Dag 69 van 365- Deuteronomium 11-13 en Marcus 12:1-27

₁Un mus lobi MASRA, un Gado, un mus hori unsrefi ala ten na den sani di A komanderi, na den sani di un mus tan du, na den sani na san un mus tan hori unsrefi nanga na den gebod fu En. ₂Bika a no den pikin fu unu ben kisi a leri fu MASRA, un Gado, èn den no sabi En. Ma na unu si den bigi sani di A du, a makti nanga a krakti fu En, ₃nanga den wondru nanga den marki fu En, di A du ini Egipte fu Farao, a kownu fu Egipte, nanga a heri kondre si. ₄Na unu sabi tu san a du nanga a legre fu Egipte, nanga den asi nanga den wagi fu en. Fa A meki a watra fu a Riet Se wasi den gwe, di den ben de na un baka èn den dede gwe te leki a dei fu tide. ₅Un sabi tu san A du nanga unu ini a sabana, te leki un doro na a presi disi. ₆Un sabi tu san A du nanga Datan nanga Abiram, den manpikin fu Eliab di ben de wan manpikin fu Ruben. Leti na un mindri A meki a gron priti opo dan a swari den nanga den ososma fu den, den tenti fu den nanga ala sani di den ben abi nanga san den ben e tyari. ₇Na unu si den bigi sani di MASRA du. ₈Dat' meki un mus hori den gebod di mi e leri un tide. Dan un sa kisi krakti fu go fu teki a kondre abra. A kondre pe un e hari go fu teki en gi unsrefi. ₉Un sa libi langa tu ini a kondre di MASRA pramisi èn sweri gi den afo fu unu, taki A bo gi en na den nanga den bakapikin fu den. Wan kondre pe merki nanga oni de bogobogo.

₁₀Bika a kondre di un e go teki abra, no de leki Egipte, a kondre fu pe un kmoto. Drape un ben mus nati a gron srefi baka te un ben sai leki na un dyari un e nati. ₁₁Ma a kondre di un e go teki abra, na wan kondre fu bergi nanga dal, di e kisi en watra fu a alen fu heimel. ₁₂Na wan kondre gi san MASRA, un Gado, e sorgu. MASRA, un Gado, no e puru un ai na en tapu, bigin fu a yari go te na a kba fu a yari. ₁₃So efu un arki den gebod bun di mi e leri un tide, fu un lobi MASRA, un Gado, èn fu un dini En nanga un heri ati èn nanga un heri sili, ₁₄dan A sa meki a alen fadon tapu a yoisti ten gi un kondre. Na a bigin fu a yari nanga na a kba fu a yari, fu un kan feni nyanyan fu a gron: karu, win nanga oli. ₁₅A sa meki grasi gro ini den wei gi den kaw fu unu. Un sa abi en bun. Noti sa man mankeri unu. ₁₆Ma un mus luku bun taki un ati no kori unu fu un kmoto tapu a pasi fu go dini tra gado èn fu go boigi gi den. ₁₇Efu un du dati, MASRA En ati o bron na un tapu. A o tapu a heimel gi unu meki alen no fadon. A gron no o gi nyanyan moro tu èn es'esi un o dede ini a bun kondre di MASRA o gi unu.

₁₈Un kibri den wortu disi fu mi ini un ati èn un mus libi nanga den. Tai den leki wan marki na un anu èn leki wan banti na un fes'ede. ₁₉Un mus leri den na den pikin fu unu èn un mus taki nanga den fu en te un sidon ini un oso, te un de na pasi, te un e didon nanga te un e opo. ₂₀Un mus skrifi den na den postu fu den doro fu un oso nanga den bigi doro fu den foto fu unu. ₂₁Dan un nanga den pikin fu unu sa libi solanga leki heimel sa de na loktu fu grontapu, ini a kondre di MASRA pramisi èn sweri gi den afo fu unu, taki A bo gi den.

₂₂Bika efu un hori unsrefi trutru na ala den gebod di mi e leri un tide, efu un lobi MASRA, un Gado, efu un libi leki fa A wani, èn efu un tan na En sei, ₂₃dan MASRA sa yagi ala den folku disi gi unu. Un sa man teki a kondre abra fu folku di bigi èn di tranga moro unu. ₂₄Ala presi pe un poti un futu, sa de fu unu. Bigin na a sabana te go miti Libanon èn kmoto fu a Eufratliba go te na a Se na westsei, sa de a kondre fu unu. ₂₅No wan sma sa man kaka futu gi unu. MASRA, un Gado sa meki taki a heri kondre ini san un e go, frede èn beifi gi unu, leki fa A taki tak' A o du.

₂₆Luku, tide mi hori fluku nanga blesi na un fesi: ₂₇Un sa si a blesi, efu un du san den gebod fu MASRA, un Gado, e taki di mi e leri un tide. ₂₈Ma un sa si a fluku, efu un no wan du san den gebod fu MASRA, un Gado, e taki èn efu un kmoto fu a pasi di mi e sori un tide, fu go waka baka tra gado, di un no ben sabi. ₂₉Te MASRA, un Gado, tyari un kon ini a kondre, di un e go fu go teki abra, dan un sa tnapu tapu a Gerisimbergi èn taki fa Gado o blesi unu èn tapu a Ebalbergi un sa taki fa Gado o fluku unu. ₃₀Den bergi disi de na a tra sei fu a Yordanliba abra Gilgal, krosbei fu den bigi bon fu More. Yu kan teki a pasi di e waka fu a Yordandal go na a westsei ini a kontren fu den Kananitisma. ₃₁Un tnapu klar'klari fu koti a Yordanliba abra, fu go teki a kondre abra di MASRA, un Gado, sa gi unu. Un sa teki en abra èn un sa libi na ini. ₃₂Baka dati un mus hori unsrefi finifini na ala den sani di un mus tan du nanga den sani na san un mus tan hori unsrefi, den sani di mi e leri un tide.

₁Disi na den sani di un mus tan du, nanga den sani na san un mus tan hori unsrefi finifini ini a kondre di MASRA, a Gado fu den afo fu unu, gi unu taki na fu unu, solanga un de na grontapu.

₂Den folku fu a kondre di un o go teki abra, ben e dini den gado fu den tapu hei bergi, tapu pikin bergi nanga ondro ala bon di lai wiwiri. Un mus broko ala den presi dati pis'pisi. ₃Un mus broko den altari fu den, naki den ston fu den gado broko di den poti tnapu, bron den postu fu den gado fu den èn un mus kapu den ston noso udu popki fu den kruktu gado fu den trowe. Sma no mus memre den srefsrefi moro na den presi dati. ₄Un no mus dini MASRA, un Gado, a fasi dati. ₅Un sa go na a presi di MASRA, un Gado, sori na mindri fu den lo fu unu, taki na drape A wani libi èn taki na drape A wani fu un memre En nen. Drape un sa suku En. ₆Drape un sa tyari den sani di mus bron leki ofrandi, den meti di mus srakti leki ofrandi, a tin prosenti di un mus gi Gado, den sani di un wani gi Gado leki kado, den sani di un pramisi fu gi Gado leki ofrandi, den sani di un wani gi fri leki ofrandi, nanga den fosi pikin fu den kaw, skapu nanga krabita fu unu. ₇Drape yu nanga den ososma fu yu sa nyan na fesi MASRA, un Gado, èn un sa prisiri fu den blesi nanga san MASRA, un Gado, blesi unu ini ala den sani di un du.

₈Un no sa du moro leki fa wi e du now, taki ala sma e tyari en ofrandi leki fa a wani. ₉Un e du en so now, fu di un no doro na a presi ete di MASRA, un Gado, o gi unu taki na fu unu, a presi pe un kan rostu. ₁₀Ma te un koti a Yordanliba abra, te un e libi ini a kondre di MASRA, un Gado, o gi unu taki na fu unu, te A meki taki fu no wan sei den feyanti fu unu wan feti nanga un moro, èn taki un kan libi sondro frede, ₁₁dan un mus go na a presi di MASRA, un Gado, sori unu taki na drape un mus memre En nen. Drape un mus tyari ala den sani di mi e komanderi unu. Den sani di mus bron leki ofrandi, den meti di mus srakti leki ofrandi, a tin prosenti di un wani gi Gado, den sani di un wani gi Gado leki kado nanga ala den spesrutu sani di un pramisi fu gi MASRA leki ofrandi. ₁₂Un sa prisiri drape na MASRA fesi. Unu nanga den manpikin fu unu, den umapikin, den mansrafu, den umasrafu nanga den sma fu a lo fu Lefi, di e libi ini a foto fu unu. Bika Gado no gi den sma fu a lo fu Lefi wan pisi fu a kondre leki unu, taki na fu den.

₁₃Dat' meki un mus luku bun taki un no bron meti leki ofrandi na ibri presi pe un wani. ₁₄Un sa bron den ofrandi na a spesrutu presi di MASRA sori unu na mindri fu den lo fu unu. Drape un sa bron den ofrandi èn drape un sa du ala den sani di mi komanderi unu. ₁₅Efu na fu nyan, dan kan un srakti someni leki un man, na a fasi fa MASRA, un Gado blesi unu. Un kan srakti awinsi pe un e libi. Ala sma, den wan di krin nanga den wan di no krin, kan nyan fu den meti dati, leki fa den bo nyan a meti fu wan dia. ₁₆Ma un no sa nyan a brudu. A brudu un mus kanti trowe na gron leki fa un bo kanti watra trowe. ₁₇Pe un e libi, drape un no sa nyan a tin prosenti fu a karu, a win nanga a oli fu unu. Drape un no sa nyan den fosi pikin fu den kaw, skapu nanga krabita fu unu. Sosrefi un no sa nyan fu den sani di un pramisi fu gi Gado leki ofrandi, den sani di un wani gi fri leki ofrandi noso den sani di un wani gi Gado leki kado. ₁₈Na a presi di MASRA, un Gado, sori un spesrutu fu du dati, na drape un sa nyan den na fesi fu MASRA, un Gado. Unu nanga den manpikin fu unu, den umapikin, den mansrafu, den umasrafu nanga den sma fu a lo fu Lefi, di e libi ini a foto fu unu. Un sa prisiri na fesi fu MASRA, un Gado, fu ala sani di un ben du. ₁₉Ma solanga un e libi un mus sorgu taki un no fergiti den sma fu a lo fu Lefi.

₂₀MASRA, un Gado, o meki a kondre fu unu kon moro bigi, leki fa A pramisi. Te A du dati èn un wani nyan meti fu di un lostu en, un kan nyan someni leki un wani. ₂₁Efu a presi di MASRA, un Gado, sori un fu un memre En nen fara tumsi gi unu, dan un kan srakti fu den kaw, den skapu nanga den krabita, di MASRA, gi unu. Un kan srakti èn nyan someni leki un wani, ma un mus du en leki fa mi taigi unu taki un mus du en. ₂₂Un kan nyan leki fa un bo nyan a meti fu wan dia. Den wan di krin nanga den wan di no krin kan nyan fu en. ₂₃Ma un sorgu taki un no nyan brudu, bika a brudu na libi èn un no sa nyan meti di abi libi ete ini en. ₂₄Un no sa nyan en. Un sa kanti en trowe na gron leki fa un bo kanti watra trowe. ₂₅Un no sa nyan en. Dan a sa go bun nanga unu nanga den bakapikin fu unu, efu un du san bun ini MASRA ai. ₂₆Den sani di un ben poti aparti fu gi Gado, nanga den sani di un pramisi fu gi Gado leki ofrandi, un mus tyari go na a presi di MASRA ben sori unu. ₂₇Den meti di mus bron leki ofrandi, a meti fu den nanga a brudu, mus bron tapu a altari fu MASRA, un Gado. A brudu fu den meti di un srakti leki ofrandi un mus kanti tapu a altari fu MASRA, un Gado, ma un kan nyan a meti fu en. ₂₈Un mus arki ala sani bun san mi e taigi un fu du. Dan fu têgo a sa go bun nanga unu, nanga den bakapikin fu unu, efu un du san bun ini a ai fu MASRA, un Gado.

₂₉MASRA, un Gado, o puru den folku na pasi fu a kondre pe un e hari go. Te un teki a kondre abra èn te un e libi ini a kondre fu den, ₃₀un mus luku bun taki den no kori unu fu du san den ben e du. No go suku den gado fu den. No aksi yusrefi taki: “Fa den folku disi ben e dini den gado fu den?” Na so un wani du en tu. ₃₁Un no mus dini MASRA, un Gado, a srefi fasi. Bika ala den sani di den ben e du gi den gado fu den, na sani di MASRA no lobi srefsrefi. Na wan groskin sani gi En. Den ben e bron den manpikin nanga den umapikin fu den srefi gi den gado fu den.

₃₂Un mus hori unsrefi bun na ala sani di mi komanderi unu. Un no sa poti noti moro, èn un no sa puru noti fu den tu.

₁Efu wan profeiti na un mindri noso wan sma di e si sani na ini dren taigi unu taki wan marki noso wan wondru o psa, ₂dan a marki noso a wondru psa tu ma a e taigi un tu taki: “Meki un waka baka tra gado, di un no ben sabi èn meki un dini den,” ₃dan un no sa arki den sani di a profeiti noso a sma di e si sani ini dren e taigi unu. Bika na tesi MASRA, un Gado, e tesi unu fu luku efu un lobi MASRA, un Gado, nanga un heri ati èn nanga un heri sili. ₄Un sa waka baka MASRA, un Gado, wawan. Na En un mus lespeki. Un mus hori un na den gebod fu En, èn na En sten wawan un mus arki. Na En wawan un mus dini èn na En sei wawan un mus tan. ₅Un mus kiri a profeiti noso a sma di dren a dren, bika a e taigi unu fu un du sani di MASRA, un Gado, no wani. Tapu a fasi dati a wani puru unu fu a pasi di MASRA, un Gado, taigi unu taki un fu waka. Na so un mus tyari wan kba kon na a ogri na un mindri. Bika na MASRA, un Gado, puru unu na ini Egipte, pe un ben de srafu.

₆Efu yu brada, a manpikin fu yu m'ma, yu manpikin, yu umapikin, yu eigi frow noso a moro bun mati fu yu wan kori yu bakabaka fu taigi yu taki: “Kon meki wi go dini tra gado. Gado di yu noso den afo fu yu no ben sabi. ₇Gado fu den folku di de krosbei noso farawe lontu unu, noso awinsi pe fu grontapu,” ₈dan un no sa du dati èn un no sa arki san a e taki. Un no sa abi sari-ati nanga en. Un no sa libi en fu a go. Un no sa kibri a ogri fu en tu, ₉ma un sa kiri en nomonomo. Yu mus de a fosi wan fu fringi ston na en tapu. Baka dati a heri folku sa fringi ston na en tapu. ₁₀Un mus fringi ston kiri en, fu di a pruberi fu meki un libi MASRA, un Gado, di puru unu ini Egipte, pe un ben de srafu. ₁₁Heri Israel sa yere èn sma sa frede fu du sowan ogri baka na un mindri.

₁₂Efu un yere taki na ini wan fu den foto di MASRA, un Gado, o gi unu fu libi ₁₃wantu soso man opo di meki den sma fu a foto libi Gado fu di den taigi den taki: “Meki un go dini tra gado di un no sabi” ₁₄dan un mus ondrosuku a tori bun èn aksi efu a tru. Efu a sori taki a tru taki sowan sani psa, taki den du a ogri sani disi na un mindri, ₁₅dan un sa kiri den sma fu a foto dati nanga un deigri. A heri foto un mus kiri. Libisma nanga meti. ₁₆Ala den gudu di un teki fu den sma, un mus tyari kon na wan tapu a pren, dan un e bron a heri foto nanga ala den gudu leki wan ofrandi gi MASRA, un Gado. A foto mus tan didon leki wan broko pranasi. Un no mus bow en baka. ₁₇Un no mus hori noti na baka gi unsrefi, fu den sani disi di ben mus bron leki wan ofrandi. Dan a atibron fu MASRA sa saka. A sa sori unu sari-ati, A sa sori un En lobi èn meki taki un kon furu leki fa A ben pramisi den afo fu unu. ₁₈Bika un arki san MASRA, a Gado fu unu, taki. Un hori unsrefi na ala den gebod di mi leri un tide èn un du san bun ini a ai fu MASRA, un Gado.

₁Dan Yesus gi den wan agersitori. A taki: “Wan man ben prani droifibon na ini en droifidyari. A skotu en lontu, dan a mesre wan baki pe den ben kan masi den droifi te den lepi. Dan a meki wan wakti-oso san ben bow go na loktu. Baka dati a yuru a droifidyari gi tra sma, dan a go na wan tra kondre. ₂Di a ten doro fu piki den droifi, a seni wan knekti fu go teki den droifi san a ben mus kisi fu den man di ben yuru a droifidyari. ₃Ma den man grabu en, den fon en, dan den seni en gwe nanga soso anu. ₄Dan a man di abi a droifidyari seni wan tra knekti go, ma den naki en na en ede, èn den gi en syen. ₅Dan a man seni ete wan knekti go, ma den kiri a knekti dati. Na so den man du nanga wan lo tra knekti fu a man. Den fon sonwan fu den, trawan den kiri. ₆A man di abi a droifidyari, ben abi a manpikin fu en ete, di a ben lobi. Te fu kba a seni en go na den nanga a prakseri taki: ‘Den no sa du den sani dati nanga mi manpikin.’ ₇Ma den man di ben yuru a gron taigi makandra taki: ‘Na a boi disi o kisi a gron te en p'pa dede. Kon meki un kiri en, dan unu o kisi a gron.’ ₈So den grabu a boi, dan den kiri en. Baka dati den srepi en go na dorosei fu a droifidyari.” ₉Dan Yesus aksi den sma taki: “San un e prakseri taki a man di abi a droifidyari o du? Mi e taigi unu: A o kon kiri den man di ben yuru a droifidyari, dan a o yuru en gi tra sma. ₁₀Un srefi leisi ini a Santa Buku taki:

₁₂Den man ben kon ferstan taki na gi den A koti wan odo nanga a agersitori disi. Dat' meki den ben wani grabu En, ma den ben frede den sma. So den libi En, dan den gwe.

₁₃Dan den seni wantu Fariseiman nanga wantu fu den man fu Herodes, go fu kisi Yesus meki A taki wan sani san no bun. ₁₄Den man go na En, dan den taigi En taki: “Meister, un sabi taki Yu na wan man di no e kori tra sma. Yu no abi bisi nanga san sma e taki fu Yu, èn ala sma na a srefi gi Yu. Yu e leri unu a pasi fu Gado leki fa a de.” Dan den aksi Yesus taki: “A fiti efu a no fiti fu pai lantimoni na a grankownu fu den Romeinisma? Un mus pai, efu un no mus pai?” ₁₅Ma Yesus si taki na wan trapu den ben wani seti gi En. Dan A aksi den taki: “Fu sanede un e pruberi fu tesi Mi? Un gi Mi wan solfrumoni meki Mi luku en.” ₁₆Den gi En wan solfrumoni, dan Yesus aksi den taki: “Suma fesi nanga suma nen de na en tapu?” Den piki taki: “A di fu a grankownu.” ₁₇Ne Yesus taigi den taki: “Dan un gi a grankownu san na fu en, èn un gi Gado san na fu Gado.” Den man ben ferwondru fu a fasi fa Yesus piki den.

₁₈Wantu Saduseiman kon na Yesus fu aksi En wan sani. Den man disi no ben e bribi taki dedesma o kon na libi baka. Den taki: ₁₉“Meister, Moses ben skrifi taki efu wan man trow, èn a dede libi en uma sondro fu den kisi pikin, dan en brada mus trow nanga a uma fu meki pikin gi en brada di dede. ₂₀Now seibi brada ben de. A fosiwan trow, ma a dede sondro fu libi wan pikin na baka. ₂₁Dan a brada di waka na en baka, trow nanga a uma. Ma ensrefi dede sondro fu kisi pikin. A srefi sani miti a di fu dri brada. ₂₂Na so no wan fu den seibi brada kisi pikin nanga a uma. Te fu kba, a uma srefi kon dede.” ₂₃Dan den aksi Yesus taki: “Te den dedesma o kon na libi baka, sortu wan fu den brada sa abi a uma disi leki en trow-uma? Bika den alamala ben trow nanga en.” ₂₄Yesus piki den taki: “Let' dya un kan si taki un fowtu srefsrefi. Bika un no sabi san skrifi ini a Santa Buku, èn un no sabi a krakti fu Gado. ₂₅Te den dedesma o kon baka na libi, den no o trow nanga makandra. Bika den o de leki den engel na heimel. ₂₆Un no leisi dan san Moses skrifi fu a tori efu dedesma o kon na libi baka? Ini a tori fu a pikin bon di ben teki faya sondro fu bron, Gado taigi en taki: ‘Mi na a Gado fu Abraham, Isak, nanga Yakob.’ Na so un e si taki dedesma o kon na libi baka. ₂₇Gado a no Gado fu dedesma, ma fu sma di e libi. Unu e meki wan bigi fowtu.”