Yésaya 1

₂Rungokna, hé langit, lan gatèkna, hé bumi,

awit GUSTI ngetokké tembung:

“Aku wis nggedèkké anak-anak lan kuwi wis Tak gulawentah

nanging pada mbruntak marang Aku.

₃Sapi kenal marang sing nduwé

nanging Israèl ora;

kimar weruh marang wadah pakané sing dityepakké karo bendarané,

nanging umat-Ku ora ngerti.”

₄Tyilaka bangsa sing dosa,

golongan sing kabotan duraka

turunané wong ala,

botyah-botyah sing nandangi ora betyik!

Kuwi pada ninggal GUSTI,

pada ngèlèk-èlèk marang sing Maha Sutyi,

Gusti Allahé Israèl,

lan nyingkur Panjenengané.

₅Kowé kepéngin disabeti ing ngendi menèh,

kowé sing pada nambahi bruntakmu?

Sirahé wis lara kabèh,

lan atiné wis dadi lemes kabèh.

₆Wiwit ing tlapakané tekan ing sirah

ora ana sing waras,

abuh lan babak-belur lan tatu anyar,

ora dipijeti lan ora diblebeti,

lan ora dilengani.

₇Negaramu dadi sepi mamring,

kuta-kutamu pada kobong nganti entèk;

pametuné bumimu dipangan karo bangsa liyané ing ngarepmu.

Sepi mamring negara kuwi kaya

diwolak-walik karo bangsa liyané.

₈Putri Sion kèri ijèn,

kaya gubuk ing kebon anggur

kaya tyakruk ing kebon timun

lan kaya kuta sing dikepung.

₉Yèn GUSTI sing ngwasani langit lan bumi

ora ngèrèkké setitik kanggo kita wong sing pada utyul,

kita wis pada kaya Sodom

lan pada kaya Gomora.

₁₀Rungokna tembungé GUSTI,

hé para penggedéné Sodom!

Gatèkna piwulangé Gusti Allah kita,

hé rayat Gomora!

₁₁“Kanggo apa kurbanmu sing okèh kuwi?”

Mengkono tembungé GUSTI: “Aku wis jelèh marang kurban obongan

sing rupa wedus gèmbèl lanang lan marang gajihé pedèt lemu;

getihé sapi lanang lan wedus gèmbèl

lan wedus lanang ora Tak senengi.

₁₂Yèn kowé pada nemoni ing ngarep-Ku

sapa sing njaluk marang kowé,

kowé pada ngidak-idak platarané Griya sutyi-Ku?

₁₃Kowé aja pada masrahaké menèh pisungsungmu sing lamis

awit ambuné nggawé ora seneng-Ku.

Yèn kowé pada ngramèkaké sasi anyar lan sabat

utawa nganakké kumpulan-kumpulan,

Aku ora tahan ngewaské,

awit perayakanmu kuwi kebak sing ala.

₁₄Perayakan-perayakanmu sasi anyar

lan kumpulan-kumpulanmu sing ajek

kuwi Aku sengit ngewaské;

kabèh kuwi dadi momotan kanggo Aku,

Aku wis kesel enggon-Ku nyangga.

₁₅Yèn kowé pada megarké tanganmu perlu ndedonga,

Aku bakal nutupi mripat-Ku,

malah senajan kowé ndedonga bola-bali

Aku ora bakal ngrungokké

awit tanganmu kebak getih.

₁₆Pada wisuha, resikana awakmu,

adohna penggawému sing ala

sangka ngarepé mripat-Ku.

Mandeka enggonmu nggawé sing ala,

₁₇pada blajara nggawé betyik

ngupayaa marang keadilan,

kwasanana wong sing seneng nggawé kereng;

mbélanana wewenangé para botyah lola,

réwangana perkarané para randa!

₁₈Hayuk, kita pada nganakké

perkaran! tembungé GUSTI:

Senajan dosamu abang kaya bolah abang,

bakal dadi putih kaya salju;

senajan rupané abang kaya sumba

bakal pada dadi putih kaya wulu wedus gèmbèl.

₁₉Yèn kowé pada mbangun turut lan gelem ngrungokké,

kowé bakal pada mangan pametuné negara kuwi sing betyik.

₂₀Nanging yèn kowé pada nglawan lan mbruntak

kowé bakal pada dipangan karo pedang.”

Tenan iki tembungé GUSTI.

₂₁Kepriyé iki, nanging kuta sing mbiyèn setia

saiki dadi wong wadon lonté!

Mbiyèn kebak keadilan

lan tansah kanggonan kabeneran,

nanging saiki kebak wong nggawé pepatèn.

₂₂Sak mlakamu wis ora tulèn kaya slaka menèh,

lan anggurmu wis ketyampuran banyu.

₂₃Para penggedému kuwi pada wong mbruntak,

lan pada komplotan karo maling.

Kabèh pada seneng nampa beselan

lan nguber beselan.

Ora pada mbélani wewenangé para botyah lola

lan perkarané para randa

ora ngladèni marang wong-wong mau.

₂₄Mulané mengkéné tembungé Gusti,

GUSTI sing ngwasani langit lan bumi,

sing Mahakwasa, Pangayomané Israèl:

“Lah, Aku bakal nindakké pewales-Ku marang para wong sing nglawan marang Aku

lan nindakké balesan marang para mungsuh-Ku.

₂₅Aku bakal nglawan marang kowé.

Aku bakal murnèkké kowe kaya slaka,

lan bakal nyingkirké kabèh regetanmu.

₂₆Aku bakal mbalèkké para rèktermu kaya mbiyèn

lan para juru pituduhmu kaya ing wiwitan.

Sakwisé mengkono kowé bakal disebut kuta keadilan,

kuta sing setia.”

₂₇Kowé bakal Tak luwari karo pengadilan

lan para wong sing mratobat bakal Tak luwari karo tyara sing bener.

₂₈Nanging para wong sing mbruntak lan para wong sing nglakoni dosa

bakal dientèkké bebarengan

lan para wong sing ninggal GUSTI bakal pada dientèkké.

₂₉Tenan, kowé bakal pada kewirangan awit sangka wit-witan terbantin

sing pada kok senengi,

lan kowé bakal pada kewirangan awit sangka taman-tamané retya

sing pada kok pilih.

₃₀Awit kowé bakal pada kaya wit terbantin

sing alum godongé,

lan kaya kebon sing kekurangan banyu.

₃₁Wong sing rosa terus dadi kaya kapuk

lan penggawéné dadi kaya geni sak pelik;

loro-loroné bakal pada kobong bareng

lan ora ana wong sing bisa nyirep.