Dag 67 van 365- Deuteronomium 5-7 en Marcus 11:1-19

Israel, yere den sani di un mus tan du nanga den sani na san un mus tan hori unsrefi, den sani di mi e taigi un tide. Un mus leri den èn un mus hori unsrefi trutru na den. ₂MASRA, wi Gado, meki wan ferbontu nanga unu tapu Horeb. ₃A no nanga den afo fu unu MASRA meki a ferbontu disi, ma nanga unu di de na libi dyaso tide. ₄Fesi nanga fesi MASRA taki nanga unu tapu a bergi ini a faya. ₅Mi ben tnapu mindri un nanga MASRA, fu taigi unu san A ben wan taigi unu. Bika un ben e frede a faya èn un no ben wani kon tapu a bergi. A ben taki:

₆“Mi na MASRA, un Gado, di puru unu na ini Egipte, pe un ben de srafu.

₇Un no mus dini no wan tra gado boiti Mi.

₈No meki no wan popki noso prentyi fu wan sani di de na heimel, di de na grontapu noso di de ini a watra ondro grontapu. ₉No boigi gi den èn no dini den. Bika Mi, MASRA, un Gado, na wan dyarusu Gado. Mi e strafu den granpikin nanga den afopikin fu den ogri di den bigisma fu den du, di no ben lobi Mi. ₁₀Ma Mi e sori sari-ati dusundusun yari na den bakapikin fu den wan di lobi Mi èn di e hori densrefi na den gebod fu Mi.

₁₁Un no mus kari a nen fu MASRA, un Gado, fu soso. Bika MASRA no o libi a sma dati fu soso tu.

₁₂Un sorgu taki un hori a sabatdei leki wan spesrutu dei, leki fa MASRA, un Gado, taigi unu fu du. ₁₃Siksi dei de fu wroko, fu un du ala sani san un abi fu du. ₁₄Ma a di fu seibi dei na a sabatdei fu MASRA, un Gado. A dei dati un no mus wroko. No unu, no den manpikin fu unu, no den umapikin fu unu, no den man nanga uma di e wroko gi unu, no den kaw fu unu, no den buriki fu unu, no den tra meti fu unu noso den doroseisma di e libi ini a kondre fu unu. So den man nanga den uma di e wroko gi unu kan rostu leki unu. ₁₅Bika un mus memre taki un ben e wroko leki knekti na ini Egipte, ma taki MASRA, un Gado, puru unu fu drape nanga En krakti èn nanga en makti. Fu dat'ede MASRA, un Gado, taigi un taki un mus hori wan sabatdei.

₁₆Lespeki un m'ma nanga un p'pa, leki fa MASRA, un Gado, taigi unu fu du, fu un kan libi langa èn fu a kan go bun nanga unu na ini a kondre di MASRA, un Gado, o gi unu.

₁₇No kiri.

₁₈No huru.

₁₉No fufuru tu.

₂₀No lei gi wan trawan.

₂₁No abi bigi ai tapu wan trawan en frow. No abi bigi ai tapu wan trawan en oso, tapu en pranigron, tapu den man nanga den uma di e wroko gi en, tapu en kaw, en buriki noso iniwan sani san na fu wan trawan.”

₂₂Na disi MASRA taigi un alamala tapu a bergi. Nanga wan tranga sten A taki nanga unu. En sten ben e kmoto ini a faya nanga a dungru wolku. Na disi wawan A taki. A skrifi den tapu tu plata ston dan A langa den gi mi. ₂₃Di un yere a sten di ben e kmoto na ini a dungru èn un si a faya tapu a bergi, un kon na mi. Un nanga ala den edeman fu den lo nanga den fesiman fu unu, dan un taki: ₂₄“Luku, MASRA, un Gado, sori un En glori nanga En makti. Un yere En sten di ben e kmoto na ini a faya. Tide un si taki Gado kan taki nanga wan sma dan a sma tan na libi. ₂₅Ma fu sanede un mus dede now? Bika a bigi faya disi o kiri unu. Efu wi yere a sten fu MASRA, wi Gado, ete wan leisi un o dede. ₂₆No wan libisma no de di yere fa a sten fu a libilibi Gado e kmoto na ini a faya, leki fa wi du, dan a tan na libi. ₂₇Yu go moro krosbei fu go arki ala sani san MASRA, un Gado, e taki. Baka dati yu sa taigi unu ala sani san MASRA, un Gado, taigi yu. Un sa arki dan un du san A taki.” ₂₈Di MASRA yere san un e taki di un ben e taki nanga mi, MASRA taigi mi taki: “Mi yere san a folku taki di den e taki nanga yu. Na wan bun sani den taigi yu. ₂₉Mi winsi taki ala ten den ben abi sowan ati fu lespeki Mi èn fu hori den na den gebod fu Mi. Dan fu têgo sani bo waka bun gi den nanga den bakapikin fu den. ₃₀Go dan yu taigi den taki den kan drai go baka na den tenti fu den. ₃₁Ma yu mus tan dyaso na Mi. Dan Mi sa taigi yu ala den gebod, den sani di den mus tan du nanga den sani na san den mus tan hori densrefi, den sani di yu mus leri den. Den mus tan du den sani disi ini a kondre di Mi o gi den fu den teki abra.”

₃₂Un mus hori unsrefi bun na den, leki fa MASRA, un Gado, taigi unu fu du. No wan fasi un mus du wan tra sani leki san den e taki. ₃₃Un waka a heri pasi di MASRA, un Gado, taigi unu fu go. Dan un sa tan na libi èn sani sa go bun nanga unu. Un sa libi langa tu ini a kondre di un o teki abra.

₁Disi na den gebod, den sani di un mus tan du nanga den sani na san un mus tan hori unsrefi. Na MASRA, un Gado, taigi mi taki mi mus leri un den, fu un tan du den ini a kondre pe un e hari go now fu teki abra. ₂Un mus lespeki MASRA, un Gado. Un mus du dati fu hori unsrefi na den sani di un mus tan du nanga den besroiti di mi e leri unu. Unu, den pikin fu unu nanga den bakapikin fu unu. Un mus du dati solanga un e libi, dan un sa libi langa. ₃Dat' meki un mus arki, Israel, un mus hori unsrefi bun na den sani disi dan a sa go bun nanga unu ini a kondre pe merki nanga oni de bogobogo. Un sa kon furu, leki fa MASRA, a Gado fu den afo fu unu, taigi unu taki A o du.

₄Israel, yere! MASRA na wi Gado. MASRA wawan! ₅Un mus lobi MASRA, un Gado, nanga un heri ati, nanga un heri sili, èn nanga ala un krakti. ₆Un mus tan memre den sani di mi e taigi un tide fu du. ₇Stampu en na ini a ede fu den pikin fu unu. Un mus tan taki fu den te un de na oso, te un de na pasi, te un e go na bedi nanga te un kmoto na ini un bedi. ₈Un mus tai den leki wan marki na un anu nanga leki wan banti na un fes'ede. ₉Skrifi den na den postu fu den doro fu un oso nanga den bigi doro fu den foto fu unu.

₁₀MASRA, un Gado, o tyari un go ini a kondre, di a ben pramisi èn A ben sweri gi Abraham, Isak nanga Yakob, den afo fu unu, taki A bo gi en na unu. Bigi èn bun foto, ma a no unsrefi ben bow den. ₁₁Oso di furu nanga ala sortu gudu, ma a no un ben poti den na ini. Watrapeti di a no unsrefi diki. Droifidyari nanga oleifbon di a no unsrefi prani. Te un nyan un bere furu, ₁₂un mus sorgu taki un no fergiti MASRA, di puru un na ini Egipte, pe un ben de srafu. ₁₃Un sa lespeki MASRA, un Gado. Na En wawan un sa dini. Na ini En nen wawan un mus sweri. ₁₄Un no mus go dini tra gado fu den folku lontu unu. ₁₅Bika MASRA, un Gado, di de na un mindri, na wan dyarusu Gado. Efu un du dati un o meki taki MASRA, un Gado, En ati bron na un tapu dan A figi un puru na grontapu. ₁₆Un no mus du wan sani tu fu luku san MASRA, un Gado, o du, leki fa un ben du na Masa. ₁₇MASRA, un Gado, taigi unu taki un mus hori unsrefi finifini na den gebod fu En, den warskow nanga den sani di un mus tan du èn un mus du en bun tu. ₁₈Un mus du san bun ini MASRA ai. Dan sani sa go bun nanga unu. Un o man go ini a bun kondre di A pramisi èn di A ben sweri gi den afo fu unu taki A o gi en na unu, en un o teki en abra. ₁₉MASRA o yagi ala den feyanti fu unu gwe, leki fa A ben taki.

₂₀Bakaten te den pikin fu unu o aksi unu taki: “Fu sanede MASRA, un Gado, poti den sani disi taki un mus du den: den warskow, taki un mus tan du den sani di un mus du èn taki un mus hori unsrefi na den sani na san un mus tan hori unsrefi?” ₂₁dan un mus piki den taki: “Un ben de srafu fu Farao ini Egipte. Ma MASRA puru unu nanga En makti na ini Egipte. ₂₂MASRA du wondru nanga marki meki wi si. A meki bigi nowtu miti Farao nanga den sma fu en. ₂₃Ma A puru un drape, fu tyari un go èn fu gi un a kondre di A ben pramisi èn di A ben sweri gi den afo fu unu, taki A o gi en na unu. ₂₄MASRA ben taigi unu taki un mus tan du den sani disi èn taki un mus lespeki MASRA, un Gado. Dan ala ten sani bo go bun nanga unu. A bo sorgu taki un tan na libi leki tide. ₂₅MASRA, un Gado taigi unu taki un mus hori unsrefi bun na den gebod disi. Efu un du dati na En fesi, un o bun na ini En ai.”

₁MASRA, un Gado, o tyari un go ini a kondre di un o teki abra. A sa yagi furu folku puru gi unu soleki den Hetitisma, den Girgasitisma, den Amoritisma, den Kananitisma, den Perisitisma, den Hiwitisma nanga den Yebusitisma. Seibi folku di bigi èn di tranga moro unu. ₂MASRA, un Gado, o gi den abra na unu meki un wini den. Un mus kiri den alamala. Un no mus meki no wan ferbontu nanga den èn un no mus abi sari-ati nanga den. ₃Un no mus trow nanga den tu. No meki den umapikin fu unu trow den manpikin fu den. No teki den umapikin fu den gi den manpikin fu unu tu. ₄Efu dati psa, den o meki den manpikin fu unu tapu fu dini Mi. Den o go dini tra gado. Dan MASRA ati o bron na un tapu èn es'esi A bo kiri un puru na pasi. ₅Disi un mus du nanga den: un mus broko den altari fu den. Un mus naki den ston fu den gado broko di den poti tnapu. Kapu den postu fu den gado trowe dan un sutu faya gi den ston noso den udu popki fu den kruktu gado fu den. ₆Bika unu na wan folku di MASRA, un Gado, poti aparti. Na unu MASRA, un Gado, teki na mindri fu ala folku na grontapu gi ensrefi. ₇A no fu di un bigi moro den tra folku meki MASRA lobi unu. Kwet'kweti, un na a moro pikin folku di de. ₈Ma na fu di MASRA ben lobi unu èn fu di A ben wani hori Ensrefi na san A ben pramisi den Afo fu unu. Na fu dat'ede meki a ferlusu unu nanga En makti fu a katibo ini san un ben de. A puru un ini a makti fu Farao, a kownu fu Egipte. ₉A du dati fu un kan sabi taki MASRA, un Gado, na a enkri Gado. A Gado tapu san yu kan bow. A e hori Ensrefi na a ferbontu èn A e sori sari-ati dusundusun yari na den bakapikin fu den wan di lobi En, èn di e hori densrefi na den gebod fu En. ₁₀Ma den sma di no lobi En A e strafu èn A e puru den na pasi. A no e draidrai fu puru den sma na pasi di no lobi En. ₁₁Dat' meki un mus hori unsrefi na den gebod, un mus tan du den sani di un mus du èn un mus tan hori unsrefi na den sani di mi e leri un tide.

₁₂Efu un gi yesi na den sani na san un mus tan hori unsrefi èn un hori unsrefi trutru na den, dan MASRA, un Gado, sa meki un si taki A e hori Ensrefi na a ferbontu èn taki A e sori un sari-ati. A ben pramisi disi èn A ben sweri en gi den afo fu unu. ₁₃A sa lobi unu, A sa blesi unu èn A sa meki un kon furu ini a kondre di A ben pramisi èn di A ben sweri gi den afo fu unu taki A o gi en na unu. A sa blesi den bere fu den umasma, A sa blesi a nyanyan fu un gron, a karu, a win nanga a oli fu unu. A sa blesi den kaw, den krabita nanga den skapu fu unu te den meki pikin. ₁₄Gado sa blesi unu moro ala tra folku di de. No wan man, no wan uma noso wan meti sa de na un mindri di no sa abi pikin. ₁₅MASRA sa wai ala siki puru na pasi gi unu. A no sa meki un kisi no wan fu den takru siki di un sabi fu Egipte. A sa meki den sma di no lobi unu kisi den siki disi. ₁₆Un mus figi ala den folku puru na pasi di MASRA, un Gado, o gi abra ini un makti. No sari den èn no dini den gado fu den. No meki den kisi unu nanga dati.

₁₇Kande un prakseri ini unsrefi taki: “Den folku disi bigi moro unu. Fa un o man yagi den puru dan?” ₁₈Un no mus frede. Un mus tan prakseri san MASRA, un Gado, du nanga Farao nanga Egipte. ₁₉Un si a pina di a pina den, un si den wondru nanga den marki èn un si a makti nanga a krakti nanga san MASRA, un Gado, puru unu drape. Na so MASRA, un Gado, o du tu nanga ala den folku, gi san un e frede. ₂₀Ma a no dati wawan. MASRA, un Gado, o seni marbonsu na den tapu, te leki alamala dede di ben tan na libi èn di ben go kibri gi unu. ₂₁No beifi gi den, bika MASRA, un Gado, wan bigi èn tranga Gado, de na un mindri. ₂₂Safrisafri MASRA, un Gado, sa yagi den folku disi gwe. Un no mus kiri den wantron. Noso tumsi furu krasi meti o de gi unu. ₂₃Na so MASRA, un Gado, sa gi den abra na unu. A o tyari bigi bruya kon na den tapu te leki den no de moro. ₂₄A sa gi den kownu fu den abra ini un makti èn un o meki taki sma no o memre den moro. No wan sma o man kaka futu gi unu, te leki den no de moro. ₂₅Un mus sutu faya gi den ston noso udu popki fu den kruktu gado fu den. Un no mus teki a gowtu nanga a solfru fu san den ben meki. No meki bigi fu den sani disi kisi unu, bika gi MASRA, un Gado, den na wan groskin sani. ₂₆No tyari no wan fu den groskin sani disi kon ini un oso noso unsrefi o dede. Un no mus lobi den srefsrefi èn un mus fisti gi den bika a fluku fu Gado de na den tapu.

₁Yesus nanga den man di ben e teki leri fu En ben kon krosbei fu Yerusalem. Di den doro na den dorpu Betfaga nanga Betania ini a birti fu a Oleifbergi, A seni tu fu den man di ben e teki leri fu En go na fesi. ₂A taigi den taki: “Un go na a dorpu san de na un fesi. Leki fa un e go ini a dorpu, un o si wan yongu buriki san den sma tai drape. Noiti ete wan sma ben sidon na en tapu. Un lusu en, dan un tyari en kon dya. ₃Efu wan sma sa aksi unu fu sanede un e lusu en, un mus piki taki: ‘Masra abi en fanowdu. Te A kba, A sa seni en wantron kon dya baka.’ ” ₄Na so den man gwe, den feni a yongu buriki tai na a doro fu wan oso na sei strati, dan den lusu a buriki. ₅Wantu fu den sma di ben tnapu drape aksi den taki: “San un e du? Fu sanede un e lusu a buriki?” ₆Den man piki den sma leki fa Yesus taigi den, dan den sma libi den meki den gwe nanga a buriki. ₇Den tyari a buriki go gi Yesus, dan den bradi den krosi na en tapu. Dan Yesus go sidon na tapu. ₈Furu sma bradi den krosi tapu a pasi gi En. Trawan koti taki puru ini den gron, dan den poti den tapu a pasi. ₉Den sma di ben e waka na En fesi nanga na En baka, ben e bari taki:

₁₁Di Yesus doro na Yerusalem, A go ini a tempel dan A waka lontu e luku ala sani. Baka dati En nanga den twarfu man go na Betania, bika a ben kon lati kba.

₁₂A tamara fu en, di den e drai kmopo fu Betania, angri bigin kiri Yesus. ₁₃Fu fara Yesus si wan figabon di ben lai nanga grun wiwiri. Dan A go na a bon fu luku efu A ben sa feni froktu na en fu nyan. Ma di A doro na a bon, A si den grun wiwiri nomo, bika a no ben de figaten. ₁₄Dan Yesus taigi a bon taki: “Noiti moro wan sma sa man nyan wan froktu fu yu.” Den man di ben e teki leri fu En yere di A taki a sani dati.

₁₅Di Yesus doro baka ini Yerusalem, A go ini a tempel. Dan A bigin yagi ala den sma gwe di ben e bai sani noso seri sani drape. A drai den tafra tapu fu den man di ben e broko moni. A du a srefi sani nanga den sturu fu den man di ben e seri doifi. ₁₆A tapu ala sma di ben e teki a dyari fu a tempel leki boropasi fu syow sani psa. ₁₇Dan Yesus taigi den sma taki: “A skrifi taki: ‘Mi oso mus de wan presi pe ala folku kan kon fu begi.’ Ma un meki a tron wan nesi fu fufuruman.” ₁₈Den prenspari priester nanga den sabiman fu Gado wèt yere san psa. Dan den bigin suku wan fasi fu kiri En. Den ben frede fu Yesus, bika ala den sma ben e arki a leri fu En nanga opo mofo. ₁₉Di a son bigin saka, Yesus nanga den man di ben e teki leri fu En kmopo ini a foto.