Masmur 46
Gusti Allah kuta bèntèng kita
1Kanggo juru penyanyi. Sangka turunané Korah. Kidungé: Wong wadon nom. Kidungan.
2Gusti Allah kuwi dadi panggonan pengayoman lan karosan kita,
nyata banget enggoné mitulungi sak njeruhné kangèlan.
3Mulané kita ora bakal giris, senajan bumi nganti ngalih panggonané,
lan gunung-gunung pada gonjing ing telengé segara;
4senajan ombaké lan banyuné muntuk,
lan senajan gunung pada horek awit sangka molak-maliké ombak. Sela
5Ana kali sing iliné mbungahké kutané Gusti Allah,
omahé sing Mahaluhur.
6Gusti Allah ing kono, mulané ora bakal gonjang-ganjing,
lan bakal dipitulungi karo Gusti Allah ing wayah ésuk.
7Para bangsa pada gègèr, kabèh kraton pada gonjing,
Panjenengané ngetokké swarané, bumi nganti ajur mumur.
8GUSTI sing ngwasani langit lan bumi nunggal karo kita,
Gusti Allahé Yakub kuwi dadi bèntèng kita. Sela
9Pada lungaa, sawangen penggawéané GUSTI,
sing nganakké pangrusakan ing bumi,
10sing ngendek peperangan nganti tekan pungkasané bumi,
sing nugel gendéwa lan ngentulké tumbak,
sing ngobongi kréta perang karo geni.
11“Menenga lan ngertia, yèn Aku iki Gusti Allah!
Aku diluhurké ing tengahé para bangsa,
diluhurké ing bumi!”
12GUSTI sing ngwasani langit lan bumi nunggal karo kita,
Gusti Allahé Yakub kuwi bèntèng kita. Sela