23 juni - Galaten 3:15-29

₁₅Brada nanga sisa, mi o gi unu wan eksempre fu a aladei libi. Te wan sma meki wan testamenti dan a poti en stampu tak' a e agri, dan no wan sma no kan taki tak' a no e teri moro noso skrifi wan tra sani poti na ini. ₁₆We, now a de so taki Gado ben gi Abraham nanga wan fu den bakapikin fu en wantu pramisi. Arki bun. A wortu no taki “den bakapikin,” sobun moro leki wan, ma a taki “wan fu den bakapikin,” dati na wan enkri wan nomo. Èn a bakapikin dati na Kristus. ₁₇San mi wani sori unu na disi: Gado meki wan ferbontu, dan A poti En stampu na en tapu. So a wèt di kon fo hondro nanga dritenti yari baka dati, no kan broko a ferbontu fu meki san Gado ben pramisi no teri moro. ₁₈Efu a wèt ben man gi unu den blesi, dan a pramisi no ben de fanowdu. Ma na a pramisi meki taki Gado gi Abraham den blesi.

₁₉Dan fu sanede a wèt ben de fanowdu dan? Gado gi a wèt bakaten fu a kon krin gi wi taki wi e sondu. A wèt ben o de gi wan pisten te leki a bakapikin kon di ben kisi a pramisi fu Gado. Den engel ben poti a wèt ini anu fu wan mindriman fu gi a folku. ₂₀A mindriman no e taki gi wan sma nomo. Ma Gado na wan. ₂₁Un sa man taki dan taki a wèt no e kruderi nanga den pramisi fu Gado? Nono, kwet'kweti! Bika efu Gado ben gi wan wèt di ben kan gi sma a libi, dan a ben o de so tu taki a sma di hori a wèt ben o kon bun ini Gado ai. ₂₂Ma a Santa Buku e sori taki ala sma de ini a katibo fu sondu. So a wan enkri fasi fu kisi a pramisi fu Gado, na fu bribi na ini Yesus Kristus. ₂₃Ma fosi a ten ben kon pe un ben kan bribi ini Yesus Kristus, wi ben de leki straf'man. A wèt ben hori ai na wi tapu, te leki a ten fu a bribi ben o kon na krin. ₂₄So a wèt ben mus luku wi èn gi wi leri te leki Kristus kon, fu wi sa kon bun ini Gado ai te wi e bribi. ₂₅Ma now di wi e bribi, wi no abi a wèt fanowdu moro fu luku wi èn gi wi leri. ₂₆Bika un alamala na pikin fu Gado, fu di un kon bribi na ini Kristus Yesus. ₂₇Bika di un teki dopu ini Kristus nen, un alamala weri Kristus leki wan krosi. ₂₈A no abi trobi efu yu na wan Dyusma, noso efu yu a no wan Dyusma, efu yu na wan srafu efu noso wan fri sma, efu yu na man noso uma. Bika un alamala de wan na ini Kristus Yesus. ₂₉We, efu unu na fu Kristus, dan unu na bakapikin fu Abraham. Dan un o teki prati na ini ala den sani san Gado ben pramisi Abraham.