Yéhèskièl 40

₁Ing taun sing kaping selawé sakwisé kita pada dibuwang ya kuwi ing wiwitan taun, ing tanggal sepuluh sasi kuwi, ing taun sing kaping patbelas sakwisé kuta kuwi dikalahké, ing dina kuwi uga pangwasané GUSTI ngwasani aku, aku digawa ₂menyang negara Israèl ing sak njeruhné wahyuné Gusti Allah lan aku dipapanaké ing gunung sing duwur banget. Ing nduwur kono ing ngarepku ana rupa-rupané kaya kuta. ₃Aku terus digawa mrana. Terus ana sakwijiné wong lanang sing kétok kaya tembaga, tangané nyekel tali lenan lan teken; wong lanang kuwi ngadek ing gapura. ₄Wongé terus ngomong marang aku: “Hé, anaké manungsa, delengen karo tliti, rungokna lan gatèkna sing tenan samubarang kabèh sing bakal tak duduhké marang kowé; awit ya kuwi perluné enggonmu digawa mréné, ya kuwi supaya aku nduduhké kuwi kabèh marang kowé. Kabèh sing kok deleng iki tyeritakna marang turunané Israèl.”

₅Lan ing sak njabané griya ana témboké mubeng ngubengi griya kuwi. Tangané wong lanang mau nyekel teken ukuran, sing dawané nem éluh ing kéné pada karo éluh lumrah luwih sak èpèk-èpèk tangan. Wong lanang mau terus ngukur témboké, kandelé sak teken lan duwuré sak teken.

₆Bareng teka ing gapura sing madep mengétan, terus munggah ing undak-undakané lan ngukur ngarepé gapura ketemu ambané sak teken. ₇Terus ngukur kamar penjagan, dawané sak teken, ambané sak teken, nanging leté kamar penjagan siji lan sijiné ana limang éluh. Ngarepé lawangé gapura ing sisih njeruh, sing tyedak karo kamaré gapura kuwi sak teken. ₈Terus ngukur kamaré gapura: wolung éluh, ₉lan kabèh témboké rong éluh; kamar kuwi ing sisih njeruh. ₁₀Ing sak kiwa-tengené gapura sisih wétan mau ana kamaré penjagan telu-telu sing ukurané pada, nanging tyagaké témbok ing sisih loro-loroné ukurané ya pada. ₁₁Terus ngukur bolongané gapura: ambané sisih njeruh sepuluh éluh lan ambané sisih njaba telulas éluh. ₁₂Pérangané ngarep kamar-kamar penjagan mau sisih kiwa tengen ana témboké let-leté, ambané sak éluh. Nanging ukurané kamar penjagan kuwi malang-mujuré enem éluh. ₁₃Terus ngukur gapura, wiwit payon kamar penjagan sing siji tekan payon mburi kamar penjagan sijiné, ngliwati lawangé let-leté loro-loroné: ambané selawé éluh. ₁₄Kamaré gapura uga diukur: rong puluh éluh; ing sak ubengé kamar kuwi ana platarané. ₁₅Wiwit ngarep gapura njaba nganti tekan kamar sisih njeruh: sèket éluh. ₁₆Ing sak ubengé gapura kuwi ing pérangan njeruh ana tyendéla-tyendélané karo kayu ditumpuk, ya kuwi ing kamar-kamar penjagan lan ing témbok-témboké, mengkono uga ing kamaré gapura. Tyagak-tyagaké témbok karo gambar wit kurma ukir-ukiran.

₁₇Aku terus digawa ing plataran njaba lan ing sak ubengé plataran kono ana kamar-kamaré, gunggungé telung puluh. Lan kamar-kamar kuwi ing sak nduwuré jogan watu. ₁₈Jogan watu kuwi ing sak kiwa-tengené gapura, tyotyok karo dawané gapura. Kuwi jogan watu ing ngisor. ₁₉Ambané plataran mau terus diukur wiwit sangka sisih njeruhné gapura ngisor nganti tekan sisih njabané gapura njeruh: 100 éluh.

Piyambaké terus mlaku ing ngarepku ngalor ₂₀lan ing kono ana gapura sing madep ngalor, ing plataran njaba. Amba-dawané terus diukur. ₂₁Kamaré penjagan telu sisih kéné lan telu sisih kana, tyagak-tyagaké témbok lan kamaré gapura ukurané pada karo gapura kaping pisan: dawané sèket éluh lan ambané selawé éluh. ₂₂Tyendéla-tyendélané, kamaré gapura lan gambar-gambaré wit kurma ukurané uga pada karo gapura sing madep mengétan. Wong bisané munggah mrana ngliwati undak-undakan pitu, nanging kamaré gapura ing sisih njeruh. ₂₃Ing plataran njeruh ana gapurané sing adep-adepan karo gapura lor, kaya gapura wétan; piyambaké terus ngukur wiwit gapura sing siji tekan gapura ngarepé: 100 éluh.

₂₄Sakwisé mengkono aku terus digawa ngidul, ing kono ana gapura sing madep ngidul; kamar-kamaré penjagan, tyagak-tyagaké témboké lan kamar-kamaré gapurané terus diukur, ukurané pada waé karo liyané. ₂₅Ing sak ubengé gapura kono lan ing kamaré gapurané ana tyendéla-tyendélané, sing pada karo liyané; gapura kuwi dawané sèket éluh lan ambané selawé éluh. ₂₆Undak-undakané mrana ana pitu, nanging kamaré gapura ing sisih njeruh. Gapura kuwi ing tyagak-tyagaké témboké, uga ana gambaré wit kurma ukir-ukiran, ing sisih kéné sak uwit ing sisih kana sak uwit. ₂₇Ing pérangané plataran njeruh sisih kidul uga ana gapurané. Piyambaké terus ngukur wiwit gapura sing siji tekan gapura ngarepé ing sisih kidul: 100 éluh.

₂₈Aku terus digawa menyang plataran njeruh ngliwati gapura kidul lan piyambaké terus ngukur gapura kuwi, ukurané pada waé karo liyané. ₂₉Kamar-kamaré penjagan, tyagak-tyagaké témboké lan kamaré gapura ukurané pada waé karo liyané. Ing sak ubengé gapura mau lan ing kamaré gapurané ana tyendéla-tyendélané; dawané gapura kuwi sèket éluh nanging ambané selawé éluh. - ₃₀Ing sak ubengé ana kamar-kamaré, dawané selawé éluh lan ambané limang éluh. - ₃₁Kamaré ing plataran njaba lan ing tyagak-tyagaké témboké ana gambaré wit kurma ukir-ukiran, nanging undak-undakané munggah ana wolu.

₃₂Aku terus digawa menyang plataran njeruh sisih wétan lan piyambaké terus ngukur gapura ing kono, kedadian ukurané pada waé karo liyané. ₃₃Kamar-kamaré penjagan, tyagak-tyagaké témbok lan kamaré gapura ukurané pada waé karo liyané. Ing sak ubengé gapura lan kamaré ana jendélané; gapura kuwi dawané sèket éluh lan ambané selawé éluh. ₃₄Kamaré ing plataran njaba lan ing tyagak-tyagaké témboké ana gambaré wit kurma ukir-ukiran, manggon ing sisih kéné lan ing sisih kanané, nanging undak-undakané munggah ana wolu.

₃₅Aku terus digawa menyang gapura lor, gapura iki terus diukur, kedadian pada waé karo liyané. ₃₆Kamar-kamaré penjagan, tyagak-tyagaké témboké lan kamaré ukurané pada waé karo liyané lan ing sak ubengé ana tyendéla-tyendélané; gapura kuwi dawané sèket éluh, ambané selawé éluh. ₃₇Kamaré ing plataran njaba lan ing tyagak-tyagaké témboké ana gambaré wit kurma ukir-ukiran, ing sisih kéné lan ing sisih kana, nanging undak-undakané munggah ana wolu.

₃₈Ing kono uga ana kamaré siji, sing lawangé ing kamar, kuwi panggonan kanggo ngumbah kurban obongan. ₃₉Ing sak njeruhné kamar kono ing sisih kéné ana méjané loro, kuwi kanggo mbelèh kurban obongan, kurban ngluwari dosa lan kurban denda. ₄₀Ing sisih kiwané kamar sisih njaba ana méjané loro, lan ing sisih tengené kamar kuwi uga ana méjané loro. ₄₁Dadi ing gapura kono ing sisih kiwa lan ing sisih tengené ana méjané papat-papat, kabèhé ana wolu; kuwi kanggo mbelèh kurban. ₄₂Uga ana méjané papat menèh kanggo kurban obongan, sing digawé sangka watu tatahan. Dawané siji setengah éluh, ambané siji setengah éluh lan duwuré sak éluh. Kuwi kanggo ndèkèk piranti mbelèh kurban obongan lan kurban sing dibelèh. ₄₃Ing sak ubengé kamar kono ana tyantèlan-tyantèlané sing dawané sak èpèk-èpèk tangan; lan méja-méja kuwi kanggo nyèlèhké daging kurban.

₄₄Aku terus digawa menyang plataran njeruh, ing kono ana kamaré loro, sing siji ing sandingé gapura lor, madep ngidul, sijiné sandingé gapura kidul, madep ngalor. ₄₅Aku terus diomongi mengkéné: “Kamar sing madep ngidul iki panggonané para imam sing nindakké kuwajipané ing griya sutyi, ₄₆lan kamar sing madep ngalor kuwi panggonané para imam sing nindakké kuwajipané ing mesbèh. Kuwi kabèh turunané Sadok lan ya mung golongan iki sangka tunggalé turunané Lèwi sing dililani tyedak karo GUSTI perlu nganakké pangabekti.” ₄₇Plataran njeruh terus diukur: kuwi pesagi, dawané 100 éluh, ambané uga 100 éluh; mesbèhé ing ngarepé griya sutyi.

₄₈Aku terus digawa menyang kamaré griya sutyi, lan piyambaké terus ngukur tyagak-tyagaké témboké: kandelé ing sisih kéné limang éluh ing sisih kana uga limang éluh, ambané lawangé patbelas éluh, nanging témboké ing sandingé telung éluh. ₄₉Griya sutyi kuwi dawané rong puluh éluh, ambané rolas éluh. Wong sing munggah mrana ngliwati undak-undakan sepuluh lan sak tyedaké tyagaké témbok loro-loroné ana tyagaké menèh loro, ing sisih kéné siji ing sisih kana uga siji.