Dag 80 van 365- Jozua 7-9 en Lucas 1:23-38

₁Ma den Israelitisma ben teki sani di den ben mus kiri èn pori. Akan ben teki wantu fu den sani disi. A ben de a manpikin fu Karmi, Karmi ben de a manpikin fu Sabdi èn Sabdi ben de a manpikin fu Serak fu a lo fu Yuda. Ne MASRA atibron srefsrefi tapu den Israelitisma.

₂A pisten dati Yosua seni wantu man kmoto fu Yeriko, go na a foto Ai, di ben de na oostsei fu a foto Betel, krosbei fu a foto Bet-Awen. Yosua ben komanderi den man fu den go luku kibrikibri fa a kondre ben tan. So den man hari go luku fa sani ben e waka ini Ai. ₃Di den drai kon den go na Yosua dan den taigi en taki: “Yu no abi fu meki a heri legre hari go na Ai. Tu noso dri dusun man sari fu teki a foto dati. A no de fanowdu fu yu weri a heri legre fu go drape, bika Ai no abi furu sma.”

₄Dan Yosua seni sowan dri dusun man go drape. Ma den ben abi fu lon gi den man fu Ai. ₅Den man fu Ai lon na den baka fu a bigi doro fu foto, psa a bergiskin go te pe den e kapu ston puru fu a bergi. Drape den kiri dritenti-na-siksi man fu Israel. A sani dati meki den Israelitisma kon lasi ati èn den ben e frede. ₆Ne Yosua nanga den fesiman fu Israel priti den krosi, den fringi densrefi nanga fesi na gron, fesi a kisi fu MASRA èn den fringi doti tapu den ede. Den tan didon drape te neti. ₇Dan Yosua taki: “Tye, Masra MASRA, fu sanede Yu meki a folku disi koti a Yordanliba abra? Na fu gi un abra na den Amoritisma fu den kiri unu? A moro betre un ben tan na a tra sei fu a Yordanliba. ₈Tye Masra, mi no sabi san mi mus taki, now di Israel abi fu lon gi en feyanti! ₉Te den Kananitisma nanga ala den tra sma fu a kondre yere a sani disi, den o lontu unu èn den o kiri unu puru a nen fu unu na grontapu. San Yu o du dan fu hori a nen fu Yu hei?” ₁₀Ne MASRA piki Yosua taki: “Fu sanede yu didon drape tapu yu fesi? Opo! ₁₁Na sondu Israel sondu. Den broko a ferbontu. Den no hori den na den sani di Mi komanderi den. Den teki wantu fu den sani di den ben mus kiri èn pori. Den fufuru den sani dati, dan den kibri den mindri den eigi ososani. ₁₂Na dat' meki Israel no ben man hori feti nanga den feyanti. Den ben abi fu lon gi den feyanti, fu di kiri nanga pori de na den mindri. Mi no o de nanga yu moro efu yu no puru den sani na un mindri di un ben mus kiri èn pori. ₁₃So, opo! Sorgu tak' a folku krin ensrefi. Taigi den taki: ‘Un sorgu taki tamara un krin ini Gado ai, bika na disi MASRA, a Gado fu Israel, taki: sma fu Israel, kiri nanga pori de na un mindri. Un no o man fon den feyanti fu unu solanga un no puru den sani dati na un mindri. ₁₄Dat' meki tamara mamanten den lo fu unu mus kon tnapu wan fru wan na Mi fesi. Dan ala den difrenti famiri fu a lo di MASRA o sori mus kon. Baka dati den mansma fu wan fu den famiri di MASRA o sori mus kon na fesi. Wan fru wan. ₁₅Dan un mus bron a sma di Mi o sori leki a wan di teki den sani. Un sa bron en makandra nanga ala den sma fu en nanga ala san a abi, bika a broko a ferbontu fu MASRA èn fu di a du wan don èn syen sani ini Israel.’ ”

₁₆A tra mamanten fruku Yosua meki ala den lo fu Israel kon tnapu, dan MASRA sori a lo fu Yuda. ₁₇Di den famiri fu a lo fu Yuda kon tnapu, MASRA sori a famiri fu Serak. Di den edeman fu a famiri fu Serak kon wan fru wan na fesi, MASRA sori tapu Sabdi. ₁₈Di den mansma fu a famiri fu Sabdi kon tnapu wan fru wan, MASRA sori tapu Akan. Akan ben de a manpikin fu Karmi, Karmi ben de a manpikin fu Sabdi èn Sabdi ben de a manpikin fu Serak fu a lo fu Yuda. ₁₉Dan Yosua taigi Akan taki: “Akan, gi MASRA, a Gado fu Israel, grani èn taigi En taki yu sondu. Ferteri mi san yu du, no kibri en gi mi.” ₂₀Ne Akan piki Yosua taki: “A tru taki na mi. Na mi du san MASRA, a Gado fu Israel, no wani. Na so a sani psa: ₂₁mindri den gudu di un feni, mi ben si wan moi langa dyakti fu Sinear, tu kilo solfru nanga wan pisi gowtu fu wan afu kilo. Bigi ai meki mi teki den. Luku, mi beri den ini mi tenti, a solfru de na ondrosei.” ₂₂Dan Yosua seni wantu man go na a tenti. Den man lon go es'esi èn den feni den sani di ben kibri ini a tenti. A solfru ben de na ondrosei. ₂₃Den man puru den sani ini a tenti tyari go gi Yosua nanga ala den tra Israelitisma, èn den panya den na gron fesi a kisi fu MASRA. ₂₄Baka dati Yosua nanga ala den Israelitisma teki Akan, a bakapikin fu Serak tyari go na a Akordal. Den tyari en makandra nanga a solfru, a langa dyakti, a pisi gowtu, den manpikin nanga den umapikin fu en, den kaw, den buriki, den skapu nanga den krabita fu en, a tenti fu en nanga ala tra sani di a ben abi. ₂₅Dan Yosua taigi en taki: “Soleki fa yu meki bigi ongoloku miti unu, na so MASRA o meki bigi ongoloku miti yu tide.” Dan ala den Israelitisma fringi ston tapu Akan nanga den sma fu en. Baka dati den bron den dedeskin fu den. ₂₆Dan den tapu den dedeskin nanga wan bigi ipi ston. Dan fosi a atibron fu MASRA saka. Te tide a ipi ston dati de drape. Na fu a sani di psa drape meki den e kari a presi dati Akordal, te tide.

₁Baka dati MASRA taigi Yosua taki: “No frede èn no meki noti skreki yu. Meki yusrefi klari fu hari go nanga a heri legre na Ai. Luku, Mi o gi a kownu fu Ai, a folku fu en, a foto nanga a kondre fu en, abra na yu. ₂Yu mus du nanga Ai èn nanga a kownu fu en soleki fa yu ben du nanga Yeriko nanga a kownu fu en. Ma a leisi disi un kan teki den gudu di un o feni nanga den meti. Meki wantu man fu a legre bigin go kibri baka a foto.”

₃Dan Yosua nanga a heri legre meki densrefi klari fu hari go na Ai. A teki dritenti dusun bun dyadya fetiman na den trawan mindri. Dan a seni den gwe neti nanga a komanderi disi: ₄“Un go kibri baka a foto, ma un no mus go tumsi fara. Un alamala mus hori unsrefi klar'klari. ₅Mi nanga den tra fetiman o go na a foto. Dan den o hari kon miti unu leki a fosi leisi èn un o lon gi den. ₆Den o kon na wi baka èn tapu a fasi disi wi o meki den gwe libi a foto. Bika den o prakseri taki wi e lon gi den leki a fosi leisi. ₇Dan unu mus kmoto fu un kibripresi go teki a foto abra. MASRA, a Gado fu unu, o gi en abra na unu. ₈Te un teki en abra, un mus sutu faya gi en wantron, soleki fa MASRA taki. Arki, na disi mi e komanderi unu.” ₉Dan Yosua seni den man gwe èn den hari go kibri na wan presi mindri Betel nanga Ai, na westsei fu Ai. A neti dati Yosua tan nanga den tra man.

₁₀A tra mamanten Yosua kari den man frukufruku kon na wan fu hari go na Ai. En nanga den fesiman fu Israel ben e waka na fesi. ₁₁Ala den fetiman hari gwe nanga en, èn di den doro krosbei fu Ai den meki den kampu noordsei fu a foto. Wan dal ben prati den nanga a foto. ₁₂Yosua ben seni feifi dusun man fu go kibri na westsei fu a foto, mindri Betel nanga Ai. ₁₃Na so a legre ben prati: wan pisi fu en ben de westsei fu a foto èn a moro bigi grupu ben de noordsei fu a foto.

Ma a neti dati Yosua nanga a legre hari psa ini a dal. ₁₄Di a kownu fu Ai si den, en nanga den man fu a foto meki densrefi klari es'esi, dan den hari frukufruku fu go feti nanga a legre fu Israel. Den hari go na wan presi pe den ben man si a dal. Ma a kownu no ben sabi taki wan pisi fu a legre fu Israel ben kibri baka a foto. ₁₅Yosua nanga a heri legre fu Israel meki leki den lasi a feti èn den lon go na a sei fu a bigi dreisabana. ₁₆Den edeman fu Ai kari ala man di ben de ini a foto ete fu go baka a legre fu Israel. Ma o moro den ben e lon baka Yosua, o moro den ben e kmoto fu a foto. ₁₇No wan man ben tan na baka ini Ai nanga Betel. Den alamala hari go baka a legre fu Israel. So den libi a foto sondro wan man fu feti gi a foto. ₁₈Dan MASRA taigi Yosua taki: “Langa a lansri di de ini yu anu go na Ai. Mi e gi a foto abra na yu.” Dan Yosua langa a lansri di a ben hori ini en anu go na a foto. ₁₉Leki fa den man di ben kibri si tak' Yosua langa en anu, na so den lon kmoto fu den kibripresi go ini a foto. Den teki a foto abra èn den sutu faya gi en wantron. ₂₀Di den man fu Ai drai luku den si tak' smoko e kmoto na ini a foto. Den no ben abi a okasi moro fu lon go no wan sei, fu di a legre fu Israel di ben lon go na a dreisabana, ben e drai kon na den tapu. ₂₁Bika leki fa Yosua nanga a legre si tak' den man di ben kibri teki a foto abra èn sutu faya gi en, na so den drai èn den bigin kiri den man fu Ai. ₂₂A pisten dati den tra man di ben de ini a foto, ben e hari kon miti den. Sofasi a legre fu Israel ben tapu den man fu Ai fu fes'sei nanga fu bakasei. A legre fu Israel kiri den alamala, no wan fu den kisi a okasi fu lowe. ₂₃Soso a kownu fu Ai den grabu libilibi dan den tyari en gi Yosua. ₂₄A legre fu Israel kiri den man fu Ai nanga deigri ini den wei nanga ini a bigi dreisabana, pe den man fu Ai ben lon kon na den baka. Den kiri den te na a laste man. Baka dati a heri legre drai go baka na Ai go kiri den tra sma fu a foto. ₂₅Tapu a dei dati ala den sma fu Ai lasi libi. Twarfu dusun man nanga uma. ₂₆Yosua ben tan langa a lansri fu en go na Ai, te leki den man fu en ben kiri ala den sma fu Ai. ₂₇Dan soleki fa MASRA ben komanderi Yosua, den Israelitisma ben hori den meti nanga den gudu di den feni drape. ₂₈Baka dati Yosua meki den bron a foto èn a meki den broko en pisipisi te na gron. Te tide a presi dati de so. ₂₉A meki den anga a kownu fu Ai na wan bon èn a libi a dedeskin fu en drape te neti tapu. Di a son ben e saka, Yosua komanderi fu den puru a dedeskin na a bon. A meki den trowe a dedeskin fesi a bigi doro fu a foto èn tapu en nanga wan bigi ipi ston. Te tide a ipi ston dati de drape.

₃₀Dan Yosua bow wan altari gi MASRA, a Gado fu Israel, tapu a Ebalbergi, ₃₁soleki fa Moses, a knekti fu MASRA, ben komanderi den Israelitisma fu du. A altari ben bow leki fa a ben skrifi ini a buku fu a wèt fu Moses. A ben mus de wan altari di meki fu grofu ston, di no kapu nanga isri wrokosani. Di a altari bow den Israelitisma bron meti leki ofrandi gi MASRA èn srakti meti leki freide-ofrandi. ₃₂Na drape Yosua skrifi a wèt tapu den ston. A wèt di Moses ben skrifi leti fesi den Israelitisma. ₃₃A pisten dati heri Israel, den fesiman, den ofisiri fu a folku nanga den krutubakra ben tnapu na ala tu sei fu a kisi, nanga den fesi go na den lefiti priester, di ben e syow a kisi fu a ferbontu fu MASRA, doroseisma nanga sma di gebore leki Israelitisma. Wan grupu sma ben e luku go na a sei fu a Geresimbergi, a tra grupu ben e luku go na a Ebalbergi. Den ben tnapu leki fa Moses, a knekti fu MASRA, ben taigi den fu tnapu. Dan Yosua blesi a folku fu Israel, soleki fa Moses ben taigi en fu du. ₃₄Baka dati a leisi a heri wèt gi den, den blesi nanga den fluku, soleki fa den ben skrifi ini a buku fu a wèt. ₃₅Ala san Moses ben komanderi, Yosua leisi gi a heri folku fu Israel. Den umasma, den pikin nanga den doroseisma di ben e libi na den mindri ben drape tu.

₁Ala den kownu na westsei fu a Yordan: den wan fu a bergikontren, den wan fu a kontren na den bergifutu, nanga den wan na a heri syoro fu a Bigi Se, te go miti a Libanonbergi, ben yere fu a wini fu Israel. Dati ben de den kownu fu den Hetitisma, den Amoritisma, den Kananitisma, den Perisitisma, den Hiwitisma nanga den Yebusitisma. ₂Dan den bondru densrefi fu feti leki wan man nanga Yosua nanga Israel.

₃Ma di den sma fu a foto Gibeon yere san Yosua du nanga den foto Yeriko nanga Ai, ₄densrefi kon nanga wan triki. Den meki leki den na boskopuman dan den go na Yosua. Den poti owru saka tapu den buriki nanga owru winsaka di ben priti èn nai tapu baka. ₅Den weri owru lapulapu susu na den futu nanga owru krosi na den skin. A brede di den ben tyari ben drei sote tak' a ben e brokobroko. ₆Na so den go na Yosua, na a kampu fu den Israelitisma na Gilgal. Den taigi Yosua nanga den man fu Israel taki: “Wi kmoto na wan farawe kondre èn wi wani meki wan ferbontu nanga unu taki wi no sa feti nanga unsrefi.” ₇Ma den man fu Israel taigi den Hiwitisma taki: “Wi no o man meki wan ferbontu nanga unu. Kande un e tan leti dyaso ini a birti.” ₈Den Hiwitisma taigi Yosua taki: “Wi na yu knekti.” Ma Yosua aksi den taki: “Ma suma na unu èn pe un kmoto.” ₉Den piki en taki: “Den knekti fu yu kmoto na wan bun fara kondre. Na a nen fu MASRA, a Gado fu yu, tyari wi kon dyaso. Bika wi yere fu den bigi sani di A du. Wi yere fu ala den sani di A du ini Egipte, ₁₀nanga ala den sani di A du na a tra sei fu a Yordanliba nanga den tu kownu fu den Amoritisma: kownu Sikon fu Hesbon nanga kownu Og fu Basan, di ben e libi na Astarot. ₁₁Na dat' meki den fesiman fu wi nanga ala den sma fu wi kondre taigi unu fu wi teki nyanyan fu nyan na pasi èn hari kon na unu. Den taigi wi tu tak' te wi doro na unu wi mus taigi unu tak' a folku fu wi e saka den srefi gi yu èn tak' wi mus begi unu fu meki wan ferbontu nanga wi. ₁₂Un luku a brede fu wi dyaso. A ben fayafaya ete a dei di wi kmoto na oso. Luku now fa a kon drei èn brokobroko. ₁₃Un luku den winsaka fu wi. Den ben nyun di wi ben e lai den. Now den priti. Un luku den krosi nanga den susu fu wi, den kon owru fu a heri ten di wi ben de na pasi.” ₁₄Dan den man fu Israel nyan pikinso fu a brede fu den, leki wan marki tak' den agri nanga a ferbontu. Ma den no aksi MASRA rai. ₁₅Dan Yosua meki mati nanga den. A meki wan ferbontu nanga den tu tak' a no o kiri a folku fu den. Den fesiman fu Israel sweri tak' den o hori den na a ferbontu dati.

₁₆Ma dri dei baka di a ferbontu meki, den Israelitisma kon sabi tak' den Hiwitisma no ben e libi fara, ma tak' den ben e libi leti ini a birti drape. ₁₇Bika den Israelitisma ben hari go moro fara èn dri dei baka dati den ben doro na den foto Gibeon, Kefira, Beerot nanga Kiryat-Yearim, den foto fu den Hiwitisma. ₁₈Ma den Israelitisma no ben man kiri den, bika den fesiman fu den ben sweri dati gi den fesi MASRA, a Gado fu Israel. Ala den Israelitisma krutu nanga den fesiman fu a sani dati. ₁₉Ma ala den fesiman taigi den taki: “Un no man fasi den bika un ben sweri dati fesi MASRA, a Gado fu Israel. ₂₀Wi o abi fu meki den tan na libi, noso MASRA ati o bron na un tapu efu un broko a sweri.” ₂₁Ne den fesiman taki: “Wi o meki den tan na libi, ma wi o meki den kapu udu èn peti watra gi heri Israel.” Na a besroiti dati den fesiman teki. ₂₂Baka dati Yosua seni kari den sma fu Gibeon dan a aksi den taki: “Fu sanede un bedrigi wi? Un taigi wi tak' un e libi bun fara, ma na leti dyaso un e libi. ₂₃Fu dat'ede mi e fluku unu. Fu têgo un sa tron srafu fu wi. Un sa kapu udu èn peti watra gi a oso fu a Gado fu mi.” ₂₄Den piki Yosua taki: “Wi du a sani disi fu di wi ben e frede gi unu tak' un ben o kiri wi. Bika wi ben e yere dorodoro tak' MASRA, a Gado fu unu, ben komanderi En knekti Moses, fu teki a heri kondre abra èn fu kiri ala den sma fu en. ₂₅We, luku, wi de ini yu makti now. Yu kan du nanga wi san yu si tak' bun èn leti.” ₂₆Na so Yosua du nanga den tu. A ferlusu den fu den Israelitisma, fu den no kiri den. ₂₇Ma sensi a dei dati, a poti den fu den kapu udu èn peti watra gi heri Israel nanga gi a altari fu MASRA, di bo meki na wan presi di MASRA ben o sori. Te tide den sma fu Gibeon e du a sani disi.

₂₃Di a ten kon kba san a ben mus du en wroko, a drai go baka na en oso.

₂₄Baka den dei dati en uma Elisabet hori bere. Feifi mun langa a no ben kmopo na ini en oso fu sma si en. ₂₅Elisabet taki: “Disi na san Gado du gi mi ini a ten di A sari mi. A puru a syen na mi tapu san mi ben abi mindri den sma.”

₂₆Di Elisabet ben abi siksi mun bere, Gado seni a engel Gabriyel go na a foto Nasaret ini Galilea. ₂₇A ben mus go na wan yongu uma di noiti no ben sribi nanga wan man ete. A yongu uma disi ben nen Maria. A ben o trow nanga Yosef, wan man di ben de wan bakapikin fu kownu David. ₂₈Di Gabriyel go ini a oso fu Maria, a taki en odi. Dan a taigi en taki: “Masra de nanga yu, èn a blesi fu Masra de na yu tapu.” ₂₉Maria skreki sote di a yere san a engel taki. Dan a aksi ensrefi san a odi disi wani taki. ₃₀Ma a engel taigi en taki: “Yu no abi fu frede, Maria, bika Gado sori yu a bun-ati fu En. ₃₁Luku. Yu o hori bere, èn yu o kisi wan manpikin. Yu mus kari en Yesus. ₃₂A o de wan prenspari man èn den o kari En a Manpikin fu a Moro Hei Gado. Masra Gado o meki A tron kownu na a presi fu En afo David. ₃₃A sa de a kownu fu a folku Israel fu têgo, èn noiti wan kba o kon na a tiri fu En.”

₃₄Dan Maria taigi a engel taki: “Fa dati o du psa? Bika noiti ete mi sribi nanga wan man.” ₃₅Dan a engel piki en taki: “A Santa Yeye o kon na yu tapu, èn a krakti fu a Moro Hei Gado o saka kon tapu yu. Dat' meki den sa kari a santa pikin di o gebore, a Manpikin fu Gado. ₃₆Luku, Elisabet a famiri fu yu, owru kba. Ma ensrefi de nanga bere fu kisi wan manpikin. Den ben taki a no man kisi pikin, ma na siksi mun kba di a abi bere. ₃₇Bika noti no de san Gado no kan du.” ₃₈Dan Maria taki: “We, mi de na Masra anu. Meki ala sani psa nanga mi soleki fa yu taki.” Dan a engel gwe.