2 Para Ratu 9

₁Sak terusé Elisa nyeluk salah sakwijiné nabi lan diomongi: sabukana, nggawaa botol isiné lenga iki lan lungaa menyang Ramot. ₂Yèn wis tekan ing kana, golèkana Yéhu anaké Yosafat anaké Nimsi, terus mlebua, wong kuwi kongkonen ngadek, ninggal kantya-kantyané, terus jaken mlebu ing kamar ing njeruh. ₃Botol isiné lenga iki terus, sokna ing sirahé lan ngomonga: Ngéné tembungé GUSTI: Kowé wis Tak jebati dadi ratu ing Israèl! Sakwisé mengkono bukaken lawangé, terus mlayua aja ndadak lèrèn.

₄Nabi nom kuwi terus budal menyang Ramot in Giléad. ₅Nemoni para penggedé suradadu ijik pada nglumpuk. Wong mau terus ngomong: Duh para penggedé, kula ana paweling kanggo sampéyan! semauré Yéhu: Kanggo sapa ing antarané kita iki? Semauré: Kanggo sampéyan, penggedé suradadu. ₆Yéhu terus ngadek lan mlebu ing njeruh omah. Nabi nom mau terus ngesokké lenga ing sirahé Yéhu lan ngomong: Mengkéné tembungé GUSTI, Gusti Allahé Israèl: Kowé wis Tak jebati dadi ratuné umaté GUSTI, ya kuwi bangsa Israèl. ₇Kowé bakal matèni brayaté Akab lan karo tyara mengkono Aku mbales marang Isebèl getihé para abdi-Ku, para nabi-Ku kuwi, malah getihé sakkèhé abdiné GUSTI. ₈Brayaté Akab kabèh bakal entèk; lan Aku bakal matèni brayaté Akab sing lanang, sing pangkaté duwur lan sing endèk ing Israèl. ₉Lan brayaté Akab bakal Tak dadèkké pada kaya brayaté Yérobéam anaké Nébat lan kaya brayaté Basa anaké Ahia. ₁₀Isebèl bakal dipangan asu ing kebon ing sak njabané Yisreèl lan ora ana wong sing ngubur.” Sakwisé mengkono nabi mau terus mbukak lawang lan mlayu.

₁₁Bareng Yéhu metu nemoni para abdiné ratu, ana sing ngomong: Kepriyé kabaré? Apa sebabé wong édan kuwi nekani sampéyan? Semauré: Sampéyan kabèh wis pada ngerti wongé lan omongané! ₁₂Nanging kabèh terus ngomong:, ngapusi. Hayuk kita pada diomongi! Yéhu terus ngomong: Omongané marang kula mengkéné: Tembungé GUSTI kowé wis Tak jebati dadi ratu ing Israèl. ₁₃Wong okèh mau terus pada njupuk sandangané, dijèrèng ing ngarepé sikilé Yéhu, terus pada ngunèkké trompèt lan surak: Yéhu dadi ratu!

₁₄Kaya mengkono enggoné Yéhu anaké Yosafat anaké Nimsi komplotan nglawan ratu Yoram. Ratu Yoram karo wong Israèl kabèh ijik pada jaga-jaga ing Ramot-Giléad, nglawan ratu Hasaèl, ratu negara Aram. ₁₅Nanging ratu Yoram déwé wis mulih menyang Yisreèl, supaya diobati tatuné awit sangka wong Aram sak njeruhné perang karo ratu Hasaèl, ratu Aram. Yéhu ngomong: “Yèn sampéyan setuju, aja nganti ana wong utyul sangka kuta terus ngekèki weruh bab iki marang Yisreèl.”

₁₆Sakwisé mengkono ratu Yéhu terus numpak kréta lunga menyang Yisreèl, awit ratu Yoram lara ing kono. Uga ratu Ahazia, ratu ing Yéhuda teka nuwèni marang ratu Yoram. ₁₇Waktu suradadu sing njaga panggung ing Yisreèl ngerti suradaduné Yéhu teka, terus ngomong: Kula weruh suradadu sak grombol. Ratu Yoram terus préntah: Miliha suradadu numpak jaran siji, kongkonen metuk lan takon: Apa nggawa kabar slamet? ₁₈Suradadu jaran mau terus budal metuk lan takon: “Mengkéné pitakoné: Apa slamet?” Ngekèki semauré Yéhu: “Slamet? Kuwi duduk urusanmu! Mbalik waé, mèlua aku!” Suradadu sing jaga mau terus ngomongi: “Kongkonan wis teka ing kana, nanging ora mulih.” ₁₉Ratu terus kongkonan suradadu numpak jaran menèh. Bareng wis tekan terus ngomong: Mengkéné pitakoné ratu: Apa iki kabar slamet? Yéhu nyauri, tembungé: Kabar slamet? Kuwi duduk urusanmu! Mbalika, mèlua aku! ₂₀Terus wong sing jaga mau ngabari: Wongé wis tekan ing kana, nanging ora mulih! Malah tyarané nggelak jarané kaya tyarané Yéhu, putuné Nimsi, awit numpak jarané kaya wong édan.

₂₁Bareng mengkono ratu Yoram préntah: Ngrakita kréta! Krétané terus teka. Ratu Yoram ratu Israèl lan ratu Ahazia, ratu Yéhuda pada numpak kréta. Wong loro pada nemoni Yéhu, terus ketemu ing kebon angguré Nabot, wong Yisreèl. ₂₂Waktu ratu Yoram weruh Yéhu, terus takon: Apa iki kabar slamet, hé! Yéhu? Semauré: Kepriyé bisané slamet, yèn terus ibumu Isebèl ijik nglonté lan tukang sihir sing tyatyahé semono okèhé kuwi! ₂₃Ratu Yoram terus arep gelis ngingerké krétané mblayu lan ngomong marang ratu Ahazia: Yéhu goroh, Ahazia! ₂₄Nanging Yéhu terus mentèng gendéwané sak rosané, ratu Yoram dipanah, ing antarané loro pundaké lan tembus ing jantungé, terus ambruk ing krétané. ₂₅Yéhu terus préntah marang, penggedé suradaduné: Angkaten layoné, buwangen ing kebon angguré Nabot, wong Yisreèl kuwi, ngertia, waktu aku lan kowé bebarengan numpak jaran ngetutké Akab, bapaké, GUSTI wis ngomongké marang dèkné bab ukuman iki: ₂₆Tenan Aku mau mbengi wis weruh getihé Nabot lan getihé anak-anaké, mengkono tembungé GUSTI Aku bakal mbales marang kowé ing kebon kéné. Mengkono tembungé GUSTI. Mulané layoné angkaten lan buwangen ing kebon kéné, tyotyok karo tembungé GUSTI.

₂₇Bareng ratu Ahazia, ratu Yéhuda, ngerti sing mengkono kuwi, ya terus mblayu liwat ing dalan sing tekan ing Be-Hagan, nanging terus diuber karo Yéhu lan ngongkon: Kuwi ya panahen! Para suradaduné terus pada ngetyulké panahé marang dèkné ing kréta, nalika ing unggah-unggahan Gur sak tyedaké Yilbiam. Ratu Ahazia terus mblayu nylametké menyang Megido lan mati ing kono. ₂₈Layoné terus diusung karo para abdiné menyang Yérusalèm, terus dikubur ing kuburané déwé, ing sandingé para leluhuré ing kutané Daved. ₂₉Ratu Ahazia kuwi dadi ratu ing Yéhuda ing taun sing kaping sewelas jaman ratu Yoram, anaké ratu Akab.

₃₀Terus Yéhu wis teka ing Yisreèl. Bareng Isebèl krungu bab kuwi, terus tyelakan mripaté, sirahé dipatyaki, terus nginguk ing tyendéla. ₃₁Waktu kuwi Yéhu nalika mlebu ing gapura. Isebèl terus mbengok: Apa slamet, hé Simri, sing matèni ratuné kuwi? ₃₂Yéhu terus ndangak nyawang ing tyendéla mau lan ngomong: Sapa sing ngguyupi aku? Sapa? Bareng ana penggedé kraton loro telu sing pada mandeng marang dèkné, Yéhu terus préntah: ₃₃Jongkrokna mengisor! Isebèl terus dijongkroké mengisor, getihé nganti nyiprati témbok lan jaran, layoné terus diidak-idak. ₃₄Yéhu terus mlebu lan terus mangan lan ngombé. Sakwisé mengkono dèkné ngomong: Wong sing kena bebendu kuwi layoné urusen, terus kuburen, awit kuwi anak ratu. ₃₅Wong-wong terus pada ngubur layoné, nanging dadakan wis ora ana, mung kèri sirahé, sikilé lan èpèk-èpèké tangané. ₃₆Terus pada bali ngabari bab kuwi marang Yéhu. Yéhu ngomong: Pantyèn ya mengkono kuwi tembungé GUSTI sing diomong lantaran nabi Elia, abdiné, sing sangka Tisbé kuwi: “Dagingé Isebèl bakal dipangan asu ing kebon ing sak njabané Yisreèl; ₃₇layoné Isebèl kuwi bakal ing kebon ing sak njabané Yisreèl kaya rabuk ing kebon, lan ora ana wong sing bisa ngarani: Iki Isebèl.”