1 Lelakoné Kraton 4

₁Para anaké Yéhuda ya kuwi Pèrès, Hèsron, Karmi, Hur, lan Syobal. ₂Syobal nduwé anak Reaya, lan nduwé anak Yahat, lan Yahat nduwé anak Ahumai lan Lahad. Kuwi turunané wong Sora.

₃Iki para anaké Etam: Yisreèl, Isma lan Idbas; seduluré wadon asmané Haselelponi; ₄terus Pnuèl, bapaké Gedor, lan Eser, bapaké Husa. Kuwi kabèh para turunané Hur, anak mbarepé Efrata, bapaké Bètléhèm.

₅Asyur, bapaké Tékoa, bojoné loro, ya kuwi Hela lan Naara. ₆Naara nduwé anak Ahusam, Hèfèr, Temeni lan wong Ahastari. Kuwi para anaké Naara. ₇Para anaké Hela ya kuwi Seret, Yesohar lan Etnan. ₈Kos nduwé anak Anub, Hasobeba, lan turunané Aharhel anaké Harum.

₉Yabes kuwi sing mulya déwé ing antarané para seduluré; mulané ibuné ngekèki asma Yabes, awit tembungé: “Enggonku nglairké dèwèké kuwi karo ngrasakaké lara.” ₁₀Yabes kuwi nyebut marang Gusti Allahé Israèl, tembungé: “Panjenengan muga gelem ngekèki berkah marang kula nganti lubèr lan supaya gelem njembarké panggonan pangwasa kula, uga supaya tangan Panjenengan nuntun kula lan gelem ngedohké kula sangka kasangsaran, terus kula ora katekan ing lelara!” Lan Gusti Allah gelem nuruti penjaluké kuwi.

₁₁Kelub, seduluré Suha, nduwé anak Mokir, bapaké Eston; ₁₂lan Eston nduwé anak Bèt-Rafa, Paséah lan Tehina, bapaké Ir-Nahas. Kuwi wong Reka.

₁₃Para anaké Kénas ya kuwi Otnièl lan Seruya; lan para anaké Otnièl ya kuwi Hatat lan Meonotai; ₁₄nanging Meonotai nduwé anak Ofra. Seruya nduwé anak Yoab, bapaké para wong sing manggon ing legokan tukang, awit kabèh pada dadi tukang.

₁₅Para anaké Kalèb anaké Yéfuné ya kuwi Iru. Ela lan Naam; lan turunané Ela ya kuwi Kénas.

₁₆Para anaké Yehaleleel ya kuwi Sif, Sifa, Tireya lan Asareel.

₁₇Para anaké Ezra ya kuwi Yètèr, Mered, Efer, lan Yalon. Kuwi para anak sing lair sangka Bitya, anaké wadon Parao sing dikèkké marang Mered dadi bojoné. Wong wadon kuwi nduwé anak Miryam, Samai, lan Yisbah, bapaké Etemoa. ₁₈Nanging bojoné Mered sing sangka negara Yéhuda, kuwi nduwé anak Yered, bapaké Gedor lan Hèbèr, bapaké Sokho, lan Yekutiel, bapaké Sanoah.

₁₉Para anaké bojoné Hodia, seduluré wadon Naham, ya kuwi Abi-Kéhila, wong Gami, lan Etemoa, wong Maaka.

₂₀Para anaké Simon, ya kuwi: Amnon, Awan, Benhanan lan Tilon. Para anaké Yisei ya kuwi Sohet lan Ben-Sohet.

₂₁Para turunané Sela, anaké Yéhuda, ya kuwi Er, bapaké Leka, lan Lada bapaké Maresa, lan para turunané sing penggawéané nenun bakal mori lenan alus ing Bèt-Asybéa, ₂₂terus Yokim lan para wong Koseba, lan Yoas lan Saraf sing ngwasani Moab lan ing sak terusé terus bali mulih menyang ing Bètléhèm; tyerita-tyerita iki wis mbiyèn. ₂₃Kuwi kabèh pada dadi tukang kendi sing manggon ing Netaim lan Gedera; wong-wong mau pada manggon ing kono lan pada nindakké penggawéan kanggo ratu.

₂₄Para anaké Siméon ya kuwi Nemuèl, Yamin, Yarib, Serah lan Saul; ₂₅wong iki nduwé anak Salum; wong iki nduwé anak Mibsam; wong iki nduwé anak Misma. ₂₆Turunané Misma ya kuwi Hamuel, iki anaké; wong iki nduwé anak Sakur; wong iki nduwé anak Simèi. ₂₇Simèi kuwi anaké lanang ana nembelas, lan sing wadon enem; nanging para seduluré pada ora nduwé anak okèh; turunané iki kabèh tambahé ora okèh kaya turunané Yéhuda. ₂₈Kuwi pada manggon ing Bèrsyéba, Molada, Hasar-Sual, ₂₉Bilha, Ezem, Tolad, ₃₀Bétuèl, Horma, Siklag, ₃₁Bèt-Markabot, Hazar-Susim, Bèt-Biri lan ing Saaraim. Kuwi kuta-kutané nganti tekan Daved dadi ratu. ₃₂Nanging désa-désané ya kuwi; Etam, Ain, Rimon, Tokem lan Asan, kabèhé ana désa lima; ₃₃uga kabèh désané ing sak ubengé pedésan-pedésan kuwi nganti tekan ing Baal. Ya kuwi panggonané sing dadi panggonané lan kuwi pada nduwé turunané déwé-déwé.

₃₄Sak terusé Mesobab, Yamlek, Yosa anaké Amasia, ₃₅Yoèl, Yéhu anaké Yosibya Seruya anaké Asiel, ₃₆Elyoenai, Yaakoba, Yesihaya, Asaya, Adiel, Yesimiel, Benaya, ₃₇Sina anaké Sipei, anaké Alon, anaké Yedaya, anaké Simri, anaké Semaya - ₃₈tunggalané wong-wong iki sing diarani asma-asmané mau pada dadi penggedéné turunané déwé-déwé. Para brayaté pada dadi mundak tambah-tambah. ₃₉Mulané terus pada ngalih nyedaki Gedor, nganti tekan ing wétané legokan, golèk pangonan kanggo wedus-wedusé. ₄₀Pada bisa olèh pangonan sing lemu lan apik; negara kuwi jembar lan tentrem lan kuwat; wong sing pada manggon ing kono sing luwih ndisik kuwi turunané Ham. ₄₁Para wong sing jenengé ketulis iki enggoné mrana waktu jamané Hiskia ratu ing Yéhuda, lan pada ngentèkké tarup-tarupé wong Ham lan wong Meunim sing ketemu ing kono lan terus pada dientèkké; kaya mengkono nganti tekan ing dina iki. Sakwisé mengkono terus pada ngenggoni panggonané wong-wong mau, jalaran ing kono ana panggonan kanggo wedus-wedusé. ₄₂Sak bagéan, tunggalané turunané Siméon, tyatyahé wong 500 pada ngalih menyang ing pegunungan Seir. Sing dadi penggedéné ya kuwi Pélatya, Néaria, Répaya lan Yizhar, para anaké Yisei. ₄₃Turahé wong Amalèk sing pada bisa utyul, dientèkké, terus pada manggon ing kono nganti ing dina iki.