12 oktober - Psalm 119:169-176

₁₆₉Meki a bari di mi e bari suku yepi

doro te na Yu fesi, MASRA,

gi mi ferstan leki fa Yu ben pramisi.

₁₇₀Meki a begi di mi e begi doro te na Yu fesi,

ferlusu mi soleki fa Yu ben pramisi.

₁₇₁Mi mofo sa gi Yu furu grani,

bika Yu e leri mi den sani fu Yu di wi mus tan du.

₁₇₂Mi mofo sa singi fu a wortu fu Yu,

bika ala den gebod fu Yu bun.

₁₇₃Langa Yu anu yepi mi,

bika mi teki a besroiti fu du san Yu komanderi.

₁₇₄Tye MASRA, mi e angri fu a ferlusu fu Yu,

mi e prisiri nanga a wèt fu Yu.

₁₇₅Meki mi libi fu mi kan prijse Yu,

meki den sani fu Yu na san wi mus tan hori wisrefi

de wan yepi gi mi.

₁₇₆Mi lasi pasi leki wan lasi skapu,

kon suku Yu knekti,

bika mi no fergiti den gebod fu Yu.