2 Lelakoné Kraton 7

₁Kadung Salomo wis mungkasi pandongané, terus ana geni sing mudun sangka langit sing mangan kurban obongan lan kurban-kurban sing dibelèh nganti entèk, lan omah mau terus kebak karo kamulyané GUSTI. ₂Para imam pada ora bisa mlebu ing griyané GUSTI, awit kamulyané GUSTI ngebeki griyané GUSTI kono. ₃Waktu wong Israèl kabèh pada weruh geni sing mudun lan kamulyané GUSTI sing nutupi omahé Gusti mau, terus pada nyembah ing jogan, praupané tekan ing lemah, terus pada sujut nyembah lan pada mujèké kidung pamuji kanggo GUSTI: “Awit Panjenengané kuwi betyik! Katrésnané kuwi nyata langgeng selawasé.”

₄Salomo lan sak bangsa kabèh terus pada masrahaké kurban sing dibelèh ing ngarepé GUSTI. ₅Kanggo kurban sing dibelèh Salomo masrahaké sapi 22.000 lan wedus 120.000. Kaya mengkono enggoné ratu lan wong sak bangsa kabèh pada ngresmèkké griyané Gusti Allah. ₆Para imam wis pada mapan ing panggonané. Mengkono uga para wong Lèwi ya wis pada tata-tata piranti-piranti musik kanggo ngluhurké GUSTI, ya kuwi piranti-piranti musik sing digawé karo Daved kanggo ngiringi kidung maturkesuwun ngadep marang GUSTI: “Katrésnané kuwi nyata langgeng ing selawasé!” ya kuwi yèn Daved ngongkon supaya pada ngidungké pamuji. Yèn nalika mengkono kuwi para imam pada ngadek ngadep menyang wong-wong mau karo ngunèkké trompèt, nanging wong Israèl pada ngadek kabèh.

₇Salomo terus nyutyèkké tengah-tengahé plataran ing ngarepé griyané GUSTI, awit sakkèhé kurban obongan lan gajihé kurban keslametan pada ditata ing kono, awit mesbèhé tembaga sing digawé karo Salomo ora kamot yèn kanggo kurban obongan lan kurban panganan lan sak okèhé gajihé kurban mau. ₈Ing waktu kuwi uga Salomo nganakké riyaya ngedekké tarup suwéné pitung dina uga wong sak bangsa kabèh, sakwijiné pasamuan sing luwih gedé, wiwit dalan sing mlebu menyang kuta Hamat nganti tekan ing kali Egipte. ₉Ing dina sing kaping wolu pada nganakké kumpulan gedé, awit mentas pada ngriyayakké peresmiané mesbèh suwéné pitung dina lan riyaya ngedekké tarup suwéné pitung dina. ₁₀Ing dina sing kaping telulikur, sasi sing kaping pitu wong kabèh pada dililani mundur mulih menyang ing tarupé karo bungah lan seneng awit sangka katrésnan sing wis dikèkké karo GUSTI marang Daved, marang Salomo, lan marang wong Israèl, umaté.

₁₁Kaya mengkono enggoné Salomo ngrampungké griyané GUSTI lan kratoné ratu lan enggoné wis bisa nindakké samubarang kabèh sing tukul ing sak njeruhné atiné ing bab enggoné gelem nggawé griyané GUSTI lan kratoné.

₁₂Sakwisé mengkono GUSTI ing wayah mbengi ngétok marang Salomo lan ngomong mengkéné: “Pandongamu wis Tak runggokké lan panggonan iki wis Tak pilih kanggo Aku kanggo omah pangurbanan. ₁₃Yèn Aku nutup langit, terus ora ana udan, lan yèn Aku ngongkon marang walang-walang supaya pada mangan pametuné bumi nganti tyutes lan yèn Aku nekakké lelara pès ing sak tengahé umat-Ku, ₁₄nanging umat-Ku sing nyebut Asma-Ku, terus ngasorké awaké, ndedonga lan nggolèki marang praupan-Ku lan terus mratobat ngendek mlakuné sing ala, Aku bakal ngrungokké sangka swarga lan ngapura marang dosané, uga negarané bakal Tak balèkké. ₁₅Saiki mripat-Ku weruh lan ing kuping-Ku ngrungokké pandonga sangka panggonan kéné. ₁₆Griya iki saiki wis Tak pilih lan Tak sutyèkké, supaya asma-Ku tetep ing kono nganti tekan selawasé; mripat-Ku lan ati-Ku tansah bakal ing kono. ₁₇Nanging kowé, yèn mlakumu ing ngarep-Ku kaya Daved, bapakmu lan nindakké apa sing tyotyok karo sakkèhé préntah-Ku marang kowé, lan yèn kowé tetep miturut marang sakkèhé katetepan lan pernatan-Ku, ₁₈Aku bakal nguwatké damparé kratonmu tyotyok karo perjanjian sing wis Tak anakaké karo Daved, bapakmu, uniné: Turunanmu, sing nyekel pemrintahan ing Israèl, bakal ora ana pedoté. ₁₉Nanging yèn kowé pada nyingkur lan ninggal sakkèhé katetepan lan tembung-Ku sing wis Tak wènèhké marang kowé lan terus lunga ngabekti marang allah liyané lan sujut lan nyembah marang kuwi, ₂₀kowé bakal Tak jabut sangka lemah-Ku sing wis Tak wènèhké marang kowé, lan griya sing wis Tak sutyèkké kanggo asma-Ku iki bakal Tak buwang sangka ngarep-Ku lan bakal Tak dadèkké tembungan lan guyonan ing antarané kabèh bangsa, ₂₁uga saben wong sing liwat griya sing banget enggoné diluhurké iki, bakal nggumun lan ngomong: Apa ta sebabé GUSTI nganti nindakké sing mengkéné iki marang negara kéné lan marang griya iki? ₂₂Terus bakal ana sing omong: Awit wong-wong pada ninggal GUSTI, Gusti Allahé para leluhur, sing wis nuntun metu sangka negara Egipte lan pada rumaket marang allah liyané lan sujut lan nyembah marang kuwi lan ngabekti marang kuwi. Ya kuwi sebabé enggoné Panjenengané terus nekakké sak okèhé tyilaka iki marang wong-wong mau.”