala sma di e du a wani fu Gado, na Mi brada, Mi s'sa nanga Mi m'ma.”