Masmur 63

₂Duh Gusti Allah, Panjenengan kuwi Gusti Allah kula, kula nggolèki Panjenengan,

nyawa kula ngelak marang Panjenengan;

daging kula kangen marang Panjenengan;

kaya lemah sing garing lan gundul, kesatan banyu.

₃Kaya mengkono enggèn kula ndangak marang Panjenengan ing panggonan sutyi,

karo nyawang marang karosan lan kamulyan Panjenengan.

₄Awit kawelasan Panjenengan luwih apik tenimbangané urip;

lambé kula bakal memuji asma Panjenengan.

₅Ya mengkono kuwi enggèn kula bakal ngluhurké Panjenengan sak lawasé kula urip,

ngumbulké tangan kula awit sangka asma Panjenengan.

₆Nyawa kula kaya warek karo gajih lan sungsum,

karo lambé sing surak-surak

tutuk kula masrahké pamuji.

₇Yèn kula ing ambèn kèlingan marang Panjenengan,

sewengi muput enggèn kula nggagas marang Panjenengan,

₈sakjané Panjenengan wis dadi pitulungan kula,

lan kula bisa surak-surak ing ngisoré swiwi Panjenengan.

₉Nyawa kula rumaket marang Panjenengan,

lan tangan tengen Panjenengan nyekel kula.

₁₀Nanging wong sing pada arep njabut nyawa kula,

pada tiba ing telengé bumi;

₁₁pada bakal dipasrahké ing pangwasané pedang

lan bakal dadi pangané asu alasan.

₁₂Nanging ratu bakal sukak-sukak, awit sangka Gusti Allah;

sapa waé wong sing sumpah ing asmané Gusti Allah, bakal nggunggung asmané Gusti,

awit kabèh wong goroh pada kebungkem tutuké.