Wulang Bebasan 19

₁Luwih apik wong mlarat sing kelakuané resik,

tenimbangané karo wong goroh lambéné lan bodo.

₂Tanpa kaweruh kesregepan uga ora maédahi,

lan sing kesusu kuwi bakal kliru jangkahé.

₃Kabodoané wong nasarké mlakuné,

terus bingung atiné marang GUSTI.

₄Kasugihan ngekèki kantya okèh,

nanging wong mlarat, ditinggal kantyané.

₅Seksi goroh mesti bakal nampani paukuman,

lan wong sing ngutyapké goroh ora bakal utyul sangka paukuman.

₆Akèh sing ngupaya ngrogoh atiné wong sing penting,

lan saben wong kepéngin dadi kantyané wong sing seneng pawèh.

₇Wong mlarat kuwi disengiti karo seduluré kabèh,

apa menèh kantyané, mesti pada ngedohi,

diuyak karo dityeluki,

nanging wongé wis pada ora kétok.

₈Sapa sing kanggonan kepinteran, kuwi nrésnani awaké déwé,

sing nggunakké kaweruh, bakal nemu beja.

₉Seksi goroh mesti bakal nampani paukuman,

lan sing ngutyapké goroh bakal entèk.

₁₀Wong bodo ora pantes olèh urip kepénak,

apa menèh batur ora pantes mréntah para penggedéné.

₁₁Kapinteran njalari wong sabar banget,

lan dipuji awit ngapura wong sing salah.

₁₂Nesuné ratu kuwi kaya nggeruhné singa enom,

nanging kabetyikan kuwi kaya ebun sing tiba ing suketan.

₁₃Anak sing bodo kuwi dadi tyilakané bapaké,

paduné wong wadon kuwi kaya trotyohé payon sing tanpa mandek.

₁₄Omah lan banda kuwi warisan sangka leluhuré,

nanging bojo wadon sing pinter kuwi pawèhé GUSTI.

₁₅Males kuwi ndadèkké turu kepati,

nanging wong wegahan bakal ngalami ngelih.

₁₆Wong sing netepi pepakon, kuwi njaga nyawané,

nanging sing ngrèmèhké tembungé Gusti, bakal mati.

₁₇Sapa sing melasi marang wong sing ringkih, kuwi ngutangi marang GUSTI,

Panjenengané sing bakal mbales penggawéné kuwi.

₁₈Anakmu rangkèten sak suwéné ijik ana pengarep-arep,

nanging aja nganti ndadèkké patiné.

₁₉Wong sing gelis banget nesuné, bakal kena denda,

awit yèn kowé njajal arep nulungi, malah tambah nesuné.

₂₀Ngrungokna pitutur lan nampanana piwulang,

supaya kowé mbésuk bisa dadi wityaksana.

₂₁Atiné wong ngrantyam-ngrantyam perkara okèh,

nanging putusané GUSTI kuwi sing bakal kelakon.

₂₂Watek sing dikepéngini kanggo wong kuwi kasetian,

luwih betyik wong mlarat tenimbangané karo wong sing ngapusi.

₂₃Wedi lan ngajèni marang GUSTI ngekèki urip,

wong terus bakal turu karo seneng ora bakal katekan karo tyilaka.

₂₄Wong males nyelupké tangané ing mangkok,

nanging ora mbalèkké ing tutuké.

₂₅Yèn wong seneng memoyok kok sabet, banjur wong sing tanpa pengalaman bakal dadi wityaksana,

yèn wong karo pikiran kok welèhké, bakal ngrumangsani.

₂₆Anak sing nglarani bapaké utawa nundung ibuné,

kuwi ngèlèkké lan mirang-mirangké awaké déwé.

₂₇Hé anakku, aja ngrungokké piwulang menèh,

yèn kowé ya nyimpangi pitutur sing ngekèki kaweruh.

₂₈Seksi sing ora ana gunané kuwi ngrèmèhké angger-angger,

lan tutuké wong duraka nguntal goroh.

₂₉Wong memoyok dityepaki paukuman,

lan gegeré wong bodo dityepaki gepuk.