13Mi si ete wan koni na grontapu di meki mi ferwondru: 14yu ben abi wan pikin foto nanga wantu sma nomo na ini. Wan kownu nanga furu makti hari go drape fu teki a foto abra: den lontu en fu alasei èn den meki heihei ipi fu santi nanga ston fu pe den ben man feti nanga den sma fu a foto. 15Ma yu ben abi wan pôti koniman ini a foto di ben kan ferlusu a foto nanga a koni fu en. Ma no wan sma ben e prakseri a pôtiman. 16Ne mi taki: Yu e si dati koni betre moro krakti. Ma den sma si a koni fu a pôtiman leki noti èn den no teki den rai fu en. 17A moro betre fu arki den wortu di wan koniman taki tapu wan safri fasi, dan a babari fu wan tiriman na mindri don sma. 18Koni betre moro iniwan fetisani. Ma wan enkri fowtu kan pori furu sani.
Preikiman 10
1Te dede freifrei fadon ini a oli nanga san switismeri e meki, den e pori en. Na so pikinso donfasi e pori furu koni. 2A ati fu wan koni sma e meki a waka tapu a leti pasi, ma a di fu wan don sma e meki a waka tapu a kruktu pasi. 3Awinsi pe a don sma go a e kon na krin dati a no abi ferstan. A e sori ala sma fa a don.
4Efu kownu ati bron nanga yu, teki en nanga sakafasi. Bika efu yu tan tiri, bigi fowtu no abi fu meki. 5Mi si wan ogri di e psa na grontapu. Na wan fowtu di tiriman e meki dorodoro: 6den e poti don sma na hei presi èn den e poti prenspari nanga gudu sma na lagi presi. 7Mi si srafu e sidon tapu asi èn bigiman fu kondre e waka nanga futu leki srafu.
