23 maart - Jesaja 51:9-16

₉Wiki, wiki, anu fu MASRA!

Sori Yu krakti.

Wiki leki fos'fosi,

leki a ten di psa langa kba.

Na Yu ben de a wan di ben kapu Rahab trowe,

di boroboro a bun bigi sneki fu a se.

₁₀Na Yu ben de a wan di ben drei a se,

den watra fu a bun dipi presi.

Na Yu ben meki wan pasi ini a se,

fu meki den wan di Yu ben ferlusu ben kan psa.

₁₁Den wan di MASRA ferlusu o drai kon baka,

nanga bigi prisiri den e kon na Sion.

Wan têgo prisiri sa de na den tapu.

Den o breiti, den o prisiri,

ma sorgu nanga dyeme sa lowe.

₁₂Mi, na Mi na a wan di e trowstu unu!

Fa un kan frede gi libisma dan,

gi libisma di e dede gwe leki grasi?

₁₃Fa un kan fergiti MASRA,

a Wan di meki unu?

Na En hari a heimel poti leki fa a de.

Na En poti grontapu tnapu.

Fa un e tan frede nomo so,

gi a atibron fu a wan di e pina unu,

te a e meki ensrefi klari fu puru un na pasi?

Pe a atibron fu a wan di ben pina unu de now?

₁₄A wan di den ben keti poti na strafu o kon fri heri esi.

A no o dede, a no o go na en grebi,

èn nyanyan no o mankeri en.

₁₅Mi na MASRA, a Gado fu yu,

a Wan di e meki a se e rigeri tak' den skwala fu en e meki babari.

MASRA fu ala sani na En nen.

₁₆Mi poti den wortu fu Mi ini a mofo fu yu,

èn Mi e kibri yu ini Mi anu.

Mi di hari a heimel poti leki fa a de,

èn di poti grontapu tnapu,

e taigi Sion taki:

“Un na a pipel fu mi.”