Dag 84 van 365- Jozua 19-21 en Lucas 2:25-52

₁A di fu tu lo di a lot sori ben de a lo fu Simeon. A kontren di den famiri fu a lo Simeon kisi, ben didon ini a kontren fu a lo fu Yuda. ₂Disi na den foto di ben de ini a kontren fu den: Berseba, Seba, Molada, ₃Hasar-Sual, Bala, Esem, ₄Eltolad, Betul, Horma, ₅Siklag, Bet-Hamarkabot, Hasar-Susa, ₆Bet-Lebaot nanga Saruken. Dati ben de tin-na-dri foto nanga den dorpu ini a birti fu den. ₇Yu ben abi moro fara: Ain, Rimon, Eter nanga Asan. Fo foto nanga den dorpu ini a birti fu den. ₈Den dorpu di ben de lontu den foto disi, ben e go te na den foto Baalat-Beer nanga Ramat-Negev.

Disi ben de a kontren fu den famiri fu a lo fu Simeon. ₉A kontren fu a lo fu Simeon ben de wan pisi fu a kontren fu a lo fu Yuda. A kontren fu a lo fu Simeon ben de ini a kontren fu Yuda, fu di a kontren fu Yuda ben bigi moro leki san den ben abi fanowdu.

₁₀A di fu dri lo di a lot sori ben de a lo fu Sebulon. A kontren fu den ben e bigin na a foto Sarid. ₁₁Fu drape a ben e waka na a westsei go na loktu na a foto Marala, a ben e psa moro fara leti sei a foto Dabeset, dan a ben e kon fadon leti na a kriki na abrasei fu a foto Yokneam. ₁₂Fu a foto Sarid a kontren ben e waka na a oostsei psa a kontren lontu Kislot-Tabor, dan a ben e go langalanga na a foto Daberat. Fu drape a ben e go na loktu na a foto Yafia, ₁₃dan a ben e waka moro fara go na oostsei. A ben e psa den foto Gat-Hakefer nanga Et-Kasin dan a ben e waka langalanga go na a foto Rimon. Fu drape a ben e beni go na a foto Nea. ₁₄Baka dati a kontren ben e meki wan boktu go na noordsei fu Hanaton, pe a ben e kon fadon ini a Yiftag-Eldal. ₁₅Tra foto ini a kontren ben de: Katat, Nahalal, Simron, Yidala nanga Bet-Lekem.

₁₆Disi ben de a kontren di den famiri fu a lo fu Sebulon ben kisi nanga ala den foto nanga den dorpu ini a birti fu den.

₁₇A di fu fo lo di a lot sori ben de a lo fu Isakar. ₁₈Den foto di ben de ini a kontren fu den famiri fu a lo disi ben de: Yisreel, Kesulot, Sunem, ₁₉Hafaraim, Sion, Anakarat, ₂₀Rabit, Kisyon, Ebes, ₂₁Remet, En-Ganim, En-Hada nanga Bet-Pases. ₂₂A kontren fu den ben e psa leti fesi Taborbergi, dan a ben e psa na den foto Sakasima nanga Bet-Semes fu go fadon na a Yordanliba. A kontren fu den ben abi tin-na-siksi foto nanga den dorpu ini a birti fu den.

₂₃Disi ben de a kontren di den famiri fu a lo fu Isakar ben kisi nanga ala den foto nanga den dorpu ini a birti fu den.

₂₄A di fu feifi lo di a lot sori ben de a lo fu Aser. ₂₅Den foto di ben de ini a kontren fu den famiri fu a lo disi ben de: Helkat, Hali, Beten, Aksaf, ₂₆Alamelek, Amad nanga Misal. A kontren fu den ben e waka go te na a Karmelbergi nanga Sigor-Libnat. ₂₇Na a tra sei, a oostsei, a ben e go na a foto Bet-Dagon. Baka dati a ben e miti nanga a kontren fu Sebulon na noordsei fu a dal fu Yiftak-El. Fu drape a ben e go moro fara na noordsei na den foto Bet-Haemek, Nehiyel nanga Kabul. ₂₈Yu ben abi moro fara: Ebron, Rekob, Hamon, Kana nanga Bigi-Sidon. ₂₉Fu Sidon a ben e drai go na a sei fu a foto Rama, dan a ben e psa a foto Tyrus, wan foto di ben tranga fu teki abra, èn a beni go na a foto Hosa, pe a ben kon fadon na se. Ini a kontren disi yu ben abi den foto Hebel nanga Aksib ₃₀Dan yu ben abi ete den foto Uma, Afek nanga Rekob tu. Dati ben de tutenti-na-tu foto nanga den dorpu ini a birtu fu den.

₃₁Disi ben de a kontren di den famiri fu a lo fu Aser ben kisi nanga ala den foto nanga den dorpu ini a birti fu den.

₃₂A di fu siksi lo di a lot sori ben de a lo fu Naftali. ₃₃A kontren fu den famiri fu a lo disi ben e waka fu a foto Helef, fu a bigi bon ini Saananim, a ben psa ini den foto Adami-Nekeb nanga Yabneel go na a foto Lakum, dan a ben go fadon na a Yordanliba. ₃₄Na a tra sei, a westsei, a ben e waka fu Helef, go na a foto Asnot-Tabor. Fu drape a ben e go na a foto Hukok dan a ben e go miti nanga a kontren fu Sebulon na zuidsei nanga a kontren fu Aser na westsei èn na oostsei a ben e go stotu na a Yordanliba, na Yehuda. ₃₅A kontren fu den ben abi den foto disi: Sidlim, Ser, Hamat, Rakat, Kineret, ₃₆Adama, Rama, Hasor, ₃₇Kedes, Edrei, En-Hasor, ₃₈Yiron, Migdal-El, Horem, Bet-Anat nanga Bet-Semes. Dati ben de tin-na-neigi foto nanga den dorpu ini a birti fu den.

₃₉Disi ben de a kontren di den famiri fu a lo fu Naftali ben kisi nanga ala den foto nanga den dorpu ini a birti fu den.

₄₀A di fu seibi lo di a lot sori ben de a lo fu Dan. ₄₁Den foto di ben de ini a kontren fu den ben de: Sora, Estaol, Ir-Semes, ₄₂Saalabin, Ayalon, Yitla, ₄₃Elon, Timna, Ekron, ₄₄Elteke, Gibeton, Baalat, ₄₅Yehud, Bene-Barak, Gat-Rimon, ₄₆Me-Hayarkon nanga Rakon, sosrefi a kontren abrasei fu a foto Yafo. ₄₇Ma baka wan pisten a kontren fu a lo fu Dan ben kon pikin gi den. Dat' meki den hari go feti nanga den sma fu a foto Lesem. Den teki a foto dati abra èn den kiri ala sma fu drape nanga deigri. Baka dati den go libi drape dan den gi a foto Lesem a nen fu Dan, bika ala den famiri fu a lo disi ben de bakapikin fu Dan.

₄₈Disi ben de a kontren di den famiri fu a lo fu Dan ben kisi nanga ala den foto nanga den dorpu ini a birti fu den.

₄₉Di den Israelitisma ben kba prati a kondre, den gi Yosua, a manpikin fu Nun, wan kontren tu taki na fu en. ₅₀Soleki fa MASRA ben komanderi, den gi en a foto di a ben aksi: a foto Timnat-Serak ini a bergikontren fu Efraim. Yosua bow a foto dati baka dan a go libi drape.

₅₁Disi ben de den kontren di priester Eleasar, Yosua nanga den famiri-edeman gi den lo fu den Israelitisma. Drape na Silo, na mofo doro fu a tenti pe den ben kan miti nanga Gado, den ben fringi a lot na fesi MASRA, fu sabi fa a kondre ben mus prati. Dan so den ben kon na wan kba fu prati a kondre.

₁Baka dati MASRA taigi Yosua taki: ₂“Taigi den Israelitisma taki den mus poti wantu foto pe wan sma kan lon go kibri di kiri wan trawan sondro espresi. Mi ben meki Moses taki nanga den abra a sani disi kba. ₃Wan sma di kiri wan trawan sondro espresi, sondro fu a ben waka nanga a prakseri fu du dati, kan lowe go drape. Dan so a famiriman fu a dedesma, di abi a leti fu kiri en baka, no sa feni en fu kiri. ₄Te a sma di kiri a trawan lowe go na wan fu den foto disi, a sa tan tnapu na a bigin fu a foto fu ferteri den edeman fu a foto san psa. Dan den edeman mus teki en ini a foto èn gi en wan tanpresi, dan a sa tan libi drape. ₅Te a famiriman fu a sma di a kiri kon na en baka, den edeman no sa gi a man abra. Bika a no nanga espresi a kiri a trawan èn a no de so tu taki na si a no ben man si a trawan na ai. ₆A mus tan libi ini a foto, te leki a go na krutu fesi den sma fu a foto. Efu a no fowtu, a kan tan libi drape te leki a granpriester fu a ten dati dede. Dan fosi a kan drai go baka na en oso, ini a foto pe a ben lowe kmoto.”

₇Dan den Israelitisma teki den foto disi leki foto pe wan sma ben kan lon go: Kedes ini Galilea, ini a bergikontren fu Naftali, Sikem ini a bergikontren fu Efraim, nanga Kiryat-Arba, dati na Hebron, ini a bergikontren fu Yuda. ₈Den foto di den teki na a tra sei fu a Yordanliba, oostsei fu a foto Yeriko, ben de: Beser, ini a dreisabana, ini a heikontren fu a lo fu Ruben. Ramot ini Gilead ini a kontren fu Gad nanga Golan ini Basan ini a kontren fu a lo fu Manase. ₉Disi ben de den foto pe ala Israelitisma nanga den doroseisma di ben e libi na den mindri ben kan lon go kibri te den ben kiri wan sma sondro espresi. A fasi dati a famiriman fu a dedesma, di abi a leti fu kiri en baka, no o man kiri en fosi a go na krutu fesi den sma fu a foto.

₁Den famiri-edeman fu a lo fu Lefi go na priester Eleasar, Yosua, a manpikin fu Nun, nanga na den famiri-edeman fu den tra lo fu den Israelitisma. ₂Den taigi den drape na Silo ini Kanaan taki: “MASRA ben komanderi Moses fu gi un foto fu un libi, nanga weigron gi den meti fu unu.” ₃Dan soleki fa MASRA ben komanderi, den tra lo fu den Israelitisma gi a lo fu Lefi wantu foto nanga weigron ini den kontren fu den.

₄A lot ben sori a famiri fu Kehat fosi. Den Lefitisma di ben de bakapikin fu priester Aaron ben kisi tin-na-dri foto ini den kontren fu den lo fu Yuda, Simeon nanga Benyamin. ₅A lot sori moro fara taki den tra bakapikin fu Kehat ben mus kisi tin foto ini den kontren fu den famiri fu den lo fu Efraim, Dan nanga a afu lo fu Manase. ₆A lot sori taki den bakapikin fu Gerson ben mus kisi tin-na-dri foto ini den kontren fu den famiri fu den lo fu Isakar, Aser, Naftali nanga a tra afu lo fu Manase ini Basan. ₇Den famiri fu den bakapikin fu Merari kisi twarfu foto ini den kontren fu den lo fu Ruben, Gad nanga Sebulon. ₈Soleki fa MASRA ben komanderi Moses, den tra Israelitisma meki a lot sori den sortu foto nanga weigron den ben mus gi na a lo fu Lefi.

₉Den lo fu Yuda nanga Simeon ben gi foto na den ₁₀famiri fu den Kehatitisma di ben de bakapikin fu Aaron. Den ben de den fosi Lefitisma di a lot ben sori èn disi kisi den foto disi: ₁₁Kiryat-Arba, dati na Hebron, ini a bergikontren fu Yuda, nanga den weigron lontu a foto. Arba ben de a p'pa fu Enak. ₁₂Kaleb, a manpikin fu Yefune, ben kisi den pranigron fu a foto dati nanga den dorpu ini a birti dati kba. ₁₃Boiti Hebron, di ben de wan fu den foto pe wan sma ben kan lowe go te a ben kiri wan trawan sondro espresi, den bakapikin fu Aaron ben kisi den foto disi tu: Libna nanga den weigron fu en, ₁₄Yatir nanga den weigron fu en, Estemoa nanga den weigron fu en, ₁₅Holon nanga den weigron fu en, Debir nanga den weigron fu en, ₁₆Ain nanga den weigron fu en, Yuta nanga den weigron fu en, nanga Bet-Semes nanga den weigron fu en. Dati ben de neigi foto fu den lo fu Yuda nanga Simeon. ₁₇Fu a lo fu Benyamin den kisi den foto: Gibeon nanga den weigron fu en, Geba nanga den weigron fu en, ₁₈Anatot nanga den weigron fu en nanga Almon nanga den weigron fu en. Dati ben de fo foto. ₁₉Ala na ala den bakapikin fu Aaron, den priester, kisi tin-na-dri foto nanga den weigron fu den.

₂₀Gi den tra famiri fu Kehat di ben de bakapikin fu Lefi tu, a lot sori den foto disi, ini a kontren fu a lo fu Efraim: ₂₁Sikem nanga den weigron fu en ini a bergikontren fu Efraim. A foto disi ben de wan fu den foto pe wan sma ben kan lowe go te a ben kiri wan trawan sondro espresi. Moro fara Geser nanga den weigron fu en, ₂₂Kibsaim nanga den weigron fu en, nanga Bet-Horon nanga den weigron fu en. Dati ben de fo foto. ₂₃Fu a lo fu Dan den kisi: Elteke nanga den weigron fu en, Gibeton nanga den wei fu en, ₂₄Ayalon nanga den weigron fu en, nanga Gat-Rimon nanga den weigron fu en. Dati ben de fo foto. ₂₅Fu a afu lo fu Manase den kisi den foto: Taanak nanga den weigron fu en, nanga Gat-Rimon nanga den weigron fu en. Dati ben de tu foto. ₂₆Ala nanga ala den tra famiri fu den bakapikin fu Kehat kisi tin foto nanga den weigron fu den.

₂₇Disi na den foto di a afu lo fu Manase gi na den famiri fu den Lefitisma di ben de bakapikin fu Gerson: Golan ini Basan nanga den weigron fu en. Golan ben de wan fu den foto pe wan sma ben kan lowe go te a ben kiri wan trawan sondro espresi. Moro fara Beestera nanga den weigron fu en. Dati ben de tu foto. ₂₈Fu a lo fu Isakar den kisi: Kisyon nanga den weigron fu en, Daberat nanga den weigron fu en, ₂₉Yarmut nanga den weigron fu en nanga En-Ganim nanga den weigron fu en. Dati ben de fo foto. ₃₀Fu a lo fu Aser den kisi: Misal nanga den wei fu en, Abdon nanga den weigron fu en, ₃₁Helkat nanga den weigron fu en, nanga Rekob nanga den weigron fu en. Dati ben de fo foto. ₃₂Fu a lo fu Naftali, den kisi den foto: Kedes nanga den weigron fu en ini Galilea. Kedes ben de wan fu den foto pe wan sma ben kan lowe go te a ben kiri wan trawan sondro espresi. Moro fara Hamot-Dor nanga den weigron fu en, nanga Kartan nanga den weigron fu en. Dati ben de dri foto. ₃₃Ala nanga ala den famiri fu den Gersonitisma kisi tin-na-dri foto nanga den wei fu den.

₃₄Disi na den foto di a lo fu Sebulon gi na den famiri fu den Lefitisma di ben de bakapikin fu Merari: Yokneam nanga den wei fu en, Karta nanga den wei fu en, ₃₅Dimna nanga den weigron fu en, Nahalal nanga den weigron fu en. Dati ben de fo foto. ₃₆Fu a lo fu Ruben, den kisi: Beser nanga den weigron fu en, Yasa nanga den weigron fu en, ₃₇Kedemot nanga den weigron fu en, Mefaat nanga den weigron fu en. Dati ben de fo foto. ₃₈Fu a lo fu Gad, den kisi: Ramot nanga den weigron fu en, ini a bergikontren fu Gilead. Ramot ben de wan fu den foto pe wan sma ben kan lowe go te a ben kiri wan trawan sondro espresi. Moro fara Mahanaim nanga den weigron fu en, ₃₉Hesbon nanga den weigron fu en nanga Yaser nanga den weigron fu en. Dati ben de fo foto. ₄₀Ala nanga ala a lot sori twarfu foto gi den famiri fu Merari. A famiri disi fu den Lefitisma ben den a laste wan di ben mus kisi foto ete.

₄₁Ala nanga ala den Lefitisma kisi fotenti-na-aiti foto na ini den kontren fu den Israelitisma. Den kisi den foto dati nanga den weigron. ₄₂Fu ala den foto disi den ben mus kisi den weigron tu. Disi ben mus de so gi ala den foto.

₄₃Na so MASRA gi Israel a heri kondre. A ben sweri dati gi den afo fu den. Den teki a kondre abra dan den go libi na ini. ₄₄Dan MASRA gi den freide na ala sei, leki fa A ben sweri gi den afo fu den. No wan fu den feyanti fu den Israelitisma ben man hori feti nanga den. MASRA ben gi den ala den feyanti fu den abra na den. ₄₅MASRA no broko no wan fu den bun pramisi di A ben pramisi a folku fu Israel. A du ala sani san A ben taki.

₂₅A pisten dati wan man ben e libi ini Yerusalem di ben nen Simeon. A man disi ben bun ini Gado ai. A ben hori ensrefi trutru na a Dyubribi, èn a Santa Yeye ben de na en tapu. A ben angri fu si a dei di Gado ben o ferlusu Israel. ₂₆A Santa Yeye ben sori Simeon taki a no ben o dede solanga a no ben si a Mesias di Masra ben o seni kon. ₂₇Dan a Santa Yeye ben meki Simeon go ini a tempel di Yosef nanga Maria tyari Yesus go drape fu du nanga En soleki fa a wèt e taki. ₂₈Dan Simeon teki a pikin tapu en anu èn a opo Gado nen. A taki:

₃₆Wan owru uma ben de ini a tempel tu. A ben nen Hana èn a ben de wan profeiti fu Gado. A p'pa fu en ben nen Fanuel èn a ben de fu a lo fu Aser. A uma disi no ben abi masra, bika seibi yari baka di a trow, en masra dede. ₃₇Hana ben abi aititenti-na-fo yari, èn a ben tan ini a tempel e dini Gado dei nanga neti nanga faste èn begi. ₃₈A srefi ten di Simeon ben e taki nanga Yosef nanga Maria, Hana kon tnapu drape. Dan a bigin opo Gado nen owktu èn ala sma di ben ferwakti taki Gado ben o ferlusu Yerusalem, a ferteri fu a pikin disi.

₃₉Di Maria nanga Yosef du ala sani san den ben mus du, soleki fa a wèt fu Masra e taki, den drai go baka na Nasaret na ini Galilea, pe den ben e libi. ₄₀A pikin ben e gro èn A ben kon tranga. A ben kon koni moro nanga moro èn Gado ben sori en a bun-ati fu En.

₄₁Ala yari a m'ma nanga a p'pa fu Yesus ben e go na Yerusalem fu nyan a Paskafesa. ₄₂Di Yesus tapu twarfu yari den go na a fesa soleki fa den ben gwenti. ₄₃Baka di a fesa kba, den teki pasi fu drai go baka na oso. Yesus tan na baka ini Yerusalem. Ma En m'ma nanga En p'pa no ben sabi. ₄₄Fu di den ben prakseri taki A ben de mindri den tra sma di ben e drai go baka na oso tu, den waka wan heri dei fosi den bigin aksi famiri nanga mati efu den ben si Yesus. ₄₅Di den no ben man feni En, den drai go baka na Yerusalem fu suku En. ₄₆Dan tapu a di fu dri dei, den feni En na ini a tempel. Drape A ben e sidon na mindri den man di e gi leri. A ben e arki san den ben taki èn A ben e aksi den wantu sani. ₄₇Ala sma di ben yere En, ben ferwondru fu a ferstan san A ben abi, nanga a fasi fa A ben piki den man. ₄₈Di Maria nanga Yosef si En, den no ben sabi san fu taki. Dan Maria taki: “Boi, fa Yu kan du a sani disi nanga unu? Luku fa mi nanga Yu p'pa ben e waka suku Yu, bika un ati ben de na dyompo.” ₄₉Dan A piki den taki: “Fu sanede un ben e suku Mi? Na sabi un no sabi dan taki Mi mus de na ini a oso fu Mi P'pa?” ₅₀Ma den no ben ferstan a piki san A ben piki den. ₅₁Dan Yesus drai go baka na Nasaret nanga den, èn A ben du san den ben e taigi En. Ma Maria no fergiti no wan fu den sani disi. ₅₂So Yesus ben kon moro bigi èn A ben kon moro koni. Gado ben lobi En, èn den sma ben lobi En tu.