Wulang Bebasan 2

₁Hé anakku, yèn kowé nampani tembung-tembungku,

lan nyimpen préntah-préntahku ing atimu,

₂nganti kupingmu nggatèkké marang kawityaksanan,

lan atimu kok adepaké marang kapinteran,

₃lan yèn kowé njaluk tulung marang pangertèn,

lan nujukké swaramu marang kapinteran,

₄yèn kuwi kok upaya kaya nggolèk slaka,

lan kok uber kaya nguber banda kependem,

₅kowé terus bakal nemu pangertèn bab wedi lan ngajèni marang GUSTI

lan olèh kaweruh bab Gusti Allah.

₆Awit GUSTI sing ngekèki kawityaksanan,

sangka tutuké Gusti metu kaweruh lan kapinteran.

₇Panjenengané nyepakké pitulungan marang wong sing jujur,

Panjenengané kuwi dadi tamèngé para wong sing mlakuné tanpa tyiri

₈Panjenengané njaga mlakuné keadilan,

lan njaga mlakuné para duwèk-E ya kuwi wong sing pada setia.

₉Mengkono dadiné kowé bakal ngerti bab kabeneran, keadilan,

lan kejujuran, malah sak wernané dalan sing betyik.

₁₀Awit kawityaksanan bakal mlebu ing atimu

lan kaweruh kuwi bakal maremké nyawamu;

₁₁kaweruh bakal njaga kowé,

lan pangertèn bakal ngrumati kowé,

₁₂supaya kowé didohké sangka dalan sing ala,

sangka wong sing ngomong goroh;

₁₃sangka wong sing pada ninggal dalan sing lurus

lan mlaku ing dalan sing peteng;

₁₄sing seneng nindakké memala,

lan surak-surak awit sangka durakané;

₁₅sing ménggak-ménggok mlakuné

lan sing keblinger tumindaké;

₁₆uga menèh supaya kowé utyul sangka wong wadon lonté,

sing lunyu tembung-tembungé,

₁₇sing ninggal bojoné sing pisanan,

lan lali marang perjanjiané Gusti Allah;

₁₈sakjané omahé ilang ambles ing njeruhné pati,

lan dalané nuju ing panggoné roh-roh peteng.

₁₉Sapa sing marani wong kuwi, ora bisa bali,

lan ora bisa tekan ing dalané urip.

₂₀Mulané mlakua ing dalané wong sing betyik,

nirua mlakuné wong bener.

₂₁Awit wong jujur sing bakal pada ngenggoni negara,

lan para wong sing tanpa tyiri bakal pada tetep manggon ing kono,

₂₂nanging para wong ala bakal pada dientèkké sangka negara kuwi,

lan wong sing laku goroh bakal pada dibuwang sangka kono.