Yésaya 5

₁Aku arep nggawé kidung bab katrésnanku,

kidungé katrésnanku bab keboné anggur:

Katrésnanku kuwi nduwé kebon anggur

ing pèrèng-pèrèngé pegunungan sing subur.

₂Kuwi dipatyuli lan watu-watuné dibuwangi,

terus ditanduri wit anggur pilihan;

uga didekké panggungan penjagan ing tengahé kebon mau.

Panjenengané terus nggawé jagongan peresané anggur;

lan ngarep-arep supaya kebon kuwi ngetokké woh anggur sing betyik,

nanging jebul ngetokké woh anggur sing ketyut.

₃Mulané saiki, hé rayaté Yérusalèm,

lan para wong Yéhuda,

pada ngadilana perkaran-Ku karo kebon-Ku anggur kuwi.

₄Apa menèh ta sing kudu ditindakké kanggo kebon-Ku anggur kuwi,

sing durung Tak lakoni?

Aku ngarep-arep supaya ngetokké woh anggur sing betyik,

nyatané mung ngetokké woh anggur sing ketyut?

₅Awit sangka kuwi Aku bakal ngekèki weruh marang kowé,

apa sing bakal Tak tibakké ing kebon-Ku anggur kuwi:

Aku bakal negori pageré eri,

terus kebon kuwi entèk dipangan,

lan témboké bakal Tak embrukké

terus kebon kuwi diidak-idak.

₆Bakal Tak gawé supaya tukul karo rerungkutan,

ora dipaprasi lan ora dibabati,

terus tukul eri lan suket;

Aku bakal préntah marang mendung,

supaya aja ngedunké udan ing kebon kuwi.

₇Awit keboné anggur GUSTI, Gusti sing ngwasani langit lan bumi

kuwi turunané Israèl,

lan para wong Yéhuda

kuwi tanduran sing disenengi Gusti;

sing diarep-arep keadilan,

nanging sing ana mung nindakké penggawé duraka,

sing dientèn-entèni kabeneran

nanging sing ana mung brangasan.

₈Tyilaka wong sing nyrobot omah siji lan sijiné

lan sing ngrebut kebon siji lan sijiné,

nganti ora ana panggonan menèh kanggo wong liyané

lan mung kowé déwé sing manggon ing negara kono!

₉Kupingku krungu tembungé GUSTI sing ngwasani langit lan bumi:

“Lah, bakal okèh omah sing dadi sepi mamring;

omah sing gedé-gedé lan sing apik-apik

bakal ora ana sing ngenggoni.

₁₀Awit kebon anggur sing ambané telung hèktar,

pametuné anggur mung sak bat;

lan wiji sak homèr

pametuné gandum mung sak éfa.”

₁₁Tyilaka para wong sing tangi ésuk

lan terus golèk ombèn sing marakké mendem,

lan jagongan nganti ing wayah mbengi,

karo ngangetké awaké karo anggur!

₁₂Kitar lan harep, terbangan lan sulingan,

uga anggur ketemu ing jagongané wong-wong mau,

nanging ora pada nggatèkké marang apa sing ditindakké GUSTI,

lan ora nliti marang penggawéané Gusti.

₁₃Mulané umat-Ku bakal digawa ing pembuwangan

awit ora ngerti apa-apa;

wong sing mulya bakal pada mati kaliren,

lan wong okèh bakal pada ngelak.

₁₄Awit sangka kuwi ndonyané wong mati bakal mangapké gorokané amba banget

lan bakal mangapké tyangkemé tanpa wates,

terus sak kabèhé kamulyan lan keraméané Yérusalèm,

sak kabèhé swara ora nggenah lan para wong sing sukak-sukak ing kuta kono bakal pada entèk ambles.

₁₅Manungsa terus bakal didingklukké,

lan wong bakal diasorké,

para wong gemunggung uga diasorké.

₁₆Nanging GUSTI sing ngwasani langit lan bumi bakal ngétokké kaluhuran-Né ing sak njeruhné keadilan-Né,

lan Gusti Allah sing Mahasutyi

bakal ngétokké kesutyiané ing sak njeruhné kebeneran-Né.

₁₇Wedus gèmbèl bakal pada nyenggut suket ing kono kaya ing pangonané déwé

lan tyempé bakal pada golèk pangan ing jugrukané

gedong-gedongé wong sugih.

₁₈Tyilaka para wong sing mantying kesalahan karo taliné tindak duraka

lan dosa kaya nganggo tali-taliné grobak,

₁₉sing ngomong: “Gusti Allah bèn gelis-gelis

lan gelis-gelis nindakké penggawéané,

supaya kita pada weruh;

lan putusané sing Mahasutyi,

Gusti Allahé Israèl,

bèn teka nyedak,

supaya kita pada weruh.”

₂₀Tyilaka para wong sing ngarani barang ala kuwi betyik

lan kabetyikan kuwi ala,

sing ngowahi pepeteng dadi pepadang

lan pepadang dadi pepeteng,

sing ngowahi pait dadi legi,

lan legi dadi pait.

₂₁Tyilaka para wong sing nganggep awaké déwé wityaksana,

lan nganggep awaké déwé pinter!

₂₂Tyilaka para wong sing dadi jago ngombé ombèn sing nggawé mendem

sing dadi pemenang ing bab nyampur ombèn sing nggawé mendem;

₂₃sing mbenerké wong duraka awit dibeseli

lan sing nyélaki wewenangé wong bener.

₂₄Awit kuwi kaya ilat geni sing ngobong damèn,

lan kaya suket garing sing entèk karo geni,

kaya mengkono oyot-oyoté bakal dadi bosok,

lan kuntyupé bakal mawut kaya awu,

awit wong-wong mau wis pada nampik

piwulangé GUSTI sing ngwasani langit lan bumi

lan nyepèlèkké marang tembungé sing Mahasutyi, Gusti Allahé Israèl.

₂₅Mulané benduné GUSTI terus nyerang marang umaté,

diatyungké tangan-Né lan terus digebuk;

gunung-gunung bakal geter, layon-layoné wong-wong mau

bakal kaya reget ing tengah dalan.

Nanging senajan kuwi kabèh wis kelakon, nesu-Né durung mandek

lan tangan-Né ijik diatyungké.

₂₆Panjenengané bakal nglèbèt-nglèbètké gendéra marang bangsa sing adoh,

lan bakal singsot nyeluk wong-wong kuwi sangka tapel watesé bumi;

kuwi tenan wis bakal teka gelis-gelis!

₂₇Tunggalé ora ana sing kesel lan ora ana sing kesandung,

ora pada ngantuk utawa keturon,

ora ana sing utyul sabuké,

ora ana sing pedot taliné sepatuné;

₂₈panahé pada dilandepké

lan sak kabèhé gendéwané pada dipentèng;

tratyaké jarané atosé kaya watu geni

lan glindingané krétané kaya lésus.

₂₉Nggeroné kaya singa wédok,

pada nggeruh kaya singa nom;

pada nggereng-nggereng terus ndekep pangané,

terus digondol mblayu lan ora ana sing nylametaké.

₃₀Ing dina kuwi wong-wong mau bakal pada ditekani

karo swara kaya gumlegeré segara.

Yèn wong nyawang ing bumi,

lah ing kono ana pepeteng sing ngrupeki,

lan pepadang dadi peteng awit sangka mendung!