Dag 70 van 365- Deuteronomium 14-16 en Marcus 12:28-44

₁Un na pikin fu MASRA, un Gado. Un no sa koti marki ini un buba noso piri un fes'ede te wan sma fu unu dede. ₂Bika un na wan folku di poti aparti gi MASRA. Na unu MASRA teki na mindri fu ala tra folku di e libi na grontapu, fu de En eigi folku.

₃Un no sa nyan noti san de wan groskin sani ini Gado ai.

₄Disi na den meti di un kan nyan: a kaw, a skapu nanga a krabita, ₅den difrenti sortu dia, den difrenti sortu stonbokoboko, nanga a werder skapu. ₆Moro fara ala meti fu san a fesi futu priti na tu. A fesifutu no mus priti afu nomo èn den mus de meti di e nyan, dan baka dati den en kaw a nyanyan fu a di fu tu leisi. ₇Disi na den meti di un no mus nyan awinsi den fes'futu priti na tu noso awinsi den na meti di e nyan, dan baka dati den e kaw a nyanyan fu a di fu tu leisi. A kameel, a hei nanga a klipdas. Den meti disi e nyan dan den e kaw a nyanyan fu a di fu tu leisi, ma den fes'futu fu den no priti tu. Un mus si den leki meti di no krin. ₈Un sa si a agu tu leki wan meti di no krin, bika en fes'futu priti na tu, ma a no e nyan dan a e kaw a nyanyan fu a di fu tu leisi. Un no sa nyan a meti fu en. Un no sa fasi a dedeskin fu en tu.

₉Fu ala sani di e libi na ini watra, disi na den wan di un kan nyan: un kan nyan ala sani di abi vin nanga buba. ₁₀Ma un no sa nyan noti di no abi vin noso buba. Un sa si den sani dati leki sani di no krin.

₁₁Un kan nyan ala fowru di krin. ₁₂Ma disi na den wan di un no sa nyan: den difrenti sortu aka, ₁₃den difrenti sortu tingifowru nanga den difrenti kawfutuboi. ₁₄Den difrenti sortu blaka fowru di den e kari raaf. ₁₅A struisfowru, a meeuw nanga den difrenti sortu sperwer. ₁₆Den difrenti sortu owrukuku. ₁₇A pelikaan nanga a aalscholver. ₁₈A ooievaar, den difrenti sortu sabaku, a hop nanga a fremusu. ₁₉Ala den pikinpikin sani tu di abi frei, un sa si leki sani di no krin. Un no sa nyan den. ₂₀Un kan nyan ala fowru di krin.

₂₁Un no sa nyan wan dede meti. Bika un na wan folku di poti aparti gi MASRA, un Gado. Un kan gi en na den doroseisma di e libi na un mindri noso un kan seri en gi wan doroseisma. Un no sa bori wan pikin skapu tu ini a merki fu en eigi m'ma.

₂₂Ala yari un sa poti tin prosenti fu ala sani di un koti na ini un gron aparti. ₂₃Un sa nyan a tin prosenti fu a karu, a win, a oli nanga den fosi pikin fu den kaw, den skapu nanga den krabita fu unu, na fesi fu MASRA, un Gado, na a presi di A sori unu taki na drape A wani fu un memre En nen. A fasi disi un e leri fu lespeki MASRA, un Gado, un heri libi langa. ₂₄Efu a pasi langa tumsi gi unu èn efu MASRA, un Gado, blesi un bogobogo taki un no man tyari ala den sani go na a presi di MASRA, un Gado, sori unu fu un mus memre En nen, fu di a fara tumsi, ₂₅dan un mus seri den sani disi dan un tyari a moni go na a presi di MASRA, un Gado, sa sori unu. ₂₆Drape un sa teki a moni bai ala sani san un lostu nanga san un wani soleki kaw, skapu, krabita, win noso tra tranga dringi. Dan un nanga den ososma fu unu sa nyan èn meki prisiri drape na fesi fu MASRA, un Gado. ₂₇Un no sa fergiti den sma fu a lo fu Lefi di e libi na un mindri. Bika den no abi wan eigi pisi gron leki unu.

₂₈Abra ibri tu yari un mus tyari den tin prosenti fu unu kon na makandra ini un eigi foto. ₂₉Dan den sma fu a lo fu Lefi sa kon nyan te den bere furu. Bika den no abi wan pisi gron gi densrefi. A srefi fasi den doroseisma, den pikin di no abi p'pa nanga m'ma moro nanga den uma di masra dede kba, sa kon. Ala den sma disi di e libi na un mindri sa kon en nyan tu te den bere furu. Dan MASRA, un Gado, sa blesi ala sani san un e du.

₁Ibri seibi yari un sa taigi a sma di mus pai unu taki a no abi fu pai un baka. ₂Tapu a fasi disi un mus du en: Ibri sma di ben leni wan trawan moni sa taigi a sma di a ben leni a moni taki a no abi fu pai en baka. A no sa dwengi wan sma fu Israel leki ensrefi fu pai en baka. Bika na ini a nen fu MASRA den sma no abi fu pai baka. ₃Wan doroseisma yu kan dwengi fu a pai yu baka. Ma efu na wan sma fu Israel leki unsrefi, dan yu sa taigi en taki a no abi fu pai yu baka. ₄Pôtisma no sa de na un mindri bika MASRA sa blesi unu ini a kondre di MASRA, un Gado, sa gi unu taki na fu unu. ₅A sa du dati efu un arki bun san MASRA, un Gado, e taigi unu fu hori unsrefi bun na a heri gebod di mi e leri un tide. ₆Te MASRA, un Gado, blesi unu leki fa A pramisi, un o man leni furu tra folku, ma unsrefi no leni noti. Un o abi makti abra furu tra folku, ma sma no o abi makti na un tapu.

₇Efu ini a kondre di MASRA, un Gado, sa gi unu wan pôtisma, wan sma fu Israel leki unsrefi, de na un mindri ini a foto pe un e libi, un no sa tranga un ati èn gridi en wan sani. ₈Un sa gi en bogobogo èn nofo, someni leki a abi fanowdu. ₉Un mus luku bun taki un no du a lagi sani disi fu no leni wan poti sma wan sani fu di un sabi taki a di fu seibi yari e kon, a yari pe un mus taigi den sma taki den no abi fu pai un baka. Tapu a fasi disi un no e sori sari-ati èn un e sondu, efu a sma kragi na MASRA fu yu. ₁₀Un sa gi en nofo èn un ati no sa hati unu te un gi en. Bika MASRA, un Gado, sa blesi un fu dati ini ala sani di un du nanga san un wani du. ₁₁Pôtisma o de nomo na un mindri. Fu dat'ede mi e taigi un taki un mus gi bogobogo na a sma fu Israel leki unsrefi, na a mofinawan nanga a pôtiwan ini un kondre.

₁₂Efu wan sma fu Israel, wan Hebrewman noso wan Hebrew-uma, leki unsrefi seri ensrefi gi unu, a sa wroko siksi yari. Ini a di fu seibi yari un mus libi en fu a go fri fu en. ₁₃Te un libi en fu a go fri fu en, un no sa meki a gwe nanga leigi anu. ₁₄Un sa gi en nofo skapu nanga krabita nanga karu nanga win. Un sa gi en fu den sani nanga san MASRA, un Gado, blesi unu. ₁₅Un mus memre taki un ben de srafu na ini Egipte èn taki na MASRA, un Gado, poti un fri. Na fu dat'ede mi e gi un a gebod disi. ₁₆Ma efu a taigi unu taki a no wan gwe libi unu, fu di a lobi yu nanga den ososma fu yu èn fu di a abi en bun na unu, ₁₇dan un sa teki wan fini sani dan un boro en yesi nanga en fasi na a doro. Tapu a fasi disi a sa de un srafu fu têgo. A srefi sani un sa du nanga a umasrafu fu unu. ₁₈Un no mus tranga gi unu efu un mus libi en fu a go fri fu en. Bika siksi yari langa a wroko gi unu gi afu fu a moni di un bo pai wan wrokoman. Efu un du so, dan MASRA, un Gado, sa blesi unu ini ala sani san un e du.

₁₉Te den kaw, den skapu nanga den krabita fu unu meki pikin, un sa poti ala fosi manwan aparti gi MASRA, un Gado. Un no mus meki sowan fosi pikin du wroko gi unu. Un no sa koti a wiwiri tu fu a fosi pikin fu a skapu. ₂₀Un nanga den ososma fu unu sa nyan den meti disi ala yari na fesi fu MASRA, un Gado, na a presi di MASRA sa sori unu. ₂₁Efu wan sani e du a meti, efu a malengri, breni noso efu wan tra sani e du en, dan un no sa srakti en gi MASRA, un Gado. ₂₂Un sa nyan sowan meti na ini a foto pe un e tan. Un sa nyan en leki fa sma di krin noso sma di no krin bo nyan a meti fu wan dia. ₂₃Soso a brudu fu en un no sa nyan. Un sa kanti a brudu trowe na gron leki fa un bo kanti watra trowe.

₁No fergiti taki ini a mun Abib un mus hori a Paskafesa fu gi MASRA, un Gado, grani. Bika na ini mun Abib MASRA, un Gado, puru neti na ini Egipte. ₂Leki paska-ofrandi un sa srakti skapu, krabita nanga kaw gi MASRA, un Gado. Un sa srakti den na a presi pe MASRA sa sori unu taki na drape A wani taki un mus memre En nen. ₃Un no sa nyan brede di meki nanga dyesi makandra nanga a meti fu a ofrandi. Seibi dei langa un no sa nyan brede di meki nanga dyesi. A brede disi mus memre unu na a pina di un pina. Bika es'esi un ben kmoto ini Egipte. Solanga un e libi un no mus fergiti a dei di un kmoto na ini Egipte. ₄Seibi dei langa dyesi no sa de fu feni ini a heri birti pe un e tan. Fu a meti di un srakti a neti fu a fosi dei, noti no mus tan te leki a tamara fu en. ₅Un no sa srakti a Paska-ofrandi na ini wan fu den foto di MASRA, un Gado, o gi unu. ₆Ma un sa srakti en na a presi di MASRA, un Gado, sa sori unu taki na drape A wani taki un mus memre En nen. Drape un sa srakti en. Un sa srakti en te neti e fadon, te a son e go na ondro. Dati na a yuru di un ben kmoto na ini Egipte. ₇Un sa bori en, èn un sa nyan en na a presi di MASRA, un Gado, sa sori unu. A tamara fu en un sa drai go baka na un tenti. ₈Siksi dei langa un sa nyan brede di meki sondro dyesi. Tapu a di fu seibi dei un sa kon makandra èn hori wan fesa fu gi MASRA, un Gado, grani. Dan un no sa wroko.

₉Un sa teri seibi wiki. Un mus bigin teri fu a fosi di un bigin koti graan. ₁₀Dan un sa hori a fesa fu den wiki fu gi MASRA, un Gado, grani. Un sa tyari wan ofrandi nanga wan fri wani gi MASRA, un Gado. A ofrandi disi sa bigi na a fasi fa A ben blesi unu. ₁₁Un sa meki prisiri na fesi fu MASRA, un Gado. Unu, den manpikin nanga den umapikin fu unu, den mansrafu nanga den umasrafu fu unu, den sma fu a lo fu Lefi di e libi ini a foto fu unu, den doroseisma, den pikin di no abi p'pa nanga m'ma moro nanga den uma di masra dede kba. Un sa prisiri na a presi di MASRA, un Gado, sa sori unu taki na drape A wani taki un mus memre En nen. ₁₂Un mus memre taki un ben de srafu na ini Egipte. Dat' meki un mus tan du a sani disi.

₁₃Seibi dei langa un sa hori a fesa fu memre taki un ben e libi wan pisten ini kampu. Disi un sa du te un tyari a nyanyan kon na wan di un koti ini un gron èn un masi den droifi. ₁₄Un sa prisiri tapu a fesadei. Unu, un manpikin, un umapikin, den mansrafu nanga den umasrafu fu unu, den sma fu a lo fu Lefi, den doroseisma, den pikin di no abi p'pa nanga m'ma moro nanga den uma di masra dede kba di e libi ini a foto fu unu. ₁₅Seibi dei langa un sa hori a fesa disi fu gi MASRA, un Gado, grani na a presi di MASRA sa sori unu. Bika MASRA, un Gado sa blesi a nyanyan fu un gron fu un kan koti furu. A sa blesi ala sani tu di un e du. Dat' meki un kan prisiri trutru.

₁₆Dri leisi wan yari ala mansma na un mindri sa kon na fesi MASRA, un Gado, na a presi di A sa sori unu. Dati na tapu a fesa pe un mus nyan brede di meki sondro dyesi, tapu a fesa fu den wiki nanga tapu a fesa fu memre taki un ben e libi wan pisten ini kampu. Ma den no sa kon nanga leigi anu na MASRA fesi. ₁₇Ala sma sa gi san a abi, na a fasi fa MASRA, un Gado, blesi en.

₁₈Ini ala den foto fu den lo fu unu di MASRA, un Gado, gi unu un sa poti krutubakra nanga ofisiri. Den sa koti krutu gi a folku tapu wan reti fasi. ₁₉Un no sa krutu tapu wan kruktu fasi. Un no sa de na a sei fu wan sma èn un no sa teki kado fu den sma. Bika wan kado kan meki wan koniman tapu en ai èn a e meki den drai a tori fu a sma di abi leti. ₂₀Un sa du ala muiti fu sani psa tapu wan leti fasi. Dan un sa tan na libi fu teki a kondre abra di MASRA, un Gado, sa gi unu.

₂₁Te un meki wan altari gi MASRA, un Gado, un no sa poti no wan postu fu wan gado noso tra postu na en sei. ₂₂Un no sa poti no wan ston tnapu tu. Bika MASRA, un Gado, no lobi dati srefsrefi.

₂₈Wan fu den sabiman fu Gado wèt ben kon drape, èn a yere fa den ben e taki. A ben feni taki Yesus piki den man bun, dan a aksi En taki: “Sortu wan fu den wèt na a moro prenspari wan fu den alamala?” ₂₉Yesus piki taki: “A moro prenspari wan na: Sma fu Israel, un arki! Masra un Gado, na En wawan na Masra. ₃₀Yu mus lobi Masra, yu Gado, nanga yu heri ati, nanga yu heri sili, nanga yu heri ferstan èn nanga ala yu krakti. ₃₁A trawan di prenspari leki a fosiwan na: Yu mus lobi tra sma soleki fa yu lobi yusrefi. No wan tra wèt no de di prenspari moro den tu disi.” ₃₂Dan a sabiman fu Gado wèt piki taki: “Meister, Yu abi leti. Leki fa Yu taki, na Masra wawan na Gado, èn no wan trawan no de, boiti En. ₃₃Un mus lobi En nanga un heri ati, nanga un heri ferstan, èn nanga ala un krakti. Èn un mus lobi tra sma soleki fa un lobi unsrefi. Den sani disi moro prenspari moro leki fu bron wan meti gi Gado, noso iniwan tra sani san yu ben kan gi Gado leki ofrandi.” ₃₄A fasi fa a man piki, Yesus si taki na wan man nanga ferstan. Dan Yesus taigi en taki: “A no libi furu moro fu yu kon ondro a tiri fu Gado.” Baka dati no wan sma ben prefuru fu aksi En wan sani.

₃₅Di Yesus ben e gi leri ini a tempel, A taki: “Fa den sabiman fu Gado wèt kan taki tak' a Mesias na wan bakapikin fu kownu David? ₃₆Bika a Santa Yeye ben meki David srefi taki: ‘Masra Gado taigi mi Masra taki: Kon sidon na Mi let'anu sei, te leki Mi poti den feyanti fu Yu ondro Yu futu.’ ₃₇We, efu David srefi kari a Mesias en Masra, dan fa A kan de en bakapikin dan?”

Bun furu sma ben lobi arki te Yesus ben e gi leri.

₃₈Di A ben gi leri, A taki: “Un mus luku bun nanga den sabiman fu Gado wèt. Den lobi fu weri langa krosi e koiri, èn den lobi te sma e gi den lespeki odi na wowoyo. ₃₉Den lobi fu sidon na den moro bun presi ini den kerki, èn den wani sidon na den moro prenspari presi te den go nyan na sma oso. ₄₀Den e puru den oso na a anu fu den uma di masra dede kba, dan den e begi langabere begi fu sma denki taki den bun. Dat' meki a strafu fu den o moro hebi.”

₄₁Dan Yesus go sidon abrasei fu a kisi pe yu e poti moni gi a tempel. A ben luku fa someni sma e poti moni ini a kisi. Wan lo gudusma ben poti furu moni. ₄₂Dan wan pôti uma kon poti tu kopromoni ini a kisi. Dati na pikinso moni nomo. A masra fu a uma disi ben dede kba. ₄₃Dan Yesus kari den man di ben e teki leri fu En kon. A taigi den taki: “Fu tru Mi e taigi un taki: A pôti uma disi poti moro furu moni ini a kisi moro ala den tra sma. ₄₄Bika ala den tra sma poti pikinso fu a furu moni san den abi, ma a pôti uma disi poti ala fu a pikinso moni san a ben abi fu sorgu gi ensrefi.”