Dag 65 van 365- Deuteronomium 1-2 en Marcus 10:1-31

₁Disi na den sani di Moses taigi a heri folku fu Israel fosi den ben koti a Yordanliba abra. Den ben de ini a sabana ini a Yordandal, nanga den fesi go na Suf. A foto Paran ben de na wan sei fu den èn den foto Tofel, Laban, Haserot nanga Di-Sahab na a tra sei. ₂Fu waka fu Horeb go na Kades-Barnea wan sma ben abi erfu dei fanowdu, efu a ben teki a pasi di ben e waka ini a Seirbergi. ₃Fotenti yari baka di den kmoto ini Egipte, Moses taigi den sma fu Israel ala den sani di MASRA ben taigi en fu taigi den. A du disi tapu a fosi dei fu a di fu erfu mun. ₄Fosi Moses ben taki nanga a folku, a ben wini a feti nanga Sikon, a kownu fu den Amoritisma, nanga Og, a kownu fu Basan. Sikon ben e libi na Hesbon. Og ben e libi na Astarot nanga Edrei. ₅Moses bigin leri a folku den a wèt disi di ben de ete ini a kondre fu Moab, fosi den ben koti a Yordanliba abra. A taigi den taki:

₆“MASRA, a Gado fu unu, taigi wi na a bergi Horeb taki: ‘Un tan langa nofo na a bergi disi. ₇Un broko a kampu dan un hari go moro fara. Un hari go na a bergi pe den Amoritisma e tan. Un hari go tu na den tra folku di e libi ini a Yordandal, tapu den bergi, na den tra bergibergi pisi, ini a sabana nanga na sekanti. Dati na a kondre fu den Kananitisma. Un hari go tu na a Libanonbergi te go miti a bigi liba di den e kari Eufrat. ₈Luku, Mi poti a kondre disi fu un teki en. So un hari go ini a kondre dan un teki a kondre abra. Na a kondre disi MASRA ben pramisi èn A ben sweri gi den afo fu unu, Abraham, Isak nanga Yakob, taki A bo gi a kondre na den nanga den bakapikin fu den.’ ”

₉A ten dati mi ben taigi un taki: “Mi wawan no o man tyari a frantwortu fu unu. ₁₀MASRA, un Gado, meki un kon so furu, èn luku, now un de so furu leki den stari di de na heimel. ₁₁Mi winsi taki MASRA, a Gado fu den afo fu unu, sa blesi un leki fa A ben pramisi, èn taki A sa meki un kon ete dusun tron so furu leki san un de now. ₁₂Ma dan fa mi wawan bo man tyari a hebi lai fu den kragi fu unu. ₁₃Dat' meki fu ala lo un mus teki koni man, man nanga bun ferstan di e si sani krin, fu mi poti den leki un edeman.” ₁₄Dan un piki mi taki: “Na wan bun sani yu e taigi unu fu du.” ₁₅So mi teki edeman fu den lo fu unu. Koni man nanga bun ferstan. Dan mi poti den leki edeman fu unu, leki edeman di ben e tiri dusun man, edeman di ben e tiri wan hondro man, edeman di ben e tiri feifitenti man nanga edeman di ben e tiri tin man. Mi poti man tu fu skrifi ala sani fu den lo. ₁₆Den krutubakra fu unu mi ben taigi taki: “Arki bun san na a problema fu den sma fu yu folku. Krutu tapu wan leti fasi efu na wan problema fu tu sma fu un folku, ma du dati tu efu na wan problema nanga wan doroseisma di e tan na un mindri. ₁₇Krutu sondro fu teki a sei fu wan sma. Un sa arki a srefi fasi san a pôtisma e taki, leki fa un e arki a gudusma. Un no mus frede no wan sma bika un e krutu ini a nen fu Gado. Efu a problema bigi tumsi gi unu fu krutu, un mus tyari en kon gi mi meki mi krutu a tori.” ₁₈Ala den sani disi mi ben taigi un a ten dati fu un du.

₁₉Baka dati un broko a kampu. Un kmoto na Horeb dan un hari psa ini a bigi sabana di ben de fu frede. Unsrefi sabi dati. Un hari go na a bergi fu den Amoritisma, leki fa MASRA, un Gado, ben taigi unu. Dan un kon doro na Kades-Barnea. ₂₀Drape mi taigi un taki: “Un doro na a bergi fu den Amoritisma, di MASRA, a Gado fu unu, o gi wi. ₂₁Luku, MASRA, a Gado fu den afo fu unu, poti a kondre fu un teki en. Un hari go dan un teki a kondre abra leki fa MASRA, a Gado fu den afo fu unu, taigi unu fu du. No frede èn no meki noti tapu skreki gi unu.” ₂₂Ne un alamala kon na mi dan un aksi mi taki: “Meki un seni wantu man go na fesi fu den go luku fa a kondre tan. Den mus kon taigi unu sortu pasi un mus teki èn sortu foto un o miti.” ₂₃Mi ben feni dati wan bun sani. So mi teki twarfu man. Wan fu ibri lo. ₂₄Den man disi teki pasi. Den hari go tapu den bergi te leki den doro na a Eskoldal, dan den luku fa drape ben tan. ₂₅Den tyari froktu fu a kondre kon gi un tu. Den ferteri un ala sani san den si. Den taigi un taki: “Na wan bun kondre MASRA, un Gado, o gi unu.”

₂₆Ma un no ben wani hari go. Un kaka futu. Un no ben wani du san MASRA, un Gado, ben taigi unu fu du. ₂₇Un ben e krutukrutu na ini un tenti taki: “Na fu di MASRA no lobi unu, meki A tyari un kmoto na Egipte fu un fadon ini anu fu den Amoritisma, fu den kiri unu. ₂₈San un e go miti? Den man di go luku fa a kondre tan, meki un lasi ati srefsrefi di den kon taigi unu taki: den sma drape bigi èn den langa moro wi. Den foto fu den bigi èn den skotu hei go miti heimel. Den si Enakitisma srefi drape.” ₂₉Ma mi taigi un taki: “Un no lasi ati. Un no frede gi den. ₃₀MASRA, a Gado fu unu, e go na un fesi. Na en sa feti a feti gi unu tapu a srefi fasi leki fa un si taki A du ini Egipte ₃₁nanga ini a sabana. Drape un si fa MASRA, un Gado, ben tyari unu leki fa wan man en tyari en pikin. A tyari unu a heri pasi te leki un doro dyaso.” ₃₂Ma aladi mi taigi un dati, un no poti un fertrow tapu MASRA, un Gado, ₃₃di go na un fesi fu luku fu wan presi gi unu, pe un ben kan opo un kampu. Te neti A ben e go leki wan faya na un fesi fu un ben kan si a pasi èn te deiten leki wan wolku.

₃₄Di MASRA yere den sani di un taki En ati bron srefsrefi. Ne A taki: ₃₅“No wan fu den takru-ati man disi di e libi now, sa si a bun kondre, di Mi sweri taki Mi sa gi en na den afo fu den. ₃₆Soso Kaleb, a manpikin fu Yefune, sa si en. Mi sa gi en nanga den pikin fu en a kontren di a si di a go luku fa a kondre tan. Bika a ben tan fertrow na Mi tapu.” ₃₇Fu unu ede, MASRA atibron tapu mi srefi, taki A taigi mi taki: “Yusrefi no sa go drape. ₃₈Yosua, a manpikin fu Nun, di e yepi yu, sa doro drape. Gi en dek'ati bika na en sa meki Israel teki a kondre abra. ₃₉Den pikin fu unu sa doro drape tu. Den yonguwan di un feni tak' den feyanti fu unu bo grabu den tyari gwe. Den di no sabi ete san na bun noso ogri. Den dati sa doro drape èn na den Mi sa gi a kondre fu den teki en abra. ₄₀Ma unu dati mus drai baka. Un hari go baka ini a sabana na sei fu a Riet Se.”

₄₁Ne un taigi mi taki: “Un sondu. Un no du san MASRA wani. Un sa hari go feti, leki fa MASRA, a Gado fu unu, taigi un fu du.” Dan ibriwan fu unu tai en fetisani na en bere bika un ben denki tak' na wan makriki sani fu hari go na den bergi. ₄₂Ma MASRA taigi mi taki: “Taigi den taki: Un no sa hari go feti bika Mi no sa de nanga unu. Efu den go den feyanti fu den o wini den.” ₄₃Mi taki nanga unu, ma un no arki. Un kaka un futu èn no du san MASRA komanderi un fu du. Un ben denki taki un tranga èn un hari go na den bergi. ₄₄Ma den Amoritisma di ben e tan tapu den bergi, hari kon miti unu. Den lon na un baka leki waswasi. Den fon unu tapu a Seirbergi èn den teki na un baka te go miti Horma. ₄₅Ne un drai kon baka èn un krei na MASRA fesi. Ma MASRA no arki unu. A no yere unu srefsrefi. ₄₆Dan so un tan wan heri pisten na Kades.

₂Dan MASRA taigi mi taki: ₃“Un waka langa nofo lontu a bergi disi. Un beni go na a noordsei. ₄Taigi a folku taki: ‘Wi o hari psa ini a kontren fu un famiri, den bakapikin fu Esau, di e libi tapu a Seirbergi. Den o frede gi unu. Ma un mus hori unsrefi. ₅Un no mus feti nanga den, bika Mi no sa gi unu no wan pisi fu den kondre. Mi gi a Seirbergi na Esau taki na fu en. ₆Efu un abi nyanyan fanowdu, un mus bai en na den. Watra srefi un sa bai na den. ₇Bika MASRA, un Gado, blesi ala sani di un e du. A ben sabi ala sani di miti unu ini a bigi sabana. Ala den fotenti yari MASRA, un Gado, ben de nanga unu. Noti no ben mankeri unu.’ ”

₈So wi hari go moro fara. Di wi psa den famiri fu unu, den bakapikin fu Esau, di ben e libi tapu a Seirbergi, wi kmoto fu a pasi di ben e waka fu Elat nanga Esyon-Geber go ini a Yordandal. Wi beni dan un hari go na a sei fu a sabana fu Moab. ₉Dan MASRA taigi mi taki: “Un no suku trobi nanga den sma fu Moab. No feti nanga den bika Mi no sa gi un no wan pisi fu den kondre. Bika Mi gi Ar na den bakapikin fu Lot taki na fu den.” ₁₀Na den Emitisma ben e libi fosi drape. Wan bigi èn tranga folku. Den ben langa leki den Enakitisma. ₁₁Den sma ben e kari den Enakitisma nanga den Emitisma son leisi Refaitisma tu. Ma den Moabitisma ben e kari den Emitisma. ₁₂Tapu a Seirbergi den Horitisma ben e libi fosi. Ma den bakapikin fu Esau ben yagi den puru. Den kiri den èn den teki a presi abra fu libi drape, neleki fa den Israelitisma du nanga a kondre di MASRA gi den taki na fu den. ₁₃MASRA taigi den moro fara taki: “Un koti a Seredkriki abra.” So wi koti a Seredkriki abra. ₁₄Dritenti-na-aiti yari baka di wi kmoto fu Kades-Barnea, wi koti a Seredkriki abra. A pisten dati no wan fu den man fu a ten dati di ben man feti no ben de na libi moro leki fa MASRA ben sweri. ₁₅MASRA ben e tan strafu den taki den ben lowe gwe libi a kampu, te leki den alamala ben dede.

₁₆Di ala den man di ben man feti ben dede, ₁₇MASRA taigi mi taki: ₁₈“Tide un o hari psa Ar, a kontren fu den Moabitisma. ₁₉Dan yu o doro pe a kontren fu den Amonitisma e bigin. Un no suku trobi nanga den. No feti nanga den tu, bika Mi no gi un no wan pisi fu a kondre fu den Amonitisma. Mi gi en na den bakapikin fu Lot taki na fu den.” ₂₀Sma e si a kondre disi tu leki wan kondre fu den Refaitisma, bika Refaitisma ben e libi fosi drape. Ma den Amonitisma ben e kari den Samsumitisma. ₂₁A ben de wan bigi èn tranga folku. Den ben langa leki den Enakitisma. Ma MASRA ben yagi den, meki den Amonitisma ben kan teki a presi abra fu libi drape. ₂₂A du dati leki fa A ben du gi den bakapikin fu Esau di ben e libi tapu a Seirbergi. A ben yagi den Horitisma gwe meki den bakapikin fu Esau teki a presi dati abra fu libi drape te leki a dei fu tide. ₂₃Den Kaftoritisma, di ben kmoto fu Kaftor, ben kiri den Awitisma di ben libi na ini dorpu te go miti Gasa. Dan den teki a presi fu den abra fu libi drape. ₂₄MASRA taigi den moro fara taki: “Un meki un klari, un broko a kampu dan un koti a Arnonliba abra. Luku, Mi o gi Sikon, a Amoritikownu fu Hesbon abra ini un makti. En nanga a heri kondre fu en. Un bigin teki a kondre dan un feti nanga en. ₂₅Bigin fu a dei disi, Mi o meki taki ala folku na grontapu bigin frede èn beifi gi unu. Den o frede èn den o beifi te den yere fu unu.”

₂₆Dan mi seni boskopuman kmoto fu a Kedemotsabana go na Sikon, a kownu fu Hesbon. Den ben mus tyari wan boskopu di ben mus sori taki un no ben wani problema nanga en. A boskopu ben taki: ₂₇“Meki mi hari psa ini yu kondre. Mi sa tan waka tapu a bigi pasi sondro fu beni go na kruktusei noso let'sei. ₂₈Nyanyan di mi abi fanowdu mi sa bai fu yu èn mi sa pai yu gi a watra di un abi fanowdu. Gi mi a okasi wawan fu hari psa nanga futu ini yu kondre, ₂₉soleki fa den bakapikin fu Esau du di e libi tapu a Seirbergi nanga den Moabitisma fu Ar, te leki un abra a Yordanliba fu go na a kondre di MASRA, un Gado, sa gi unu.” ₃₀Ma Sikon, a kownu fu Hesbon, no ben wani fu un hari psa ini en kondre. Bika MASRA, un Gado, ben meki a tranga en ati èn taki a no ben wani gi yesi srefsrefi, soso fu ben kan gi en ini un makti, leki fa un sabi tide taki dati psa tu. ₃₁Dan MASRA taigi mi taki: “Luku, Mi e bigin gi yu Sikon nanga a kondre fu en. Bigin feti nanga en fu teki a kondre abra.” ₃₂Sikon hari kon miti unu nanga a heri folku fu en, fu feti nanga unu na Yahas. ₃₃Ma MASRA, wi Gado, gi en abra na unu. Ne un fon en, den manpikin fu en nanga a heri folku fu en. ₃₄Ala den foto fu en un teki abra. Wi broko den foto èn un kiri ala man, uma nanga pikin. No wan sma wi meki tan na libi. ₃₅Soso den kaw, skapu nanga krabita wi teki tyari gwe èn den gudu fu den foto wi hori gi wi srefi. ₃₆Kmoto fu a foto Arower di ben didon na syoro fu a Arnonliba, kmoto fu a foto ini a dal te go miti Gilead, no wan foto no ben de di un no teki abra. MASRA, un Gado, ben poti ala sani ini wi anu. ₃₇Ma un no go ini a kondre fu den Amonitisma, a heri kanti fu a Yabok-kriki noso den foto di didon tapu den bergi. Un no go na no wan presi di MASRA, un Gado, no taigi unu fu go.

₁Yesus kmopo fu drape, dan A go na Yudea nanga a kontren abrasei fu a Yordanliba. Agen wan lo sma kon na En, èn A bigin gi den leri soleki fa A ben gwenti fu du. ₂Dan wantu Fariseiman kon na En fu tesi En. Den aksi En taki: “Wan man kan broko trow nanga en uma?” ₃Yesus aksi den taki: “San Moses skrifi taki un kan du?” ₄Den taki: “Moses taki tak' wan man kan broko trow, ma a mus gi a uma wan brifi san e sori taki a trow broko.” ₅Yesus piki taki: “Na fu di un no wani du san Gado taki, meki Moses skrifi a sani disi. ₆Ma na a bigin di Gado meki libisma, A meki den leki man nanga uma. ₇Dat'ede wan man sa gwe libi en m'ma nanga en p'pa fu go libi nanga en uma. ₈Dan den tu sma disi sa de leki wan enkri sma. So den no de tu sma moro, ma den de leki wan. ₉Èn san Gado tyari kon na wan, libisma no mus prati.”

₁₀Di den go na oso, den man di ben e teki leri fu Yesus aksi En a tori disi baka. ₁₁Dan Yesus taigi den taki: “A man di broko trow nanga en uma dan a trow baka, e huru gi en fosi uma. ₁₂Èn efu wan uma broko trow nanga en masra èn a trow baka, dan sowan uma e libi wan huru libi tu.”

₁₃Den sma ben e tyari den pikin kon na Yesus fu A fasi den. Ma den man di ben e teki leri fu Yesus bari den. ₁₄Di Yesus si san den man e du, a mandi srefsrefi. A taigi den taki: “Meki den pikin kon na Mi. No tapu den, bika na sma leki den pikin disi, Gado e tiri. ₁₅Fu tru Mi e taigi un taki: Efu yu no kon na Gado leki wan pikin fu A tiri yu, dan noiti yu o man kon ondro a tiri fu Gado.” ₁₆Yesus brasa den pikin, dan A poti anu na den tapu èn A blesi den.

₁₇Di Yesus ben e waka go moro fara, wan man lon kon na En. A saka kindi gi En, dan a aksi En taki: “Bun Meister, san mi mus du fu kisi a libi fu têgo?” ₁₈Yesus piki en taki: “Fu sanede yu e taki tak' Mi bun? No wan sma bun, boiti Gado. ₁₉Yu srefi sabi san a wèt fu Gado e taki: Yu no mus kiri, yu no mus huru, yu no mus fufuru, yu no mus lei gi trawan, yu no mus bedrigi sma, èn yu mus lespeki yu m'ma nanga yu p'pa.” ₂₀A man piki taki: “Meister, sensi mi pikin mi hori ala den wèt disi.” ₂₁Di Yesus luku a man, a firi wan lobi gi en. Dan A taigi en taki: “Wan sani libi ete fu yu du. Go seri den sani san yu abi, dan yu e prati a moni gi pôtisma. So yu o abi wan gudu na heimel. Baka dati yu e kon waka na Mi baka.” ₂₂Di a man yere san Yesus taki, en fesi kenki. A gwe nanga sari bika a ben abi furu gudu.

₂₃Yesus luku lontu, dan A taigi den man di ben e teki leri fu En taki: “A sa tranga gi sma di lai moni fu den poti densrefi ondro a tiri fu Gado.” ₂₄Den man fu En ben ferwondru fu a sani san Yesus taki. Ma Yesus taki baka taki: “Mi pikin, a tranga fu kon ondro a tiri fu Gado. ₂₅A moro makriki gi wan asaw fu psa ini wan nanai-olo, dan fu wan guduman poti ensrefi ondro a tiri fu Gado.” ₂₆Den man ben ferwondru srefsrefi. Den taigi Yesus taki: “Suma Gado o man ferlusu dan?” ₂₇Yesus luku den man di ben e teki leri fu En, dan A taigi den taki: “Libisma no man du en, ma Gado man. Bika Gado kan du ala sani.” ₂₈Dan Petrus bigin taigi Yesus taki: “Ma luku, wi libi ala sani san wi ben abi fu waka na Yu baka.” ₂₉Yesus piki en taki: “Fu tru Mi e taigi un taki: Ala sma di libi en oso, noso en brada nanga en s'sa, noso en m'ma nanga en p'pa, noso en pikin nanga en gron fu Mi ede èn fu a bun nyunsu ede, o kisi den sani disi baka. ₃₀Ini a libi disi Gado o gi den sma dati hondro tron so moro furu oso, brada nanga s'sa, m'ma, pikin nanga gron. Ma sma o de na den baka fu du den ogri. Dan ini a ten san e kon, A o gi den a libi fu têgo. ₃₁Ma furu fosiwan o tron lastewan, èn furu lastewan o tron fosiwan.”