1Aksi MASRA fu a seni alen
na a bigin fu a yari.
Dan A sa meki alen fadon gi yu,
A sa gi yu nyanyan ini yu gron.
Bika na MASRA e meki den dungru alenwolku.
2Den kruktu gado e kori unu,
den lukuman e ferteri soso lei,
den sani di den si ini den dren,
no o psa.
A trowstu fu den no e kowru ati.
Fu dat'ede den waka lontu nomo
leki wan ipi skapu di de na nowtu.
bika den no abi wan skapuman.
3Mi ati e bron tapu den skapuman. Mi o strafu den bokoboko. Ma MASRA fu ala sani e sorgu gi den skapu fu En, a folku fu Yuda. Den sa de leki a moi fet'asi fu En tapu san A e hari go feti. 4Bika ini a folku disi a ukuston o kmoto, a pen di e hori a tenti tnapu, nanga a bo. Na ini a folku disi ala den fesiman e kmoto. 5Den dyadya fetiman. Ini a feti den e trapu den feyanti fu den na ini a tokotoko tapu strati. Den e feti bika MASRA de nanga den. Den wan di sidon hei tapu den asi fu den, o lasi a feti.
6Na so Mi o meki a folku fu Yuda kon tranga, na so Mi o ferlusu den bakapikin fu Yosef. Mi sa tyari den kon baka, fu di Mi abi sari-ati gi den. A sa de leki noiti Mi ben taigi den taki Mi no wani den moro. Bika Mi na MASRA, a Gado fu den. Mi sa arki den. 7Dan Efraim sa de leki wan dyadya fetiman, den sa drungu fu prisiri. Den pikin fu den sa si dati. Densrefi sa prisiri tu. Den ati sa prisiri fu san MASRA du.
8Mi sa froiti kari den dan Mi tyari den kon na wan. Bika na Mi e ferlusu den. Den sa kon so furu baka leki fa den ben de bifo. 9Mi e panya den na mindri den tra folku Ma den sa prakseri Mi na ini den fara kondre pe den o de. Na so den o libi nanga den pikin fu den dan den o drai kon baka. 10Iya, Mi sa puru den na ini a kondre Egipte, Mi sa puru den na ini Asur èn tyari den kon makandra. Mi o tyari den go na a kontren fu Gilead nanga Libanon. Ma a presi o pikin fu hori den. 11Nanga frede den o psa ini a se, ma Mi sa naki den skwala. Den peti fu a Nijl-liba sa drei gwe. Na so a heimemre fu Asur sa broko, nanga a makti fu Egipte.
12Mi MASRA sa meki den kon tranga. Den sa waka na ini a nen fu MASRA, na so MASRA taki.
