1Suma koni trutru? Suma man taki fa sani de trutru? Koni e meki a fesi fu wan sma brenki. A tranga luku e kmoto fu en fesi.
2Du san kownu e komanderi, bika Gado ben meki en wan pramisi èn A ben sweri dati A o hori En na a pramisi.3No waka gwe fu kownu sondro fu prakseri bun san yu o du, èn no moksi nanga sma di wan du en ogri. Bika a kan du san a wani. 4Memre tu dati na san en e taki e psa. Suma sa man kari en kon fu a gi frantwortu? 5Ogri no o miti a sma di e du san kownu e komanderi. Wan koni sma sabi fa nanga oten a mus du wan sani. 6Bika ala sani abi en ten nanga en fasi fa a mus du. Ma libisma abi fu psa furu tranga ten, 7bika a no sabi san de fu kon noso fa sani sa de. Suma sa man taigi en dati? 8No wan sma abi makti abra a bro fu en, efu a mus koti a o koti. No wan sma abi makti tu abra a dei di a o dede. Èn leki fa srudati no e kisi primisi fu gwe libi wan feti, na so ogri no e lusu den wan di e du ogri. 9Mi si ala den sani dati di e psa na grontapu èn mi prakseri den go, mi prakseri den kon. Son leisi sma e basi trawan ma densrefi e firi en.
10Mi si wan tra sani tu: dati na a fasi fa den e beri ogri-ati sma. Sma e tyari den fu a santa presi go beri èn den e kisi grani fu sma fu a srefi foto pe den ben du den ogri. Dati na wan sani di tranga fu ferstan. 11Fu di sma no e kisi strafu wantron fu a ogri di den e du, meki a e kon so esi ini den ede fu du ogri. 12Wan sondusma kan abi wan langa libi aladi a du ogri en heri libi langa. Ma mi sabi tu dati a o go bun nanga a sma di abi lespeki gi Gado, fu a lespeki di a abi gi En. 13Ma nanga a ogri-ati sma a no o go bun. Leki fa wan schaduw e psa es'esi, na so a libi fu en o psa es'esi tu, bika a no e lespeki Gado. 14Ma wan sani e psa na grontapu di tranga fu ferstan: dati de tak' son sma di bun ini Gado ai e kisi a strafu di ogri-ati sma mus kisi, èn dati son ogri-ati sma e kisi san sma di bun ini Gado ai ben mus kisi. Mi taigi misrefi taki: dati tranga fu ferstan. 15Dat' meki a moro betre sani di wan sma kan du na fu prisiri. Bika wan moro betre sani no de fu du dyaso na grontapu dan fu nyan, fu dringi, nanga fu prisiri. Den sani dati no mus mankeri ini a libi fu wan sma nanga ala a tranga wroko di a e du a ten di Gado gi en fu a libi na grontapu.
16Di mi teki a besroiti fu kon ferstan moro betre san koni wani taki èn fu luku ala den sani di libisma e du na grontapu, mi no ben e sribi, no dei no neti. 17Dan mi kon si dati libisma no o man ferstan noti fu den sani di Gado du na grontapu. Awinsi omeni muiti den meki, den no man ferstan en. Srefi efu wan koniman taigi yu dati a ferstan en, na lei a e lei.
