19 september - Handelingen 13:44–15:7

₄₄Tapu a tra sabatdei, pikinso moro dan a heri foto ben kon makandra fu arki a wortu fu Masra. ₄₅Ma di den Dyusma si a bigi grupu sma, den kon dyarusu. Den bigin taki takru fu Paulus èn den taki tak' na lei a e lei. ₄₆Ma sondro frede Paulus nanga Barnabas taigi den taki: “Unu na den fosi sma di ben mus yere a wortu fu Gado. Ma fu di un no wani yere en srefsrefi, èn un feni taki un no fiti fu kisi a libi fu têgo, meki wi e go now na den sma di no de Dyu. ₄₇Bika Masra ben komanderi wi taki: ‘Mi poti yu leki wan leti gi den sma di no de Dyu, fu tyari ferlusu kon gi ala sma te na den moro fara uku fu grontapu.’ ”

₄₈We, di den sma di no de Dyu yere a sani dati, den prisiri èn den gi Masra grani fu a wortu fu En. Ala sma di Gado ben wani fu kisi a libi fu têgo, teki bribi. ₄₉So a wortu fu Masra panya lontu ini a heri kontren drape.

₅₀Ma den Dyusma sutu faya gi den gudu uma di ben anbegi Gado, nanga gi den edeman fu a foto. Den meki den sma de na Paulus nanga Barnabas baka fu du den ogri, èn den yagi den puru fu a kontren drape. ₅₁So Paulus nanga Barnabas seki a santi puru na den futu leki wan marki tak' den no e tyari a frantwortu moro gi den. Dan den go na a foto Ikonium. ₅₂Ma den bribisma fu a foto Antiokia ben prisiri srefsrefi èn den ben kon furu nanga a Santa Yeye.

₁A srefi sani psa ini Ikonium tu. Paulus nanga Barnabas go ini a kerki èn a fasi fa den ben e taki meki taki furu Dyusma nanga sma di no de Dyu, teki bribi. ₂Ma den Dyusma di no ben wani teki bribi, sutu faya gi den sma di no de Dyu èn den meki den prakseri takru fu den bribisma. ₃Paulus nanga Barnabas tan wan heri pisten drape. Den ben fertrow Masra èn sondro frede den ben preiki a boskopu fu a bun-ati fu Masra. Dan Masra meki den du wondru èn A meki den sori den sma marki, fu sori taki den sani san den taki tru. ₄Ma dan wan prati kon na mindri den sma fu a foto. Sonwan ben de na a sei fu den Dyusma, trawan ben de na a sei fu den boskopuman fu Yesus. ₅Te fu kba den Dyusma nanga den sma di no de Dyu, makandra nanga den fesiman fu den, meki mofo fu fon den èn fu ston den kiri. ₆Ma di Paulus nanga Barnabas kisi a sani disi fu yere, den lowe go na Listra nanga Derba, tu foto fu Likaonia. Drape ini den foto nanga den birti fu den, ₇den go doro fu preiki a bun nyunsu.

₈Yu ben abi wan man ini Listra di no ben man waka. Noiti a ben tnapu tapu en futu fu di a ben lan sensi a gebore. ₉A man disi ben sidon e arki di Paulus ben e taki. Dan Paulus luku en trangatranga èn a si taki a man ben abi bribi fu kon betre. ₁₀So a taigi en nanga tranga sten taki: “Opo tnapu tapu yu futu!” A man dyompo opo èn a bigin waka lontu. ₁₁Di a bigi grupu sma si san Paulus du, den bari na ini Likaonia-tongo taki: “Den gado saka kon leki libisma na wi.” ₁₂Dan den kari Barnabas Seus, èn fu di na Paulus ben e taki den kari en Hermes. ₁₃Dan a priester fu a tempel fu Seus, di ben de krosbei fu a foto, tyari kaw nanga bromki kon na den doro fu a foto. Makandra nanga ala den sma, a ben wani tyari ofrandi gi den. ₁₄Ma di Barnabas nanga Paulus, den boskopuman fu Yesus, yere san den ben wani du, den no ben feni en bun srefsrefi. Dat' meki den priti den krosi èn den lon go na mindri den sma. ₁₅Den bari taki: “Sma fu Listra, fu sanede un e du den sani disi? Wi na libisma leki unu! Wi kon fu ferteri unu a bun nyunsu tak' un mus drai un baka gi den soso sani disi fu kon na a libilibi Gado di meki heimel nanga grontapu, a se nanga ala den sani san de ini den. ₁₆Fosten A ben meki ala folku go den eigi pasi. ₁₇Ma toku Gado meki un si suma A de nanga den bun sani di A e du. A e meki alen kmopo fu heimel, èn A e meki nyanyan gro kon na tapu en ten. A e gi un nofo fu nyan èn A e furu un ati nanga prisiri.” ₁₈Ma aladi den taki so, a ben tranga gi den fu tapu den sma fu no tyari ofrandi gi den.

₁₉Ma baka dati wantu Dyusma kmopo fu Antiokia nanga Ikonium kon drai den sma ede. Den fringi ston tapu Paulus èn di den prakseri taki a dede, den srepi en go na dorosei fu a foto. ₂₀Ma di den bribisma kon tnapu lontu en, a opo tnapu dan a go ini a foto. A tra dei Paulus nanga Barnabas go na a foto Derba.

₂₁Di den preiki a bun nyunsu ini a foto dati èn den gi furu bribisma leri, den drai go baka na Listra, Ikonium, nanga Antiokia. ₂₂Drape den meki den bribisma kon tranga ini bribi èn den gi den dek'ati fu tan ini a bribi. Den taigi den taki: “Wi o abi fu nyan furu pina fu kon ondro a tiri fu Gado.” ₂₃Na ini ibri gemeente den poti sma leki fesiman tu. Den begi èn den faste, dan den poti den ini Masra anu, bika na ini En den ben e bribi. ₂₄Dan Paulus nanga Barnabas psa ini Pisidia, go na Pamfilia. ₂₅Baka di den preiki a boskopu ini Perga, den go na Atalia. ₂₆Drape den teki wan sipi go baka na Antiokia, pe a gemeente ben poti den ini Gado anu fu A yepi den du a wroko di den ben kba du now. ₂₇Di den doro, den kari a gemeente kon na wan. Dan den ferteri den sma ala den sani di Gado meki den du, nanga fa A opo pasi gi den sma di no de Dyu, fu den kon na bribi tu. ₂₈Dan den tan wan heri pisten nanga den bribisma drape.

₁Wantu man di kmopo fu Yudea bigin leri den bribisma taki: “Gado no o ferlusu unu efu un no besnei leki fa a wèt fu Moses e taki.” ₂Ma Paulus nanga Barnabas no ben agri nanga den srefsrefi. A sani disi tyari sowan dyugudyugu tak' den sma fu a gemeente taigi Paulus nanga Barnabas fu go makandra nanga wantu tra sma na Yerusalem, fu taki a tori disi nanga den boskopuman fu Yesus nanga den fesiman fu a gemeente drape. ₃So a gemeente seni den go èn den psa ini Fenisia nanga Samaria. Drape den ferteri den bribisma fa den sma di no de Dyu teki bribi na ini Masra Yesus. Di den bribisma yere a sani dati, den ben breiti srefsrefi. ₄Di den doro ini Yerusalem, den bribisma, den boskopuman fu Yesus nanga den fesiman fu a gemeente, bari den wan odi. Dan Paulus nanga Barnabas ferteri den ala sani san Gado ben meki den du. ₅Ma wantu Fariseiman di ben teki bribi, opo tnapu dan den taki: “Den sma di no de Dyu musu besnei, èn sma mus leri den fu hori a wèt fu Moses.”

₆So den boskopuman fu Yesus nanga den fesiman fu a gemeente kon makandra fu taki a tori disi. ₇Ma den no ben man feni densrefi. Ne Petrus opo dan a taki: “Brada, un sabi taki langa ten kba Gado ben teki mi puru na un mindri, fu go ferteri a bun nyunsu na den sma di no de Dyu fu den teki bribi.