Masmur 41

₂Rahayu wong sing nggatèkké marang wong sing ringkih!

Wong kuwi bakal ditulungi GUSTI ing waktu ngalami sangsara.

₃GUSTI bakal ngayomi lan ngrumati nyawané,

nganti diarani wong beja ing bumi;

Panjenengan ora bakal nglilani dèwèké dienggo dolanan karo mungsuhé!

₄Yèn ngalami lara, diréwangi karo GUSTI ing peturoné,

Panjenengan maraské larané babar pisan.

₅Kanggo aku, omonganku mengkéné: “Duh GUSTI kula supaya Panjenengan welasi,

kula supaya Panjenengan waraské, awit enggèn kula nggawé dosa kuwi marang Panjenengan.”

₆Mungsuhku pada nyatur aku ala:

“Mbésuk kapan matiné wong kuwi, lan entèkké jenengé?”

₇Wong sing tilik aku, rembukané goroh:

atiné kebak sing ala,

bareng metu kuwi diomong-omongké.

₈Kabèh wong sing sengit marang aku pada bisik-bisikan bab aku,

pada ngrantyam sing ala marang aku:

₉“Wong kuwi wis ngalami lara sing ndrawasi,

enggoné ngglétak ora bakal bisa tangi menèh.”

₁₀Uga kantyaku sing tak pertyaya,

sing mangan bebarengan karo aku,

kuwi uga ngetungké tungkaké marang aku.

₁₁Nanging Panjenengan duh GUSTI, supaya gelem melasi kula lan jejekké kula,

kula terus bakal mbales marang wong-wong kuwi.

₁₂Awit sangka mengkéné kula ngerti, yèn Panjenengan seneng marang kula,

kuwi menawa ora dadi dalané satru kula terus surak-surak.

₁₃Nanging kula, Panjenengan bopong kula, awit sangka temen kula,

lan Panjenengan jejekké ing ngarepé Panjenengan

ing sak lawas-lawasé.

₁₄Pinujia GUSTI, Gusti Allahé Israèl,

wiwit ing kelanggengan tekan ing kelanggengan!

Amin, Amin.