A bunfasi fu Gado nanga a ogrifasi fu Israel
1Gi a tiriman fu a singigrupu fu a tempel. A musu singi a srefi fasi leki: A Gitit. Fu Asaf.
2Un bari gi Gado, a Wan di e kibri wi,
un meki wan babari fu prisiri gi a Gado fu Yakob.
3Un singi wan singi, meki a tamboerijn de fu yere,
meki switi poku nanga a citer èn nanga a harp.
4Un bro a tutu gi a nyunmun,
un bro en te a furu mun opo,
un bro en gi a fesa fu wi.
5Na wan sani di Israel mus tan du,
wan sani fu a Gado fu Yakob
na san den mus tan hori densrefi.
6A ben poti en fu memre den bakapikin fu Yosef
di den ben hari kmoto fu Egipte.
Mi yere wan sten e taki, wan sten di mi no sabi:
7“Mi puru a hebi lai fu yu skowru,
Mi puru den hebi mantyi na yu anu.
8Di un ben de ini benawtu un kari Mi,
èn Mi ferlusu unu.
Mi ben piki unu kmoto fu wan dungru wolku nanga dondru.
Mi luku san un ben o du na den watra fu Meriba. sela
9Arki Mi, Mi pipel, Mi wani warskow unu,
tye Israel, efu un ben wani arki Mi nomo!
10No wan tra gado mus de na un mindri,
un no sa boigi gi wan gado di un no sabi.
11Na Mi, MASRA, na a Gado fu unu,
na Mi ben puru unu na ini Egipte.
Aksi nomo dan Mi sa gi unu san un abi fanowdu.
12Ma a pipel fu Mi no ben wani arki Mi,
Israel no ben wani du san Mi taki.
13Na dat' meki Mi libi den nanga a trangayesi fu den,
fu den waka baka den eigi pasi.
14Tye, efu a pipel fu Mi ben wani arki Mi nomo,
efu Israel ben wani libi leki fa Mi wani!
15Dan heri esi Mi ben o strafu den feyanti fu den,
feti nanga den wan di ben wan feti nanga den.
16Den di no lobi MASRA, o kon boigi gi En
a strafu fu den o tan fu têgo.
17Ma unu Mi ben o gi a moro bun tarwe,
Iya, Mi ben o gi un bogobogo oni fu a bergiston.”
