Dag 59 van 365- Numeri 20-22 en Marcus 7:1-23

₁Ini a fosi mun ala den Israelitisma doro ini a Sinsabana, dan den meki den kampu na Kades. Drape Miryam dede èn den bere en drape.

₂Di den sma no ben abi watra fu dringi, den kon tnapu lontu Moses nanga Aaron. ₃Dan a folku bigin meki trobi nanga Moses. Den taigi en taki: “Betre wi ben dede tu di den trawan ben dede na MASRA fesi. ₄Fu sanede yu tyari a folku fu MASRA kon ini a dreisabana disi? Fu meki wi nanga den meti fu wi dede? ₅Fu sanede yu meki wi hari kmoto na ini Egipte fu tyari wi kon ini a birti dyaso pe sma no man libi? Graan no e gro dyaso, figabon no e de dyaso, droifibon nanga granaki-apra no e gro dyaso. Watra srefi no dyaso fu wi dringi.” ₆Ne Moses nanga Aaron kmoto na mindri den sma, dan den go na mofodoro fu a tenti pe yu kan miti nanga Gado. Drape den fringi densrefi nanga fesi na gron. Dan a glori fu MASRA ben de fu si gi den. ₇Ne MASRA taigi Moses taki: ₈“Teki a wakatiki dan yu e meki ala sma kon makandra. Yu nanga yu brada Aaron tu. Leti na den fesi yu mus taki nanga a bergiston, dan a sa gi watra. Yu sa meki watra kmoto ini a bergiston fu ala den sma nanga den meti fu den dringi.” ₉Ne Moses teki a wakatiki di ben e tan na MASRA fesi, leki fa A ben taigi en fu du. ₁₀Moses nanga Aaron meki ala den sma kon makandra fesi a bergiston, dan a taigi den taki: “Un arki, unu di no wan arki. Wi sa meki watra kmoto gi unu ini a bergiston disi.” ₁₁Ne Moses opo en anu, dan a naki a bergiston tu leisi nanga en wakatiki. Dan furu watra kmoto ini a bergi taki ala sma nanga den meti fu den ben man dringi. ₁₂Ma MASRA taigi Moses nanga Aaron taki: “Fu di un no poti un fertrow na Mi tapu, èn fu di un no meki den Israelitisma si taki Mi na wan santa Gado, un no sa tyari a folku go ini a kondre di Mi gi den.” ₁₃Disi na a watra fu Meriba, pe den Israelitisma ben krutu nanga MASRA, èn pe A meki den si En santa fasi.

₁₄Dan Moses seni boskopuman fu Kades go na a kownu fu Edom nanga a boskopu taki: “Disi na san yu brada Israel seni taigi yu: ‘Yu sabi ala den problema di miti wi. ₁₅Yu sabi fa den afo fu wi ben hari go na Egipte, fa wi ben tan libi na ini Egipte gi wan langa ten èn fa den sma fu Egipte libi takru nanga den afo fu wi. ₁₆Ne wi begi MASRA èn A arki wi. A seni wan engel fu tyari wi kmoto na ini Egipte. Luku, now wi de na Kades, wan foto na a lantyi fu a kondre fu yu. ₁₇Wi e begi yu primisi fu hari psa ini a kondre fu yu. Wi no sa hari psa ini den gron nanga den droifidyari fu yu èn wi no sa dringi watra fu den peti fu yu. Wi san tan waka tapu a bigi pasi di den e kari a kownu pasi. Wi no sa beni go na kruktusei noso let'sei te leki wi psa a kondre fu yu.’ ” ₁₈Ma Edom piki taki: “Un no sa hari psa ini a kondre fu mi, noso mi o hari kon feti nanga unu.” ₁₉Ne den Israelitisma taigi en taki: “Wi o tan tapu a bigi pasi èn efu wi nanga den meti fu wi dringi watra fu yu, dan wi sa pai yu fu en. Wi no wani noti moro dan fu hari psa nanga futu.” ₂₀Ma Edom piki taki: “Un no sa hari psa.” Dan Edom hari kon miti den nanga wan bigi èn tranga legre. ₂₁Fu di Edom no ben wani fu Israel psa ini en kondre, Israel beni dan den psa na den sei.

₂₂So den kmoto fu Kades dan den hari go na a Horbergi, di didon na a lantyi fu kondre fu Edom tu. ₂₃Drape MASRA taigi Moses nanga Aaron taki: ₂₄“Aaron o kon na a kba fu en libi. A no sa kon ini a kondre di Mi gi den Israelitisma, fu di un no du san Mi taki di un ben de na a watra fu Meriba. ₂₅Teki Aaron nanga en manpikin Eleasar dan yu e kren a Horbergi nanga den ₂₆Meki Aaron puru en krosi dan yu e weri den gi en manpikin Eleasar. Dan Aaron sa dede go na den afo fu en.” ₂₇Moses du san MASRA taigi en fu du. Den kren go tapu a Horbergi leti na fesi fu ala sma. ₂₈Dan Moses meki Aaron puru en krosi, dan a weri den gi en manpikin Eleasar. Baka dati Aaron dede tapu a bergi. Dan Moses nanga Eleasar saka fu a bergi baka. ₂₉Di den sma kon ferstan taki Aaron ben dede, ala den Israelitisma row dritenti dei langa.

₁Di a kananiti kownu fu Arad, di ben e tan ini a Negebsabana, yere taki den Israelitisma ben de tapu a pasi fu Atarim e kon, a hari go feti nanga den dan a tyari wantu sma gwe leki srafu. ₂Ne den Israelitisma pramisi MASRA taki: “Efu Yu gi a folku disi abra ini a makti fu wi, wi sa broko den foto fu den pis'pisi te na gron.” ₃Dan MASRA arki san den Israelitisma aksi en. A gi a kananiti kownu abra ini den makti. Ne den Israelitisma kiri den alamala èn den broko den foto fu den pis'pisi te na gron. Dat' meki den e kari a presi dati Horma.

₄Di den Israelitisma kmoto fu a Horbergi den hari go na a sei fu a Riet Se, bika den ben wani beni lontu a kondre Edom. Ma ondropasi den sma no ben abi pasensi moro. ₅Dan den bigin krutu gi Gado nanga Moses taki: “Fu sanede yu meki wi kmoto na ini Egipte? Fu wi dede ini a sabana? Brede no de, watra no de èn wi e fuga fu a nyanyan disi di no abi tesi.” ₆Ne MASRA seni takru sneki go tapu a folku. Den sneki ben e beti den èn furu fu den Israelitisma dede. ₇Di dati psa a folku kon na Moses dan den taki: “Wi sondu, bika wi krutu gi MASRA nanga gi yu. Begi MASRA fu A seni den sneki gwe.” Ne Moses begi gi a folku. ₈Dan MASRA taigi Moses taki: “Meki wan takru sneki poti tapu wan langa tiki. A sma di opo en ede luku a sneki na a tiki, no sa dede te wan sneki beti en.” ₉Ne Moses meki wan kopro sneki dan a poti en tapu wan langa tiki. Ala sma di ben e opo en ede luku a kopro sneki te wan sneki ben beti en, ben e tan na libi.

₁₀Baka dati den Israelitisma hari kmoto fu drape dan den meki den kampu na Obot. ₁₁Di den kmoto fu Obot den meki den kampu ini a dreisabana, na a broko foto Abarim, di ben didon na oostsei fu Moab. ₁₂Baka di den broko a kampu drape den hari go na a dal pe a Seredliba e lon, dan den meki den kampu drape. ₁₃Baka dati den hari kmoto fu drape, dan den meki den kampu na abrasei fu Arnonliba. A liba disi e kmoto ini a kontren fu den Amoritisma èn a e lon psa ini a dreisabana. A liba disi e prati a kontren fu den Moabitisma nanga den Amoritisma. ₁₄Fu dat'ede den e taki ini a buku fu den feti fu MASRA taki: “Waheb di didon ini Sufa, ini a dal fu a Arnonliba, ₁₅den heihei pisi ini den dal, di e waka go te na Ar nanga pe a kontren fu Moab e bigin.” ₁₆Fu drape a e go moro fara na Beer. Dati na a watrabron pe MASRA ben taigi Moses taki: “Kari a folku kon na wan, dan Mi sa gi den watra.” ₁₇Ne Israel singi a singi disi:

₂₁Dan Israel seni boskopuman go na Sikon, a kownu fu den Amoritisma. Den ben mus aksi taki: ₂₂“Tangitangi, gi wi primisi fu hari psa ini yu kondre. Wi no sa beni dan wi waka psa ini den gron noso den droifidyari fu yu. Wi no sa dringi watra fu den peti fu yu. Wi sa tan tapu a bigi pasi te leki wi psa a kondre fu yu.” ₂₃Ma Sikon no ben wani fu Israel psa ini a kondre fu en. A kari a heri legre fu en kon na wan dan a hari go miti Israel ini a dreisabana dan den bigin feti nanga Israel na Yahas. ₂₄Ma den Israelitisma kiri den ini a feti dan den teki a kondre fu den abra fu a Arnonliba te go miti a Yabokliba. A liba disi ben e prati a kondre fu den Amoritisma nanga di fu den Amonitisma. Ma a sei fu den Amonitisma ben tranga fu teki abra. ₂₅Den Israelitisma teki ala den foto fu den Amoritisma abra dan den go libi na ini den. Srefi ini Hesbon nanga ala den dorpu fu en. ₂₆Hesbon ben de a foto pe Sikon, a kownu fu den Amoritisma ben e tan. A ben feti nanga a kownu fu Moab èn a ben puru a heri kondre na en anu te go miti a Arnonliba. ₂₇Dat' meki den powemaman e taki:

₃₁Na so den Israelitisma ben go libi ini a kondre fu den Amoritisma. ₃₂Dan Moses meki den go luku ini wan kibrifasi fa a foto Yaser tan. Baka dati den teki a foto nanga den dorpu fu en abra, dan den yagi den amoritisma gwe di ben e libi drape.

₃₃Baka dati den drai dan de hari go na a sei fu Basan. Ne Og a kownu fu Basan hari kon miti den nanga a heri folku fu en fu feti nanga den na Edrei. ₃₄Ma MASRA taigi Moses taki: “No frede en, bika Mi o gi en, en heri folku nanga a kondre fu en abra ini yu makti. Yu o du a srefi sani nanga en, leki fa yu du nanga Sikon, a kownu fu den Amoritisma di ben e libi na Hesbon.” ₃₅Dan so den fon Og, den manpikin fu en nanga a heri folku fu en. Den fon den te na a laste man, dan den teki a kondre fu en abra.

₂Ma Balak, a manpikin fu Sipor, ben si ala sani di Israel ben du nanga den Amoritisma. ₃Dan den Moabitisma bigin frede den Israelitisma fu di a ben de wan bigi folku. ₄Ne den Moabitisma taigi den fesiman fu Midyan taki: “A bigi folku o krin a heri kontren disi, leki fa wan kaw e nyan a grasi.” A pisten dati na Balak, a manpikin fu Sipor, ben de kownu fu Moab. ₅Dan Balak seni boskopuman go na Bileam, a manpikin fu Beor. Bileam ben e libi na Peor, di ben e didon na a Eufratliba. So Balak seni boskopuman go na a kondre fu den kondreman fu en fu taigi Bileam taki: “Wan folku hari kmoto na ini Egipte. Luku, den furu a heri kondre èn den meki den kampu krosbei fu mi. ₆Kon dan yu e fluku a folku disi bika a tranga moro mi. Kande te yu du dati mi sa man fon den èn yagi den puru fu a kondre. Bika mi sabi taki wan blesi de tapu a sma di yu blesi, èn wan fluku de tapu a sma di yu fluku.” ₇Dan so den fesiman fu den Moabitisma nanga den Midyanitisma go na Bileam. Den ben abi a moni na den di den bo pai en. Di den doro na Bileam den taigi en san Balak seni aksi en. ₈Ne Bileam taigi den taki: “Un psa a neti dyaso, dan mi sa taigi unu san MASRA taigi mi.” So den fesiman fu Moab tan na Bileam. ₉Dan Gado kon na Bileam. A aksi en taki: “Suma na den man di de na yu?” ₁₀Bileam piki Gado taki: “Na Balak, a manpikin fu Sipor, a kownu fu Moab, seni wan boskopu gi mi taki: ₁₁‘Luku, wan folku hari kmoto na ini Egipte di furu a heri kondre. Kon fluku en gi mi, dan kande mi san man feti nanga den èn yagi den gwe.’ ” ₁₂Ne Gado taigi Bileam taki: “Yu no sa go nanga den. Yu no sa fluku a folku disi, bika wan blesi de tapu a folku disi.” ₁₃A tra mamanten di Bileam opo a taigi den fesiman fu Balak taki: “Un drai go na un kondre baka, bika MASRA no wani fu mi go nanga unu.” ₁₄So den fesiman fu Moab drai go baka. Di den doro na Balak den taigi en taki: “Bileam no ben wani fu kon nanga wi.”

₁₅Ne Balak seni fesiman go baka. Disi leisi moro furu èn moro prenspari man dan den fosiwan. ₁₆Di den doro na Bileam den taigi en taki: “Na so Balak, a manpikin fu Sipor seni taigi yu: ‘No meki noti no hori yu fu kon na mi. ₁₇Mi sa pai yu bun. Ala sani di yu sa taigi mi, mi sa du. Mi e begi yu fu yu kon fluku a folku disi gi mi.’ ” ₁₈Ma Bileam piki den knekti fu Balak taki: “Awinsi Balak gi mi en heri oso nanga solfru nanga gowtu, mi no man du not'noti san MASRA, mi Gado, no taigi mi fu du. ₁₉Unsrefi kan psa a neti dyaso tu, fu mi kan kon sabi san MASRA sa taigi mi moro fara.” ₂₀A neti dati Gado kon na Bileam dan A taigi en taki: “Go nanga den man, bika dan kon fu kon teki yu. Ma yu sa taki soso san Mi o taigi yu fu taki.”

₂₁So Bileam opo a tamara mamanten, a seti a umaburiki di a ben e rei, dan a go nanga den fesiman fu Moab. ₂₂Ma Gado ati bron di a e go èn A Engel fu MASRA ben wakti en tapu a pasi fu a no go moro fara. Bileam ben sidon tapu en buriki èn tu knekti fu en ben e go nanga en. ₂₃Ma di a buriki si taki a Engel fu MASRA ben tnapu tapu a pasi, a beni kmoto fu a pasi dan a go waka ini wan gron. Ne Bileam naki a buriki fu a go waka baka tapu a pasi. ₂₄Ma dan a Engel fu MASRA go tnapu mindri tu gron, pe a pasi ben smara, èn pe skotu ben de na ala tu sei fu a pasi. ₂₅Di a buriki si a Engel fu MASRA, a kwinsi ensrefi na a skotuskin, taki a ben e masi a futu fu Bileam na a skotu. Ne Bileam naki en baka. ₂₆Ma a Engel fu MASRA go tnapu wantron moro tapu a pasi. Disi leisi tapu so wan smara pisi taki presi no ben de na kruktusei noso na let'sei fu psa. ₂₇Di a buriki si a Engel fu MASRA, a go didon fu en nanga Bileam ete tapu en baka. Ne Bileam ati bron dan a naki a buriki nanga wan tiki. ₂₈Dan MASRA meki a buriki bigin taki. Ne a buriki taigi en taki: “Na dri leisi kba yu naki mi. San mi du yu so?” ₂₉Bileam piki en taki: “Na fu di yu e teki mi meki spotu. Efu mi ben abi wan deigri ini mi anu, mi ben kiri yu someni langa kba.” ₃₀Ma a buriki piki Bileam baka taki: “Mi na yu buriki di tyari yu, yu heri libi langa te leki tide. Mi du sowan sani bifo?” Bileam piki: “Nono.” ₃₁Ne MASRA opo den ai fu Bileam dan a si fa a Engel fu MASRA ben tnapu tapu a pasi nanga en deigri ini en anu. Ne a kindi dan a boigi nanga fesi na gron. ₃₂Dan a Engel fu MASRA taigi en taki: “Fu sanede yu naki a buriki fu yu? Luku, mi kon spesrutu fu hori yu fu yu no go, bika yu e go fu go du wan sani di Mi no wani. ₃₃Dri leisi a buriki beni kmoto gi Mi di a si Mi. Efu a no ben beni kmoto gi Mi dan Mi e taigi yu taki Mi ben o kiri yu trutru, dan mi meki en tan na libi.” ₃₄Ne Bileam taigi a Engel fu MASRA taki: “Mi sondu. Mi no ben sabi taki na Yu ben e tapu pasi gi mi. Ma now mi sa drai go baka fu di mi sabi now taki a no bun ini Yu ai.” ₃₅Ma a Engel fu MASRA piki Bileam taki: “Yu kan go nanga den man ma yu sa taki soso san Mi sa taigi yu fu taki.” Dan so Bileam go moro fara nanga den fesiman fu Balak.

₃₆Di Balak yere taki Bileam ben de na pasi e kon, a hari go miti en te na a foto fu Moab ini a kontren fu a Arnonliba, pe a kondre fu Moab ben e miti nanga a tra kondre na en sei. ₃₇Dan Balak taigi Bileam taki: “Mi seni kari yu fu di mi abi yu tranga fanowdu. Fu sanede yu no ben wani kon na mi? Na pai yu denki taki mi no o man pai yu?” ₃₈Ne Bileam piki Balak taki: “Luku, ala di mi kon na yu mi no o man taki noti. Mi o man taki soso san Gado o taigi mi fu taki.” ₃₉Dan Bileam go moro fara nanga Balak, dan den kon doro na Kiryat-Kusot. ₄₀Balak srakti kaw nanga skapu, dan a seni meti go gi Bileam nanga den fesiman di ben di na en.

₄₁A tamara fu en Balak tyari Bileam go tapu wan hei presi di den ben e kari Bamot-Baal. Fu drape Bileam ben man si wan pikin pisi fu a folku.

₁Den Fariseiman nanga wantu sabiman fu Gado wèt di ben kmopo kon fu Yerusalem, kon na Yesus. ₂Dan den si wantu fu den man di ben e teki leri fu Yesus e nyan brede sondro fu wasi den anu tapu a fasi fa a gwenti ben de. ₃A ben de so taki den Fariseiman nanga ala den tra Dyusma, no ben go nyan fosi den wasi den anu tapu a fasi fa den bigisma ben leri den. ₄Efu den ben bai wan sani na wowoyo, den ben e wasi en tapu wan spesrutu fasi, fosi den nyan en. Den ben abi wan lo tra gwenti san den ben e hori, soleki fa den afo ben leri den. Na so den ben e wasi den kan, den patu nanga den pan tapu wan spesrutu fasi. ₅Dan den Fariseiman nanga den sabiman fu Gado wèt aksi Yesus taki: “Fu sanede den man fu Yu no e du san den bigisma fu unu ben leri unu? Bika den e nyan brede sondro fu wasi den anu tapu a fasi fa un gwenti.” ₆Yesus piki den taki: “Un hoigriman unu! Yesaya ben abi leti di a taki fu unu taki:

₁₄Yesus kari ala den sma agen fu kon na En, dan A taigi den taki: “Un alamala arki Mi èn ferstan bun san Mi e taki. ₁₅A no san wan sma e nyan e meki taki a no krin ini Gado ai. Ma na san e kmopo ini en ati kon na dorosei e meki taki a no krin. ₁₆Efu wan sma abi yesi fu yere, meki a yere!”

₁₇Yesus libi den sma, dan A go na oso. Dan den man di ben e teki leri fu En aksi En san A ben wani taki nanga a agersitori disi. ₁₈Yesus piki den taki: “San! Unu srefi no man ferstan den sani di Mi e taki? Un mus ferstan taki a no san wan sma e nyan e meki taki a no krin ini Gado ai. ₁₉Bika nyanyan no e saka go ini wan sma ati, ma a e go ini en bere, èn a e kmopo baka pe a mus kmopo.” Na so Yesus sori den taki ala nyanyan bun fu nyan. ₂₀Yesus taki moro fara: “Na den sani san kmopo ini wan sma ati e meki taki a no krin ini Gado ai. ₂₁Bika den sani san e kmopo fu inisei, fu a ati fu wan sma, na takru prakseri, takru lostu, fufuru nanga kiri. ₂₂Moro fara: huru, bigi-ai, ogri-ati, kori fasi, yayolibi, dyarusu fasi, taki takru fu trawan, bigimemre nanga fu du lawlaw sani. ₂₃Ala den takru sani disi e kmopo ini wan sma ati kon na doro, èn na dati e meki taki wan sma no krin na ini Gado ai.”