Dag 98 van 365- 1 Samuel 10-12 en Lucas 9:37-62

₉Fa Saul drai gwe fu Samuel, na so Gado gi Saul wan heri nyun denki. Èn ala den marki di Samuel ben taki, psa a srefi dei dati. ₁₀Di den doro na Gibea, den miti nanga a grupu profeiti. Ne a yeye fu Gado kon tapu Saul, èn makandra nanga den profeiti a bigin dansi èn meki babari. ₁₁Ala den sma di ben sabi Saul bifo si fa a ben e singi èn meki babari makandra nanga den profeiti. Ne den aksi taki: “San psa nanga Saul, a boi fu Kis? A tron wan profeiti tu?” ₁₂Dan wan sma di ben e libi drape aksi taki: “Ma suma na den p'pa?” Na drape a odo meki: Saul na wan profeiti tu? ₁₃Di Saul ben kba dansi èn meki babari, a go na a presi pe sma e tyari ofrandi. ₁₄Drape wan omu fu en aksi en nanga en knekti taki: “Pe un ben de?” Saul piki en taki: “Un ben go suku den buriki. Ma di wi no ben man feni den, un go na Samuel.” ₁₅Dan a omu aksi en taki: “San Samuel taigi unu?” ₁₆Saul piki en taki: “A taigi wi soso taki den buriki ben feni kba.” Ma Saul no taigi en taki Samuel ben taigi en taki a o tron kownu.

₁₇Baka wan pisten Samuel kari den Israelitisma kon na wan na a santa presi fu MASRA na Mispa. ₁₈Dan a taigi den taki: “Na disi MASRA, a Gado fu Israel, e taki: Israel, na Mi ben puru unu ini Egipte. Na Mi ben ferlusu unu puru ini a makti fu den sma fu Egipte, nanga ini a makti fu ala den tra kondre di ben e pina unu. ₁₉Ma now un poti a Gado na wan sei, di ben ferlusu unu na ini ala nowtu nanga problema. Un taki: Nono, wi wani wan kownu fu tiri wi. Un kon tnapu na fesi MASRA, lo na lo, famiri na famiri.” ₂₀Di Samuel meki ala den lo fu Israel kon krosbei, a lot sori a lo fu Benyamin. ₂₁Baka dati Samuel meki den famiri fu a lo fu Benyamin kon krosbei, èn a lot sori a famiri Matri. Te fu kba a lot sori Saul, a manpikin fu Kis. Ma di den ben suku en a no ben de fu feni. ₂₂Dat' meki den suku rai baka na MASRA. Den aksi En efu a man di den e suku de drape. MASRA piki den taki: “Luku, a e kibri mindri den lai.” ₂₃Ne den man lon go drape, èn den puru en kon na doro. Den tyari en go mindri a pipel, èn a ben de fu si taki Saul ben langa moro den alamala. ₂₄Dan Samuel taigi a heri pipel taki: “Un luku a man di MASRA teki. Wan trawan leki en no de na un mindri.” Ne a heri pipel bigin prisiri èn den bari taki: “Meki kownu libi langa!”

₂₅Baka dati Samuel sori den sma tapu den leti nanga den plekti fu wan kownu. Dan a skrifi den poti na ini wan buku èn a tyari a buku go poti ini a santa presi fu MASRA. Di a du dati, a meki ala den sma drai go baka na den oso. ₂₆Saul srefi drai go baka na en oso na Gibea. Gado ben meki wan grupu dyadya man go nanga en. ₂₇Ma wantu takru-ati taki: “A man disi o man ferlusu wi fu wi feyanti?” Den ben e si Saul fu noti èn den no gi en kado. Ma Saul no piki den.

₁Kownu Nakas fu Amon hari go nanga en legre na a foto Yabes ini a kontren fu Gilead, dan a lontu a foto na alasei. Dan ala den man fu Yabes taigi Nakas taki: “Meki wan ferbontu nanga wi, dan wi sa saka wisrefi gi yu.” ₂Ma Nakas fu Amon taigi den taki: “Mi kan meki wan ferbontu nanga unu efu un agri taki mi diki a let' ai fu iniwan fu unu puru. Na a fasi dati mi o meki heri Israel kisi syen.” ₃Dan den edeman fu Yabes taigi en taki: “Gi wi seibi dei. Dan wi o seni boskopuman fu go lontu ini heri Israel. Efu wi no feni no wan sma fu yepi wi, wi o gi wisrefi abra na yu.” ₄Di den boskopuman doro ini a foto Gibea pe Saul ben e libi, den ferteri den sma san psa. Ne ala den sma bari krei. ₅A srefi ten dati Saul ben kmoto kon fu a wei nanga den bulu fu en. Ne a aksi den sma fu sanede den e krei. Dan den ferteri en san den man fu Yabes taki. ₆Di Saul yere san den man taki, a yeye fu Gado kon na en tapu, èn en ati bron srefsrefi. ₇Ne a teki tu bulu, a kapu den pis'pisi dan a meki den boskopuman tyari den lontu ini heri Israel, nanga a boskopu disi: “Na a srefi sani disi o psa nanga den bulu fu a sma di no wani go nanga Saul nanga Samuel ini a feti.” Den sma fu Israel kon frede fu san MASRA ben o du efu den no ben go, so den alamala hari go leki wan man. ₈Saul meki den kon makandra na Besek. Dri hondro dusun man fu Israel ben drape, nanga dritenti dusun fu Yuda. ₉Dan den taigi den boskopuman di ben kon na Gibea taki: “Taigi den man fu Yabes ini Gilead taki tamara te a son kon faya, wi o kon ferlusu den.” Di den boskopuman drai go baka na Yabes, den gi den man fu drape a boskopu èn den ben breiti srefsrefi. ₁₀Ne den taigi Nakas taki: “Tamara wi o gi wisrefi abra na yu. Dan yu kan du san yu wani nanga wi.” ₁₁A tamara mamanten Saul prati a legre ini dri grupu. Dan den broko go ini a legrekampu fu den Amonitisma, a laste pisi fu a neti wakti. Den feti nanga den te go miti brekten yuru èn den Amonitisma di ben tan na libi, ben lon panya taki yu no ben man feni tu fu den na wan presi.

₁₂Baka a feti a pipel taigi Samuel taki: “Pe den man de di ben taki dati Saul no bo man tiri unu? Un tyari den kon meki un kiri den.” ₁₃Ma Saul piki taki: “Tide wi no o kiri no wan sma, bika MASRA ferlusu Israel tide.”

₁₄Dan Samuel taigi a pipel taki: “Un kon, meki wi go na Gilgal go sori baka tak' na Saul wi poti leki wi kownu.” ₁₅Ne a heri pipel go na Gilgal. Drape, na a santa presi fu MASRA, den poti Saul leki kownu. Dan den srakti meti leki freide-ofrandi gi MASRA èn Saul nanga a heri pipel fu Israel meki prisiri srefsrefi drape.

₁Dan Samuel taigi ala den Israelitisma taki: “Luku, mi du ala sani san un ben aksi mi èn mi poti wan kownu fu tiri unu. ₂We dan, a kownu o tiri un now. Mi kon owru èn mi edewiwiri kon weti. Ma den boi fu mi de nanga unu. Mi ben tiri unu sensi di mi ben yongu te kon miti a dei fu tide. ₃Dyaso mi de. Un abi a okasi fu krutu mi fesi MASRA nanga a wan di A poti leki kownu: efu mi ben teki wan sma kaw, efu mi ben teki wan sma buriki, efu mi ben bedrigi wan sma noso puru wan sani nanga tranga na en anu noso efu mi ben teki tyuku fu tapu mi ai gi a leti. Efu dati de so, dan mi sa gi baka san mi ben teki.” ₄Ma a pipel piki taki: “Yu no bedrigi wi, yu no puru noti nanga tranga na wi anu èn yu no teki tyuku fu no wan fu wi tu.” ₅Dan Samuel piki taki: “Dan MASRA nanga a kownu di A poti de leki kotoigi tide taki un no kan sori no wan finga na mi tapu.” Den sma piki taki: “Iya, na so a de.” ₆Dan Samuel taigi a pipel moro fara taki: “Na MASRA ben poti Moses nanga Aaron fu puru den afo fu wi na Egipte. ₇We dan, un tnapu, dan leki tiriman mi sa sori un fesi MASRA, ala den bun sani di MASRA du gi wi nanga den afo fu wi. ₈Baka di Yakob go na Egipte, den afo fu wi kari MASRA na ini begi fu A yepi den. Dan MASRA seni Moses nanga Aaron, di puru den na Egipte tyari kon tan dyaso. ₉Ma den afo fu wi fergiti MASRA, den Gado. Dat' meki MASRA gi den abra na Sisera, a edeman fu a legre fu Hasor, na den Filistijnsma èn na a kownu fu Moab. Den sma disi feti nanga den. ₁₀Dan den kari MASRA baka na ini begi fu A yepi den. Den ben taigi En taki: ‘MASRA, wi sondu. Wi ben gwe libi Yu fu go dini den Baal nanga Astarte. Now wi e begi Yu, ferlusu wi fu a makti fu wi feyanti, dan wi sa dini Yu baka.’ ₁₁Dan MASRA seni Yerubaal, Barak, Yefta nanga Samuel, fu ferlusu unu puru ini a makti fu wi feyanti, fu wi ben kan libi sondro frede. ₁₂Ma di un si taki kownu Nakas fu den Amonitisma, ben kon feti nanga unu, un taigi mi taki: ‘Nono, wi wani wan kownu fu tiri wi.’ Ma na MASRA un Gado, na wi kownu. ₁₃We dan, luku a kownu dyaso di un ben wani, a kownu di un ben angri fu abi. MASRA gi unu wan kownu. ₁₄Ma un mus tan abi lespeki gi MASRA, èn un mus tan dini En. Un mus arki En, èn un no mus tranga un yesi gi den sani di A e komanderi unu fu du. Unu nanga a kownu fu unu mus tan waka baka MASRA, un Gado! ₁₅Ma efu un no arki MASRA, èn efu un no wani du san A komanderi, dan A o strafu unu leki fa A ben strafu den afo fu unu. ₁₆Un tan tnapu, MASRA o du wan bigi wondru di un o si nanga un eigi ai. ₁₇Na a ten fu koti tarwe. Ma mi o begi MASRA fu A meki dondru bari èn fu A meki alen fadon. A sani dati o meki un ferstan taki MASRA e si a aksi di un aksi fu wan kownu, leki wan bigi ogri.”

₁₈Dan Samuel begi MASRA, èn MASRA meki dondru bari èn alen fadon a dei dati. A sani dati meki a heri pipel kisi lespeki gi MASRA nanga gi Samuel. ₁₉Dan den aksi Samuel taki: “Begi MASRA, yu Gado, gi wi fu wi no dede. Bika wi du someni sondu kba, èn wi meki en moro ogri now di wi aksi fu wan kownu.” ₂₀Ne Samuel piki den taki: “Un no abi fu frede. A tru tak' san un du no bun. Ma now un mus tan dini MASRA wawan, èn un mus dini En nanga un heri ati. ₂₁Un no mus gwe libi MASRA fu go waka baka sani di no de noti èn di no man yepi unu. Den no de noti. ₂₂Bika noiti MASRA sa poti En pipel na wan sei. A no sa du dati fu En nen ede, bika MASRA ben teki unu leki En eigi folku. ₂₃Mi fu mi sei, no o sondu tu fu tapu fu begi gi unu. Efu mi du dati, mi no e du a wani fu MASRA. Mi sa tan sori un tu tapu a bun nanga a leti pasi. ₂₄Na MASRA wawan un mus lespeki èn un mus tan dini En nanga un heri ati. Bika unu srefi sabi den bigi sani di A du gi unu. ₂₅Ma efu un e tan du ogri, A o puru unu nanga a kownu fu unu na pasi.”

₃₇A tamara fu en, di den saka kmopo fu a bergi, wan bigi grupu sma waka miti Yesus. ₃₈Ne wan man ini a grupu bari taki: “Meister, mi e begi Yu fu kon luku a boi fu mi. Na en wawan mi abi. ₃₉Wan yeye e kon na en tapu, dan wantron a e bigin bari. A yeye e gi en stoipi taki skuma e kmopo ini en mofo. Te a yeye bigin pina en, a no wani libi en. ₄₀Mi ben aksi den man di e teki leri fu Yu fu yagi a yeye puru na en tapu, ma den no ben man.” ₄₁Dan Yesus taigi den sma taki: “Ai baya! Yu kan si taki un no e bribi, èn taki un ati takru. O langa Mi mus tan na un mindri fu teki den sani disi?” Dan A taigi a man taki: “Tyari yu manpikin kon dya.” ₄₂Di a boi e waka kon, a takruyeye naki en stoipi fringi trowe na gron. Yesus komanderi a takruyeye fu kmopo ini a boi, dan a boi kon betre. Dan Yesus langa a boi baka gi en p'pa. ₄₃Ala den sma ben tnapu nanga opo mofo di den si a fasi fa Gado bigi.

A pisten di den sma ben e ferwondru ete fu ala den sani san Yesus ben e du, A taigi den man di ben e teki leri fu En taki: ₄₄“Un no mus fergiti a sani san Mi o taigi un now: Den o gi a Manpikin fu Libisma abra na ini anu fu libisma.” ₄₅Ma den man no ben ferstan san Yesus ben wani taki. A ben de wan kibritori gi den, di den no ben man ferstan. Ma den ben frede fu aksi Yesus san A ben wani taki.

₄₆Wan pikin tak'taki ben de mindri den man di ben e teki leri fu Yesus, fu sortu wan fu den na a moro prenspari wan. ₄₇Ma Yesus ben sabi san den e prakseri, so A teki wan pikin poti tnapu na En sei. ₄₈Dan A taigi den taki: “A sma di opo en doro gi sowan pikin ini Mi nen, e opo en gi Mi. Èn a sma di opo en doro gi Mi, e opo en gi a Wan di seni Mi kon. Bika a wan fu unu di saka ensrefi gi ala trawan, na en na a moro prenspari wan.” ₄₉Dan Yohanes taki: “Meister, un si wan man e yagi takruyeye puru na sma tapu na ini Yu nen. Un ben suku fu tapu en, bika a no de ini a grupu fu unu.” ₅₀Yesus piki taki: “No tapu en. Bika efu wan sma no e suku fu tapu a wroko fu unu, dan a de na un sei.”

₅₁A ten fu Yesus go baka na heimel ben kon krosbei, so A teki a besroiti fu go na Yerusalem. ₅₂Dan A seni wantu boskopuman go na En fesi. Den man go na wan fu den dorpu fu Samaria, fu seti sani gi Yesus. ₅₃Ma den sma no ben wani A tan drape, bika A ben de na pasi fu go na Yerusalem. ₅₄Di Yakobus nanga Yohanes yere a sani disi, den taki: “Masra, Yu wani fu un taki fu faya kmopo na heimel fu bron den kiri?” ₅₅Ma Yesus drai, dan A piri ai gi den. ₅₆Dan den go na wan tra dorpu.

₅₇Di den ben de na pasi, wan sma taigi Yesus taki: “Mi sa go nanga Yu ala sei pe Yu e go.” ₅₈Ma Yesus piki en taki: “Krab'dagu abi den olo, èn pikinfowru abi den nesi. Ma a Manpikin fu Libisma no abi wan presi fu kanti En ede.” ₅₉Dan Yesus taigi wan tra sma taki: “Kon nanga Mi.” Ma a man piki taki: “Masra, gi mi a okasi fu go beri mi p'pa fosi.” ₆₀Dan Yesus taki: “Meki den dedewan beri den eigi dede. Ma yu mus go panya a nyunsu taki Gado o tiri libisma.” ₆₁Dan ete wan tra sma taigi Yesus taki: “Masra, mi sa waka na yu baka, ma meki mi go bari den ososma fu mi adyosi fosi.” ₆₂Ma Yesus taigi en taki: “A sma di poti en futu na pasi kba, ma di e tan luku na baka, no fiti fu kon ondro a tiri fu Gado.”