8 september - Handelingen 11:1-18

₁Den boskopuman fu Yesus nanga den bribisma ini Yudea, ben kisi fu yere taki den sma di no de Dyu bribi a wortu fu Gado tu. ₂Di Petrus go na Yerusalem, den Dyusma di ben teki bribi no ben agri nanga san a ben du. ₃Den taigi en taki: “Fa yu ben kan go ini a oso fu sma di no de Dyu, dan yu nyan nanga den?” ₄Dan Petrus bigin ferteri den a heri tori soleki fa a psa. ₅A taigi den taki: “Mi ben de ini Yopa e begi, dan Gado sori mi wan sani. Mi si fa wan sani leki wan bigi sribikrosi san ben tai na den fo uku, saka kmopo fu heimel let' na mi fesi. ₆Di mi luku moro fini, mi si meti di e waka tapu fo futu, krasi meti, meti di e kroipi, nanga fowru di e frei na loktu. ₇Dan mi yere wan sten taigi mi taki: ‘Petrus, opo. Srakti wan sani, dan yu e nyan.’ ₈Ma mi taki: ‘Nono, Masra, kwet'kweti! Noiti ete mi poti wan sani na mi mofo san un leki Dyusma no mus fu nyan, fu di a no bun ini Yu ai fu un nyan en.’ ₉Ma a sten di kmopo fu heimel taigi mi a di fu tu tron taki: ‘Efu Gado taki wan sani bun fu nyan, dan yu no kan taki moro tak' yu no kan nyan en.’ ₁₀Dri leisi a sani disi psa. Baka dati ala sani hari go baka na heimel. ₁₁Dan a srefi momenti dati dri man doro na a oso pe un ben e tan. Wan sma fu Sesarea ben seni den kon na mi. ₁₂Dan a Yeye taigi mi tak' mi kan go nanga den man sondro fu draidrai. So mi nanga den siksi brada disi go na a oso fu a man di seni kari mi. ₁₃Dan a man dati ferteri unu tak' a ben si wan engel tnapu ini en oso di taigi en taki: ‘Seni wan sma go na Yopa, fu go kari Simon kon di den e kari Petrus tu. ₁₄A sa ferteri yu wan boskopu di sa meki taki Gado sa ferlusu yu nanga ala den sma fu yu oso.’ ₁₅Di mi bigin taki nanga den, a Santa Yeye kon na den tapu leki fa A ben kon na wi tapu ini a bigin. ₁₆Dan mi memre fa Masra ben taki: ‘Yohanes ben e dopu sma nanga watra, ma unu o kisi dopu nanga a Santa Yeye.’ ₁₇So efu Gado gi den a srefi Santa Yeye leki unu di den bribi ini Masra Yesus Kristus, fa mi ben o man tapu Gado dan?” ₁₈Di den yere den sani disi, den ati kon kowru. Dan den gi Gado glori taki: “Gado e gi sma di no de Dyu a okasi tu fu drai den libi, meki den kisi a nyun fasi fu libi.”