6 augustus - Kolossenzen 3:18-4:6

₁₈Uma, un mus saka unsrefi gi un masra, soleki fa a fiti sma di de fu Masra. ₁₉Mansma, un mus lobi un uma èn un no mus grofu nanga den. ₂₀Pikin, un mus gi yesi na ala sani san un m'ma nanga p'pa e taigi unu, bika Masra abi prisiri nanga dati. ₂₁P'pa, un no mus tanteri den pikin fu unu, noso den o lasi ati. ₂₂Srafu, un mus du ala sani san den masra fu unu dyaso na grontapu, e taki. Un no mus du dati soso te den e luku unu, fu un kan kisi bun nen. Ma un mus du dati, nanga wan krin ati, fu di un abi dipi lespeki gi Gado. ₂₃Awinsi sortu wroko un e du, du en nanga un heri ati, leki na gi Gado un e du en, èn no gi libisma. ₂₄Bika un sabi taki a paiman san Masra o gi unu, na fu un teki prati ini a gudu san A poti klari gi den sma fu En. Bika a Masra san un e dini na Kristus. ₂₅Dat' meki a sma di e du kruktu, o kisi a paiman fu san a ben du. Gado no e luku suma yu de.

₂Hori doro na ini begi. Un mus tan na ai, èn un mus gi Gado tangi tu. ₃Begi tu gi wi. Un begi taki Gado sa opo wan doro gi a boskopu san wi e tyari, fu wi kan taki fu a kibritori fu Kristus. Na fu a tori disi meki mi de na straf'oso. ₄Un begi tu tak' mi sa taki a tori disi krin soleki fa a mus de. ₅Un mus libi nanga koni na mindri fu den sma di no e bribi. Un no musu e lasi ten te un feni wan okasi. ₆Ala ten te un e taki, sma mus abi prisiri fu arki. A taki fu unu mus abi sowtu. Un mus sabi fa fu piki ibri sma tapu a yoisti fasi.