Masmur 86

Duh GUSTI, Panjenengan supaya gelem ngrungokké lan gelem nyauri,

awit kula ngalami sangsara lan kasusahan.

₂Nyawa kula supaya Panjenengan rumat, awit Panjenengan trésna marang kula,

Panjenengan supaya gelem ngluwari abdi Panjenengan sing pertyaya marang Panjenengan kuwi.

₃Duh Gusti, Panjenengan kuwi Gusti Allah kula, kula supaya Panjenengan welasi,

awit sedina muput enggèn kula sambat marang Panjenengan.

₄Panjenengan supaya gelem mbungahké nyawané abdi Panjenengan

awit, duh Gusti, nyawa kula teka marang Panjenengan.

₅Awit Panjenengan kuwi apik, duh Gusti, lan seneng ngapura,

apa menèh kawelasan Panjenengan kuwi lubèr

kanggo wong sing sambat marang Panjenengan.

₆Duh GUSTI, Panjenengan supaya gelem ngrungokké pandonga kula,

lan gelem nggatèkké swarané penjaluk kula.

₇Ing dina kangèlan kula, kula sambat marang Panjenengan,

awit Panjenengan gelem nyauri marang kula.

₈Duh Gusti Allah, ing antarané para allah ora ana sing madani Panjenengan,

lan ora ana sing madani penggawéané Panjenengan.

₉Duh Gusti, kabèh bangsa, sing Panjenengan dadèkké,

pada bakal teka sujut nyembah ing ngarepé Panjenengan,

lan bakal ngluhurké asma Panjenengan.

₁₀Awit Panjenengan kuwi gedé lan nindakké mujijat-mujijat;

ya mung Panjenengan déwé kuwi sing dadi Gusti Allah.

₁₁Duh GUSTI, kula supaya Panjenengan duduhké dalan Panjenengan,

supaya mlaku kula manuta, ing kabeneran Panjenengan;

ati kula supaya Panjenengan mantepké supaya wedi-asih marang asma Panjenengan.

₁₂Duh Gusti, Gusti Allah kula, kula bakal masrahké maturkesuwun karo sak kabèhé ati marang Panjenengan

lan ngluhurké asma Panjenengan tekan sak lawas-lawasé;

₁₃awit gedé kawelasan Panjenengan marang kula,

lan nyawa kula wis Panjenengan tulungi sangka ndonyané wong mati sing jeru déwé.

₁₄Duh Gusti Allah, wong sing sombong pada ngadek nyerang kula,

lan grombolané wong gemunggung pada arep njabut nyawa kula,

lan ora perduli marang Panjenengan.

₁₅Nanging Panjenengan kuwi, duh Gusti, Gusti Allah sing kebak welas asih lan trésna,

gedé kesabarané Panjenengan lan lubèr kawelasan lan kasetian Panjenengan.

₁₆Kula supaya Panjenengan delok lan dikèki kawelasan,

abdi Panjenengan supaya Panjenengan kèki karosan Panjenengan,

anak lanangé Panjenengan supaya diluwarana.

₁₇Kula supaya Panjenengan kèki tanda sing apik,

supaya para satru kula pada ngerti karo kisinan,

yèn Panjenengan duh GUSTI, wis ngekèki pitulungan lan panglipuran marang kula.