Manasé, ratu ing Yéhuda
1Manasé waktu dadi ratu kuwi umuré rolas taun, nanging enggoné dadi ratu ing Yérusalèm lawasé sèket lima taun. Ibuné asmané Hepsibah. 2Manasé nandangi apa sing ala ing ngarepé GUSTI, pada karo penggawé ala sing ditindakké karo para bangsa sing wis dilungakké karo GUSTI sangka ngarepé wong Israèl. 3Puntuk-puntuk pangurbanan sing wis dientèkké karo Hiskia, bapaké, pada didekké menèh; piyambaké nggawé mesbèh mesbèhé kanggo Baal, nggawé retya Asyèra kaya Akab, ratu Israèl lan sujut nyembah marang kabèh suradadu langit lan ngabekti marang kuwi. 4Piyambaké ngedekké mesbèh mesbèhé ing griyané GUSTI, senajan kanggo omahé Gusti kuwi GUSTI wis ngomong: “Aku bakal ndèkèkké asma-Ku ing Yérusalèm!” 5Sak terusé ratu uga ngedekké mesbèh loro kanggo suradadu langit ing lataré Omahé GUSTI. 6Malah piyambaké masrahaké anaké didadèkké kurban ing geni, nandangi ngèlmu ramalan lan pétungan dina, uga seneng nyeluk para préwangan lan para tukang tenung. Akèh sing ditandangi sing ala ing ngarepé GUSTI, terus ndadèkké nesuné ati-Né. 7Piyambaké ndèkèkké retya Asyèra sing digawé ing sak njeruhné griyané Gusti, senajan kanggo griyané Gusti iki GUSTI wis ngomong marang Daved lan marang Salomo, anaké: “Ing griyané Gusti iki, lan ing Yérusalèm, sing wis Tak pilih sangka antarané taleré Israèl, enggon-Ku bakal ndèkèkké asma-Ku tekan sak lawas-lawasé! 8Aku ora bakal nglilani menèh bangsa Israèl digawa metu sangka tanah sing wis Tak wènèhké marang para leluhuré, angger pada tetep nglakoni apa sing wis Tak omongké marang dèwèké lantaran abdi-Ku Moses.” 9Nanging ora pada gelem ngrungokké, pada disasarké karo Manasé, terus pada nglakoni sing ala, ngungkuli para bangsa sing wis pada dientèkké karo GUSTI sangka ngarepé wong Israèl.
10GUSTI terus ngomong lantaran para abdiné, ya kuwi para nabi: 11“Awit Manasé, ratu Yéhuda, wis nglakoni sing ala banget iki, nglakoni ala ngungkuli kabèh penggawéné wong Amori, sing ana sak durungé, lan karo nyembah brahala njalari wong Yéhuda uga terus nandangi dosa, 12mulané mengkéné tembungé GUSTI, Gusti Allahé Israèl: Aku bakal nekakké tyilaka ing Yérusalèm lan ing Yéhuda, terus saben wong sing krungu nganti gembrebek kupingé loro pisan. 13Lan Aku bakal nggèrèt tali kanggo ngukur Yérusalèm pada kaya Samaria lan tali lod pada kaya brayaté Akab; lan Aku bakal ngresiki kaya tyarané wong ngresiki kendi, yèn wis diresiki terus diwalik dikurepké. 14Turahé panduman duwèk-Ku bakal Tak buwang, Tak pasrahké marang ing tangané para mungsuhé, terus dadi rebutan lan dadi wong boyongané kabèh mungsuhé, 15awit wis pada nglakoni apa sing ala ing mripat-Ku lan awit sangka kuwi pada nggawé nesuné ati-Ku, wiwit nalika para leluhuré pada metu sangka negara Egipte nganti tekan ing dina iki.”
16Sak terusé Manasé ngutahké getihé wong sing ora salah nganti bolak-balik, nganti ngebaki Yérusalèm wiwit pojok tekan pojok, kuwi durung kepitung dosa-dosané sing njalari wong Yéhuda terus nglakoni dosa uga, ya kuwi nindakké apa sing ala ing ngarepé GUSTI.
17Sak luwihé sejarahé Manasé, kabèh sing ditandangi lan dosa-dosané sing ditandangi, kuwi kabèh wis ketulis ing kitab sejarahé para ratu ing Yéhuda. 18Manasé terus dililani ngasuh nunggal karo para leluhuré lan terus dikubur ing petamanan palèsé, ing taman Uza. Nanging Amon, anaké, terus dadi ratu nggentèni piyambaké.
Amon, ratu ing Yéhuda
19Waktu Amon dadi ratu kuwi umuré rolikur taun, nanging enggoné dadi ratu ing Yérusalèm suwéné rong taun. Ibuné asma Mesulemet, anaké wadon Harus, sangka Yotba. 20Amon nandangi apa sing ala ing ngarepé GUSTI pada kaya sing ditindakké karo Manasé, bapaké. 21Uripé kaya bapaké mbiyèn, karo ngabekti marang para brahala sing disembah-sembah karo bapaké, lan sujut nyembah marang kuwi. 22Piyambaké ninggalké GUSTI, Gusti Allahé para leluhuré lan uripé ora miturut karepé GUSTI. 23Para pegawéné Amon terus pada nganakké komplotan nglawan piyambaké, ratu dipatèni ing palèsé. 24Nanging sing pada komplotan nglawan marang Amon mau terus pada dipatèni karo rayat ing negara kono. Rayat ing negara kono mau terus pada ngangkat Yosia anaké dadi ratu,, nggentèni piyambaké.
25Sak luwihé sejarahé Amon, apa sing ditindakké, kuwi kabèh wis ketulis ing kitab sejarahé para ratu ing Yéhuda. 26Ratu terus dikubur ing kuburané ing petamanan Uza. Nanging Yosia, anaké, terus dadi ratu nggentèni piyambaké.