Dag 55 van 365- Numeri 9-11 en Marcus 5:1-20

₁MASRA taki nanga Moses ini a Sinaisabana. Disi ben de ini a fosi mun fu a di fu tu yari baka di den sma fu Israel kmoto na ini Egipte. A taigi en taki: ₂“Den sma fu Israel sa hori a Paskafesa tapu a ten di Mi poti. ₃Tapu a tin-na-fo dei fu a mun disi un sa hori en, te neti e fadon. Te un o hori a fesa un sa hori en tapu a ten di Mi poti èn un mus du ala den sani di un mus tan du èn hori unsrefi na ala den sani na san un mus hori unsrefi.” ₄Dan Moses taigi den sma fu Israel fu hori a Paskafesa. ₅So den hori a Paskafesa ini a fosi mun, tapu a di fu tin-na-fo dei fu a mun. Den du en ini a Sinaisabana di neti ben e fadon, leki fa MASRA ben taigi Moses taki den sma fu Israel mus du en.

₆Ma wantu man ben de di no ben krin fu di den ben fasi a dedeskin fu wan libisma. So den man disi no ben o man nyan a Paskafesa a dei dati. A srefi dei dati den man disi go na Moses nanga Aaron. ₇Dan den man taigi Moses nanga Aaron taki: “Un no krin fu di wi fasi a dedeskin fu wan libisma. Taigi wi efu disi wan taki tak' wi no kan tyari a ofrandi gi MASRA makandra nanga den tra sma fu Israel, tapu a ten di a ofrandi mus tyari.” ₈Ne Moses piki den taki: “Un wakti dyaso. Mi sa go arki san MASRA sa taki tak' un mus du.” ₉Ne MASRA taigi Moses taki: ₁₀“Taigi den sma fu Israel taki: ‘Awinsi wan sma no krin fu di a fasi a dedeskin fu wan libisma noso efu wan sma go na waka na wan farawe kondre, disi no sa hori en fu a no nyan a Paska fu MASRA. Unu nanga den bakapikin fu unu mus hori un na a sani disi. ₁₁Ma dan a sma sa nyan en ini a di fu tu mun tapu a di fu tin-na-fo dei. A sa nyan en te neti e fadon èn a sa nyan en makandra nanga brede di meki sondro dyesi èn nanga bita spesrei. ₁₂Noti fu en no mus tan te a tamara fu en. No wan bonyo fu en mus broko tu. A sa hori ensrefi na ala sani na san a mus hori ensrefi te a o nyan en. ₁₃Ma efu wan sma no hori a Paskafesa ala di a krin èn aladi a no de so taki na wan farawe kondre a go, dan den mus yagi sowan sma fu têgo kmoto na mindri fu den Israelitisma. Bika a no tyari a ofrandi fu MASRA tapu a ten di a ben mus tyari en. A sma dati sa kisi a strafu di fiti en. ₁₄Efu wan doroseisma e tan na yu èn a wani nyan a Paska fu MASRA, a kan nyan en. Ma a sa du ala sani di un mus tan du, nanga ala sani na san un mus tan hori unsrefi, te un o nyan a Paska. A doroseisma nanga a sma di gebore leki wan Israelitisma sa hori den na a sani disi.’ ”

₁₅Tapu a dei di den ben kba bow a santa tenti, a wolku ben kon abra a santa tenti, sobun abra a tenti fu a ferbontu. Te neti a ben de fu si leki wan faya tapu a santa tenti, te leki mamanten. ₁₆Na so a ben e go nomonomo. A wolku ben e tapu a tenti èn te neti a ben de fu si leki wan faya. ₁₇Te a wolku ben kmoto tapu a tenti, den Israelitisma ben e broko a kampu fu hari go moro fara. Pe a wolku ben tan tnapu, drape den ben e meki a kampu baka. ₁₈Den Israelitisma ben e broko a kampu te MASRA ben taki tak' den mus broko en, èn den ben e meki a kampu baka te MASRA ben taki so. Solanga a wolku ben de tapu a santa tenti, den ben e tan drape. ₁₉Efu a wolku ben tan langa tapu a santa tenti, dan de Israelitisma no ben e broko a kampu fu hari go moro fara tu. Den ben e hori densrefi na san MASRA ben taigi den. ₂₀Son leisi a wolku ben e tan wantu dei tapu a santa tenti. Dan den Israelitisma ben e meki a kampu te MASRA ben taki tak' den mus meki en, èn den ben e broko en te MASRA ben taki so. ₂₁Son leisi a wolku ben e tan fu mamanten te leki neti nomo. Efu a wolku ben kmoto mamanten fu en presi, dan den ben e broko a kampu fu hari go moro fara. A no ben abi trobi efu a ben de neti noso deiten. Efu a wolku ben kmoto fu en presi, den ben e broko a kampu. ₂₂Efu a wolku ben e tan moro langa tapu a santa tenti, tu dei, wan mun noso moro langa, den Israelitisma no ben e broko a kampu fu hari go moro fara. Te a wolku ben kmoto fu en presi fosi, dan den ben e broko a kampu. ₂₃Den ben e meki den kampu te MASRA ben komanderi den, èn den ben e broko a kampu fu hari go moro fara te MASRA ben taki so. Den ben e hori densrefi na san MASRA ben taigi Moses fu taigi den.

₁MASRA taigi Moses taki: ₂“Meki tu solfru trompet. Meki den fu solfru di naki plata. Den sa dini fu kari ala sma kon na wan èn a sa de wan marki tu te un mus broko a kampu fu hari go moro fara. ₃Te den bro wan syatu leisi tapu ala tu trompet, dan ala sma sa kon makandra na yu na mofodoro fu a tenti pe yu kan miti nanga Gado. ₄Te den bro wan syatu leisi tapu wan fu den trompet nomo, dan na soso den fesiman, den edeman fu Israel, sa kon na yu. ₅Te den bro wan langa leisi, dan ala den legre di de na a oostsei sa broko den kampu fu hari go moro fara. ₆Te den bro wan langa leisi fu a di fu tu tron, dan den legre di de na a zuidsei sa broko den kampu. Den sa bro wan langa leisi te den kampu mus broko. ₇Fu kari ala sma kon na wan, den sa bro wan syatu leisi nomo. Den no sa bro wan langa leisi. ₈Na den manpikin fu Aaron, sobun den priester, sa bro tapu den trompet. Na wan sani di un nanga den bakapikin fu unu sa tan du. ₉Te un de ini un kondre èn un e hari go feti nanga den feyanti fu unu di e trobi unu, un sa bro wan langa leisi tapu den trompet. Dan MASRA, un Gado, sa memre unu èn A sa ferlusu unu fu un feyanti. ₁₀Tapu den dei di un e meki prisiri, tapu den fesadei nanga tapu den dei fu a nyun mun, un sa bro wan syatu leisi tapu den trompet, te un e bron meti leki ofrandi nanga te un e tyari freide-ofrandi. Disi sa meki Gado memre unu. Mi na MASRA, un Gado.”

₁₁Ini a di fu tu mun fu a di fu tu yari, a wolku ben kmoto fu en presi tapu a tenti fu a ferbontu. Disi ben de tapu a di fu tutenti dei fu a mun. ₁₂Dan den Israelitisma kmoto na ini a Sinaisabana. Den kmoto tapu a fasi fa den ben leri taki den ben mus du en. Dan a wolku tan tnapu ini a Paransabana. ₁₃Disi ben de a fosi leisi di den ben broko a kampu fu hari go moro fara, tapu a fasi di MASRA ben komanderi Moses taki den mus du en. ₁₄Den legre di ben de na a sei pe a fraga fu Yuda de, ben de den fosi wan di ben broko den kampu. A kapten fu a legre fu Yuda ben de Nakson, a manpikin fu Aminadab. ₁₅A kapten fu a legre fu Isakar ben de Netanel, a manpikin fu Suar. ₁₆A kapten fu a legre fu Sebulon ben de Eliab, a manpikin fu Helon. ₁₇Baka dati den broko a santa tenti. Den bakapikin fu Gerson nanga Merari di e tyari a santa tenti sa broko den kampu tu. ₁₈Dan den legre di de na a sei pe a fraga fu Ruben de, sa broko den kampu. A kapten fu a legre fu Ruben ben de Elisur, a manpikin fu Sedeur. ₁₉A kapten fu a legre fu Simeon ben de Selumiyel, a manpikin fu Surisadai. ₂₀A kapten fu a legre fu Gad ben de Elyasaf, a manpikin fu Rehuel. ₂₁Baka dati den bakapikin fu Kehat sa broko den kampu. Den ben e syow den santa sani. Te den ben e meki santa tenti baka, a ben e meki fosi den bakapikin fu Kehat ben doro na a presi pe a nyun kampu ben o meki. ₂₂Dan den legre di de na a sei pe a fraga fu Efraim de, sa broko den kampu. A kapten fu a legre fu Efraim ben de Elisama, a manpikin fu Amihud. ₂₃A kapten fu a legre Manase ben de Gamliyel, a manpikin fu Pedasur. ₂₄A kapten fu a legre fu Benyamin ben de Abidan, a manpikin fu Gidoni. ₂₅Den legre di de na a sei pe a fraga fu Dan de, sa de den laste wan di sa broko den kampu. A kapten fu a legre fu Dan ben de Akiyeser, a manpikin fu Amisadai. ₂₆A kapten fu a legre fu Aser ben de Pagiyel, a manpikin fu Okran. ₂₇A kapten fu a legre fu Naftali ben de Akira, a manpikin fu Enan. ₂₈Disi ben de a fasi fa den legre fu den Israelitisma ben mus broko den kampu èn a fasi disi den ben e hari go moro fara.

₂₉Dan Moses taigi Hobab taki: “Wi e hari go na a presi fu san MASRA taigi wi taki: ‘Mi sa gi en na unu.’ Kon nanga wi. Yu o abi en bun na wi, bika MASRA taigi Israel taki den o abi en bun.” Hobab ben de a manpikin fu Rehuel. Rehuel ben de fu Midyan èn a ben de a p'pa fu a frow fu Moses. ₃₀Ma Hobab piki Moses taki: “Nono. Mi wani go baka na mi kondre nanga den famiri fu mi.” ₃₁Dan Moses taigi en taki: “No gwe libi wi. Yu sabi den presi ini a sabana pe wi kan meki wi kampu. Yu na a sma di kan tyari wi. ₃₂Efu yu kon nanga wi, dan wi sa meki yu teki prati ini den bun di MASRA sa gi unu.”

₃₃Dan den kmoto na a bergi fu MASRA. Den hari dri dei langa go moro fara. A kisi fu a ferbontu fu MASRA ben e go na den fesi fu suku wan presi gi den fu rostu. ₃₄Te deiten a wolku fu MASRA ben e anga abra den te den ben e broko a kampu fu hari go moro fara. ₃₅Te a kisi ben e hari go moro fara Moses ben e taki:

₁A folku ben e krutukrutu èn disi no ben de wan bun sani na a yesi fu MASRA. MASRA ben yere san den ben taki èn a ben gi En atibron. Ne a faya fu MASRA bigin bron na den mindri. A faya bigin bron na seisei fu a kampu. ₂Dan a folku bari suku Moses. Ne Moses begi MASRA dan a faya dede. ₃Na fu dat'ede den e kari a presi Tabera, fu di a faya fu MASRA ben bron na den mindri.

₄Wan grupu fu ala sortu sma fu tra folku ben de mindri den Israelitisma. Nyanyan no ben sari den sma disi. So den Israelitisma srefi ben e bigin knor'knoru. Den taki: “Suma o gi wi meti fu nyan? ₅Wi e prakseri a fisi di wi ben e nyan fu soso na ini Egipte. Den komkomro, den watramun, a supuwiwiri, a ayun nanga a konofroku. ₆Ma now wi e drei gwe. Not'noti no dyaso. Soso a mana disi wi e si.” ₇A mana ben gersi koriandersiri, ma a ben abi a kloru fu balsemhars. ₈A folku ben e panya go na alasei fu suku a mana. Den ben e mara en ini pikin miri noso den ben stampu en na ini mata. Den ben e bori en na ini patu èn den ben e meki kuku fu en. Den kuku ben e tesi leki den ben baka na ini oli. ₉Ala neti te a dow ben e fadon tapu a kampu, a mana ben e fadon tapu a kampu tu.

₁₀Moses ben e yere fa a heri folku, ala den lo, ben e krutukrutu na mofodoro fu den tenti èn a lasi ati di MASRA ati bron srefsrefi. ₁₁Ne a aksi MASRA taki: “Fu sanede Yu e libi so nanga mi? Fu sanede Yu no sori Yu knekti Yu bun-ati. Fu sanede Yu poti a lai fu a heri folku disi na tapu mi skowru? ₁₂A no mi ben tyari a folku disi ini mi bere. A no mi tyari den kon na grontapu tu. Dan fa Yu kan taigi mi taki: ‘Tyari den tapu yu anu. Leki fa den e tyari nyunyun pikin tapu den anu, na so yu mus tyari den go na a kondre di Mi sweri gi den afo fu yu taki Mi o gi den.’ ₁₃Pe mi o feni meti fu gi a heri folku disi? Den e krutu gi mi taki: ‘Gi unu meti fu nyan!’ ₁₄Mi wawan no man teki a sorgu fu a heri folku disi na mi tapu. A hebi tumsi gi mi. ₁₅Efu na so Yu wan du nanga mi dan sori mi Yu bun-ati, kiri mi, dan mi no sa pina moro langa.”

₁₆Ne MASRA piki Moses taki: “Teki seibitenti fesiman fu Israel. Den mus de man fu san yu sabi taki den na fesiman nanga tiriman fu a folku. Meki den kon tnapu na yu fesi na a tenti pe yu kan miti nanga Gado. ₁₇Dan Mi sa saka kon fu taki drape nanga yu. Mi sa teki wan pisi fu a Yeye di de na yu tapu poti na den tapu. So den sa yepi yu tyari a lai fu a folku dan yu wawan no abi fu tyari en. ₁₈Ma yu mus taigi a folku taki: ‘Un mus sorgu taki tamara mamanten un santa. Dan un o nyan meti. Bika un krutu gi MASRA taki: Suma sa gi un meti fu nyan? Un ben abi en so bun na ini Egipte. MASRA o gi unu meti fu nyan. Un o nyan meti! ₁₉A no wan noso tu dei nomo. A no feifi, tin noso tutenti dei nomo. ₂₀Ma wan heri mun langa te leki a e kmoto na ini un noso èn un e fuga fu en. Bika un si MASRA di de na un mindri leki noti èn un krutu taki un no sabi fu sanede un kmoto na ini Egipte.’ ” ₂₁Ne Moses taki: “Mi de dyaso nanga wan folku fu siksi hondro dusun sma. Dan fa Yu o man gi den meti fu nyan wan heri mun langa? ₂₂Pe wi o feni someni skapu nanga kaw fu srakti gi den te leki den no man nyan moro? Srefi efu wi ben fanga ala den fisi fu a se gi den, a no bo sari den.” ₂₃Ma MASRA piki Moses taki: “Yu denki taki disi na wan sani san Mi no man du? Mi sa meki yu si taki Mi o du san Mi taigi yu.”

₂₄Moses go na dorosei dan a taigi a folku san MASRA ben taki. Baka dati a teki seibitenti fesiman fu a folku, dan a meki den tnapu lontu a tenti. ₂₅Dan MASRA saka kon ini a wolku. A taki nanga Moses èn A teki wan pisi fu a Yeye di ben de na en tapu poti tapu den seibitenti fesiman. Di a Yeye ben de na den tapu den ben man taki san Gado ben e gi den fu taki. Baka dati den no ben man du disi moro. ₂₆Tu man, di ben nen Eldad nanga Medad, ben tan na baka ini a kampu. Den nen ben skrifi tu ma den no ben go na a tenti fu Gado. Di a Yeye kon na den tapu den bigin taki ini a kampu san Gado ben gi den fu taki. ₂₇Dan wan yonkuman lon go taigi Moses taki: “Eldad nanga Medad e taki san Gado e gi den fu taki ini a kampu.” ₂₈Ne Yosua, a manpikin fu Nun, di ben de a knekti fu Moses sensi di a ben yongu, taki: “Mi masra Moses, tapu den fu den no du dati.” ₂₉Ma Moses piki en taki: “Na dyompo yu wan dyompo gi mi? Mi winsi taki MASRA ben poti En Yeye tapu ala sma, meki a heri folku fu MASRA ben de profeiti.” ₃₀Di Moses taki dati a drai go baka na a kampu nanga den fesiman fu Israel.

₃₁Dan MASRA meki wan winti bigin wai. A winti ben wai fowru fu a se kon trowe tapu a kampu. Den ben didon alasei lontu a kampu tapu makandra, wan meter hei. Efu yu ben waka wan dei langa kmoto fu a kampu yu ben feni den ete. ₃₂Ne a folku bigin piki den fowru. A heri dei, a heri neti nanga a tamara mamanten fu en. A sma di ben piki a moro pikinso, ben piki sowan tu dusun kilo. Den ben poti den lontu a heri kampu fu drei. ₃₃Ma leki fa den ben poti a meti ini den mofo, fosi den kaw en srefi, MASRA lusu En atibron tapu folku èn A kiri wan lo fu den. ₃₄Dat' meki den e kari a presi dati Kibrot-Hatawa, fu di na drape den beri den sma di ben feni taki nyanyan no ben sari den.

₃₅Fu Kibrot-Hatawa a folku hari go na Haserot. Dan den tan wan pisten na Haserot.

₁Na so den doro na a tra sei fu a meer ini a kontren fu den sma fu Gerasa. ₂Fa Yesus kmopo ini a boto, wan man kmopo ini a berpe kon na En. A man disi ben abi takruyeye na en tapu ₃èn a ben e tan ini a berpe. No wan sma ben man tai en hori moro, wan keti srefi no ben yepi. ₄Bika furu leisi den ben tai en nanga keti, èn den ben bui en na en futu. Ma a ben koti den keti èn a ben broko den bui. A man ben tranga sote taki no wan sma no ben man nanga en. ₅Dei nanga neti a ben waka lontu mindri den grebi èn tapu den bergi e meki babari e naki ensrefi nanga ston. ₆Yesus ben de farawe ete di a man si En. A lon go na Yesus, dan a trowe ensrefi na En fesi. ₇A bari nanga tranga sten taki: “Yesus, Manpikin fu a Moro Hei Gado, san Yu wani nanga mi? Mi e begi Yu ini a nen fu Gado: No pina mi!” ₈Bika Yesus ben bari en taki: “Yu takruyeye, kmopo tapu a man!” ₉Dan Yesus aksi en taki: “Fa yu nen?” A piki taki: “Mi nen na Hilahila, bika un furu.” ₁₀Dan a begi Yesus tangitangi fu A no yagi den puru ini a birti. ₁₁Now yu ben abi bun furu agu drape di ben e nyan tapu a bergiskin. ₁₂Den takruyeye begi Yesus taki: “Seni un go na den agu, fu un kan go na ini den.” ₁₃So Yesus meki den go. Den takruyeye kmopo tapu a man go na ini den agu. Dan den agu lon saka fu a bergi go ini a meer. Den ben de tu dusun agu so di dede ini a watra.

₁₄Den man di ben luku den agu, lon gwe. Den go ini a foto nanga den presi ini a kontren fu a foto, go ferteri san ben psa. So ala den sma kon fu si san psa. ₁₅Den go na Yesus, dan den si a man sidon drape di ben abi hilahila takruyeye na en tapu. A ben weri krosi èn a ben de ensrefi. Ne ala den sma kon frede. ₁₆Den sma di si fa ala sani waka, ferteri den tra sma san ben psa nanga a man di ben abi den takruyeye na en tapu, nanga san ben psa nanga den agu. ₁₇Dan den sma bigin begi Yesus tangitangi fu A kmopo ini a birti fu den. ₁₈Di Yesus ben e go ini a boto, a man aksi En efu a kan go nanga En. ₁₉Ma Yesus no ben wani. A taigi en taki: “Go na oso na den sma fu yu, dan yu ferteri den ala sani san Gado du gi yu, èn fa A ben abi sari-ati nanga yu.” ₂₀So a man bigin waka ini a kontren san den ben kari Dekapolis e ferteri san Yesus du gi en. Èn ala den sma ben ferwondru.