Wan singi fu taki Gado tangi
1Gi a tiriman fu a singigrupu fu a tempel. Wan psalm fu David.
2MASRA, a makti fu Yu e gi kownu prisiri,
a e bari fu prisiri fu a wini di Yu gi en.
3Yu gi en san en ati ben angri,
Yu no taki no gi a sani di a begi Yu. sela
4Yu waka miti en nanga bogobogo blesi,
wan kroon fu fini gowtu Yu poti tapu a ede fu en.
5A aksi Yu fu hori en na libi, èn Yu du en,
Yu gi en wan bun èn wan langa libi.
6A wini di Yu gi en meki a taki a kisi wan bigi nen,
Yu gi en glori nanga grani.
7Iya, dorodoro Yu e blesi en,
èn Yu e gi en bogobogo prisiri fu di Yu de nanga en.
8Bika kownu e fertrow tapu MASRA,
èn a bigi lobi fu a Moro Hei Gado,
e meki taki no wan sma man puru en fu a kownusturu.
9Yu o grabu ala den feyanti fu yu,
nanga a makti fu yu,
yu o grabu den wan di no lobi yu.
10MASRA, te Yu o sori Yusrefi,
Yu o meki den bron leki a udu fu wan udufaya.
Yu o puru den na pasi nanga atibron,
Yu o meki a faya swari den.
11Yu o kiri den pikin fu den puru na grontapu,
figi den bakapikin fu den puru na mindri libisma.
12Te sma poti fu du yu ogri,
poti ogri na den ede fu du,
den no o man du en.
13Bika Yu o meki den lon,
Yu o marki nanga a bo fu Yu leti na den tapu.
14Opo, MASRA, sori a krakti fu Yu,
wi wani singi fu a bigi krakti fu Yu.
