Wan begi fu Gado feti den feyanti
1Wan singi. Wan psalm fu Asaf.
2Tye Gado, no sidon tiri,
Gado, no tan tiri èn sidon luku nomo.
3Bika luku, den feyanti fu Yu e meki opruru,
den di no lobi Yu e kaka futu gi Yu.
4Den e meki mofo fa den o kisi Yu folku tapu wan bedrigi fasi,
den sidon e taki makandra fa den o kisi a wan di Yu lobi.
5Den e taki: “Kon meki wi kiri a folku disi puru na pasi.
No wan sma mus memre a nen fu Israel moro.”
6Den agri nanga san den sidon taki makandra,
den meki wan ferbontu fu feti Yu:
7Den Edomitisma nanga den Ismaelitisma,
den sma fu Moab nanga Hagar,
8fu Gebal, Amon nanga Amalek,
den di fu Filistea nanga den sma fu Tyrus.
9Srefi Asur go moksi nanga den,
den go yepi den bakapikin fu Lot. sela
10Du nanga den leki san Yu ben du nanga Midyan,
leki fa Yu ben du nanga Sisera nanga Yabin
na a Kisonkriki.
11Yu kiri den na Endor,
den dedeskin fu den tan didon leki doti.
12Du nanga den edeman fu den
leki fa Yu du nanga Oreb nanga Seeb,
du nanga ala den kownu fu den
leki fa Yu du nanga Sebak nanga Salmuna.
13Den ben taki:
“Wi o teki a kondre dati abra pe a oso fu Gado de.”
14Mi Gado, meki den de leki drei wiwiri,
leki aleisibuba di a winti e wai gwe.
15Leki fa faya e bron wan busi es'esi,
leki fa a e bron ala sani di e gro tapu wan bergi,
16na so Yu mus go na den baka nanga a tranga winti fu Yu,
bruya den nanga wan draiwinti.
17Tye MASRA, meki bigi syen naki den,
dan den sa drai suku Yu.
18Meki den kisi syen fu têgo,
meki den no sabi san fu du,
meki den dede gwe nanga bigi syen.
19So den sa ferstan taki Yu nen na: MASRA,
a Moro Hei Gado fu heri grontapu.
