11 oktober - Psalm 119:161-168

₁₆₁Prenspari sma de nomo na mi baka fu du mi ogri,

sondro taki mi du den wan sani,

ma mi abi lespeki gi den wortu fu Yu.

₁₆₂Mi e prisiri nanga a wortu fu Yu,

leki wan sma di feni wan bigi gudu.

₁₆₃Mi no lobi srefsrefi te sma e lei,

mi no wani abi not'noti fu du nanga den,

ma na a wèt fu Yu mi lobi.

₁₆₄Seibi leisi wan dei mi e gi Yu grani,

fu bun sani fu Yu na san wi mus hori wisrefi.

₁₆₅Den sma di lobi a wèt fu Yu

abi trutru freide

no wan ongoloku e kon tapu den pasi.

₁₆₆MASRA, mi e fertrow na Yu tapu fu ferlusu mi,

mi e hori den gebod fu Yu.

₁₆₇Mi e tan du den sani fu Yu di wi mus memre,

mi lobi den trutru.

₁₆₈Mi e hori misrefi na den sani di Yu komanderi,

nanga den sani fu Yu di wi mus memre,

Yu e si ala san mi e du.