Masmur 99

₁GUSTI kuwi Ratu, para bangsa terus pada gemeter,

Panjenengané njagong ing kerup,

bumi terus gonjang-ganjing!

₂GUSTI kuwi Mahaluhur ing Sion,

luhuré ngungkuli kabèh bangsa.

₃Ya bèn pada ngidungké maturkesuwun marang asma Panjenengan sing gedé lan ngidap-idapi kuwi.

Panjenengané kuwi sutyi!

₄Ratu sing kuwat, sing seneng marang angger-angger,

Panjenengan sing njejekké kabeneran,

angger-angger lan keadilan ing antarané turunané Yakub,

Panjenengan sing nindakké.

₅Diluhurna GUSTI, Gusti Allah kita,

lan pada sujuta nyembaha ing ngarepé antyik-antyiké sikilé Gusti,

Panjenengané kuwi sutyi!

₆Moses lan imam Harun kuwi tunggalé para imamé,

lan Samuèl kuwi tunggalé sing pada nyebut asmané,

kuwi pada nyebut asmané GUSTI, terus disauri.

₇Pada diomongi sangka tugu mega,

kabèh wis pada netepi pepélingé lan pernatan sing dikèkké.

₈Duh GUSTI, Gusti Allah kita, Panjenengan wis nyauri marang wong iki kabèh.

Panjenengan kuwi Gusti Allah, sing seneng ngapura marang para wong kuwi,

nanging uga ngekèki balesan marang penggawéané.

₉Pada ngluhurna GUSTI, Gusti Allah kita,

lan pada sujuta nyembaha ing ngarepé gunungé sing sutyi,

awit GUSTI, Gusti Allah kita kuwi sutyi.