9 oktober - Psalm 119:145-152

₁₄₅MASRA, mi e kari Yu nanga ala san de ini mi,

piki mi,

mi sa hori mi na den sani fu Yu di wi mus memre.

₁₄₆Mi e kari Yu, ferlusu mi,

dan mi sa du den sani fu Yu di wi mus memre.

₁₄₇Fosi dei krin mi e kari Yu fu Yu yepi mi

na tapu a pramisi fu Yu mi e howpu.

₁₄₈Heri neti mi de na ai,

mi e sidon prakseri a wortu fu Yu.

₁₄₉Arki mi, fu Yu lobi ede,

MASRA, hori mi na libi soleki fa a fiti na ini Yu ai.

₁₅₀Den sma di de nomo na mi baka fu du mi ogri

den de krosbei,

den di no e du srefsrefi san a wèt fu Yu e taki.

₁₅₁Ma Yu, MASRA, de krosbei fu mi,

ala den gebod fu Yu de fu fertrow.

₁₅₂Bun langa mi sabi kba

taki den sani fu Yu di wi mus memre

de fu têgo.