1Paulus nanga Silas psa ini den foto Amfipolis nanga Apolonia, dan den doro na a foto Tesalonika pe wan kerki ben de. 2Dan soleki fa Paulus ben gwenti, a go ini a kerki èn dri sabatdei baka makandra a gi den leri kmopo fu a Santa Buku. 3A sori den krin taki a Mesias ben mus nyan pina èn taki a ben mus opo baka na dede. A taigi den taki: “A Yesus di mi e taki, na En na a Mesias.” 4Wantu Dyusma bribi san Paulus nanga Silas taigi den, dan den bigin waka nanga den. Bun furu Grikisma di ben e anbegi Gado, teki bribi tu, nanga furu fu den prenspari umasma. 5Ma tra Dyusma kon dyarusu tapu Paulus. Den go teki wantu trobiman èn makandra nanga den den tyari wan lo sma kon na wan fu meki dyugudyugu kon ini a foto. Den lon go na a oso fu Yason nanga a prakseri fu tyari Paulus nanga Silas kon na doro gi den sma. 6Ma di den no feni den, den srepi Yason nanga wantu tra bribisma go fesi den edeman fu a foto, dan den bari taki: “Den man di e tyari dyugudyugu na heri grontapu, kon dyaso tu, 7èn Yason meki den tan na en oso. Den alamala e broko den wèt fu a grankownu fu den Romeinisma, bika den e taki tak' wan tra kownu de, di den e kari Yesus.” 8Di den sma nanga den edeman fu a foto yere a sani disi, den bruya srefsrefi. 9Dan den meki Yason nanga den tra bribisma pai moni fu den no koti strafu, dan den meki den go.
Paulus ini a foto Berea
10Fa neti tapu, den bribisma seni Paulus nanga Silas go na Berea. Di den doro drape den go na a kerki. 11Den Dyusma fu Berea no tapu den yesi leki fa den sma fu Tesalonika ben du. Ma nanga wan opo ati den ben arki a boskopu san Paulus tyari, èn ala dei den ben e ondrosuku a Santa Buku fu si efu den sani de so trutru. 12Furu fu den Dyusma teki bribi, sosrefi furu prenspari Griki umasma nanga furu Griki mansma tu. 13Ma di den Dyusma fu Tesalonika yere taki Paulus e tyari a wortu fu Gado ini Berea tu, den go sutu faya gi den sma drape tu fu meki dyugudyugu. 14Dan wantron den bribisma meki Paulus go na sekanti, ma Silas nanga Timoteus tan drape. 15Den sma di ben tyari Paulus gwe, go nanga en te na a foto Atena. Dan den drai go baka nanga a boskopu gi Silas nanga Timoteus tak' den mus kon na Paulus so esi leki den kan.
