Masmur 64

₂Duh Gusti Allah, Panjenengan supaya gelem ngrungokké swarané sambat kula,

nyawa kula supaya Panjenengan rumat yèn ana satru sing medèni.

₃Panjenengan supaya ngaling-alingi kula yèn ana wong ala sing pada komplotan,

lan rerusuh sing dianakké karo para wong sing nandangi duraka,

₄sing nglandepké ilaté kaya pedang,

lan sing ngetyulaké tembung sengak kaya panah,

₅sing dityulké marang wong bener sangka delikan,

dadakan panahé ditantyepké tanpa wedi-wedi.

₆Pada nékat nindakké duraka,

pada rembukan masang jiret ing delikan,

lan ngomong: “Sapa sing weruh?”

₇Pada ngréka-ngréka tumindak ora jujur:

“Aku wis pada siap, rantyamané wis mateng.”

Tenan jeruné batin lan atiné wong kuwi!

₈Nanging Gusti Allah ngetyulké panah marang wong-wong kuwi;

dadakan pada ketaton.

₉Pada ditibakké karo Gusti Allah awit sangka ilaté déwé;

kabèh wong sing nyawang pada gèdèk-gèdèk.

₁₀Wong kabèh pada wedi lan terus nyritakké penggawéané Gusti Allah,

karo ngakoni penggawéané.

₁₁Wong bener bakal pada bungah, awit pangrumaté GUSTI,

lan wong sing ndelik marang Panjenengané;

kabèh wong sing jujur bakal pada memuji-mujia.