1Den sma fu Kiryat-Yearim kon èn den teki a santa kisi fu MASRA tyari gwe. Den tyari en go poti ini a oso fu Abinadab di ben de tapu wan pikin bergi. Baka dati den salfu Elasar, a manpikin fu Abinadab, fu teki a frantwortu fu a santa kisi na en tapu.
Samuel e tiri den Israelitisma
2A santa kisi tan wan heri pisten ini Kiryat-Yearim, wan tutenti yari so. Ini a ten dati ala den Israelitisma ben e krei den nowtu gi MASRA. 3Ne Samuel taigi den taki: “Efu un wani drai kon trutru baka na MASRA, un mus puru ala gado fu tra folku nanga den Astarte na un mindri. Un gi unsrefi abra na MASRA èn un dini En wawan. Dan A sa ferlusu unu fu a makti fu den Filistijnsma.” 4So den Israelitisma puru ala den Baal nanga Astarte na den mindri, èn den bigin dini MASRA wawan. 5Dan Samuel taigi den taki: “Un alamala mus kon na Mispa. Drape mi o begi MASRA gi unu.” 6Di den kon makandra na Mispa, den teki watra fu wan peti dan den kanti en na gron leki wan ofrandi gi MASRA. Den sma faste a dei dati tu, èn den taki: “MASRA wi sondu, wi du san Yu no wani.” Drape na Mispa Samuel tron a tiriman fu den Israelitisma.
7Di den Filistijnsma yere dati den Israelitisma ben de makandra na Mispa, den tiriman fu den Filistijnsma hari go drape fu go feti nanga den. Di den Israelitisma yere a sani dati den bigin frede gi den Filistijnsma. 8Den taigi Samuel taki: “No tapu! Ma tan begi MASRA, a Gado fu wi, gi wi, fu A ferlusu wi fu a makti fu den Filistijnsma.” 9Ne Samuel teki wan yongu skapu di ben e dringi bobimerki ete, dan a bron en her'heri leki wan ofrandi gi MASRA. Di a begi MASRA fu yepi den Israelitisma, MASRA piki en. 10Ma di Samuel ben e tyari a ofrandi ete, den Filistijnsma ben e kon kba fu feti nanga den Israelitisma. Ne MASRA meki a dondru bari so tranga tak' den Filistijnsma bruya, èn den lasi a feti nanga den Israelitisma. 11Den srudati fu Israel kmoto fu Mispa èn den saka go baka den Filistijnsrudati te ini a birti fu Bet-Kar. Den kiri furu fu den Filistijnsrudati tapu pasi. 12Baka dati Samuel teki wan bigi ston, a poti en tnapu mindri den foto Mispa nanga Sen, dan a kari en Eben-Haeser. A taki: “Te so fara MASRA yepi wi.” 13Na a fasi dati den Israelitisma broko den Filistijnsma saka èn den Filistijnsma no ben e broko kon ini Israel moro. MASRA ben e tapu den solanga leki di Samuel ben de na libi. 14Ala den foto di den Filistijnsma ben teki fu den Israelitisma, fu Ekron te kon miti Gat, ben kon baka ondro a tiri fu Israel. Srefi den gron lontu den foto dati den Israelitisma puru na den anu. Freide ben de tu mindri Israel nanga den Amoritisma.
15Samuel tan krutubakra fu Israel te leki a dede. 16Ala yari a ben e go na Betel, Gilgal nanga Mispa. Na ini iniwan fu den presi dati a ben e seti sani poti leki fa den mus de. 17Te a ben kba a ben e drai go baka na Rama, bika drape en oso ben de. Èn fu drape a ben e tiri Israel. Na drape a ben bow wan altari gi MASRA tu.
1 Samuel 8
Den Israelitisma wani wan kownu
1Di Samuel ben kon owru, a poti den boi fu en leki krutubakra fu Israel. 2A fosi wan ben nen Yowel èn a trawan ben nen Abia. Den ben tan na Berseba èn fu drape den ben e tiri a kondre. 3Ma den no ben e tyari densrefi leki den p'pa. Den ben gridi fu moni, den ben e teki tyuku èn den no ben e koti krutu nanga leti. 4Na dat' meki ala den edeman fu Israel kon makandra. Dan den go na Samuel na Rama. 5Drape den taigi en taki: “Luku, yu kon owru, èn den boi fu yu no e tyari densrefi leki fa yu ben tyari yusrefi. Dat' meki wi wani wan kownu fu tiri wi, leki den tra folku.” 6Ma a no ben bun ini Samuel ai di den aksi en fu a gi den wan kownu fu tiri den. Dat' meki a begi MASRA. 7Dan MASRA piki Samuel taki: “Arki san a pipel e taki, èn du ala san den wani. Bika a no yu den poti na wan sei, ma na Mi den no wani moro leki den kownu. 8Na so den e du kba, sensi a dei di mi puru den na Egipte, te kon miti tide, den e drai den baka gi Mi fu dini tra gado. Now den e du en nanga yu. 9Du san den e aksi. Ma yu mus warskow den trangatranga èn sori den tapu den leti di a kownu abi di o tiri den.”
10Dan Samuel taigi a pipel, di ben aksi fu wan kownu, ala san Masra taki. 11A taigi den moro fara taki: “Na den sani disi a kownu di o tiri unu o du nanga unu: a o teki den manpikin fu unu puru na un anu èn poti den fu wroko gi en na den fetiwagi nanga den asi fu en, èn fu waka fesi a wagi fu en. 12A o poti den leki ofisiri abra wan dusun noso abra feifitenti srudati. Den o abi fu wroko den pranigron fu en èn koti nyanyan ini en pranigron. Den o abi fu meki fetisani nanga sani di fetiwagi abi fanowdu. 13A o teki den umapikin fu unu puru na un anu tu fu meki oli nanga switismeri gi en, fu bori en nyanyan èn fu baka en brede gi en. 14A o puru den moro bun pranigron, droifidyari nanga oleifdyari na un anu tu fu gi den spesrutu wrokoman fu en. 15Te den karu nanga den droifidyari fu unu gi nyanyan, a o puru tin prosenti na un anu gi den spesrutu wrokoman nanga den tra wrokoman fu en. 16A o puru den srafu fu unu na un anu tu, manwan nanga umawan. Sosrefi den moro tranga yonkuman fu unu nanga den buriki fu unu. A o teki den fu den wroko gi en. 17A o teki tin prosenti fu den skapu nanga fu den krabita fu unu. Iya, unsrefi o tron en srafu. 18Dan un o bari kari MASRA a ten dati, tak' un no wani a kownu moro di unsrefi ben teki, ma MASRA no o piki unu.”
19Ma a pipel no ben wani arki Samuel. Den taki: “Nono, wi wani wan kownu fu tiri wi, 20dan wi sa de leki den tra folku. A kownu sa tiri wi, a sa go na wi fesi èn feti den feti gi wi.” 21Di Samuel arki ala san den sma taki, a go taigi MASRA. 22Ne MASRA piki en taki: “Du san den taki èn gi den wan kownu.” Dan Samuel taigi ala den Israelitisma fu den drai go baka na den foto.
1 Samuel 9
Saul nanga Samuel e miti
1Wan man ben e libi ini a kontren fu a lo fu Benyamin di ben nen Kis. A ben de a manpikin fu Abiyel, Abiyel ben de a manpikin fu Seror, Seror ben de a manpikin fu Bekorat èn Bekorat ben de a manpikin fu Afiak. Kis ben de fu a lo fu Benyamin èn a ben de wan gudu man. 2A ben abi wan boi di ben nen Saul. Saul ben de wan yongu boi di ben moi srefsrefi. No wan sma ini Israel ben moi leki en, èn a ben langa moro den alamala tu. 3Wan leisi den uma buriki fu Kis, a p'pa fu Saul, ben kon lasi. Ne Kis taigi en boi Saul taki: “Teki wan fu den knekti dan un go suku den buriki.” 4Saul suku ini a heri bergikontren fu Efraim. Baka dati a suku ini a heri kontren fu Salisa, ma den no feni den. Den suku tu ini a heri kontren fu Saalim, ma den no ben drape. Baka dati den suku ini a heri kontren fu Benyamin, ma drape srefi den no ben de. 5Di den ben doro ini a kontren fu Suf, Saul taigi a knekti fu en taki: “Meki wi drai gwe baka, bika mi p'pa o broko en ede moro abra wi dan abra den buriki.” 6Ma a knekti piki en taki: “Wakti, wan profeiti de ini a foto disi. Sma e lespeki en, èn ala san a e taki e kon tru. Meki wi go wantron drape, kande a kan taigi wi sortu sei wi mus suku den buriki.” 7Ma Saul piki en taki: “Ma efu wi go na a man san wi o tyari gi en? No wan nyanyan sani no de ini den saka fu wi moro, èn wi no abi noti san wi kan gi a profeiti. Noti wi no abi moro.” 8Ma a knekti piki Saul taki: “Wakti, mi abi wan pikin solfru moni ete. Efu wi gi a profeiti, a o taigi wi sortu sei wi mus go suku den buriki.” 9Te den Israelitisma fu fosi ben wani go aksi Gado rai, den ben e taki: “Meki wi go na a man di Gado e sori sani.” Na so den sma fu fosi ben e kari wan profeiti. 10Ne Saul taigi en knekti taki: “Na wan bun sani yu taki. Kon meki wi go.” Dan den go na a foto pe a man fu Gado ben e libi.
11Di den ben e kren a pikin bergi fu go ini a foto, den miti nanga wantu umapikin di ben e go peti watra. Den aksi den taki: “A man di Gado e sori sani de dyaso?” 12Den pikin piki den taki: “Iya, efu un go es'esi un kan miti en ete. Bika a kon ini a foto tide fu di a pipel abi wan fesa pe den o tyari ofrandi, na a presi pe den sma e tyari ofrandi. 13Efu un go now ini a foto, un o si en fosi a go na a presi pe den e tyari ofrandi fu nyan makandra nanga den sma. Bika den sma no o nyan fosi a doro, fu di na en e blesi a ofrandi. Baka dati den sma di kisi wan kari e nyan. We dan, un go es'esi, bika un o miti en wantron.” 14So Saul nanga en knekti waka go doro na a foto. A srefi momenti di den e go ini a foto Samuel ben e kon na dorosei, fu go na a presi pe den sma e tyari ofrandi. 15Ma MASRA ben taki nanga Samuel wan dei fosi Saul ben doro drape. A ben taigi Samuel taki: 16“Tamara, a yuru disi, Mi o seni wan man fu a lo fu Benyamin kon na yu. Na en yu mus salfu leki a wan di Mi kari fu tiri Mi pipel Israel. Na en sa ferlusu Mi pipel tu ini a makti fu den Filistijnsma. Bika Mi yere a kari di Mi pipel e kari fu Mi yepi den.” 17Di Samuel si Saul, MASRA taigi en taki: “Luku, na a man disi Mi ben taki. Na en sa tiri Mi pipel.” 18Saul waka go na Samuel di ben de na a bigi doro fu a foto, dan a aksi en taki: “Yu kan taigi mi pe a man e libi di Gado e sori sani.” 19Samuel piki Saul taki: “Na mi na a man di Gado e sori sani. Go na mi fesi na a presi pe den sma e tyari ofrandi. Tide yu o tan nyan nanga mi. Tamara mamanten frukufruku mi sa meki yu gwe. Dan mi sa taigi un san e dangra unu. 20Nanga den buriki di lasi dri dei kba, yu no abi fu broko yu ede, bika sma feni den. Ma suma heri Israel e angri fu feni? Na yu nanga a heri famiri fu yu.” 21Ma Saul piki Samuel taki: “Mi na wan sma fu a lo fu Benyamin, wan fu den moro pikin lo fu Israel. A famiri fu mi na a moro pikin wan fu a lo dati. Dan fu sanede yu e taigi mi den sani disi?” 22Samuel tyari Saul nanga a knekti fu en go ini a kamra pe den ben o nyan. Drape a poti den sidon na edesei fu a tafra. Sowan dritenti man ben sidon drape tu di ben kisi wan kari. 23Dan Samuel taigi a man di ben o meki a nyanyan klari taki: “Tyari a pisi meti kon di mi ben gi yu fu hori gi mi.” 24Ne a man tyari a bowtu kon, dan a poti en gi Saul. Dan Samuel taigi Saul taki: “Yu kisi wan spesrutu pisi. Yu kan nyan en. Bika mi ben kibri en gi yu fu yu nyan en na a okasi disi nanga den sma di mi kari.” Na so Saul nyan a dei dati nanga Samuel. 25Baka dati den kmoto na a presi pe sma e tyari ofrandi, dan den go ini a foto. Dan Samuel taki nanga Saul tapu a plata daki fu en oso.
Samuel e salfu Saul leki edeman fu Israel
26A tra mamanten Saul nanga en knekti wiki frukufruku. Di dei e krin Samuel bari kari Saul, di ben de tapu a daki, taki: “Kon, mi o tyari yu afu pasi.” Saul saka go na gron, èn den ala tu, en nanga Samuel, go na strati. 27Di den doro na a kba fu a foto Samuel taigi Saul taki: “Taigi yu knekti meki a waka doro. Ma yu mus tan tnapu, bika mi o taigi yu san Gado taki.”
18Wan dei Yesus ben de En wawan e begi, èn den man di ben e teki leri fu En ben de nanga En. Dan Yesus aksi den taki: “Suma den bigi grupu sma e taki tak' Mi de?” 19Den piki taki: “Son sma e taki: Yu na Yohanes a Dopuman. Tra sma e taki: Yu na Elia. Trawan baka e taki: Yu na wan fu den fosten profeiti di kon baka na libi.” 20Dan Yesus aksi den taki: “Ma unu, suma unu e taki tak' Mi de?”
Petrus piki En taki: “Yu na a Mesias di Gado seni kon.” 21Dan Yesus warskow den krin tak' den no mus taigi no wan sma.
Yesus taki fu a pina di o miti En
22Yesus taki moro fara taki: “A Manpikin fu Libisma o abi fu nyan furu pina. Den fesiman fu a folku, den prenspari priester, nanga den sabiman fu Gado wèt o poti En na wan sei. Sma o kiri En, ma tapu a di fu dri dei Gado o meki A kon baka na libi.”
23Dan Yesus taigi ala den sma taki: “Efu wan sma wani waka na Mi baka, a mus poti en eigi wani na wan sei. A mus de klar'klari ala dei fu nyan pina te fu dede srefi, èn a mus kon nanga Mi. 24Bika a sma di wani tan libi fa a wani, o lasi en libi. Ma a sma di e poti en libi na wan sei fu Mi ede, sa kisi a libi fu têgo. 25Bika san yu e wini efu yu kisi ala sani fu grontapu, ma yu lasi a libi fu têgo, noso yu pori yu libi? 26Ala sma di o taki tak' den no sabi Mi, noso den sani san Mi e leri, a Manpikin fu Libisma o taigi den owktu taki A no sabi den te A drai kon baka nanga a bigi makti fu En, fu En P'pa nanga fu den santa engel. 27Mi e taigi unu wan tru sani: Son sma de dya na un mindri di no sa dede fosi den si fa Gado o bigin tiri libisma.”
Moses nanga Elia kon na Yesus tapu a bergi
28Aiti dei so baka di Yesus taki den sani disi, A teki Petrus, Yohanes nanga Yakobus go na tapu wan bergi fu go begi. 29Di Yesus ben e begi, En fesi kenki èn En krosi kon weti taki a e brenki. 30Dan wantron so tu man ben drape e taki nanga En. A ben de Moses nanga Elia. 31Den ben e brenki, èn den ben e taki nanga Yesus fu a dede di A ben o dede na Yerusalem. 32Petrus, Yohanes nanga Yakobus ben fadon na sribi. Di den wiki, den si fa Yesus ben e brenki, èn den si den tu man di ben e taki nanga En. 33Di Elia nanga Moses ben de fu gwe, Petrus taigi Yesus taki: “Meister, a bun taki un dya. Meki un meki dri tenti: wan gi Yu, wan gi Moses nanga wan gi Elia.” Ma Petrus taki a sani disi sondro fu denki moro fara. 34Di a ben e taki, wan wolku saka kon na den tapu. Di a wolku tapu den, den kon frede. 35Dan wan sten taki kmopo ini a wolku taki: “Disi na mi Manpikin, di Mi teki fu du Mi wani. Un mus arki san A e taki.” 36Di a sten e taki, den si Yesus wawan nanga den. Ini a ten dati den man no ferteri no wan sma san den ben si. Den ben hori den mofo.
