Wulang Bebasan 1

₂kanggo ngekèki kawityaksanan lan piwulang,

supaya ngerti marang tembung-tembung sing ana tegesé,

₃kanggo nampani piwulang sing ndadèkké pinter,

bener, adil lan jujur,

₄kanggo ngekèki kepinteran marang wong sing ora nduwé pengalaman,

kaweruh lan kawityaksanan marang wong enom.

₅Wong sing wityaksana, betyik rungokna, supaya tambah kaweruh,

lan wong sing nduwé pangertèn supaya olèh perkara-perkara sing kena kanggo tetimbangan,

₆kanggo mengertèni isiné wulang bebasan lan plambang,

uga tetembungan lan bedèkané sangka para wong wityaksana.

₇Wedi lan ngajèni marang GUSTI kuwi wiwitané kawityaksanan,

nanging wong bodo pada ngrèmèhké kawityaksanan lan piwulang.

₈Hé anakku, rungokna marang gulawentahé bapakmu,

lan aja ninggal piwulangé ibumu;

₉awit ontyèn-ontyèn kembang sing apik kuwi kanggo sirahmu,

lan kalung kanggo gulumu.

₁₀Hé anakku, yèn kowé dibujuk karo wong dosa,

kowé aja nuruti;

₁₁yèn wongé pada nduwé tembung:

“Mèlua kita, hayuk pada ngutahké getih,

ngindik marang wong sing ora salah, karo tanpa sebab;

₁₂hayuk kuwi pada diuntal uripan, kaya ndonyané wong mati,

diuntal pisan kaya wong mati sing diuntal kuburan;

₁₃nganti kita pada olèh barang rupa-rupa sing okèh ajiné,

pada bisa ngebaki omah kita karo barang rampasan,

₁₄bagéanmu ditambahké marang kita,

kantong siji kanggo kita kabèh.”

₁₅Hé anakku, uripmu aja niru mlakuné wong-wong mau,

sikilmu adohna sangka dalané;

₁₆awit sikilé wong kuwi gelis nuju memala,

lan gelis yèn arep ngutahké getih.

₁₇Awit tanpa guna masang jaring

ing ngarepé manuk;

₁₈nanging wong ala mau pada ngadang marang getihé déwé

lan nyilakani nyawané déwé.

₁₉Kaya mengkono mlakuné saben wong murka nggolèk rejeki nganggo tyara peteng,

bakal ngrebut nyawané wong kuwi déwé.

₂₀Kawityaksanan mbengok banter ing dalan-dalan,

lan nyuwara ing lapangan,

₂₁enggoné mbengok ing enggokan dalan-dalan sing ramé,

ing ngarepé gapurané kuta enggoné ngetokké tembung-tembungé.

₂₂“Hé wong sing ora nduwé pengalaman, nganti pira suwéné,

enggonmu ijik nyenengi kahananmu kuwi,

tukang moyok enggoné seneng memoyok

lan wong bodo enggoné sengit marang kaweruh?

₂₃Pada madepa marang pamelèhku lan aku arep ngesokké rohku

lan ngekèki weruh bab tembungku marang kowé.

₂₄Awit kowé nulak waktu tak undang,

lan ora ana wong sing ngrèwès waktu aku ngelungké tanganku,

₂₅malah kowé pada nyepèlèkké pituturku

lan ora gelem nampani pepélingku,

₂₆mulané aku ya bakal nggeguyu tyilakamu,

lan nyokoraké yèn kowé katekan sing nggegirisi,

₂₇yèn kowé katekan sing nggegirisi kaya lésus,

lan katekan ing bilai kaya lésus,

lan katekan kangèlan lan kasusahan.

₂₈Ing kono bakal pada sambat marang aku, nanging ora bakal tak sauri,

senajan temen-temen enggoné pada nggolèki aku, nanging ora bisa ketemu.

₂₉Awit pada sengit marang kaweruh lan ora milih wedi lan ngajèni marang GUSTI,

₃₀pada emoh nampani pituturku,

lan pada nampik marang sak kabèhé pamelèhku,

₃₁mulané bakal pada mangan paité wohé penggawéané,

lan pada warek karo rantyamané déwé.

₃₂Awit wong sing tanpa pengalaman kuwi bakal dipatèni awit wangkoté;

lan wong bodo bakal dientèkké karo sembranané.

₃₃Nanging sapa sing nggugu marang aku, kuwi bakal manggon aman,

dipageri sangka tyilaka sing nggegirisi.”