Dag 71 van 365- Deuteronomium 17-19 en Marcus 13:1-20

₂Efu wan man noso wan uma de ini wan fu den foto di MASRA, un Gado, o gi unu, di no hori en na a ferbontu, fu di a e du wan sani di no bun ini a ai fu MASRA, un Gado, ₃fu dini tra gado, a son, a mun noso tra sani di de na loktu na heimel èn fu boigi gi den, aladi mi taigi unu taki un no mus du en, ₄èn wan sma kon taigi unu noso un kon kisi fu yere en, dan un mus ondrosuku finifini efu a de so. Efu a sori taki a tru taki sowan ogri psa trutru na ini Israel, ₅un mus tyari a man noso a frow di du a ogri disi go na a bigi doro fu a foto dan un fringi ston kiri en. ₆Efu tu noso dri ketoigi taki tak' na so a de, dan un sa kiri a sma di mus kisi a strafu. Efu wan ketoigi nomo de un no sa kiri en. ₇Den ketoigi sa de den fosi sma di mus fringi ston fu kiri en. Baka dati a heri folku sa fringi ston gi en. Tapu a fasi disi un mus tyari wan kba kon na a ogri na un mindri.

₈Efu tori de fu krutu den foto fu unu èn wan tori de di tranga tumsi gi unu fu krutu soleki wan kiri tori, wan tori pe a no de krin suma mus kisi leti, noso wan tori pe wan sma gi wan trawan mankeri, dan un sa go na a presi di MASRA, un Gado, sa sori unu. ₉Un sa go na den lefiti priester nanga a krutubakra di drape, dan un aksi den rai. Dan den sa krutu a tori. ₁₀Un sa du san den man disi, fu a presi di MASRA sori unu, taigi unu fu du. Un sa du ala sani finifini di den taigi unu taki un mus du. ₁₁Un sa du san den taigi unu fu du èn un sa hori un na a besroiti di den meki. Un no sa beni noso drai a besroiti di den teki. ₁₂Den mus kiri a sma di denki taki a tranga, dan a no du san a priester noso a krutubakra taigi en. Bika den e du a wroko ini a nen fu MASRA, un Gado. Tapu a fasi disi un mus tyari wan kba na a ogri ini Israel. ₁₃A heri folku sa yere disi èn den sa frede fu den du a sani disi.

₁₄Te un doro ini a kondre di MASRA, un Gado, o gi unu èn, teki en abra èn un e libi na ini, dan un taki: “Un wani wan kownu tu leki fa ala den folku di lontu unu,” ₁₅dan un sa teki wan kownu di MASRA, un Gado, sa sori unu. Un sa teki wan sma fu un eigi folku leki kownu gi unsrefi. Un no sa teki wan doroseisma di no de wan sma fu un folku leki un kownu. ₁₆A kownu no sa wani furu asi èn a no sa seni sma fu en folku go baka na Egipte fu go bai asi. Bika MASRA taigi un taki: “Noiti moro un sa drai go baka tapu a pasi dati.” ₁₇A kownu no sa abi furu frow tu. Noso dati o meki a tapu fu dini Gado. A no sa abi tumsi furu solfru nanga gowtu tu.

₁₈Te a kownu sidon na tapu en kownusturu, a sa seni sma go na den lefiti priester di abi a wèt, meki den skrifi en gi en fu a kan abi en tu gi ensrefi. ₁₉A sa abi a wèt na en, èn a sa leisi na ini en heri libi langa. Tapu a fasi dati a sa leri fu leri fu lespeki MASRA, en Gado, èn hori ensrefi bun na ala den wortu fu a wèt nanga ala den sani di a mus tan du. ₂₀Dan a no sa firi ensrefi moro hei moro den tra sma fu en folku, noso du wan sani di a wèt e taki tak' a no mus du. Sofasi en nanga den manpikin fu en sa tan langa ten na ini Israel.

₁Den lefiti priester, sobun a heri lo fu Lefi, no sa abi wan pisi gron gi densrefi leki den tra sma fu Israel. Den sa libi fu den ofrandi fu MASRA, di e bron nanga faya. ₂Den no sa abi wan pisi gron fu densrefi. MASRA sa sorgu gi den, leki fa A ben pramisi den. ₃Te wan sma fu a folku tyari wan kaw, wan skapu noso wan krabita kon fu srakti leki ofrandi, a sa gi den priester den skowru, den wang nanga a maag fu a meti, fu di den abi a leti fu kisi en. ₄Un sa gi den priester den fosi nyanyan di un koti fu a karu, a moro bun win nanga oli di un meki fu den fosi froktu di den koti, nanga a moro bun wiwiri fu un skapu. ₅Bika na den MASRA, un Gado, teki na mindri fu ala den lo fu unu, fu en nanga den manpikin fu en tnapu fesi MASRA fu du a wroko ini En nen, fu têgo. ₆Efu wan Lefitiman kon tan ini wan fu den foto fu unu ini Israel, leki wan doroseisma, èn a angri fu go na a presi di MASRA sa sori unu, ₇fu go wroko ini a nen fu MASRA, en Gado, leki den tra Lefitifamiri fu en, di e wroko drape na MASRA fesi, ₈un sa gi en den srefi sani leki den tra Lefitiman. Un no sa luku na den sani di a kisi fu di famirigudu fu en seri.

₉Te un doro ini a kondre di MASRA, un Gado, o gi unu, un no sa du densrefi groskin sani di den folku drape e du. ₁₀No wan sma sa de na un mindri di sa bron en manpikin noso en umapikin leki ofrandi. No wan sma sa de tu na un mindri di e koti luku fu sabi san de fu kon. No wan sma sa de na un mindri di e koti luku gi trawan. No wan sma sa de na un mindri di e leisi karta gi sma fu si fa den libi o lon. No wan tofruman sa de tu na un mindri, ₁₁no wan bonuman, no wan sma di man kari yorka fu dedesma noso tra yeye fu aksi den rai. ₁₂Bika MASRA e si ibrisma di e du den sani disi leki wan groskin sani èn na fu den sani disi ede MASRA, un Gado, e yagi den folku gwe gi unu. ₁₃Unsrefi no sa du den sani disi fesi MASRA, un Gado. ₁₄Bika den folku disi di un o yagi gwe, e arki san den sma e taki di e koti luku gi trawan nanga den sma di e leisi trawan anu fu sabi san de fu kon. Ma MASRA, un Gado, no wani unu du den sani dati. ₁₅MASRA, un Gado, sa seni profeiti kon gi unu. Wan sma fu un eigi folku leki mi. Na en un mus arki. ₁₆Unsrefi ben aksi MASRA, un Gado, na a Horeb-bergi, fu A du dati, tapu a dei di un ben kon makandra. Un ben taki tak': “Un no wani yere a sten fu MASRA, un Gado, moro langa èn un no wan si a bigi faya disi tu noso un o dede.” ₁₇Ne MASRA taigi mi taki: “Na wan bun sani den aksi. ₁₈Mi sa seni profeiti gi den. Sma fu den eigi folku, leki yu. Mi sa poti den wortu fu Mi na ini den mofo èn a sa taigi den ala sani di Mi taigi en fu taigi den. ₁₉Mi aksi frantwortu na a sma di no arki den sani di a taki na ini Mi nen. ₂₀A profeiti sa dede di abi a dek'ati fu taki wan sani di Mi no taigi en fu taki, dan a taki tak' na Mi taki en.” ₂₁Efu un sa aksi unsrefi taki: Ma fa un kan sabi efu na wan sani di MASRA no taki? ₂₂dan na disi na a fasi fa un sa sabi: Efu wan profeiti taki wan sani ini a nen fu MASRA, ma a sani di a taki no psa fu sori taki a tru, dan na wan sani di MASRA no ben taki. Na lei a ben e lei. Un no sa frede gi sowan profeiti.

₁MASRA, un Gado, o kiri den folku puru na pasi èn A o gi unu a kondre fu den. Te A du dati, un teki a kondre abra èn un e libi ini den foto nanga den oso fu den, ₂un mus poti dri aparti foto, ini a kondre di MASRA, un Gado, o gi unu taki na fu unu. ₃Un mus marki o bigi a kondre de di MASRA, un Gado, o gi unu, dan un prati en na dri pisi. Dan wan sma di kiri wan trawan kan lowe go drape. ₄A sma di kiri wan trawan sa lowe go drape èn a sa tan na libi efu a no kiri a trawan espresi èn efu a no ben hori a trawan na ati kba. ₅Efu tu man go na busi fu kapu udu, dan wan fu den wai en anu nanga a aksi fu fala a bon, dan a aksi ede lusu kmoto fu a tiki naki a trawan sowan fasi taki a dede, dan sowan man kan lowe go na wan fu den foto fu tan na libi. ₆Tapu a fasi disi a famiri fu a man di dede èn di abi a leti fu kiri en baka, no o man lon kon miti en fu kiri en ini en atibron. Bika a man no fiti fu den kiri en, fu di a no ben hori a wan di dede na ati. ₇Fu dat'ede mi e taigi un taki un sa poti dri foto aparti.

₈MASRA, un Gado, o meki a kondre fu unu kon moro bigi, leki fa A ben sweri gi den afo fu unu, èn A o gi unu a heri kondre di a ben pramisi den afo fu unu taki A bo gi den, ₉efu un hori unsrefi trutru na ala den gebod di mi e leri un tide, efu un lobi MASRA, un Gado, èn efu un libi leki fa En wani. Te dati psa un mus poti ete dri tra foto. ₁₀Dan brudu no sa lon fu soso ini a kondre di MASRA, un Gado, o gi unu taki na fu unu, èn un no sa fiti fu kisi strafu fu di un kiri wan sma fu soso.

₁₁Ma efu wan sma ben hori wan trawan na ati kba, luru a trawan, kiri en, dan a lowe go na wan fu den foto disi, ₁₂den fesiman fu a foto fu en sa seni teki en fu drape. Den sa gi en abra na a famiri fu a sma di a kiri èn di abi a leti fu kiri en baka, fu a kiri en. ₁₃Un no sa sari en. Tapu a fasi disi un e puru a strafu na un tapu taki brudu ben lon fu soso na ini Israel. Dan a sa go bun nanga unu.

₁₄Ini a kondre di MASRA, un Gado, o gi unu, den afo fu unu ben poti langa ten na fesi kba postu noso ston di e sori pe a gron fu a tra sma e bigin èn pe a e kba. Un no sa dribi den postu noso ston disi ini a kontren fu unu.

₁₅Efu tu noso dri ketoigi taki tak' na so a de, dan fosi un sa kiri krutu wan sma fu wan sani di a du. Wan ketoigi nomo no o man meki taki un krutu wan sma fu wan ogri noso wan sondu di a du. ₁₆Efu wan ketoigi lei gi wan sma fu a tra sma kan kisi strafu, ₁₇den sa tyari den tu man disi go na MASRA fesi. Den sa poti den tnapu fesi den priester nanga den krutubakra di de drape a dei dati. ₁₈Dan den krutubakra sa ondrosuku a tori finifini. Efu a de so taki na lei a ketoigi lei gi wan sma fu Israel leki ensrefi, ₁₉dan a sa kisi a strafu di a ben wani taki a trawan kisi. Na so un sa tyari wan kba na a ogri na un mindri. ₂₀Bika den tra sma sa yere èn den sa frede fu du so wan sani baka. ₂₁Un no sa sari en. Efu na kiri a kiri wan sma, un mus kiri en baka. Efu na broko wan sma ai, wan sma tifi, wan sma anu noso futu, un mus broko en ai, en tifi, en anu noso en futu baka.

₁Di Yesus e waka kmopo na ini a tempel, wan fu den man di ben e teki leri fu En taigi En taki: “Meister, luku fa den ston moi èn fa den oso bigi.” ₂Dan Yesus taigi en taki: “Yu e si ala den bigi oso disi? Den alamala o broko te na gron. No wan ston o tan na tapu wan trawan.”

₃Baka dati Yesus go sidon tapu a Oleifbergi, na abrasei fu a tempel. Petrus, Yakobus, Yohanes, nanga Andreas wawan ben de nanga En. Dan den aksi En taki: ₄“Masra, taigi unu: Oten a sani dati o psa? San o de a marki di o sori taki den sani dati de fu psa?” ₅Dan Yesus bigin taigi den taki: “Un mus luku bun taki no wan sma no kori unu! ₆Furu sma o du leki den na Mi. Den o taki tak' den na a Mesias, èn den o kori furu sma. ₇Te un sa yere taki kondre e feti nanga densrefi èn taki bigi feti de fu broko, un no mus skreki. Den sani disi mus fu psa, ma dati a no a kba ete. ₈Bika a wan folku o feti nanga a tra folku, èn a wan kondre o feti nanga a trawan. A gron o seki hebi na difrenti presi, èn angriten o de. Ma ala den sani disi na soso a bigin fu a tranga ten di o kon. ₉Ma un mus luku bun, bika den sa tyari un go na krutu, èn den o fon unu na ini den kerki fu den. Fu Mi ede den o srepi unu go na fesi granman nanga kownu. Dan un mus teki den okasi dati fu ferteri den fu Mi. ₁₀Bika fosi grontapu kba, sma fu ala folku mus yere a bun nyunsu. ₁₁Te den kisi unu tyari go na krutu, un no abi fu broko un ede na fesi san un mus taki. Ma un mus taki san Gado o gi un fu taki a yuru dati. Bika a no unu sa taki fu unsrefi, ma a Santa Yeye sa meki un taki.” ₁₂Dan Yesus taki moro fara: “Wan brada sa gi en eigi brada abra fu den kiri en. Wan p'pa sa du a srefi sani nanga en pikin. Pikin sa tron feyanti fu den m'ma nanga den p'pa, èn den o kiri den. ₁₃Fu Mi ede no wan sma no o man si un na ai. Ma Gado sa ferlusu a sma di sa hori doro te na a kba.”

₁₄“Te un si taki a groskin sani di e pori ala sani, de pe a no mus de, dan den sma di de ini Yudea mus lon go na den bergi. (Suma e leisi a sani disi mus suku fu ferstan en.) ₁₅A sma di de tapu a daki fu en oso, no mus saka go ini en oso fu go teki sani. ₁₆Èn a sma di de ini en gron, no mus drai go na en oso fu go teki en krosi. ₁₇Den uma di de nanga bere, nanga den di abi pikin na bobi a pisten dati, o de fu sari. ₁₈Un mus begi taki a sani disi no o psa ini a kowruten. ₁₉Bika ini den dei dati, wan bigi pinaten o kon. Kmopo na a bigin di Gado ben meki ala sani, kon te leki now, noiti sowan ten ben de. Èn noiti moro sowan ten o kon baka. ₂₀Efu Gado no ben syatu a ten disi, no wan sma ben o tan na libi. Ma Gado syatu a ten fu den sma fu En ede, di A ben teki gi Ensrefi.